Kinapudno

• Ania ngata ti langa ti kagimongan no naan-anay a napudno ti amin?

Kuna ti maika-13 a pagannurotan ti pammati, “Mamatikami iti kinapudno.” Isalaysay kadatayo ti Libro ni Mormon ti maipapan iti maysa a grupo dagiti tao a “naam-ammo babaen iti kinareggetda iti Dios, ken kasta met iti tattao; ta awan ti pagkurangan ti kinapudnoda ken nalintegda iti amin a banag; ken natibker ti pammatida ken ni Cristo, agingga iti panungpalan” (Alma 27:27). Gapu iti kinapudnoda, dagitoy a tao ket binigbig dagiti padada a tao ken ti Dios. Nasken a masursuro no ania ti kinapudno, no kasano a masulisogtayo nga agulbod, ken no kasano a maparmektayo daytoy a pannulisog.

Kasapulan ti naan-anay a kinapudno para iti pannakaisalakantayo. Kinuna ni Presidente Brigham Young, “No awatentayo ti pannakaisalakan babaen dagiti kondision a naidiaya kadatayo, nasken nga agbalintayo a napudno iti tunggal panunot, kadagiti panagiladawantayo, kadagiti panagutobtayo, kadagiti pribado nga ummongtayo, kadagiti pannakikaduatayo, kadagiti palawagtayo, ken iti tunggal tignay ti panangbiagtayo” (Teachings of Presidents of the Church: Brigham Young [1997], 293).

Napudno ken nalinteg ti Dios iti amin a banag (kitaen iti Alma 7:20). Nasken met a napudnotayo iti amin a banag tapno agbalin a kas Kenkuana. Impaneknek ti lalaki a kabsat ni Jared, “Wen, Apo, ammok a sika … ti Dios ti kinapudno, ket saanka a makapaglibak” (Ether 3:12). Kas kasupadina, ulbod ti sairo. Kinapudnona, isu ti ama ti kinaulbod (kitaen iti 2 Nephi 9:9). “Dagiti agpili nga agkusit ken agulbod ken mangallilaw ken mangballaibo agbalinda nga adipenna” (Mark E. Petersen, iti Conference Report, Okt. 1971, 65; wenno Ensign, Dis. 1971, 73).

Ipatpateg dagiti napudno a tao ti kinapudno ken kinalinteg. Napudnoda kadagiti balikas ken tignayda. Saanda nga agulbod, agtakaw, wenno agkusit.

Ti panagulbod ket naigagara a panangallilaw kadagiti dadduma. Maysa a kita ti panagulbod ti panagsaksi iti saan a pudno. Inted ti Apo daytoy a bilin kadagiti annak ti Israel: “Dika agsaksi iti ulbod a maibusor iti padam a tao” (Exodo 20:16). Insuro met ni Jesus daytoy idi adda Isuna iti daga (kitaen iti Mateo 19:18). Adda adu a kita ti panagulbod. No agsaotayo iti saan a pudno, agbasoltayo iti panagulbod. Mabalintayo met nga igagara nga allilawen dagiti dadduma babaen ti ikikita, babaen ti panagulimek, wenno babaen ti panangibaga laeng iti paset ti kinapudno. No isungsongtayo dagiti tao iti ania man a wagas a mamati iti banag a saan a pudno, saantayo a napudno.

Saan a maragsakan ti Apo iti kasta a panagulbod, ket datayto ti agsungbat kadagiti panagulbodtayo. Kayat ni Satanas a mamatitayo a nasayaat ti agulbod. Kunana, “Wen, agulbodkayo iti bassit; … saan a makadangran daytoy” (2 Nephi 28:8). Allukoyennatayo ni Satanas a mangikalintegan kadagiti panagulbodtayo iti bagbagitayo. Mailasinto dagiti napudno a tao dagiti pannulisog ni Satanas ket agsaodanto iti sibubukel a kinapudno, uray no kasla maisuppiat iti pagsayaatanda.

Insuro ni Jesus, “Dika agtakaw” (Mateo 19:18). Ti panagtakaw ket panangala iti maysa a banag a saantayo a kukua. Agtaktakawtayo no agalatayo iti kukua ti maysa a tao wenno ti maysa a pagtagilakuan wenno ti komunidad nga awanan iti pammalubos. Ti panagtakaw ket panangala iti tagilako wenno ramramit a kukua ti pagtartrabahuan. Ti panangkopia iti musika, pelikula, ladawan, wenno nakasurat a teksto nga awan ti pammalubos dagiti agtagikua iti karbengan ket panagulbod ken maysa a kita ti panagtakaw. Panagulbod ti panangawat iti ad-adu pay ngem iti umisu a supli wenno banag. Panagtakaw ti panangala iti ad-adu pay ngem iti bingaytayo iti ania man a banag.

Agkusittayo no nakurang ti imbayadtayo iti utangtayo, wenno agalatayo iti maysa a banag a saantayo a pakaikarian. Sumagmamano nga empleado ti agkusit kadagiti pagtartrabahuanda babaen ti saanda a panagtrabaho iti umisu nga oras; ngem umaw-awatda iti naan-anay a sueldo. Sumagmamano nga agpatpatrabaho ti saan a napudno kadagiti empleadoda; bayadanda ida iti nababbaba ngem iti umisu a sueldoda. Kuna ni Satanas, “Gundawayanyo ti sabali gapu kadagiti balikasna, ikalianyo iti abut ti kaarrubayo”(2 Nephi 28:8). Ti pananggundaway ket maysa a kita ti di kinapudno. Panagkusit ti panangted iti serbisio wenno tagilako a saan a nasayaat.

• Ania ti mapasamak kadatayo a naespirituan no ikalintegantayo ti kinaulbodtayo?

Agus-usar dagiti tao iti adu a panangikalintegan iti panagulbodda. Agulbod dagiti tao tapno masalaknibanda ti bagbagida ken tapno patien dagiti dadduma a nasayaatda. Sumagmamano ti mangikalintegan iti bagbagida iti panagtakawda, nga iti panagkunada ket maikarida iti innalada, panggepda nga isubli daytoy, wenno ad-adda a kasapulanda daytoy ngem ti akinkukua. Sumagmamano ti agkusit tapno makaala iti nangatngato a marka iti eskuela wenno gapu ta “ar-aramiden ti amin daytoy” wenno tapno makabales.

Dagitoy a panangikalintegan ken addu pay ket mait-ited a gapu iti panagulbod. Iti Apo, awan ti maawat a panangikalintegan. No ikalintegantayo ti bagbagitayo, kusitentayo ti bagbagitayo ket adaywannatayo ti Espiritu ti Dios. Ad-adda nga agbalintayo a saan a nalinteg.

• Ania ti kaipapanan ti agbalin a naan-anay a napudno?

Tapno agbalin a naan-anay a napudno, nasken nga amirisentayo a nasayaat ti biagtayo. No adda dagiti wagas a mabalin nga adda bassit panagulbodtayo, nasken a dagusentayo ti agbabawi kadagitoy.

No naan-anay a napudnotayo, saantayo a makaaramid iti dakes. Napudnotayo iti amin a panagtalek, pagrebbengan, pannakitulag, wenno katulagan, uray pay no katimbeng daytoy ti kuarta, gagayyem, wenno ti biagtayo. Iti kasta mabalintayo ti makisango iti Apo, iti bagitayo, ken dagiti dadduma nga awanan pannakaibabain. Imbalakad ni Presidente Joseph F. Smith, “Bay-antayo ti biag ti tunggal tao ta naigetto ti pannakaamiris ti kababalinna, ket makitanto daytoy a kasla silulukat a libro, tapno awanto ti rumbeng a pagsanudanna wenno pagbainanna” (Gospel Doctrine, 5th ed. [1939], 252).

• Kadagiti ania a wagas nga aringan ti kinapudno wenno kinaulbodtayo ti panagriknatayo maipapan iti bagbagitayo?

• DkK 50:17 (agsao laeng babaen ti espiritu ti kinapudno)

• DkK 76:103–6 (pagtungpalan dagiti ulbod)

• DkK 42:27 (bilin a di pagsawan iti dakes dagiti kaarruba)

• Exodo 20:15–16 (dagiti bilin a di panagtakaw ken di panagsaksi iti ulbod)

• DkK 42:20, 84–85; 59:6 (maiparit ti agtakaw)

• DkK 3:2 (napudno ti Dios)

• DkK 10:25–28 (mangallilaw ni Satanas)