Ti Lubong dagiti Espiritu Kalpasan ti Naindagaan a Biag

Kapitulo 41

Ladawan

A mother in a wheelchair is surrounded by three young children. They are in a cemetery in front of a tombstone.

Ti Biag kalpasan ti Ipapatay

Ania ti mapasamak kadatayo kalpasan ti ipapataytayo?

Nangisagana ti Nailangitan nga Ama iti plano para iti pannakaisalakantayo. Kas paset daytoy a plano, imbaonnatayo manipud iti sidongna nga agnaed iti daga ket umawat kadagiti mortal a bagi nga addaan iti lasag ken dara. Iti kamaudiananna matayto dagiti mortal a bagitayo, ket mapanto dagiti espiritutayo iti lubong dagiti espiritu. Ti lubong dagiti espiritu ket maysa a lugar a pagur-urayan, pagtartrabahuan, pagsursuruan, ken, para kadagiti nalinteg, pagin-inanaan iti parikut ken ladingit. Agnaedto dagiti espiritutayo sadiay agingga a nakasaganatayon para iti panagungartayo. Kalpasanna tumiponto manen dagiti mortal a bagitayo kadagiti espiritutayo, ket awatentayonto ti tukad ti gloria nga insaganaantayo (kitaen ti kapitulo 46 iti daytoy a libro).

Adu a tao ti masmasdaaw no ania ti langa ti lubong dagiti espiritu. Nangted kadatayo dagiti nasantuan a kasuratan ken propeta iti ud-udina nga aldaw iti impormasion maipapan iti lubong dagiti espiritu.

Ania a liwliwa ti maawatmo iti pannakaammom nga adda biag kalpasan ti ipapatay? Kasano a mausartayo ti pannakaawattayo maipapan iti lubong dagiti espiritu kalpasan daytoy a biag tapno maliwliwatayo dagiti dadduma?

Sadino ti Lubong dagiti Espiritu Kalpasan ti Naindagaan a Biag?

Kinuna dagiti propeta iti ud-udina nga aldaw a saan nga adayo kadatayo dagiti espiritu dagiti pimmusayen. Kinuna ni Presidente Ezra Taft Benson: “No dadduma agbalin a naingpis unay ti belo iti nagbaetan daytoy a biag ken ti biag kalpasan daytoy a biag. Saan nga adayo kadatayo dagiti pimmusayen a patpatgentayo” (iti Conference Report, Abr. 1971, 18; wenno Ensign, Hunio 1971, 33). Insuro ni Presidente Brigham Young a ti lubong dagiti espiritu kalpasan daytoy a biag ket adda iti daga, iti aglawlawtayo (kitaen iti Teachings of Presidents of the Church: Brigham Young [1997], 279).

Ania ti Kasasaad dagiti Espiritutayo?

Addaan dagiti espiritu a bagi iti porma ti bagi a maipada kadagiti mortal malaksid nga adda iti naan-anay a porma ti espiritu a bagi (kitaen iti Ether 3:16). Maikuyog dagiti espiritu manipud iti daga dagiti wagasda iti kinapasnek wenno kinasukir kadagiti banag maipapan iti kinalinteg (kitaen iti Alma 34:34). Addaanda kadagiti isu met laeng a paggarteman ken tarigagay nga adda kadakuada idi addada iti daga. Adda iti porma a nataengan ti amin nga espiritu. Nataenganda sakbay ti biagda iti daga, ken nataengan ti pormada kalpasan ti ipapatayda, uray no pumusayda a kas kadagiti maladaga wenno ubbing (kitaen iti Teachings of Presidents of the Church: Joseph F. Smith [1998], 131–32).

Apay a napateg a maammuan nga addaanto dagiti espiritutayo kadagiti isu met laeng a galad nga adda kadakuada ita iti lubong dagiti espiritu?

Ania dagiti Kasasaad iti Lubong dagiti Espiritu kalpasan ti Naindagaan a Biag?

Insuro ni propeta Alma iti Libro ni Mormon ti maipapan iti dua a dibision wenno kasasaad iti lubong dagiti espiritu:

“Maawat dagiti espiritu dagiti nalinteg iti kasasaad ti kinaragsak, a maawagan iti paraiso, ti panaginana a kasasaad, ti natalna a kasasaad, a paginanaanda iti amin a parikutda ken amin a panagdandanag, ken panagleddaang.

“Ket mapasamakto a dagiti espiritu dagiti nadangkes, wen, dagiti dakes— ta adtoy, awan ti biangda wenno bingayda iti Espiritu ti Apo; gapu ta adtoy, pinilida ti dakes nga aramid a saan a ti naimbag; ngarud simrek ti espiritu ti sairo kadakuada, ket tinagikuana ti balayda—ket dagitoy ti naibelleng iti ruar a nasipnget; addanto panagsangit, ken panagdung-aw, ken panagngariet, ket gapu daytoy iti kinadakesda, a naiturong a paadipen iti pagayatan ti sairo.

“Ita daytoy ti sasaaden ti kararua dagiti nadangkes, wen, iti kasipngetan, ken iti nakaal-alingget a kasasaad, sibubukel a kumitkita iti dumardarang a gura ti pungtot ti Dios kadakuada; ket agtalinaedda iti kastoy a kasasaad, kasta met kadagiti nalinteg nga adda iti paraiso, agingga iti kanito a panagungarda” (Alma 40:12–14).

Mapaglalasin dagiti espiritu a maibatay iti kinatarnaw dagiti biagda ken panagtungpalda iti pagayatan ti Apo bayat ti kaaddada iti daga. Mapagsina dagiti nalinteg ken nadangkes (kitaen iti 1 Nephi 15:28–30), ngem mabalin a dumur-as dagiti espiritu bayat ti panagsursuroda kadagiti pagbatayan ti ebanghelio ken panagbiagda a mayannurot kadagitoy. Mabalin dagiti espiritu iti paraiso ti mangisuro kadagiti espiritu iti pagbaludan (kitaen iti DkK 138).

Paraiso

Segun ken ni propeta Alma, aginana dagiti nalinteg nga espiritu manipud kadagiti naindagaan a parikut ken ladingit. Nupay kasta, makumikomda iti panagaramid iti trabaho ti Apo. Nakita ni Presidente Joseph F. Smith iti maysa a parmata a kalpasan laeng a nailansa ni Jesucristo iti krus, sinarungkaranna dagiti nalinteg iti lubong dagiti espiritu. Nangtuding kadagiti mensahero, inikkanna ida iti bileg ken turay, ken binilinna ida a “mangimet iti silaw ti ebanghelio a mapan kadagiti adda iti kasipngetan, a kas kadagiti amin nga espiritu ti tattao” (DkK 138:30).

Nabukel ti Simbaan iti lubong dagiti espiritu, ket itultuloy dagiti dadaulo ti priesthood dagiti pagrebbenganda sadiay (kitaen iti DkK 138:30). Insuro ni Presidente Wilford Woodruff: “Ti isu met laeng a Priesthood ti adda sabali a bangir ti belo. … Tunggal Apostol, tunggal Pitupulo, tunggal Elder, kdpy., a pimmusayen iti pammati apaman a makalabas iti sabali pay a bangir ti belo, ket sumrek iti aramid ti panagministro” (Deseret News, Ene. 25, 1882, 818).

Napateg pay dagiti relasion iti pamilia. Ni Presidente Jedediah M. Grant, maysa a mamalbalakad ken ni Brigham Young, ket nakitana ti lubong dagiti espiritu ket inladawanna ken ni Heber C. Kimball ti organisasion nga adda idiay: Kinunana a nabukel dagiti tao a nakitana idiay kadagiti pagrebbengan iti pamilia. … Kinunana, ‘Idi kimmitaak kadagiti pamilia, adda pagkurangan iti sumagmamano, … ta nakitak dagiti pamilia a saanto a mapalugodan nga umay ken agtaengda a sangkamaysa, gapu ta saanda a dinayaw ti awagda ditoy’” (Deseret News, Dis. 10, 1856, 316–17).

Pagbaludan ti Espiritu

Dinakamat ni Apostol Pedro ti lubong dagiti espiritu kalpasan daytoy a biag a kas maysa a pagbaludan, a para iti sumagmamano (kitaen iti 1 Pedro 3:18–20). Adda iti pagbaludan ti espiritu dagiti espiritu dagitay saan pay nga immawat iti ebanghelio ni Jesucristo. Addaan dagitoy nga espiritu iti kinawaya nga agpili ket mabalin a maallukoy ida ti agpada a nasayaat ken dakes. No awatenda ti ebanghelio ken dagiti ordinansa a maannong para kadakuada kadagiti templo, mabalin a makapanawda iti pagbaludan ti espiritu ket agtaengda iti paraiso.

Adda pay iti pagbaludan ti espiritu dagiti saan a nangawat iti ebanghelio kalpasan a naikasaba daytoy kadakuada iti daga wenno iti pagbaludan ti espiritu. Agsagsagaba dagitoy nga espiritu iti kasasaad nga am-ammo a kas impierno. Inyadayoda ti bagbagida manipud ti asi ni Jesucristo, a nagkuna, “Adtoy, siak, a Dios, sinagabak dagitoy a banag para iti amin, tapno saanda koma nga agsagaba no agbabawida; ngem no saanda nga agbabawi nasken nga agsagabada a kas kaniak; a dayta a panagsagaba nangipaay kaniak, uray pay Dios, a kaindaklan iti amin, nga aggarigenggen gapu iti saem, ken agdara iti tunggal teterreman, ken agsagaba nga agpada iti bagi ken espiritu” (DkK 19:16–18). Kalpasan ti panagsagabada gapu kadagiti basolda, mapalugodandanto, babaen ti Pannubbot ni Jesucristo, nga agtawid iti kababaan a tukad ti gloria, a daytoy ti telestial a pagarian.

Kasano a maipada dagiti kasasaad iti lubong dagiti espiritu kadagiti kasasaad iti daytoy a biag?

Dagiti Mainayon a Nasantuan a Kasuratan

1 Pedro 4:6 (naikasaba ti ebanghelio kadagiti natay)
Moises 7:37–39 (naisagana ti pagbaludan ti espiritu para kadagiti nadangkes)
DkK 76 (paltiing maipapan kadagiti tallo a pagarian ti gloria)
Lucas 16:19–31 (gasat ti agpalpalama ken ti nabaknang a lalaki iti lubong dagiti espiritu)