Te Atua i rotopū ia tātou

’A feruri hōhonu ai au i teie uira’a, ’ua feruri au i tō tātou mau misiōnare taure’are’a Marite tei tāvini i rotopū ia mātou i te roara’a o taua mau matahiti ra. ’Ua fa’aru’e rātou i te pārurura’a o tō rātou fare i tera atu hope’a o te ao nei, ’e ’ua rātere mai i Heremani—e fenua nō tō rātou mau ’enemi ’aita i maoro a’e nei—nō te pūpū i te ti’aturi hanahana i tō mātou nūna’a. ’Aita rātou i haere mai nō te fa’ahapa, nō te a’o, ’aore rā, nō te fa’aha’amā. ’Ua hōro’a rātou ma te hina’aro mau i tō rātou ora feiā ’āpī ma te feruri ’ore i te ho’o tāhuti nei, ma te hina’aro noa e tauturu ia vetahi ’ē ’ia ’ite mai i te ’oa’oa ’e te hau tā rātou i ’ite.

Nō’u nei, e feiā ’āpī tamāroa ’e tamāhine ti’a roa teie. ’Ua pāpū roa iā’u ē, tē vai ra tō rātou mau hapehape, nō’u rā, ’aita roa ïa. E tāmau noa vau i te fa’ariro ia rātou ’ei mea rahi a’e i te orara’a—’ei mau melahi nō te māramarama ’e te hanahana, te mau fa’aterehau nō te aroha, te maita’i, ’e te parau mau.

’A paremo ai te ao nei i roto i te pāpū ’ore te mana’o, te ’ino’ino, te riri, ’e te mata’u, ’ua fa’a’ī te hi’ora’a ’e te mau ha’api’ira’a a teie feiā ’āpī iā’u i te tīa’ira’a. ’Ua hau a’e te parau poro’i tā rātou i pūpū i te mau poritita, te ’ā’amu, te tairoiro, te ’ino’ino, ’e te tārena a te ta’ata iho. ’Ua hōro’a te reira i te mau pāhonora’a hanahana i te mau uira’a faufa’a roa, tā mātou e vai ra i te roara’a o taua mau taime fifi ra.

Te parau poro’i ’oia ho’i, tē ora nei te Atua ’e tē ha’ape’ape’a nei nō mātou, i roto ato’a i teie mau hora o te ’ārepurepura’a, te pāpū ’ore, ’e te huehue. ’Ua fā mau mai iho ā ’oia i tō tātou nei ’anotau nō te fa’aho’i mai i te parau mau ’e te māramarama—tāna ’evanelia ’e tāna ’Ēkālesia. Tē paraparau fa’ahou nei ’oia i te mau peropheta, ē tei rotopū te Atua ia tātou—’e tei roto roa ’oia iho i tō tātou orara’a ’e tē arata’i mau nei i tāna mau tamari’i.

E mea māere mau, te mau mea tā tātou e nehenehe e ha’api’i mai nā roto i te hi’o-fātata-ra’a i te fa’anahora’a nō te fa’aorara’a ’e te fa’ateiteira’a a tō tātou Metua i te ao ra, te fa’anahora’a nō te ’oa’oa nō tāna mau tamari’i. ’Ia mana’o ana’e tātou ia tātou iho e mea faufa’a ’ore, ’ua fa’aru’ehia, ’e ’ua ha’amo’ehia, tē ha’api’i mai nei tātou ē, e nehenehe tātou e ’ite pāpū ē, ’aita te Atua i ha’amo’e ia tātou—tē pūpū mai nei rā ’oia i tāna mau tamari’i pā’āto’a i te hō’ē mea māere rahi : ’ia riro « ’ei mau fatu ’āi’a nō te Atua, ’e ’ei mau fatu ’āi’a ’āpiti ’e te Mesia ».²

E aha te aura’a o teie parau ?

’Oia ho’i, e ora tātou e ’a muri noa atu, e fāri’i i te ’īra’a o te ’oa’oa,³ ’e e ti’ara’a tō tātou ’ia « noa’a ho’i te mau terono, te mau bāsileia, te mau hau hui ari’i, ’e te mau mana ».⁴

E tupu te ha’eha’a rahi mau ’ia ’ite ē, e tupu mau teie ananahi nehenehe ’e te fa’ahiahia—’eiaha nō te mea ē, ’o vai tātou, nō te mea rā ē, ’o vai te Atua.

Ma te ’itera’a i te reira, nāhea e ti’a ai ia tātou ’ia ’ore e amuamu ’aore rā, e ’ino’ino ? Nāhea e ti’a ai ia tātou ’ia hi’o tūtonu noa i te repo, ’a ani mai ai te Ari’i o te mau ari’i ia tātou ’ia horo ’ē i te hō’ē ananahi māere o te poupou hanahana ?⁵

Maoti te here rahi o te Atua nō tātou ’e te tusia mure ’ore o Iesu Mesia, e nehenehe tā tātou mau hara—tei rahi ’e tei na’ina’i—e tūmāhia ’e e ’ore e ha’amana’o-fa’ahou-hia.⁶ E nehenehe tātou e ti’a i mua iāna ma te vi’ivi’i ’ore, te ti’amā, ’e te ha’amo’ahia.

Tē ’ī nei tō’u ’ā’au i te māuruuru nō tō’u Metua i te ao ra. Tē ’ite nei au ē, ’aita ’oia i fa’autu’a i tāna mau tamari’i ’ia hi’a i roto i te tāhuti nei ma te ti’aturira’a ’ore i te hō’ē ananahi māramarama ’e te mure ’ore. ’Ua hōro’a mai ’oia i te mau arata’ira’a ’o te heheu mai i te rāve’a nō te ho’i iāna ra. ’E i rōpū i te reira mau mea ato’a, tē vai ra tāna tamaiti here ’o Iesu Mesia⁷ ’e te ’ohipa tāna i rave nō tātou.

’Ua taui roa te tāra’ehara hope ’ore a te Fa’aora i te huru e ti’a ai ia tātou ’ia hi’o i tā tātou mau hara ’e tō tātou mau huru ti’a ’ore. Maoti i te fa’atāerera’a i ni’a i te reira ’e te ferurira’a ’aita e rāve’a fa’ahou ’aore rā ’aita e tīa’ira’a, e nehenehe tātou e ha’api’i mai nā roto mai i te reira ’e ’ia fāri’i tātou i te ’īra’a o te ti’aturira’a.⁸ E fa’ati’a te hōro’a tāmā o te tātarahapa ia tātou ’ia vaiiho i tā tātou mau hara i muri ’e ’ia pipiha mai ’ei ta’ata ’āpī.⁹

Maoti Iesu Mesia, ’aita tō tātou mau manuia ’ore e fa’ata’a i tō tātou huru. E nehenehe te reira e ha’amaita’i ia tātou.

Mai te hō’ē ta’ata ha’uti ’upa’upa e tāpiti noa i tāna mau nota, e nehenehe tātou e ’ite i tō tātou mau ta’ahira’a hape, tō tātou mau hapehape ’e tā tātou mau hara ’ei mau rāve’a nō te ’ite rahi atu ā ia tātou iho, te hō’ē here rahi atu ’e te ha’avare ’ore nō vetahi ’ē ’e te ha’amaita’ira’a nō te tātarahapa.

Mai te mea e tātarahapa tātou, e’ita te mau hara e fa’ati’a ia tātou. E tuha’a te reira nō tō tātou haerera’a i mua.

E mau ’aiū tātou pā’āto’a ’ia fa’aauhia i te mau ta’ata hanahana ’e te teitei i fa’ata’ahia ’ia riro mai tātou. ’Aita e ta’ata tāhuti e haere nā mua ma te ’ore e ne’e ’e ’ia horo ma te turori ’ore, ’e ’ia pinepine te orura’a, ’e te mau pēpē. E mea nā reira tātou ’ia ha’api’i mai.

Mai te mea e tāmau noa tātou i te fa’a’ohipa ma te itoito, e tūtava ’ia ha’apa’o noa i te mau fa’auera’a a te Atua, ’e e tauto’o pāpū ’ia tātarahapa, ’ia fa’a’oroma’i māite, ’e ’ia fa’a’ohipa i te mau mea tā tātou i ha’api’i mai, te a’o nā ni’a te a’o, e ha’aputu mai tātou i te māramarama i roto i tō tātou vārua.¹⁰ ’E noa atu e’ita tātou e māramarama hope roa i tō tātou fāito mau i teienei, « ’ua ’ite ra tātou ē, ’ia fā mai [te Fa’aora] », e ’ite tātou i tōna hōho’a mata i roto ia tātou, ’e « e ’ite ho’i tātou iāna i tōna ra huru mau ».¹¹

’Auē ïa fafaura’a fa’ahiahia !

’Oia mau, tei roto te ao nei i te ’āehuehu. ’E ’oia mau, tē vai ra tō tātou mau paruparu. ’Aita rā e tītauhia ia tātou ’ia pi’o i tō tātou upo’o i raro i roto i te tapineva, nō te mea e nehenehe tātou e ti’aturi i te Atua, e nehenehe tātou e ti’aturi i tāna Tamaiti, ia Iesu Mesia, ’e e nehenehe tātou e fāri’i i te hōro’a o te Vārua nō te arata’i ia tātou i ni’a i teie ’ē’a e tae atu ai i te hō’ē orara’a tei ’ī i te ’oa’oa ’e te poupou hanahana.¹²

Pinepine au i te uiui ē, E aha tā Iesu e ha’api’i ’e e rave ’āhiri ē, tei rotopū ’oia ia tātou i teie mahana ?

I muri mai i te ti’afa’ahoura’a, ’ua fa’atupu Iesu Mesia i tāna parau fafau e haere e fārerei i « te tahi atu mau māmoe » tāna.¹³

Tē parau ra te Buka a Moromona : Te tahi atu ’ite nō Iesu Mesia, i te reira fāra’a mai i te mau ta’ata i ni’a i te fenua Amerika. Tē vai ra tā tātou teie parau pāpa’i faufa’a roa ’ei fa’a’itera’a pāpū i te ’ohipa a te Fa’aora.

’Ua ora nā te nūna’a nō te Buka a Moromona i te tahi atu pae o te ’ōpenu fenua—e mea ta’a ’ē roa tō rātou mau ’ā’amu, te ta’ere, ’e te pae poritita i tō te mau ta’ata tā Iesu i ha’api’i i tōna tau tāvinira’a i te tāhuti nei. ’E ’ua ha’api’i ho’i ’oia ia rātou e rave rahi mau mea, e hō’ē ā mau mea tāna i ha’api’i i te fenua mo’a.

Nō te aha ’oia i nā reira ai ?

E ha’api’i noa te Fa’aora i te mau parau mau e au i te mau tau ato’a. E au te reira nō te mau ta’ata o te mau fāito matahiti ato’a ’e i roto i te huru orara’a ato’a.

I riro nā ’e tē riro nei tāna parau poro’i ’ei poro’i nō te tīa’ira’a ’e te tā’amura’a—e fa’a’itera’a pāpū ē, e’ita roa te Atua tō tātou Metua i te ao ra e fa’aru’e i tāna mau tamari’i.

Tei rotopū te Atua ia tātou !

E piti hānere matahiti i ma’iri a’e nei, ’ua ho’i fa’ahou mai te Fa’aora i te fenua nei. ’Ua fā ’āmui mai ’oia ’e te Atua te Metua ia Iosepha Semita, 14 matahiti ’e ’ua ’ōmua i te fa’aho’ira’a mai o te ’evanelia ’e te ’Ēkālesia a Iesu Mesia. Mai taua mahana ra, ’ua vetea te mau ra’i, ’e ’ua pou mai te mau ve’a nō te ra’i nā roto mai i te mau piha o te hanahana tāhuti ’ore. ’Ua māni’i mai te māramarama ’e te ’ite nā ni’a mai i te terōno tīrētiēra.

’Ua paraparau fa’ahou mai te Fatu Iesu Mesia i tō te ao nei.

E aha tāna i parau ?

Nō tō tātou ha’amaita’ira’a, e rave rahi mau parau tāna tei pāpa’ihia i roto i Te Parau Ha’api’ira’a ’e te mau Parau Fafau—e roa’a i te mau ta’ata ato’a i te ao nei ’o tē hina’aro e tai’o ’e e tuatāpapa i te reira. ’Auē ïa te faufa’a rahi o teie mau parau nō tātou i teie mahana !

’E ’eiaha tātou e hitimahuta ’ia ’ite ē, tē ha’api’i fa’ahou nei te Fa’aora i te parau poro’i tumu o tāna ’evanelia : « E here ’oe i te Fatu ra o tō ’oe Atua ma tō ’ā’au ato’a, ’e i tō pūai ato’a, te mana’o, ’e te itoito ; ’e nā roto i te i’oa o Iesu Mesia ’oe e tāvini atu ai iāna ra ».¹⁴ Tē fa’auru mai nei ’oia ia tātou ’ia ’imi i te Atua¹⁵ ’e ’ia ora i te mau ha’api’ira’a tāna i heheu mai i tōna mau tāvini, te mau peropheta.¹⁶

Tē ha’api’i mai nei ’oia ia tātou ’ia aroha i te tahi ’e te tahi¹⁷ ’e « ’ia ’ī i te aroha i te mau ta’ata ato’a ».¹⁸

Tē ani mai nei ’oia ia tātou ’ia riro ’ei rima nōna, ’ia rave i te maita’i.¹⁹ « ’Eiaha tō tātou te aroha… ’ei aroha rave rā, ’ei mea mau ».²⁰

Tē tītau nei ’oia ia tātou ’ia ha’apa’o i tāna hōpoi’a rahi : ’ia here, ’ia hōro’a, ’ia ani i te mau ta’ata ato’a i tāna ’evanelia ’e i tāna ’Ēkālesia.²¹

Tē fa’aue nei ’oia ia tātou ’ia patu i te mau hiero mo’a ’e ’ia tomo i roto ’e ’ia tāvini i reira.²²

Tē ha’api’i nei ’oia ia tātou ia riro ’ei mau pipi nāna—’eiaha tō tātou ’ā’au ’ia tauto’o nō te mana o te ta’ata iho, nō te tao’a, nō te ha’amanara’a, ’aore rā, nō te ti’ara’a. Tē ha’api’i nei ’oia ia tātou « e ha’apae ’oe i te mau mea nō teie nei ao, ’e e tītau ho’i i te mau mea nō tei maita’i a’e ra ».²³

Tē a’o nei ’oia ia tātou ’ia ’imi i te ’oa’oa, te māramarama, te hau, te poupou,²⁴e te parau fafau nō te tāhuti ’ore ’e te ora mure ’ore.²⁵

E rave ana’e i te ta’ahira’a ’āvae hau atu. ’Āhani pai e haere mai Iesu i roto i tā ’outou pāroita, tā ’outou ’āma’a, ’aore rā, i tō ’outou fare i teie mahana. E aha ïa te huru o te reira ’ohipa ?

E ’ite ’āfaro ’oia i roto i tō ’outou ’ā’au. E mo’e te faufa’a o te mau huru i rāpae’au. E ’ite ’oia ia ’outou ’ia au i tō ’outou huru mau. E ’ite ’oia i te mau hina’aro o tō ’outou ’ā’au.

E fa’ati’a ’oia i tei marū ’e tei ha’eha’a.

E fa’aora ’oia i tei ma’ihia.

E hōro’a ’oia i tei fē’a’a i te fa’aro’o ’e i te itoito nō te ti’aturi.

E ha’api’i ’oia ia tātou ’ia ’īriti i tō tātou ’ā’au i te Atua ’e ’ia toro i te rima ia vetahi ’ē.

E ’ite ’oia ’e e fa’atura i tei ha’avare ’ore, te ha’eha’a, te parauti’a, te ha’apa’o maita’i, te here ’e te aroha.

Hō’ē hi’ora’a i roto i tōna mata e taui roa tō tātou huru. E taui roa tātou ē a muri noa atu. E tauihia nā roto i te ’itera’a hōhonu ē, ’oia mau, tei rotopū te Atua ia tātou.

’Ua hi’o vau i muri ma te maita’i i te taure’are’a tā’u i riro mai i te roara’a o te mau matahiti o tō’u pa’arira’a. ’Āhiri e nehenehe tā’u e ho’i fa’ahou i te tau i muri, e tāmāhanahana vau iāna ’e e parau iāna ’ia fa’aea noa i ni’a i te ’ē’a maita’i ’e ’ia tāmau ā i te ’imi. ’E e ani au iāna ’ia ani manihini ia Iesu Mesia i roto i tōna orara’a, nō te mea tei rotopū te Atua ia tātou !

Ia ’outou e tō’u mau taea’e ’e mau tuahine here, tō’u mau hoa here, ’e i te feiā ato’a ’o tē ’imi nei i te mau pāhonora’a, te parau mau ’e te ’oa’oa, tē hōro’a atu nei au i teie ā parau a’o : ’A ’imi tāmau noa ma te fa’aro’o ’e te fa’a’oroma’i.²⁷

E ani, ’e e roa’a ho’i tā ’outou. E pātōtō, e ’īritihia mai ho’i ia ’outou.²⁸ ’A ti’aturi i te Fatu.²⁹

Tā tātou terā ’ohipa tumu i roto i tō tātou orara’a i te mau mahana ato’a, ’e e rāve’a ha’amaita’ihia nō te fārerei i te Atua.

’A tu’u ai tātou i te te’ote’o i te hiti, ’e ’a ha’afātata atu ai tātou i tōna ra terōno ma te ’ā’au tae ’e te vārua marū,³⁰ e ha’afātata mai ’oia i pīha’i iho ia tātou.³¹

’A ’imi ai tātou i te pe’e ia Iesu Mesia ’e ’ia haere nā ni’a i te ’ē’a o te ti’ara’a pipi, te a’o nā ni’a iho i te a’o, e tae mai te mahana e ’ite ai tātou i taua hōro’a fāito ’ore ra nō te fāri’ira’a i te ’īra’a o te ’oa’oa.

E a’u mau hoa here, e here rahi tō te Metua i te Ao ra ia ’outou. ’Ua fa’a’ite pāpū mai ’oia i tōna here ma te hope ’ore, nā roto iho ā rā i te hōro’ara’a mai i tāna tamaiti fānau tahi ’ei tusia ’e ’ei ō nō tāna mau tamari’i nō te fa’atupu i te ho’ira’a i tō tātou nā Metua i te ao ra ’ei ’ohipa mau.

Tē fa’a’ite pāpū nei au ē, tē ora nei tō tātou Metua i te ao ra, ē tē fa’atere nei Iesu Mesia i tāna ’Ēkālesia, ’o te peresideni Russell M. Nelson ’o tāna ïa peropheta.

Tē pūpū atu nei au ia ’outou i tō’u here ’e te ha’amaita’ira’a nō teie tau ’oa’oa o te Pāsa. ’A ’īriti i tō ’outou ’ā’au i tō tātou Fa’aora ’e te Tāra’ehara, noa atu te huru o tō ’outou orara’a, te mau tāmatara’a, te mau māuiui, ’aore rā, te mau hape, e ’ite mai ’outou ē, tē ora nei ’oia, tē here nei ’oia ia ’outou, ’e e maoti ’oia, e ’ore roa atu ’outou e vai ’ōtahi noa.

Tei rotopū te Atua ia tātou.

Nō teie, tē fa’a’ite nei au ’e tē ha’apāpū nei au nā roto i te i’oa mo’a o Iesu Mesia ra, ’āmene.