E riro mai tō tātou ’oto ’ei ’oa’oa

E rave rahi matahiti i ma’iri, ’a haere ai au i te mau purera’a i Roto Miti, ’ua fāri’i-aroha-hia mai au e tō tātou peropheta here, o Russell M. Nelson. I roto i te hō’ē fa’anahora’a tāmāhanahana nāna iho, ’ua ani mai ’oia iā’u : « Mark, e aha te huru o tō ’oe māmā ? »

’Ua parau vau iāna ē i pīha’i iho vau iāna i te ’ōmuara’a o taua hepetoma ra i tōna fare i Niu Terani ’e tē pa’ari noa atu ra ’oia ’ua ’ī rā i te fa’aro’o ’e ’ua riro ’ei fa’aurura’a nō te mau ta’ata ato’a i mātau iāna.

I muri iho ’ua parau ’oia : « ’A fa’a’ite i te tāpa’o o tō’u here iāna […] ’e ’a parau iāna ē tē ’oa’oa nei au ’ia fārerei fa’ahou iāna ».

’Ua māere ri’i au ’e ’ua ui au :« Tē vai rā anei tō ’oe hō’ē tere ’o tei fa’anahohia nō Niu Terani i te mau taime e haere mai nei ? »

Ma te mana’o tae feruri maita’i ’ua pāhono mai ’oia : « ’Aita roa atu, e fārerei fa’ahou vau iāna i roto i te orara’a a muri atu ».

’Aita roa atu hō’ē a’e tapitapira’a i roto i tāna pāhonora’a. ’Ua riro te reira ’ei fa’a’itera’a ’ōhie roa nō te parau mau. I roto i taua taime mo’emo’e, tīa’i-’orehia, ’ua fa’aro’o ’e ’ua fāri’i au i te ’itera’a pāpū ateate nō te hō’ē peropheta ora ē e tāmau noa te orara’a i muri a’e i te pohe.

I tē ’āmuira’a nō teie hope’a hepetoma, e fa’aro’o mai ’outou i te mau ’āpōsetolo ’e te mau peropheta ora e fa’a’ite pāpū mai nō te ti’afa’ahoura’a o Iesu Mesia. « Te mau parau tumu nō tō tātou haʼapa’ora’a ʼo te ʼiteraʼa pāpū ïa o te mau ʼāpōsetolo ʼe te mau peropheta, nō ni’a ia Iesu Mesia, ’e ’ua pohe ʼoia, ’ua tanuhia ’oia, ʼe ’ua ti’afaʼahou mai i te toru o te mahana […] te tahi atu mau mea atoʼa nō ni’a i tō tātou haʼapa’oraa e mau hu’ahu’a ana’e ïa nō te reira [parau mau] ».¹ Tē fafau nei au ē ia ’outou ē mai te mea e fa’aro’o ’outou ma te ’ā’au tae, e ha’apāpū mai te Vārua i tō ’outou mana’o ’e tō ’outou māfatu i te parau mau o teie mau ’itera’a pāpū.²

’Ua taui roa te mau ’āpōsetolo tahito a Iesu i muri iho i tōna fāra’a atu ia rātou i muri mai i tōna pohera’a. E ’ahuru o rātou ’o tei ’ite nā roto ia rātou iho ē ’ua ti’afa’ahou mai ’oia. Toma, ’o tei ma’iri i reira, ’ua fa’ahiti ’oia : « I ’ore au i ’ite […] e ’ore roa ïa vau e fa’aro’o ».³ ’Ua ha’api’i Iesu ia Toma : « ’Eiaha e fa’aro’o tai’atā, e fa’aro’o rā ».⁴ I muri iho ’ua ha’api’i te Fatu i te ti’ara’a faufa’a rahi o te fa’aro’o : « E ao tō te feiā ’aore i hi’o mai, ’e ’o tei fa’aro’o mai na ».⁵

’Ua hōro’a atu ra te Fatu tei ti’afa’ahou mai i tāna mau ’āpōsetolo i tē hōpoi’a ’ia fa’a’ite pāpū nō ni’a iāna. Mai tō tātou mau ’āpōsetolo ora i teie mahana, ’ua vaiiho rātou i tō rātou mau pe’ape’a o te ao nei ’e ’ua rave rātou i te toe’a o tō rātou orara’a nō te fa’a’ite ma te itoito ē ’ua fa’ati’a mai te Atua i taua Iesu ra. ’Ua arata’i tō rātou mau ’itera’a pāpū pūai e rave rahi tauatini ta’ata ’ia fāri’i i te anira’a ’ia bāpetizohia.⁶

’Ua riro te poro’i hanahana nō te poipoi Pāsa ’ei poro’i pū nō te mau keresetiano ato’a. ’Ua tia fa’ahou mai Iesu Mesia mai te pohe mai, ’e nā roto i te reira, e ora fa’ahou ā tātou i muri a’e i tō tātou pohera’a. Tē hōro’a mai nei ïa teie ’itera’a i te aura’a ’e te fā i tō tātou nei orara’a. Mai te mea e haere tātou i mua ma te fa’aro’o, e tauihia ïa tātou ē a muri noa atu, mai te mau ’āpōsetolo i tahito ra. Mai ia rātou, e ti’a ia tātou ’ia fa’a’oroma’i i te mau fifi ato’a ma tē fa’aro’o ia Iesu Mesia. E hōroa ato’a mai teie fa’aro’o ia tātou i te ti’aturira’a nō te hō’ē taime « e riro ai tō tātou ’oto ’ei ’oa’oa ».⁷

’Ua ha’amata tōu iho fa’aro’o i muri a’e i te hō’ē taime ’oto.

E mau ta’ata fa’a’amu māmoe tō’u metua tāne ’e tō’u metua vahine i Niu Terani.⁸ ’Ua ’oa’oa rāua i tō rāua orara’a. ’Ei nā ta’ata fa’aipoipo ’āpī, ’ua ha’amaita’ihia rāua i nā tamāhine iti e toru. Tē hope’a o rātou ’o Ann te i’oa. I te hō’ē mahana, ’a haere ’āmui ai rātou i te hō’ē tau fa’afa’aeara’a i te hō’ē roto, ’ua mo’e ’o Ann e 17 ’āva’e tōna. I muri iho te tahi minuti pā’imira’a tapineva, ’ua ’itehia mai tōna tino pohe i roto i te pape.

’Ua fa’atupu teie ’ati i te ’oto rahi. ’Ua pāpa’i pāpā e rave rahi mau matahiti i muri mai ē ’ua matara te hō’ē tuha’a o te mau ’atara’a mai roto atu i tō rātou orara’a ē a muri noa atu. ’Ua fa’atupu ato’a te reira i te hia’ai ’ia fāri’i i te mau pāhonora’a nō te mau uira’a faufa’a roa o te orara’a nei : E aha te mea e tupu mai i ni’a i tā mātou Ann here iti ? E ’ite fa’ahou ānei mātou iāna ? Nāhea tō mātou ’utuāfare e nehenehe ai e ’oa’oa fa’ahou ?

Tau matahiti i muri mai i teie ’ati, ’ua haere mai e piti misiōnare nō te ’Ēkālesia a Iesu Mesia i te Feiā Mo’a i te mau Mahana Hope’a nei i tō mātou fare fa’a’amura’a māmoe. ’Ua ha’amata rāua i te ha’api’i i te mau parau mau e ’itehia i roto i te Buka a Moromona ’e te Bibilia. Teie mau parau mau ’o te pāpūra’a ïa ē tē ora nei ’o Ann i teienei i roto i te ao vārua. Nō tē ti’afa’ahoura’a o Iesu Mesia, e ti’afa’ahou ato’a ’oia. ’Ua ha’api’i mai rāua ē ’ua fa’aho’i-fa’ahou-hia mai te ’Ēkālesia a Iesu Mesia i ni’a i tē fenua nei ’oia ato’a te hō’ē peropheta ora ’e e ’ahuru ma piti ’āpōsetolo. ’E ’ua ha’api’i rāua i te ha’api’ira’a tumu ta’a ’ē ’e te fa’ahiahia ē e ti’a i te mau ’utuāfare ’ia tā’ati-’āmui-hia ē a muri noa atu nā roto i te mana autahu’ara’a tā Iesu Mesia i hōroa i tāna ra ’āpōsetolo fa’atere, ’o Petero.⁸

’Ua ’ite ’oi’oi a’era o Māmā i te parau mau ’e ’ua fāri’i i tē hō’ē fa’a’itera’a a te Vārua. Terā rā, i te matahiti i muri mai ’ua ’aro ’o pāpā i te fē’a’a ’e te mau tūpa’ipa’ira’a pae vārua. ’Ua ’ōtohe ri’i ’oia e taui i tōna huru orara’a. I te hō’ē po’ipoi i muri a’e i te hō’ē pō ta’oto ’ore, ’a ta’ahi noa ai ’oia i ni’a i te tahua, ’ua fāriu atu ra ’oia i ni’a ia māmā ma te parau ē : « I teie mahana vau e bāpetizo ai ’e ’aore rā ’e’ita roa atu ».

’Ua parau ’o māmā i te mau misiōnare i te ’ohipa i tupu, ’e ’ua ’ite ’oi’oi a’era rāua i te purapurara’a o te fa’aro’o i roto i tō’u metua tāne i terā taime ’o tē ’ama ’e ’aore rā ’o tē tūpohehia.

I taua po’ipo’i roa ra, ’ua tere atu tō mātou ’utuāfare i te pae tahatai piri roa a’e. Ma te ’ore i ’ite i te ’ohipa e tupu ra, ’ua haere mātou te mau tamari’i i te hō’ē ’amura’a mā’a i ni’a i te tahua one ’a aratai ai ’o Elder Boyd Green ’e ’o Gary Sheffield i tō’u nā metua i roto i te moana ’e ’ua bāpetizo ia rāua. Nā roto i te tahi atu ’ohipa nō te fa’aro’o, ’ua fafau ’ōmo’e ’o pāpā i te Fatu ē noa atu e aha tē tupu mai, e vai parauti’a noa ’oia i roto i tōna orara’a tā’āto’a i te mau fafaura’a tāna i rave.

Hō’ē matahiti i muri mai ’ua ha’amo’ahia te hiero i Hamilton, i Niu Terani. ’Aita i maoro roa i muri iho ’ua tūturi tō mātou ’utuāfare, ’e te tahi ti’a nō te mono ia Ann, ’atiti’a i te fata i roto i taua fare mo’a ra o te Fatu. I reira, nā roto i te mana o te autahu’ara’a, ’ua tāhō’ēhia mātou ’ei ’utuāfare mure ’ore i roto i te hō’ē ’ōro’a ’ōhie ’e te nehenehe. ’Ua hōpoi mai te reira i te hau ’e te ’oa’oa rahi.

E rave rahi matahiti i muri mai, ’ua parau mai ’o pāpā iā’u ē, ’āhiri ’aita te pohe ’ati rahi o Ann, ’aita roa atu ïa ’oia e fa’aha’eha’a nō tē fāri’i i te ’evanelia i fa’aho’i-fa’ahou-hia mai. Noa atu rā i te reira ’ua tu’u mai te Vārua o te Fatu i te ti’aturira’a ē te mea tā te mau misiōnare i ha’api’i e parau mau ïa. ’Ua tāmau noa te fa’aro’o o tō’u nā metua i te tupu i te rahi ē tae roa atu ’ua ’ama rāua tāta’itahi i te auahi o te ’itera’a pāpū ’o tei arata’i ma te tūrērua ’e te ha’eha’a i tā rāua mau fa’aotira’a ato’a i roto i te orara’a.

E vai noa tō’u māuruuru nō tē hi’ora’a maita’i o tō’u nā metua i mua i te mau u’i nō ’ananahi. E’ita e nehenehe e fāito i te rahira’a orara’a o tei taui a muri noa atu nā roto i tā rāua mau ’ohipa fa’aro’o ’ei pāhonora’a i te ’oto rahi.

Tē ani manihini nei au i te feiā ato’a e ’oto nei, te feiā ato’a e ’aro nei i te fē’a’a, te feiā ato’a e ui nei e aha tē tupu i muri a’e i tō tātou pohera’a, ’ia tu’u i tō ’outou fa’aro’o i roto i te Mesia. Tē fafau nei au ē mai te mea e hina’aro ’outou e ti’aturi, ’e i muri iho e ’ohipa i roto i te fa’aro’o ’e e pe’e i te mau muhumuhu a te Vārua, e ’ite ïa ’outou i te ’oa’oa i roto i teie orara’a ’e i roto i te ao a muri a’e.

’Auē ïa tō’u tīa’ira’a i te mahana e fārerei ai au i tō’u tuahine ’o Ann. Tē tīai nei au i tē hō’ē fārereira’a ’oa’oa ’e tō’u metua tāne, tei pohe ’a 30 matahiti i teienei. Tē fa’a’ite pāpū nei au i te ’oa’oa e ’itehia i roto i te orara’a nā roto i te fa’aro’o, ma te ti’aturi ma te ’ite ’ore te mata, ma te ’ite rā nā roto i te mana o te Vārua Maita’i ē tē ora nei Iesu Mesia. Ma tō’u ’ā’au ato’a ’e tō’u vārua, tē mā’iti nei au ’ia pe’e ia Iesu Mesia ’e tāna ’evanelia tei fa’aho’i-fa’ahou-hia mai. Tē ha’amaita’i nei te reira i te mau tuha’a ato’a o tō’u orara’a. ’Ua ’ite au ē ’o Iesu te Mesia, te Tamaiti a te Atua, tō tātou Fa’aora ’e tō tātou Tāra’ehara. I te i’oa o Iesu Mesia, ’āmene.