Dagiti Libro ken Adalen
Kapitulo 2: Ti Nailangitan a Pamiliatayo

Ti Nailangitan a Pamiliatayo

Kapitulo 2

Ladawan
Hubble image of the galaxy

Annaknatayo ti Nailangitan nga Amatayo

  • Ania ti isuro kadatayo dagiti nasantuan a kasuratan ken dagiti propeta iti ud-udina nga aldaw maipapan iti pakainaigantayo iti Dios?

Ti Dios ket saan laeng nga Agturay ken Namarsuatayo; Isu pay ti Nailangitan nga Amatayo. Amin a lallaki ken babbai ket literal nga annak a lallaki ken annak a babbai ti Dios. “Ti tao, kas espiritu, ket pinutot ken inyanak dagiti nailangitan a nagannak, ken pinatanor agingga a nataengan kadagiti agnanayon a mansion ti Ama, sakbay ti yaayna iti daga iti naindagaan [pisikal] a bagi” (Teachings of Presidents of the Church: Joseph F. Smith [1998], 335).

Tunggal tao a nayanak iti daga ket espiritu a kabsattayo. Gapu ta espiritu nga annaknatayo ti Dios, tinawidtayo ti potensial a mangpadur-as kadagiti nadiosan a kababalinna. Babaen ti Pannubbot ni Jesucristo, makapagbalintayo a kas iti Nailangitan nga Amatayo ken maawattayo ti pakabuklan ti rag-o.

  • Kasano a ti pannakammom nga anaknaka ti Dios ket makaimpluensia kadagiti panunot, balikas, ken tignaymo?

Pinadur-astayo dagiti Kinatao ken Talentotayo Bayat ti Pangbiagtayo iti Langit

  • Panunotem maipapan kadagiti talento ken sagut a naiparaburen kenka.

Isuro dagiti nasantuan a kasuratan kadatayo nga insagana dagiti propeta ti bagbagida nga agbalin a dadaulo iti daga idi espirituda pay laeng iti langit (kitaen iti Alma 13:1–3). Sakbay a nayanakda kadagiti mortal a bagi, impasakbay nga inordenan (pinili) ti Dios ida nga agbalin a dadaulo iti daga. Da Jesus, Adan, ken Abraham ti sumagmamano kadagitoy a dadaulo. (Kitaen iti Abraham 3:22–23). Insuro ni Joseph Smith a “tunggal tao nga adda awagna nga agministro kadagiti agindeg ti lubong ket [naipasakbay] a naordenan iti dayta mismo a panggep” (Teachings of Presidents of the Church: Joseph Smith [2007], 511). Nupay kasta, nawaya ti tunggal maysa iti daga nga umawat wenno agkedked iti ania man a gundaway nga agserbi.

Saantayo nga agkakaasping wenno agkakalanga amin idi idiay langit. Kas pagarigan, ammotayo nga annakdatayo dagiti nailangitan a nagannaktayo—lallaki ken babbai (kitaen iti “Ti Kaamaan: Maysa a Waragawag iti Lubong,” Ensign, Nob. 1995, 102). Addaantayo iti agduduma a talento ken kabaelan, ken naawagantayo nga agaramid iti agduduma a banag iti daga. Makasursurotayo iti ad-adu pay maipapan kadagiti “agnanayon a posibilidad” no umawattayo kadagiti bendisiontayo iti kinapatriarka (kitaen iti Thomas S. Monson, iti Conference Report, Okt. 1986, 82; wenno Ensign, Nob. 1986, 66).

Nalipatantayon wenno ditayon malagip pay ti biagtayo idi sakbay daytoy a biag, ngem ammo ti Amatayo iti Langit no asinotayo ken no ania ti inaramidtayo sakbay nga immaytayo ditoy. Pinilina ti oras ken lugar para iti pannakayanak ti tunggal maysa kadatayo tapno masursurotayo dagiti leksion a kasapulantayo mismo ket aramidentayo ti kasayaatan babaen kadagiti bukod a talento ken kinataotayo.

  • Kasano a nabendisionannakan dagiti talento dagiti dadduma a tao? Kasano a nakabendisionen dagiti talento ken sagutmo kadagiti dadduma?

Nangidatag ti Nailangitan nga Amatayo iti maysa a Plano para Kadatayo tapno Agbalin a Kas Kenkuana

  • Kasano a matulongannatayo ti biag iti daga iti panagsaganatayo nga agbalin a kas iti Nailangitan nga Amatayo?

Ammo ti Nailangitan nga Amatayo a saantayo a makapagdur-as iti labes ti agpatingga a tukad malaksid no pumanawtayo Kenkuana iti maysa a panawen. Kayatna a padur-asentayo dagiti kababalin nga adda Kenkuana kas maysa a Dios. Tapno maaramid daytoy, kinasapulan a panawantayo ti pagtaengantayo sakbay daytoy a biag tapno masubok ken tapno makagun-od iti padas. Kinasapulan nga umawat dagiti espiritutayo iti bagi a pisikal [lasag ken dara] a pagnaedan. Kasapulan a panawantayo dagiti pisikal a bagitayo iti ipapatay ken tumipon manen kadagitoy iti Panagungar. Kalpasanna umawattayo kadagiti imortal a bagi kas iti bagi ti Nailangitan nga Amatayo. No malasattayo dagiti pannuboktayo, umawattayo iti pakabuklan ti rag-o nga inawaten ti Nailangitan nga Amatayo. (Kitaen iti DkK 93:30–34.)

Nangawag ti Nailangitan nga Amatayo iti Dakkel a Konseho tapno mangidatag iti planona para iti panagdur-astayo (kitaen iti Teachings of the Presidents of the Church: Joseph Smith, 209, 511). Naammuantayo a no sumurottayo iti planona, agbalintayo a kas Kenkuana. Agungartayonto; maaddaantayonto iti amin a bileg iti langit ken iti daga; agbalintayonto a nailangitan a nagannak ken maaddaan kadagiti espiritu nga annak a kas Kenkuana (kitaen iti DkK 132:19–20).

Naammuantayo a mangipaay Isuna iti daga para kadatayo a pangsubokantayo iti bagbagitayo (kitaen iti Abraham 3:24–26). Lingdan ti belo dagiti lagip ti napalabastayo, ket malipatantayo ti nailangitan a pangtaengantayo. Kasapulan daytoy tapno maaramattayo ti kinawayatayo nga agpili tapno pumili iti nasayaat wenno dakes a saan a maaringan ti lagip ti pannakipagindeg iti Nailangitan nga Amatayo. Iti kasta makapagtungpaltayo Kenkuana gapu iti pammatitayo Kenkuana, saan a gapu iti pannakaammo wenno lagiptayo Kenkuana. Tulongannatayo a mangbigbig iti kinapudno no mangngegantayo manen daytoy iti daga (kitaen iti Juan 18:37).

Iti Dakkel a Konseho naammuantayo pay ti panggep para iti panagdur-astayo: tapno maaddaan iti pakabuklan ti rag-o. Nupay kasta, naammuantayo pay a sumagmamano ti maallilaw, mangpili iti sabali a dalan, ket mapukaw iti dalanda. Naammuantayo a maaddaantayo amin iti pannubok iti biagtayo: panagsakit, pannakaupay, panagsanaang, panangladingit, ken ipapatay. Ngem naawatantayo a maited dagitoy kadatayo nga agpaay a padastayo ken pagimbagantayo (kitaen iti DkK 122:7). No palugodantayo dagiti pannubok, mangpatarnaw kadatayo dagitoy a pannubok imbes a mangparmekda kadatayo. Tulongandatayo a maaddaan iti panagibtur, panaganus, ken panangngaasi (kitaen iti Teachings of Presidents of the Church: Spencer W. Kimball [2006], 15–16).

Iti daytoy a konseho naammuantayo pay a gapu iti pagkapsutantayo, agbasoltayo amin malaksid kadagiti babassit nga ubbing (kitaen iti DkK 29:46–47). Naammuantayo a maipaayto ti maysa a Mangisalakan para kadatayo tapno maparmektayo dagiti basoltayo ken maparmek babaen iti panagungar. Naammuantayo a no mamatitayo Kenkuana, nga agtungpal iti balikasna ken sumurot iti pagwadanna, maitan-oktayo ken agbalintayonto a kas iti Nailangitan nga Amatayo. Umawattayo iti pakabuklan ti rag-o.

  • Ilistam ti sumagmamano a kababalin ti Nailangitan nga Ama. Kasano a tulongannatayo ti plano ti pannakaisalakan a mangpadur-as kadagitoy a kababalin?

Dagiti Mainayon a Nasantuan a Kasuratan