Dagiti Natulagan a Tao ti Apo

• Ania ti katulagan? Apay a maawagan dagiti Santo iti Ud-udina nga Aldaw iti natulagan a tattao?

Manipud idi punganay, nakitulagen ti Apo kadagiti annakna ditoy daga. No makitulag (wenno agkari) dagiti taona Kenkuana, ammoda no ania ti namnamaenna kadakuada ken no ania dagiti bendision a mabalin a namnamaenda Kenkuana. Maipatungpalda a nasaysayaat ti aramidna ditoy daga. Dagiti tao a makitulag iti Apo ken pakitulagan met ti Apo ket maawagan kadagiti natulagan a tao ti Apo. Maibilang dagiti miembro ti Simbaan kadagiti natulagan a tao ti Apo.

Iti ikub ti ebanghelio, ti katulagan ket kaipapananna ti maysa a sagrado a panagtinnulag wenno panagkinnari ti Dios ken ti maysa a tao wenno grupo dagiti tattao. Iti pannakitulag, mangikari ti Dios iti maysa a bendision kas subad iti panagtungpal kadagiti mainumo a bilbilin. Ikeddengna dagiti kondision dagiti katulaganna, ket ipalgakna dagitoy a kondision kadagiti propetana. No pilientayo ti agtungpal kadagiti kondision ti katulagan, umawattayo kadagiti naikari a bendision. No pilientayo ti saan nga agtungal, ibabawina dagiti bendision, ket no dadduma maited pay ti pannusa.

Kas pagarigan, no kumappengtayo iti Simbaan agaramidtayo iti sumagmamano a katulagan iti Dios (kitaen iti kapitulo 20 iti daytoy a libro). Makitulagtayo iti Mangisalakan iti panagbuniag tapno awatentayo iti bagitayo ti naganna. Ikarina a “kas kaadu ti agbabawi ken mabuniagan iti naganko, a ni Jesucristo, ken agibtur agingga iti panungpalan, kastanto met ti maisalakan” (DkK 18:22). Makitulagtayo iti Apo no makiranudtayo iti sakramento (kitaen iti kapitulo 23 iti daytoy a libro). Ikaritayo nga awatentayo ti naganna iti bagbagitayo, manglaglagip kenkuana, ken agtungpal kadagiti bilinna. Maikari kadatayo nga addanto ti Espiritu Santo kadatayo. (Kitaen iti DkK 20:77–79.) No umawattayo kadagiti ordinansa iti templo, agaramidtayo kadagiti dadduma pay a sagrado a katulagan ken maikari kadatayo ti pannakaitan-ok gapu iti napudno a panagtungpal (kitaen iti DkK 132; kitaen met iti kapitulo 47 iti daytoy a libro).

Nagaramid pay ti Apo kadagiti naisangsangayan a katulagan kadagiti mainumo a tao wenno grupo. Nagaramid kadagiti naisangsangayan a katulagan kada Adan, Enoc, Noe, dagiti annak ti Israel, ken ni Lehi (kitaen iti Moises 6:31–36, 52; Genesis 9:9–17; Exodo 19:5–6; 2 Nephi 1). Nagaramid iti naisangsangayan a katulagan ken ni Abraham ken dagiti kaputotanna a mangbendision kadagiti miembro ti Simbaan ken iti amin a nasion ti daga iti agdama.

• Panunotem maipapan kadagiti katulagan nga inaramidmon iti Apo ken dagiti bendision nga inkarina kenka gapu iti panagtulnogmo kadagitoy a bilin.

• Ania ti katulagan ni Abraham?

Nalinteg unay a tao ni Abraham, ti propeta iti Daan a Tulag (kitaen ti ladawan iti daytoy a kapitulo). Nagkedked nga agrukbab kadagiti didiosen ti amana. Tinungpalna dagiti amin a bilin ti Apo. Gapu iti kinalinteg ni Abraham, nakitulag ti Apo kenkuana ken kadagiti kaputotanna.

Inkari ti Apo ken ni Abraham a maaddaanto isuna iti saan a mabilang a kaputotan. Inkarina a maikaridanto amin nga umawat iti ebanghelio, dagiti bendison ti priesthood, ken amin nga ordinansa ti pannakaitan-ok. Babaen iti bileg ti priesthood, isangbayto dagitoy a kaputotan ti ebanghelio iti amin a nasion. Babaen kadakuada, mabendisionanto ti amin a pamilia ti daga (kitaen iti Abraham 2:11). Inkari pay ti Dios a no nalintegda ipasdeknanto ti katulaganna iti amin a kaputotan dagiti annak ni Abraham (kitaen iti Genesis 17:4–8).

• Kasano a mayaplikar kadatayo dagiti bilin ken kari iti katulagan ni Abraham? (Ibilang no kasano a mayaplikar daytoy a saludsod iti nadumaduma a lugar, kas iti pagtaengan, iti pagtrabahuan, iti komunidad, wenno kas misionario.)

• Ania dagiti bendision ken pagrebbengan a sumangbay kadagiti natulagan a tao ti Dios iti agdama?

Saan laeng a dagiti literal a kaputotan ni Abraham dagiti tao nga aw-awagan ti Dios a dagiti natulagan a taona. Iti pannakisaona ken ni Abraham, kinuna ti Dios, “Kas iti kaadu ti umawat iti daytoy nga Ebanghelio ti maawaganto iti naganmo, ket maibilangdanto kadagiti bukelmo [kaputotan], ket bumangondanto ket bendisionandaka, a kas amada” (Abraham 2:10). Ngarud, maibilang ti dua a grupo dagiti tao iti katulagan a naaramid ken ni Abraham: (1) dagiti nalinteg a literal a kaputotan ni Abraham ken (2) dagiti naadaptar iti kaputotanna babaen iti panangawat ken panagbiag iti ebanghelio ni Jesucristo (kitaen iti 2 Nephi 30:2).

No mabuniagantayo iti Simbaan, sumrektayo iti katulagan nga inaramid ti Apo kada Abraham, Isaac, ken Jacob (kitaen iti Taga Galacia 3:26–29). No managtungpaltayo, tawidentayo dagiti bendision dayta a katulagan. Adda karbengantayo nga umawat iti tulong ken pannarabay manipud iti Espiritu Santo. Adda karbengan dagiti maikari a lallaki nga agikut iti priesthood. Mabalin nga awaten dagiti pamilia dagiti bendision ti priesthood. Makagun-odtayo iti agnanayon a biag iti celestial a pagarian. Awanen dagiti nain-indaklan pay a bendision ngem dagitoy.

Karagpin dagitoy a bendision nga aw-awatentayo kas natulagan a tattao ti Apo, addaantayo iti dadakkel a responsibilidad. Inkari ti Apo ken ni Abraham a babaen kadagiti kaputotanna maisangbayto ti ebanghelio iti intero a daga. Ipatpatungpaltayo daytoy a pagrebbengan babaen ti programa iti full-time a misionario ti Simbaan ken ti aramid a misionario dagiti miembro. Daytoy a gundaway a mangikasaba iti ebanghelio iti sangalubongan ket agpaay laeng iti Simbaan ti Apo ken kadagiti natulagan a taona.

Kas natulagan a tao ti Apo, nasken a tungpalentayo dagiti bilinna. Kinuna ti Apo, “Siak, ti Apo, ikarik nga aramidek ti sawek no agtungpalkayo; ngem no diyo tungpalen ti sawek, awan ti kariyo” (DkK 82:10). No supringentayo ti katulagantayo kalpasan ti panangawattayo iti ebanghelio, agbalin ti katulagan nga awan kaes-eskanna ken agtakdertayonto a madusa iti sango ti Dios (kitaen iti DkK 132:4). Kinunana: “Liklikanyo ti agbasol, no saan nadagsen a pangngeddeng ti maituon kadagiti uloyo. Ta isu nga adu a naited adu met ti kasapulan; ket isu a nagbasol iti nabilbileg a lawag umawatto iti nakarkaro a pannakadusa” (DkK 82:2–3).

• Ania ti ikaritayo nga aramiden no awatentayo ti ebanghelio? Ania dagiti bendision nga ited kadatayo ti Nailangitan nga Ama no tungpalentayo dagitoy a kari?

Ti pakabuklan ti ebanghelio ket maawagan iti baro ken agnanayon a katulagan. Iraman daytoy dagiti katulagan a naaramid iti panagbuniag, kabayatan ti sakramento, iti templo, ken iti ania man a sabali pay a kanito. Aw-awagan ti Apo daytoy nga agnanayon gapu ta impasdek daytoy ti maysa nga agnanayon a Dios ken gapu dinto kaano man mabalbaliwan ti katulagan. Intedna daytoy isu met la a katulagan kada Adan, Enoc, Noe, Abraham, ken kadagiti dadduma pay a propeta. Iti daytoy a pannakaawat saan a baro daytoy. Ngem awagan ti Apo daytoy a baro gapu ta tunggal kanito a maisubli ti ebanghelio kalpasan ti pannakaipanawna manipud iti daga, baro daytoy kadagiti tao nga umawat iti daytoy (kitaen iti Jeremias 31:31–34; Ezequiel 37:26).

No awatentayo ti baro ken agnanayon a katulagan, umanamongtayo nga agbabawi, agpabuniag, umawat iti Espiritu Santo, umawat kadagiti endowmenttayo, umawat iti katulagan ti kallaysa iti templo, ken sumurot ken agtungpal ken Cristo agingga iti gibus ti panagbiagtayo. No agtungpaltayo kadagiti katulagantayo, ikari ti Nailangitan nga Amatayo nga awatentayonto ti pannakaitan-ok iti celestial a pagarian (kitaen iti DkK 132:20–24; kitaen met iti kapitulo 47 iti daytoy a libro).

Ti kinaindaklan dayta a kari ket narigat a maawatan dagiti mortal a tao. Agpaay a pagimbagantayo dagiti bilin nga itedna, ken no napudnotayo mabalin nga agnanayon a maparaburantayo kadagiti bendision ken kinangayed ti langit ken daga. Mabalin nga agnaedtayo iti sidongna ket makiranud iti ayat, kaasi, bileg, kinaindaklan, pannakaammo, sirib, gloria, ken dagiti pagturayanna.

• Ania ti pakainaigan dagiti natulagan a tattao ti Apo iti wagas a panagkawes, panagtignay, ken panagtungpaltayo kadagiti bilin ti Dios?

• 1 Pedro 2:9–10 (naidumduma a tattao)

• DkK 54:4–6 (dagiti bunga dagiti natungpal ken nalabsing a katulagan)

• DkK 132:7 (dagiti naaramid a katulagan babaen ti umno a turay)

• DkK 133:57–60 (panggep dagiti katulagan)

• DkK 35:24 (dagiti kari iti panagtungpal kadagiti katulagan)

• Hebreo 8:6 (ni Jesucristo ti mangibabaet iti nasaysayaat a katulagan)

• Pangiwanwan iti Nasantuan a Kasuratan, “Katulagan,” panid 97