Ɔfã 39
Nyikyerɛ a wɔnam Joseph Smith Nkɔnhyɛnyi no do dze maa James Covel, wɔ Fayette, New York, Sanda 5, 1831. James Covel a ɔayɛ Methodist sɔfo bɛyɛ mfe eduanan no nye Ewuradze dzii ahyɛmu dɛ obedzi mbrasɛm biara a Ewuradze bodua Joseph Nkɔnhyɛnyi no do dze ama no do.
1–4, Ahotseweefo no wɔ tum dɛ wɔbɛyɛ Nyame ne mba; 5–6, Egye asɛmpa no a, nna agye Christ; 7–14, Wɔhyɛ James Covel dɛ ɔmma wonnuma no na ɔnyɛ edwuma wɔ Ewuradze no wenyin ture mu; 15–21, Ewuradze no nkowaa wɔ dɛ wɔkã asɛmpa no ansaana Mbaa a Otsĩa Ebien no aso; 22–24, Wɔbɔboaboa hɔn a wɔgye asɛmpa no hɔn ano wɔ aber yi nye mbersantsen mu.
1 Yɛ aso na tsie nyia ɔwɔ hɔ fi mbersantsen nyina kesi mbersantsen nyina no, Okokroko Emi Mara no, Jesus Christ no mpo—
2 Wiadze ne kan nye nkwa no; kan a ɔhyerɛn wɔ sum mu na sum no nntum nnkyer no;
3 Emi nye nyia mebaa mankasa medze hɔ wɔ mber nkyekyɛmu ntamu, na mankasa medze anngye me no;
4 Na mbom dodowara a wɔgyee me no, memaa hɔn tum dɛ wɔmbɛyɛ me mba; na dɛmara so mpo na medze tum bɛma dodowara a wɔbɛgye me no, ama wɔaabɛyɛ me mba.
5 Na nokwar, nokwar, mese wo dɛ, nyia ɔgye m’asɛmpa no ɔgye me; na nyia ɔnngye m’asɛmpa no ɔnngye me.
6 Na iyi nye m’asɛmpa no—nnuho na nsu mu enuma, na ekyir no ogya nye Sunsum Krɔnkrɔn mu enuma ba, Ɔwerɛkyekyefo no a oyi ndzɛmba nyina kyerɛ na ɔkyerɛkyerɛ ndzɛmba a ɔyɛ ahenman n’asomdwee ndzɛmba no mpo no.
7 Na afei, hwɛ, mese ɔwo, m’akowaa James dɛ, mahwɛ wo ndwuma na minyim wo.
8 Na nokwar, mese wo dɛ, afei w’akoma atsen wɔ m’enyim aber yi mu; na, hwɛ, mehue nhyira kɛse egu w’etsifi;
9 Naaso, edzi awerɛhow kɛse, osian ahantanyɛ nye wiadze yi mu akɔdadwen ntsi apow me mpɛn pii.
10 Mbom, hwɛ, wo gyeda aba, sɛ ibetsie me ndze no a ɔse wo dɛ: Soɛr na wonnuma wo, na hohor wo bɔn gu, na bɔ me dzin, na wo nsa bɛkã mo Sunsum no, nye nhyira kɛse a innhun bi da.
11 Na sɛ eyɛ iyi a, mibesiesie wo ama dwumadzi kɛse bi. Ebɛkã m’asɛmpa ne mãhyɛ no a medze ama wɔ nda a odzi ekyir yi mu no, ahyɛmu a medze ama dɛ wɔmfa ngye mo nkorɔfo a wɔyɛ Israelfifo no.
12 Na ɔbɛba dɛ tum bɛba wo do; ibenya gyedzi kɛse, na mebɛba wo nkyɛn na medzi w’enyim kan.
13 Wɔafrɛ wo dɛ yɛ edwuma wɔ mo wenyin ture mu, na kyekyer m’asɔr, na kyekyer Zion, ama oeedzi ehurusi wɔ bepɔw no do na ɔaayɛ prɔmprɔm.
14 Hwɛ, nokwar, nokwar, mese wo dɛ, wɔammfrɛ wo dɛ kɔ boka nkurow no mu, na mbom wɔafrɛ wo dɛ kɔ Ohio no.
15 Na medze nhyira kɛse bi a wɔnntsee nkã da wɔ adasamba mu esie, na mber dodowara a mo nkorɔfo bɔboa hɔn ano wɔ Ohio no, mubohue egu hɔn etsifi. Na ofi hɔ no nyimpa bɔkɔ aman nyina mu.
16 Hwɛ, nokwar, nokwar, mese wo dɛ nkorɔfo a wɔwɔ Ohio no dze gyedzi kɛse frɛ me, na wɔdwen dɛ mebɛpem me nsa adze wɔ atsɛmbu mu wɔ aman do, na mbom munnkotum etwa abrɔdɔ wɔ m’asɛm ho.
17 Dɛm ntsi, hom mfa hom ahoɔdzen ndzi dwuma na hom mfrɛ edwumayɛfo nokwafo wɔ mo wenyin ture no mu, ama oesiesie mu wɔ aber a odzi ewiei yi mu.
18 Na mber dodow a wobonu hɔn ho na wɔagye m’asɛmpa ne mãhyɛ, na hɔn ho bɛtsew no, mebɛpem me nsa adze wɔ atsɛmbu mu.
19 Dɛm ntsi kɔ na fa ndze kɛse tsẽatsẽa mu dɛ: Ɔsor ahenman no abɛn; tsẽatsẽa mu kã dɛ: Hosanna! nhyira nkã Ɔsorsor Nyankopɔn ne dzin.
20 Kɔ konuma wɔ nsu mu, na siesie m’enyim kwan ma me mbae;
21 Osiandɛ aber no abɛn; na da anaa dɔn no dze nyimpa biara nnyim; na mbom ɔbɛba ampa.
22 Na nyia ɔgye dɛm ndzɛmba yinom no ɔgye me; na wɔbɔboa hɔn ano dze hɔn ama me wɔ aber yi nye mbersantsen mu.
23 Na bio, ɔbɛba dɛ dodowara a hom bonuma hɔn wɔ nsu mu no, hom mfa nsa ngu hɔn do, na wobenya Sunsum Krɔnkrɔn n’akyɛdze no, na wɔbɔhwehwɛ me mbae ho nsɛnkyerɛdze, na wobohu me.
24 Hwɛ, mereba ntsɛm. Ɔnyɛ hɔ dɛm. Amen.