Ɔfã 33
Nyikyerɛ a wɔnam Joseph Smith Nkɔnhyɛnyi no do dze maa Ezra Thayre na Northrop Sweet, wɔ Fayette, New York, Ɔbɛsɛ, 1830. Ber a ɔreyi dɛm nyikyerɛ yi enyim no, Joseph Smith n’abakɔsɛm no si no pi dɛ “Ewuradze … ayɛ krado aber nyina dɛ ɔbɛkyerɛkyerɛ hɔn a wɔdze gyedzi hwehwɛ no enyiberdo no.”
1–4, Wɔfrɛ edwumayɛfo dɛ wɔmbɔ asɛmpa no dawur wɔ dɔn a otsĩa dubiako no mu; 5–6, Wɔakyekyer Asɔr no na ɔwɔ dɛ wɔboa mpamufo no ano; 7–10, Hom nnu homho, na sor ahenman no abɛn; 11–15, Woesi Asɔr no wɔ asɛmpa no botan do; 16–18, Hom nsiesie homho mma Ayeforkun ne mbae no.
1 Hwɛ, mese hom, mo nkowaa Ezra na Northrop dɛ, hom mbue hom aso na hom ntsie Ewuradze hom Nyankopɔn ne ndze, nyia n’asɛm nkwa na tum wɔ mu, ɔyɛ ndam sen nkrantsee anofanu, na ohwira mu kodu dɛ ɔpaapaa akwaa nye ehuon mu, ɔkra nye sunsum mu; na ohu adwen nye akoma mu nsusui.
2 Na nokwar, nokwar, mese hom dɛ wɔafrɛ hom dɛ hom mma hom ndze do dɛ mbrɛ hom dze totorobɛnto, na hom mbɔ m’asɛmpa no dawur nkyerɛ ebusuasantsen kɔntɔnkye a wɔakyea yi.
3 Na, hwɛ, haban no ahoa na twaber no asõ; dɔn a otsĩa dubiako no abɔ, ber a odzi ewiei a mebɛfrɛ m’edwumayɛfo ma wɔakɔ mo wenyin ture mu no.
4 Na mo wenyin ture ne fã biara asɛɛ; na obiara nnyi hɔ a ɔyɛ papa gyedɛ kumaabi; na osian asɔfoɔtorsom ntsi hɔn nyinara wɔ adwen a wɔaprɔw, na wɔfom wɔ akwan pii mu.
5 Na, nokwar, nokwar, mese hom dɛ, makyekyer dɛm asɔr yi na mafrɛ no efi sar no do.
6 Na dɛmara so na mobɔboaboa me mpamufo no ano efi asaase ne mfɛndzanan nyina, dodowara mpo a wɔbɛgye me edzi, na woetsie me ndze.
7 Nyew, nokwar, nokwar, mese hom dɛ, haban no ahoa na twaber no asõ dada; dɛm ntsi, hom mfa hom ahom, adwen, nye ahoɔdzen nyina ntow hom kantankrankye.
8 Hom mbue hom anomu na wɔbɛhyɛ no mã, na hom bɛyɛ mpo dɛ tsetseberdo Nephi a otuu kwan fii Jerusalem wɔ sar no do no.
9 Nyew, hom mbue hom anomu na mma hom nngyaa obiara, na wɔbɛkyekyer efi-efi no egu hom ekyir, na hwɛ, mekã hom ho.
10 Nyew, hom mbue hom anomu na wɔbɛhyɛ no mã, rekã dɛ: Hom nnu homho, hom nnu homho, na hom nsiesie Ewuradze no kwan, na hom mma n’atsempɔn ntsentsen; na sor ahenman no abɛn;
11 Nyew, hom nnu homho ma wonnuma hom mu kor biara, nkɔ hom bɔnfakyɛ mu; nyew, wonnuma hom wɔ nsu mpo mu, na ɔno ekyir ogya nye Sunsum Krɔnkrɔn enuma so aba.
12 Hwɛ, nokwar, nokwar, mese hom dɛ, iyi nye m’asɛmpa no; na hom nkaa dɛ ɔwɔ dɛ wonya gyedzi wɔ mo mu, annyɛ dɛm a wonnkotum agye hɔn nkwa wɔ kwan biara do.
13 Na ɔbotan yi do na mibesi m’asɔr; nyew, wɔdze hom esi ɔbotan yi do, na sɛ hom kɔ do a, hɛl mbobow nnkotum enya tum wɔ hom do.
14 Na hom nkaa asɔr ne nkyerɛkyerɛ nye ahyɛmu no na hom ndzi do.
15 Na obiara a ɔwɔ gyedzi no, hom mfa nsa ngu no do, nsi no pi wɔ m’asɔr mu, na mubohue Sunsum Krɔnkrɔn akyɛdze no egu hɔn do.
16 Na mara medze Mormon Nwoma no nye kyerɛwsɛm krɔnkrɔn no mae dɛ wɔmfa nkyerɛkyerɛ hɔn; na mo Sunsum no tum no kenyan ndzɛmba nyinara.
17 Dɛm ntsi, hom ndzi nokwar, na hom mbɔ mpaa dabaa, na hom nsiesie hom nkandzea ma ɔndzɛw na hom mfa ngo so, ama hom aayɛ krado dze atweɔn Ayeforkun no ne mbae—
18 Na, hwɛ, nokwar, nokwar, mese hom dɛ, mereba ntsɛm. Ɔnyɛ hɔ dɛm. Amen.