Ti Maikadua a Yaay ni Jesucristo

Uppat a pulo nga aldaw kalpasan ti Panagungarna, naguummong da Jesus ken dagiti Apostolna iti Bantay Olibo. Dimtengen ti oras para ken ni Jesus tapno pumanaw iti daga. Naileppasna aminen ti trabaho a nasken nga aramidenna iti dayta a panawen. Nasken nga agsublin Isuna iti Nailangitan nga Amatayo agingga iti panawen ti Maikadua a Yaayna.

Kalpasan ti panangiwanwanna kadagiti Apostolna, immuli iti Jesus iti langit. Bayat ti itatangad dagiti Apostol iti langit, dua nga anghel ti nagtakder iti abayda ket kinunada, “Lallaki a taga Galilea apay nga agtaktakderkayo a kumitkita iti langit? daytoy Jesus a naipangato sadi langit manipud kadakayo, kasta met umayto a kas iti pannakakitayo nga ipapanna sadi langit” (Dagiti Aramid 1:11).

Manipud iti dayta a panawen agingga iti agdama nga aldaw, inur-urayen dagiti pasurot ni Jesucristo ti Maikadua a Yaay.

Inton umay manen ti Jesucristo iti daga, aramidennanto dagiti sumaganad a banag:

1. Dalusannanto ti daga. Inton umay manen ni Jesus, umayto nga addaan bileg ken naindaklan a dayag. Iti dayta a pana-wen madadaelto dagiti nadangkes. Mauramto amin a banag a narugit, ket madalusanto ti daga babaen ti apuy (kitaen iti DkK 101:24–25).

2. Kedngannanto dagiti taona. Inton umay manen ni Jesus, kedngannanto dagiti pagilian ket ilasinnanto dagiti nalinteg manipud kadagiti nadangkes (kitaen iti Mateo 25:31–46; kitaen met iti kapitulo 46 iti daytoy a libro). Insurat ni Juan a Mammaltiing ti maipapan iti daytoy a panangukom: “Nakitak dagiti trono, ken dagiti nagtugaw kadakuada, ket naitalek kadakuada ti panangukom: ket nakitak dagiti kararua dagiti naputolan gapu iti pammaneknek ken Jesus, ken gapu iti sao ti Dios, … ket dagitoy nakipagindeg ken nakipagarida ken Cristo iti sangaribu a tawen.” Dagiti nakitana a nadangkes “saanda a napagbiag agingga a di nalpas ti sangaribu a tawen” (Apocalipsis 20:4–5; kitaen met iti DkK 88:95–98).

3. Umayto a bayabay iti Milenium. Ti Milenium ket panawen ti sangaribu a tawen a panagturay ni Jesus iti daga. Maitayabto dagiti nalinteg a mangsabat ken ni Jesus iti yaayna (kitaen iti DkK 88:96). Iruginto ti yaayna ti panagturay iti milenium. (Kitaen ti kapitulo 45 iti daytoy a libro.)

   Kinuna ni Presidente Brigham Young:

   “Iti Milenium, inton maipasdek ti Pagarian ti Dios iti daga nga addaan iti bileg, dayag ken kinaan-anay, ken magupeden ti naunday unay a panagturay ti kinadangkes, maaddaanto dagiti Santo ti Dios iti gundaway a mangbangon kadagiti temploda, ket iti iseserrek kadagitoy, agbalinda, a kas idi, nga adigi kadagiti templo ti Dios (kitaen iti Apocalipsis 3:12], ket agannongdanto para kadagiti minatayda. Ket makitatayto dagiti gagayyemtayo nga umay, ken nalabit dagiti sumagmamano a naam-ammotayo ditoy. … Ket maaddaantayonto kadagiti paltiing a mangammo kadagiti ammatayo manipud kada Ama Adan ken Ina Eva, ket sumrektayonto kadagiti templo ti Dios ket agannongtayto para kadakuada. Ket [dagiti annak] mailantipdanto kadagiti [nagannak] agingga a maaramid a naan-anay ti linia nga agsubli ken ni Adan, tapno addanto naan-anay a linia ti Priesthood manipud ken ni Adan agingga iti panungpalan” (Teachings of Presidents of the Church: Brigham Young [1997], 333–34).

4. Leppasennanto ti Umuna a Panagungar. Dagiti naaddaan iti pribilehio a rummuar iti panagungar dagiti nalinteg ket bumangondanto manipud kadagiti tanemda. Maitayabdanto a sumabat iti Mangisalakan bayat ti panagbabana manipud iti langit. (Kitaen iti DkK 88:97–98.)

   Kalpasan a bimmangon ni Jesucristo manipud kadagiti natay, nagungar met dagiti dadduma pay a nalinteg a tao a natayen. Nagparangda idiay Jerusalem ken kasta met iti kontinente ti America. (Kitaen iti Mateo 27:52–53; 3 Nephi 23:9–10.) Daytoy ti rugi ti Umuna a Panagungar. Sumagmamano a tao ti nagungaren manipud pay idin. Tawidento amin dagiti nagungaren ken dagiti agungarto iti panawen a yaayna ti gloria ti celestial a pagarian (kitaen iti DkK 76:50–70).

   Kalpasan ti panagungar dagiti agtawidto iti celestial a gloria, sabali pay a grupo ti agungarto: dagiti umawatto iti terestrial a gloria. No nagungar aminen dagitoy a tao, maileppaston ti Umuna a Panagungar.

   Madadaelto iti lasag dagiti nadangkes a sibibiag iti panawen ti Maikadua a Yaay ti Apo. Agurayto dagitoy a kaduada dagiti natayen a nadangkes agingga iti maudi a panagungar. Bumangonto amin dagiti nabati pay a natay tapno sumabat iti Dios. Mabalin a tawidendanto ti telestial a pagarian wenno maibelleng iti adayo a kasipngeten a kaduada ni Satanas (kitaen iti DkK 76:32–33, 81–112).

5. Alaennanto ti umisu a lugarna a kas Ari ti langit ken daga. Inton umay ni Jesus, ipasdeknanto ti gobiernona iti rabaw ti daga. Agbalinto ti Simbaan a paset dayta a pagarian. Iturayannanto amin dagiti tao iti daga iti talna iti uneg ti 1,000 a tawen.

   Idi immuna a yaay ni Jesucristo iti daga, saan nga immay a nadayag. Nayanak iti nanumo a kuadra ken naipaidda iti kulluong ti garami. Saan nga immay a kaduana ti dadakkel a buyot a kas iti ninamnama dagiti Judio iti Mangisalakanda. Ngem ketdi, immay a kunkunana, “Ayatenyo dagiti kabusoryo, … [agaramid iti nasayaat kadagiti manggurgura kadakayo], ken ikararaganyo dagiti mangidadanes kadakayo” (Mateo 5:44). Saan a naawat Isuna ken nailansa iti krus. Ngem saanton a di maawat iti Maikadua a Yaayna, “ta mangngegto ti tunggal lapayag, ket agparintumengto amin a tumeng, ken agpudnonto ti tunggal dila” a ni Jesus isu ti Cristo (DkK 88:104). Makablaawanto a kas “Apo dagiti ap-apo, ken Ari dagiti ar-ari” (Apocalipsis 17:14). Maawaganto iti “Nakaskasdaaw, Mamagbaga, Ti mannakabalin a Dios, Ti agnanayon nga Ama, Ti Prinsipe ti Kappia” (Isaias 9:6).

• Ania dagiti pampanunotmo ken riknam bayat ti panangutobmo kadagiti pasamak ti Maikadua a Yaay?

Idi nayanak ni Jesucristo, manmano ti tao ti nakaammo a dimtengen ti Mangisalakan ti lubong. Inton umay manen Isuna, awanto ti agduadua iti kinasiasinona. Awan ti makaammo iti umisu nga oras a yaayto manen ti Mangisalakan. “Awan ti tao a makaammo iti aldaw ken oras, uray pay dagiti anghel ti langit, ngem ti Amak laeng” (Mateo 24:36; kitaen met iti DkK 49:7).

Nagusar ti Apo iti maysa a pangngarig a mangted kadatayo iti kapanunotan maipapan iti panawen ti yaayna:

“Ita adalenyo ti pangngarig nga agtaud iti kayo nga igos; Inton aguggot ti sangana ken patubbuenna dagiti bulongna, ammoyo a ti tikag asidegen:

“Kasta met nga inton makitayo a maaramid dagitoy a banag, ammuenyo nga isu asidegen kadagiti ruangan” (Marcos 13:28–29).

Inikkannatayo pay ti Apo iti sumagmamano a tanda tapno maammuantayo no asidegen ti yaayna. Kalpasan ti panangipalgakna kadagiti tanda, imballaagna:

“Agsalukagkayo ngarud: ta diyo ammo no ania nga aldaw ti yaayto ti Apoyo. …

“… Addakay met koma a sisasagana: ta inton oras a diyo ipagpagarup toy Anak ti tao umayto” (Mateo 24:42, 44).

Para iti ad-adu pay nga impormasion maipapan iti no kasano a maammuantayo nga asidegen ti Maikadua a Yaay ni Jesus, kitaen ti kapitulo 43 iti daytoy a libro.

Ti kasayaatan a wagas a makapagsaganatayo para iti yaay ti Mangisalakan ket awatentayo dagiti pannursuro ti ebanghelio ket aramidentayo ida a paset ti biagtayo. Nasken nga agbiagtayo iti tunggal aldaw iti kasayaatan a kabaelantayo, a kas iti insuro ni Jesus idi adda Isuna iti daga. Makapangnamnamatayo iti pannarabay ti propeta ken makapagtungpal iti balakadna. Makapagbiagtayo a maikari tapno tarabayennatayo ti Espiritu Santo. Ket urayentayonto ti yaay ti Mangisalakan nga addaan iti ragsak ken saan nga agbuteng. Kinuna ti Apo: “Saankayo nga agbuteng, babassit nga arban, kukuayo ti pagarian agingga nga umayak. Adtoy, umayak a di agtantan. Pudno a kasta. Amen” (DkK 35:27).

• Apay a nasken a maseknantayo maipapan iti panagsaganatayo imbes a ti umisu nga oras ti Maikadua a Yaay?

• Juan 14:2–3; Mateo 26:64 (mangisagana ni Jesus iti lugar ket umayto manen)

• Malakias 3:2–3; 4:1; DkK 64:23–24 (mauramto ti daga)

• DkK 133:41–51 (madadaelto dagiti nadangkes)

• Mateo 13:40–43 (naipadto ti Panangukom)

• 1 Taga Corinto 15:40–42; DkK 76; 88:17–35 (dagiti pagarian ti gloria)

• DkK 43:29–30; 29:11 (ti yaay ti Mangisalakan ti manarabay iti Milenium)

• Pagannurotan ti Pammati 1:10 (agturayto ni Jesus)

• Alma 11:43–44; 40:23 (nailawlawag ti Panagungar)

• DkK 88:96–98 (bumangonto dagiti natay)

• Zacarias 14:9; Apocalipsis 11:15; 1 Nephi 22:24–26 (agturayto ni Jesus a kas Ari)