Ɔfã 21
Nyikyerɛ a wɔdze maa Joseph Smith Nkɔnhyɛnyi no wɔ Fayette, New York, Ebɔbira 6, 1830. Wɔdze nyikyerɛ yi mae wɔ ber a wɔrekyekyer Asɔr no, wɔ da a wɔakã no mu, wɔ Peter Whitmer Panyin, ne fie. Mbarimba beesia a nna woenuma hɔn dada no na wɔkã ho. Hɔn nyina toow aba gyee too mu nyaa pɛ dɛ wobesi nkitsi akyekyer Asɔr no dɛ mbrɛ Nyankopɔn ne mbrasɛm no se (hwɛ Ɔfã 20). Wɔtoow aba so gyee too mu na wɔmaa Joseph Smith Kakraba na Oliver Cowdery tsipia dɛ wɔnyɛ Asɔr no no banodzifo etsitsir. Joseph dze ne nsa guu Oliver do hyɛɛ no elder wɔ Asɔr no mu, na Oliver so yɛɛ dɛmara dze hyɛɛ Joseph elder. Ber a wohyiraa sacrament do dze kɔr aporɔw wiee no, Joseph na Oliver dze hɔn nsa guu ankorankor biara a woehyia hɔ no hɔn etsir do, ma wonyaa Sunsum Krɔnkrɔn no na wosii hɔn pi ma wɔbɛyɛɛ Asɔrmba.
1–3, Wɔfrɛ Joseph Smith ma ɔbɛyɛ adzehunyi, nyia ɔkyerɛ adze ase, nkɔnhyɛnyi, ɔsomafo na elder; 4–8, N’asɛm bɛkyerɛ Zion kwan; 9–12, Ahotseweefo no bɛgye n’asɛm a ɔnam Ɔwerɛkyekyefo no do bɛka no edzi.
1 Hwɛ, ɔwɔ dɛ wɔkyerɛw abakɔsɛm yi wɔ hom mu na wɔdze sie; no mu na wɔbɛfrɛ wo adzehunyi, nyia ɔkyerɛ adze ase, nkɔnhyɛnyi, Jesus Christ ɔsomafo, asɔr no mu elder a wɔnam Egya Nyankopɔn ne pɛ, nye hom Ewuradze Jesus Christ n’adom do yii no.
2 Hom nam Sunsum Krɔnkrɔn ne nkenyan do rotow asɔr yi ne fapem, na hom esi ama gyedzi krɔnkrɔn mapa no.
3 Dɛm asɔr no a wɔahyehyɛ na wɔakyekyer wɔ hom Ewuradze n’afe apem ahaawɔtwe eduasa mu, wɔ no bosoom a otsĩa anan mu, ne da a otsĩa esia wɔ bosoom a wɔfrɛ no Ebɔbira mu.
4 Dɛm ntsi, me kyerɛ asɔr no, hom bɛyɛ aso dze ama ne nsɛm na mbrasɛm nyina a ne nsa bɛkã dze ama hom no, na ɔnantsew krɔnkrɔnyɛ mu wɔ m’enyim;
5 Na n’asɛm na hom bɛgye, tse dɛ ofi mankasa m’anomu, wɔ abotar nye gyedzi nyina mu.
6 Na sɛ wɔyɛ dɛm ndzɛmba yinom a hɛl mbobow no nnkotum edzi hom do konyim; nyew, na Ewuradze Nyankopɔn bɔhwetse sum no tum efi hom enyim, na ɔama sor awosow ama hom yieyɛ, nye ne dzin n’enyimnyam ntsi.
7 Na dɛm na Ewuradze Nyankopɔn se: Ɔno na mekenyan no dɛ ɔmfa tum kɛse mpia ama Zion enya kankɔ dze ama hom yieyɛ, na no mbɔdzembɔ dze minyim, na ne mpaabɔ no matse.
8 Nyew, no sũ a orusũ ma Zion no meehu, na mebɛyɛ ma onnkedzi awerɛhow ama no bio; na ne da a obenya n’enyigye ber no edu ama woenya no bɔn ho fakyɛ, na nhyira a medze ehyira no dwumadzi no so ada edzi.
9 Na, hwɛ, medze nhyira kɛse behyira hɔn a wɔyɛ edwuma wɔ mo wenyin ture mu nyina, na wɔbɛgye ne nsɛm, a ofi mo hɔ a Ɔwerɛkyekyefo no dze ama no edzi, dza ɔda no edzi dɛ ndzebɔnyɛfo bɔɔ Jesus mbeamudua mu dze maa wiadze bɔn, nyew, ama bɔnfakyɛ abɛyɛ hɔn a hɔn akoma abobɔ no dze.
10 Dɛm ntsi, ɔyɛ me pɛ dɛ ɔwo Oliver Cowdery mo somafo bɛhyɛ no sɔfo;
11 Iyi yɛ ayɛdze a ɔwɔ hɔ ma wo, dɛ ayɛ elder wɔ ne nsa ase yi, ɔno a odzi wo kan, ama abɛyɛ elder wɔ Christ n’asɔr yi mu, dza me dzin da do no—
12 Na asɛmpakãnyi a odzi kan wɔ asɔr yi mu, na ɔdze ato asɔr no na wiadzemba enyim, nyew, wɔ Amanamamfo enyim; na dɛm na Ewuradze Nyankopɔn no se, hwɛ! hwɛ! dze ama Jewfo no so. Amen.