Ha’api’ira’a mai tā te Fa’aora

Tau ’āva’e i ma’iri, ’ua parau mai tō’u hoa ha’api’ira’a tahito nō tō mātou ’oire nō Overton i Nevada, e fa’aineine māua i te hō’ē tao’a Noela nō tā māua ’orometua ha’api’ira’a tamahou tei ra’ehia a’enei tōna 98 matahiti. ’Ua ha’api’i mai ’oia ’ia hāmani maita’i i te ta’ata, nā reira ato’a te faufa’a rahi nō te taime ta’oto’otora’a, te au o te ū ’e te faraoa pa’apa’a graham, ’e ’ia here te tahi i te tahi. Māuruuru e te tuahine Davis nō te rirora’a ’ei ’orometua maita’i mau.

Hōho’a

Te tuahine Davis

Tē vai ato’a nei te tahi atu ’orometua ta’a ’ē mau nō’u, i te fare ha’api’ira’a Ricks College, e rave rahi matahiti i ma’iri. Tē fa’aineine ra vau nō te haere i tā’u misiōni, ’ua mana’o a’era vau e mea au ’ia haere atu vau i te piha fa’aineinera’a misiōnare. ’Ua taui roa tō’u orara’a i te ’ohipa i tupu.

Te mahana mātāmua ra iho ā, ’ua mana’o vau, e ’orometua rahi teie i mua iā’u. ’O te taea’e F. Melvin Hammond ïa te ’orometua. ’Ua ta’a roa iā’u ē, ’ua here te taea’e Hammond i te Fatu, ’e iā’u ato’a ho’i. Tē ’ite ra vau i ni’a i tōna mata ’e i roto i tōna reo. ’Ia ha’api’i ’oia, e māramarama tō’u ferurira’a i te Vārua. ’Ua ha’api’i ’oia i te ha’api’ira’a tumu, ’ua tītau ato’a rā iā’u ’ia ha’api’i i te reira i tō’u iho pae. Nā te reira tītaura’a i tauturu iā’u ’ia ta’a maita’i i tā’u hōpoi’a ’ia ha’api’i i te ha’api’ira’a tumu a te Fatu nō’u iho nei. ʼUa taui a muri noa atu te reira iā’u. Māuruuru e te taea’e Hammond nō te ha’api’ira’a mai, mai tā te Fa’aora.

Te mau taea’e ’e te mau tuahine, e tano te reira huru ha’api’ira’a nō te mau ta’ata ato’a, i te fare ’e i te fare purera’a.

I roto i te parau ’ōmuara’a nō te Mai, pe’e mai tē vai ra te hi’ora’a nō te maita’i o te ha’api’ira’a i te ta’ata mai te Mesia te huru. Tē nā ’ō ra : « Te fā nō te ’ohipa ha’api’ira’a ’evanelia, ’o te fa’ahōhonura’a ïa i tō tātou fa’afāriura’a ia Iesu Mesia ’e te tauturura’a… ’ia riro rahi atu ā mai iāna te huru… E’ita rā te huru ha’api’ira’a ’evanelia e ha’apūai i tō tātou fa’aro’o ’e e fa’atupu i te tauira’a temeio nō te fa’afāriura’a, e tupu i terā iho taime. E tupu rā i muri iho i te piha ha’api’ira’a, i roto i te ’ā’au ’e i te fare o te ta’ata hō’ē ».¹

Tē parau ra te mau pāpa’ira’a mo’a ē, nō te pūai ’e te parare o te tāvinira’a a te Fa’aora i Amerika tahito ra, « ’ua hope te ta’ata i te fenua ē ’ati noa a’e, ’o te ’āti Nephi ’e te ’āti Lamana ato’a ho’i, i te fa’afāriuhia i te Fatu, ’aita roa e mārō ’e te tama’i i roto ia rātou, ’e ’ua rave te mau ta’ata ato’a ra i te mea ti’a te tahi i te tahi ».²

Nāhea tātou e nehenehe ai e fa’atupu i te reira huru ’ohipa i ni’a i te ta’ata tā tātou i here ? Nāhea tātou i te ha’api’i rahi atu ā mai te Fa’aora te huru, ma te tauturu i te ta’ata ’ia fa’afāriu rahi atu ā ia rātou ? E hōro’a atu vau i te tahi mana’o.

’A tahi ’e nā mua roa, e tauto’o tātou iho i te ha’api’i mai i te mau mea ato’a nō ni’a i te ’Orometua rahi. Nāhea ’oia i te fa’a’itera’a i te here i te ta’ata ? E aha tō rātou mana’o i te ha’api’ira’a ’oia ? E aha tāna i ha’api’i atu ? E aha tāna mau tītaura’a ia rātou tāna i ha’api’i ? ’Ia oti teie mau parau i te tuatāpapahia, ’a hi’opo’a ’e ’a fa’atano i tā ’outou huru ha’api’ira’a nō te riro rahi atu ā mai iāna te huru.

’Ua fa’aineine te ’Ēkālesia e rave rahi mātēria ha’api’ira’a i roto i te fa’anahora’a Vaira’a buka ’evanelia ’e i ni’a i te tahua natirara ChurchofJesusChrist.org. Te vai nei te buka ra, Ha’api’ira’a mai tā te Fa’aora. Tē ani nei au ia ’outou ’ia tai’o ’e ’ia tuatāpapa i tō te reira mau parau ato’a. Nā teie mau parau tumu e tauturu ia ’outou i roto i tā ’outou tauto’ora’a ’ia riro rahi atu ā mai te Mesia te huru i roto i tā ’outou ha’api’ira’a.

Te mana’o nō muri iho, e nehenehe ïa e fa’ahōho’ahia i te hō’ē ’ohipa i tupu iā’u tau ’āva’e i ma’iri a’enei, i te tāpe’ara’a vau nō te paraparau i te hō’ē hoa iti. Tē fa’aro’o ra vau i tāna vahine i roto i te fare, tē paraparau ra i te tahi atu ta’ata, nō reira ’ua vaiiho vau iāna, ’ia haere atu ’oia ’e tōna ’utuāfare.

Hō’ē hora i muri iho, ’ua fāri’i au i te hō’ē poro’i niuniu nā tāna vahine iti : « E te taea’e Newman, māuruuru nō te haerera’a mai. Tātarahapa mai ’aita mātou i fāri’i ia ’oe i roto i te fare, tē hina’aro nei au e fa’a’ite atu ia ’oe te tumu. Mai te ha’amatara’a nō te pararera’a ma’i pohe, e ’āparau māua i tā māua mau tamari’i pa’ari i te Mai, pe’e mai i te mau sābati ato’a nā ni’a i te fa’anahora’a Zoom. ’E ’ua tupu mau te mau temeio. ’A tahi rā paha tā māua tamāhine ’a tai’o ai i te Buka a Moromona ’o ’ōna ana’e. I teie mahana te ha’api’ira’a hope’a nō ni’a i te Buka a Moromona, tē fa’aoti ra mātou ’a tae mai ai ’oe […] ’Ua mana’o vau e au paha ’oe ’ia ’ite nāhea te Mai, pe’e mai, te Zoom, ’e te pararera’a ma’i pohe i te fa’afāna’o i te taime tano roa nō te taui i te hō’ē ’ā’au […] Tē uiui ra tō’u mana’o, e fea pa’i temeio iti tei tupu i roto i teie tau huru ’ē ».

Iā’u nei, e tupura’a teie nō te parau a te peresideni Russell M. Nelson i te ’āva’e ’Ātopa 2018. ’Ua nā ’ō mai ’oia ē tē vai nei i roto i te fa’anahora’a ha’api’ira’a tei fa’atumuhia i ni’a i te ’utuāfare, ’e e turuhia e te ’Ēkālesia, te « fāito pūai nō te tu’u i te mana o te mau ’utuāfare, ’a pe’e māite ai te ’utuāfare tāta’itahi ’e ’a ha’apa’o ai rātou i te reira nō te fa’ariro i tō rātou ’utuāfare ’ei vāhi mo’a nō te fa’aro’o. Tē parau fafau atu nei au ē, ’ia ha’a itoito noa ’outou nō te fa’aau i tō ’outou ’utuāfare ’ei pū nō te ha’api’ira’a ’evanelia, e riro mai ïa tā ’outou mau sābati ’ei mahana hina’arohia. E ’ana’anatae roa mai tā ’outou mau tamari’i i te ha’api’i mai ’e i te ora i te mau ha’api’ira’a a te Fa’aora… E taui roa mai tō ’outou ’utuāfare ’e e vai noa mai te reira maita’i ».³ ’Auē ïa fafaura’a fa’ahiahia !

Nō te taui mau i te orara’a, e mea ti’a i te fa’afāriura’a ia Iesu Mesia ’ia ravehia ma tō tātou vārua ato’a, ’e ’ia ō i roto i te mau tuha’a ato’a o tō tātou orara’a. Nō reira e mea ti’a i te reira ’ia rōtahi tātou i ni’a i te pū o tō tātou orara’a—’oia ho’i tō tātou ’utuāfare ’e tō tātou fare.

Tō’u mana’o hope’a, ’o te fa’aha’amana’ora’a ïa ē, ’ia tupu te fa’afāriura’a mai roto atu i te hō’ē ta’ata e ti’a ai. Mai tei fa’ahōho’ahia i roto i te parabole o nā paretenia hō’ē ’ahuru, e’ita tā tātou e nehenehe e hōro’a i te tahi atu ta’ata te mōrī nō te fa’afāriura’a, noa atu tō tātou hina’aro ’ia nā reira. Mai tā Elder David A. Bednar i ha’api’i : « E roa’a teie mōrī tao’a rahi hō’ē tōpata i te taime hō’ē […] ma te fa’a’oroma’i ’e te tāmau māite. ’Aita e vai ra te ’ē’a tāpū poto ; [e’ita e haere ] te fa’aineinera’a rū i te taime hope’a ».⁴

’Ua niuhia te Mai, pe’e mai i ni’a i te reira parau mau. Tē fa’aau nei au i te reira i te melahi tei ha’api’i ia Nephi nō ni’a ia Iesu Mesia ma te parau ē : « ’A hi’o na ! »⁵ Mai taua melahi ra, tē ani nei te Mai, pe’e mai ia tātou ’ia hi’o i roto i te mau pāpa’ira’a mo’a ’e te mau parau a te mau peropheta o teie ’anotau nō te ’ite mai i te Fa’aora ’e nō te fa’aro’o iāna. Mai ia Nephi te huru, nā te Vārua e ha’api’ipi’i iho ia tātou ’a tai’o ai ’e ’a feruri ai i te parau a te Atua. Te Mai, pe’e mai ’o te vāhi ’ōu’ara’a ïa i roto i te hōhonu o te mau pape ora nō te ha’api’ira’a tumu a te Mesia.

Mai te reira ato’a te hōpoi’a a te hō’ē metua. ’Ua fāna’o te mau tamari’i i te mau mea e rave rahi a tō rātou metua, ’eiaha rā te ’itera’a pāpū. E’ita tā tātou e nehenehe e hōro’a i te tamari’i i te hō’ē ’itera’a pāpū, mai te ’ōteora’a huero ato’a. E nehenehe rā tātou e fa’aineine i te vāhi e tauturu i te reira, mai te repo maita’i, ’aita e tātarāmoa e « hō’ene [ai] te parau ». E nehenehe tātou e tūtava i te fa’atupura’a i te huru au maita’i ’ia ti’a i tā tātou mau tamari’i—’e i te feiā herehia—’ia fa’aāteatea i te vāhi nō te huero, ’ia « fa’aro’o i te parau, ’e [’ia māramarama] i taua parau ra »⁶ ’e ’ia ’ite mai rātou iho ē « e huero maita’i ïa ».⁷

Hōho’a

Tē taea’e Newman ’e tāna tamaiti ’o Jack

E rave rahi matahiti i ma’iri, ’ua fāna’o māua tā’u tamaiti ’o Jack ’ia ha’uti i ni’a i te tahua huira’a pōpō (golf) nō Old Course i St. Andrews i Ekotia, i reira te huira’a pōpō mātāmua. Hope te au ! I te ho’ira’a mai au, ’ua tāmata vau i te fa’ati’a atu i te fa’ahiahia o te reira. ’Aita rā i haere. Te mau hōho’a, te mau video ’e tā’u fa’ati’ara’a, e ’ere terā roa. I te fa’ahope’ara’a, ’ua feruri au ē, te rāve’a noa e ’ite ai te ta’ata i te fa’ahiahia nō St. Andrews, ’o te haerera’a ïa i’ō—nō te hi’o i te mau vāhi ha’utira’a, huti i te mata’i, ’e ’ia pūhi hau ato’a mai i ni’a i te mata, ’e ’ia topa te pōpō i roto i te ’āpo’o one ’e i roto i te mau rā’au ri’i me’ume’u.

Mai te reira ato’a ïa nō te parau a te Atua. E nehenehe e ha’api’i i te ta’ata, e nehenehe e poro, e nehenehe e fa’ata’a atu i te reira. E nehenehe e paraparau nō te reira, e nehenehe e vauvau atu, e nehenehe ato’a e fa’a’ite pāpū atu i te reira. ’Ia ’ore rā te hō’ē ta’ata e putapū i te parau mo’a a te Atua i te tōpatapatara’a i ni’a i tōna vārua mai te hupe o te ra’i ra, nā roto ho’i i te mana o te Vārua,⁸ e riro noa ïa te reira mai te māta’ita’ira’a i te tāreta fare rata ’aore rā te mau hōho’a tere ori haere a te hō’ē ta’ata. Tītauhia ’ia haere roa atu te ta’ata. Nā ’oe iho tō ’oe tere fa’afāriura’a—e tere ha’aputuputura’a.

E ti’a i te mau ta’ata ato’a e ha’api’i nei i te fare ’e i te fare purera’a, ’ia fa’afāna’o i te ta’ata i te rāve’a nō te fa’atupu i tā rātou iho mau ’ohipa pae vārua. Nā roto i te reira rātou e « ’ite ai […] i te parau mau i te mau mea ato’a ra », nō rātou iho.⁹ ’Ua ha’api’i te peresideni Nelson : « Mai te mea ē, e uira’a ’ā’au tae tā ’outou nō ni’a i te ’evanelia ’aore rā te ’Ēkālesia, mai te mea ē, e mā’iti ’outou ’ia vaiiho i te Atua ’ia upo’oti’a, e arata’ihia ’outou nō te ’ite ’e nō te hāro’aro’a i te mau parau mau pāpū ’e te mure ’ore ’o tē arata’i i tō ’outou orara’a, ’e ’o tē tauturu ia ’outou ’ia ti’a pāpū i ni’a i te ’ē’a o te fafaura’a ».¹⁰

Tē ani nei au i te feiā fa’atere ’e te mau ’orometua i roto i te mau fa’anahora’a ato’a o te ’Ēkālesia ’ia ’āpo’o ’e te mau metua ’e te feiā ’āpī nō te ha’amaita’i roa ’ino i tā tātou ha’api’ira’a i te mau vāhi ato’a—i te titi, i te pāroita ’e i te fare. E tupu te reira nā roto i te ha’api’ira’a i te ha’api’ira’a tumu ’e te tītaura’a i te ’āparaura’a tei ’ī i te Vārua, nō ni’a i te mau parau mau tā te Vārua Maita’i i ha’api’i ia tātou i te taime hau o tā tātou iho tuatāpapara’a pāpa’ira’a mo’a.

E au mau hoa i roto i te Mesia, tei ni’a mau ia tātou tāta’itahi te hōpoi’a ’ia pe’e i te hi’ora’a o te ’Orometua ’e ’ia ha’api’i i te ta’ata mai iāna te huru. Tei iāna ra te rāve’a mau ! ’A pe’e ai tātou iāna, « ’ia fā mai ’oia ra ’ua riro [ïa] tātou mai iāna ra te huru ; e ’ite ho’i tātou iāna i tōna ra huru mau, ’ia vai māite ā teie nei tīa’ira’a i roto ia tātou, ’e ’ia tāmāhia ho’i tātou ato’a mai iāna i mā ».¹¹ I te i’oa ’o tei ti’afa’ahou, te ’Orometua rahi ho’i, ’o Iesu Mesia, ’āmene.