Kyerɛwsɛm
Nkyerɛkyerɛ na Ahyɛmudzi 10


Ɔfã 10

Nyikyerɛ a wɔdze maa Joseph Smith Nkɔnhyɛnyi no, wɔ Harmony, Pennsylvania, bɛyɛ Ebɔbira 1829 ber mu, ɔwɔ mu dɛ bia wonyaa afã binom so ahyɛse noara wɔ afe 1828 ɔhyewber no. Ha na Ewuradze se Joseph dɛ, emumuyɛfo asesã Lehi nwoma no ne nkrataafa 116 no mu nsɛm a wɔakyerɛ ase wɔ Mormon Nwoma mu no. Dɛm nkrataafa yi na wɔdze hyɛɛ Martin Harris nsa mber kakra ma ɔyewee no. (Hwɛ dza wɔakyerɛw wɔ Ɔfã 3 n’etsifi no). Nsusui bɔn a wonyae nye dɛ wɔbɔtweɔn na sɛ wɔsan kyerɛ dza wɔayew no ase bio wie a woedua nsesã biara a ɔbɛba mu no do dze egu nyia ɔkyerɛɛ ase no n’enyim ase. Dɛm emumuyɛ tsirmpɔw yi a ɔyɛ abɔnsam no susui no yɛ adze a Ewuradze nyim wɔ ber mpo a, nna Mormon, tsetseberdo Abakɔsɛm kyerɛwfo Nephinyi no, rutwitwa nsɛm a ɔwɔ mprɛtse pii no a, ɔwɔ Mormon Nwoma mu no do ntsiantsia no (hwɛ Mormon ne Nsɛm 1:3–7).

1–26, Satan nunu emumuyɛfo ma wotsia Ewuradze N’edwuma; 27–33, Ɔper hwehwɛ dɛ ɔsɛɛ nyimpa akra; 34–52, Asɛmpa no bodua Mormon Nwoma no do akɔ Lamanfo nye aman nyina hɔ; 53–63, Ewuradze bɛkyekyer N’Asɔr na N’asɛmpa no wɔ adasa mu; 64–70, Ɔbɔboaboa hɔn a woenu hɔnho no ano akɔ N’Asɔr mu na Ɔagye hɔn a wɔyɛ setsie no nkwa.

1 Afei, hwɛ, mese wo dɛ, osiandɛ edze dɛm nkyerɛwee no a wɔmaa wo tum ma edze Urim na Thummim kyerɛɛ ase no hyɛɛ omumuyɛnyi nsamu ntsi, ayew no.

2 Na eyeew w’akyɛdze no so dɛm aber no ara, na w’adwen mu bɛyɛɛ sum.

3 Naaso, afei wɔdze asan ama wo bio; dɛm ntsi, hwɛ na dzi nokwar na kɔ do wie nkyerɛase edwuma no dɛ mbrɛ ahyɛ ase no.

4 Mma nntu mbirika ntsɛntsɛm anaadɛ nnyɛ edwumadzen nnsen mbrɛ w’ahom na mboa a wɔdze ama wo dɛ fa kyerɛ ase no botum; mbom bɔ mbɔdzen kesi ewiei.

5 mpaa aber nyina, ama ayɛ konyim dzifo; nyew, ama eedzi Satan do konyim, na ama eetum eguan efi Satan no nkowaa a wodzi dwuma ma no no hɔn nsa.

6 Hwɛ, wɔrohwehwɛ asɛɛ wo; nyew, nyimpa a edze wo werɛ ahyɛ no mu no mpo rohwehwɛ asɛɛ wo.

7 Na iyi ho ntsi na mekãa dɛ ɔyɛ omumuyɛnyi no, na ɔrohwehwɛ agye ndzɛmba a wɔdze ahyɛ wo nsa no; na ɔrohwehwɛ so asɛɛ w’akyɛdze no.

8 Na osiandɛ edze nkyerɛwee no hyɛɛ ne nsa ntsi, hwɛ, emumuyɛfo agye efi wo hɔ.

9 Dɛm ntsi, egyaa adze a ɔyɛ krɔnkrɔn mu ama, nyew, edze ama emumuyɛdze.

10 Na, hwɛ, Satan dze ahyɛ hɔn akoma mu dɛ wɔnsesã nsɛm a ama ɔakyerɛw no, anaadɛ dza akyerɛ ase no a, efi wo nsa no.

11 Na hwɛ, mese wo dɛ, osiandɛ wɔasesã nsɛm no ntsi, ɔnye dza ekyerɛɛ ase ma wɔkyerɛwee no bɔ ebira;

12 Na, osian iyi ntsi, abɔnsam aper dɛ ɔbɛfa ndaadaa kwan bi do, ama ɔasɛɛ dɛm dwumadzi yi;

13 Na ɔdze ahyɛ hɔn akoma mu dɛ wɔnyɛ dɛm adze yi, ama wɔnam ndabraba kwan do eetum akã dɛ wɔapa wo wɔ nsɛm a apatuw akyerɛ ase no ho.

14 Nokwar, mese wo dɛ, mennkɛma kwan ma Satan ne nsusui bɔn wɔ dɛm adze yi ho no ayɛ hɔ.

15 Na hwɛ, ɔdze ahyɛ hɔn akoma mu ama ne nsa aakã wo ma asɔ Ewuradze wo Nyankopɔn ahwɛ wɔ ber a ibebisa no dɛ ɔmma san kyerɛ ase bio no.

16 Na afei, hwɛ, wɔkã na wɔdwen wɔ hɔn akoma mu dɛ—Yɛbɔhwɛ dɛ sɛ Nyame ama no tum dɛ ɔnkyerɛ ase a; sɛ dɛm a, ɔbɛsan ama no tum bio;

17 Na sɛ Nyame ma no tum bio, anaa dɛ sɛ ɔkyerɛ ase bio, anaadɛ sɛ ɔsan dze dɛm nsɛm no ara so ba bio a, hwɛ, yɛwɔ ɔnoara so bi wɔ hɛn nkyɛn, na yɛasesã no;

18 Dɛm ntsi wɔrennyɛ pɛr, na yɛbɛkã dɛ oedzi ator wɔ ne nsɛm no mu, na dɛ onnyi akyɛdze biara, na dɛ onnyi tum biara;

19 Dɛm ntsi yɛbɛsɛɛ ɔno, nye edwuma no so; na yɛbɛyɛ iyi amma hɛn enyim eenngu ase ekyir yi, na ama yeenya wiadze mu enyimnyam.

20 Nokwar, nokwar, mese wo dɛ, Satan wɔ tum kɛse wɔ hɔn akoma do; na onunu hɔn ma wɔyɛ emumuyɛ dze tsia dza oye;

21 Na hɔn akoma aprɔw, na emumuyɛdze na ebusudze ahyɛ mu mã; na wɔdɔ sum kyɛn kan, osiandɛ hɔn ndwuma yɛ bɔn; dɛm ntsi worimmbisa me.

22 Satan nunu hɔn, ama oeegya hɔn akra akɔ ɔsɛɛ mu.

23 Na dɛm na ɔayɛ ndaadaa nhyehyɛɛ, na ɔdwen dɛ ɔdze resɛɛ Nyame n’edwuma; na mbom mebɛgye iyi efi hɔn nsamu, na ɔbɛdan hɔn enyimguase; na hɔn afɔbu wɔ atsɛmbu da no mu.

24 Nyew, onunu hɔn akoma ma wonya ebufuw tsia edwuma yi.

25 Nyew, ɔse hɔn dɛ: Hom ndaadaa hɔn na hom ntsɛw hɔn nkyer hɔn ama hom asɛɛ hɔn; hwɛ, iyi nnyɛ ɔhaw. Na dɛm na ɔdaadaa hɔn, na ɔse hɔn dɛ, ɔnnyɛ bɔn dɛ ibedzi ator ato ɔdasanyi do ama wɔakyer no ator mu ama wɔasɛɛ no.

26 Na dɛm na ɔdaadaa hɔn, na ɔgye hɔn do kɛpem dɛ ɔtwe hɔn akra kɔ hɛl; na dɛm so na ɔyɛ ama wɔapa hɔnankasa wɔ hɔn efir mu.

27 Na hwɛ okyin asaase do, pasapasar do dzi akɔnaaba, dze rohwehwɛ asɛɛ nyimpa akra.

28 Nokwar, nokwar, mese wo dɛ, nyia odzi ator dze daadaa ndue osiandɛ osusu dɛ obi so dzi ator dze daadaa, na dɛm nkorɔfo no rimmfi Nyame ne pɛrpɛrdzi nsa.

29 Afei, hwɛ, wɔsesã dɛm nsɛm yi, osiandɛ Satan ase hɔn dɛ: Ɔadaadaa hom—na dɛm na ɔdaadaa hɔn ma wɔyɛ emumuyɛ dze, na ɔyɛ ma esɔ Ewuradze wo Nyankopɔn hwɛ.

30 Hwɛ, mese wo dɛ, mma nnkyerɛ dɛm nsɛm no a oefi wo nsamu kɔ no ase bio;

31 Na, hwɛ, wonnkotum ayɛ hɔn nsusui bɔn a wɔdze bedzi ator etsia dɛm nsɛm no. Na, hwɛ, sɛ edze dɛm nsɛm no ara san ba bio a, wɔbɛkã dɛ, edzi ator na epetuw dɛ erekyerɛ ase, na mbom atotõ woara woho.

32 Na, hwɛ, wɔdze iyi bopue guado, na Satan epirim nkorɔfo no hɔn akoma na oenunu hɔn ma woenya ebufuw etsia wo, amma wɔanngye me nsɛm no enndzi.

33 Dɛm na Satan rodwen mbrɛ ɔbɛhyɛ wo dasegye do wɔ dɛm ebusuasantsen yi mu, amma edwuma no eemmpue wɔ dɛm ebusuasantsen yi mu.

34 Mbom hwɛ, nyansa nye yi, na osiandɛ mekyerɛ wo nyansa, na mema wo mbrasɛm a ɔfa dɛm ndzɛmba yinom ho ntsi, dza ɔwɔ dɛ eyɛ no, mma mmfa nnkyerɛ wiadze kesi dɛ ibowie nkyerɛase dwumadzi no.

35 Mma ɔnnyɛ wo ahobow dɛ mesee wo dɛ: Nyansa nye yi, mma mmfa nnkyerɛ wiadze—na mekãa dɛ, mma mmfa nnkyerɛ wiadze, ama wɔaakora wo do.

36 Hwɛ, mennse dɛ mma mmfa nnkyerɛ atseneneefo;

37 Mbom dɛ mbrɛ irunntum nnhu atseneneefo daa no, anaadɛ irunntum nnkyerɛ emumuyɛfo mfi atseneneefo mu daa no, hwɛ mese wo dɛ, mua w’ano kesi dɛ mubohu mber pa a ɔsɛ dɛ meda ndzɛmba nyinara a ɔfa dɛm adze yi ho edzi kyerɛ wiadze.

38 Na afei, nokwar mese wo dɛ, ndzɛmba a ekyerɛwee no a woeefi wo nsamu kɔ no, woekrukye no Nephi ne mprɛtse no do;

39 Nyew na ekaa dɛ wɔkãa wɔ dɛm nkyerɛwee no mu dɛ, dɛm ndzɛmba no no mu nsɛm dza ohia kɛse no wɔakyerɛw no Nephi ne mprɛtse no do.

40 Na afei, osiandɛ nsɛm a woekrukye no Nephi ne mprɛtse no do no yɛ ndzɛmba a no ho hia kɛse a ofi me nyansaa mu ntsi, mebɛma nkorɔfo enya ho nyimdzee wɔ dɛm nsɛm yi mu—

41 Dɛm ntsi, kyerɛ nkrukye no a ɔwɔ Nephi ne mprɛtse no do no ase, hyɛ ase na fa kɛpem ɔhen Benjamin n’ahendzi do, anaadɛ fa kɛpem dza akyerɛ ase no a, ɔwɔ wo hɔ no do;

42 Na hwɛ, fa pue guado dɛ ɔyɛ Nephi n’abakɔsɛm; na hwɛ mebɛma hɔn a wɔasesã me nsɛm no hɔn enyim egu ase.

43 Meremma kwan mma wɔnnsɛɛ m’edwuma; nyew, mebɛma woehu dɛ me nyansaa sõ sen abɔnsam ne ndaadaa.

44 Hwɛ, Nephi ne nsɛm no mu kakra ara, anaadɛ dza otwitwaa no esinesin no ara na wɔwɔ.

45 Hwɛ, ndzɛmba pii a ɔma wohu m’asɛmpa no mu yie no, woekrukye no Nephi ne mprɛtse no do; dɛm ntsi, osian nyansa a ɔwɔ mo mu ntsi na mese kyerɛ dza woekrukye no a ɔwɔ Nephi ne mprɛtse no do ne fã a odzi kan no ase, na fa kã dɛm dwumadzi yi ho.

46 Na, hwɛ, edwuma yi mu dza ɔaka ekyir nyinara mu na m’asɛmpa nyinara no a mo nkɔnhyɛfo krɔnkrɔn, nyew, nye m’esuafo so, bɔɔ mpaa dɛ wɔpɛ dɛ dɔm yi hɔn nsa kã no wɔ.

47 Na mesee hɔn dɛ, wɔdze bɛma hɔn dɛ mbrɛ hɔn gyedzi a ɔwɔ hɔn mpaabɔ mu tse;

48 Nyew, na iyi nye hɔn gyedzi—dɛ m’asɛmpa a, medze maa hɔn dɛ wɔnkã wɔ hɔn aber do no, hɔn nuanom Lamanfo, nye hɔn so a osian hɔn etuatsew ntsi wɔbɛyɛɛ Lamanfo no nyina nsa bɛkã.

49 Afei, nnyɛ ne nyinara nye yi—hɔn gyedzi a ɔwɔ hɔn mpaabɔ mu nye dɛ sɛ ɔba no dɛ aman bi so bɛtsena asaase yi do a, wɔbɛma nkorɔfo so atse asɛmpa yi no;

50 Na dɛm ntsi, wɔnam mpaabɔ mu gyaa nhyira wɔ asaase yi do, ama obiara a ɔbɛgye dɛm asɛmpa yi edzi wɔ asaase yi do no eenya onnyiewiei nkwa;

51 Nyew, ama ɔman, ebusuakuw, kasa horow, anaa nyimpa biara eenya no kwa.

52 Na afei, hwɛ, osian hɔn gyedzi a ɔwɔ hɔn mpaabɔ mu ntsi, mebɛma mo nkorɔfo enya dɛm asɛmpa yi ho nyimdzee. Hwɛ, meremmfa mmbɛsɛɛ dza woenya no, na mbom ɔbɛyɛ ntowdo dze ama hɔn.

53 Na iyi ho ntsi na maakã dɛ: Sɛ ebusuasantsen yi emmpirim hɔn akoma a, mebɛkyekyer m’asɔr wɔ hɔn mu.

54 Afei mennkã iyi mmfa nnsɛɛ m’asɔr, na mbom mekã iyi dze tow m’asɔr do;

55 Dɛm ntsi, obiara a ɔwɔ m’asɔr mu no onnyi dɛ osuro, na woyinom na wobenya ɔsor ahenman no edzi.

56 Mbom woyinom na wonnsuro me, na wonndzi me mbrasɛm do na mbom wɔkyekyer asɔrasɔr ma hɔnho dze enya hɔnho, nyew, nye hɔn a wɔyɛ emumuyɛdze na wɔkyekyer abɔnsam n’ahenman no—nyew, nokwar, nokwar, mese wo dɛ woyinom na mebɛhaw hɔn, na mebɛma hɔnho apopo na wɔawosow akɔ hɔn mu.

57 Hwɛ, emi nye Jesus Christ, Nyame ne Ba no. Mebaa mankasa medze hɔ, na mankasa medze anngye me.

58 Emi nye kan a ɔhyerɛn wɔ sum mu, na sum no annkyer no.

59 Emi na mekãa dɛ—Mowɔ nguan binom so a wonnyi nguanbuw yi mu—mekãa kyerɛɛ m’esuafo, na pii wɔ hɔ a wɔanntse me ase.

60 Na mebɛma nkorɔfo ehu dɛ mowɔ nguan binom so, na wɔyɛ Jacob fi abaw no bi;

61 Na medze hɔn ahobow ndwuma a, wɔyɛe wɔ me dzin mu no bɛba kan mu;

62 Nyew, na medze m’asɛmpa no a wɔkãa kyerɛɛ hɔn no so bopue kan mu, na, hwɛ, wɔrommpow dza wo nsa akã yi, na mbom wɔbɔtow do, na wɔdze me nkyerɛkyerɛ ho nokwar botae no bopue kan mu, nyew, nkyerɛkyerɛ kortoo a ɔwɔ mu no.

63 Na dɛm na mebɛyɛ dze ada m’asɛmpa no edzi, amma wentwiwentwi pii ammba; nyew, Satan nunu nkorɔfo hɔn akoma ma wɔdze wentwiwentwi ba a ɔfa me nkyerɛkyerɛ no botae ho; na wɔfom wɔ dɛm ndzɛmba yinom ho, ntsi wɔdandan kyerɛwsɛm no na wɔnntse ase.

64 Dɛm ntsi, mubobue dɛm esumadze kɛse yi enyi do akyerɛ hɔn;

65 Na, hwɛ, sɛ woemmpirim hɔn akoma a, mobɔboaboa hɔn ano dɛ mbrɛ akokɔbaatan boaboa ne mba ano hyɛ ne ntsaban ase no.

66 Nyew, sɛ wɔpɛ dɛ wɔba a, wobotum na wɔabɛfa nkwa nsu no kwa.

67 Hwɛ, iyi nye me nkyerɛkyerɛ—obiara a onu noho na ɔba mo hɔ no, onyia no yɛ m’asɔrba.

68 Obiara a ɔdze bi bɛkã iyi ho anaa obeyi bi efi mu no nnyɛ medze, na mbom otsia me; dɛm ntsi ɔnnyɛ m’asɔrba.

69 Na afei, hwɛ, hɔn a wɔkã m’asɔr ho, na wotsim m’asɔr mu kodu ewiei no, na medze hɔn besi me ɔbotan do, na hɛl mbobow no nnkenya tum wɔ hɔn do.

70 Na afei, kaa nyia ɔno nye wiadze nkwa nye kan no, wo Pomfo, w’Ewuradze nye wo Nyankopɔn ne nsɛm no. Amen.