’A ha’amaita’i nā roto i tōna i’oa

Tā’u mau taea’e here ē, mau hoa tāvini i roto i te autahu’ara’a a te Atua, e taime hanahana mau teie nō’u ’ia paraparau atu ia ’outou i teie pō. E rā mai te tāpa’o nō tō’u fa’atura ’e te ’ā’au mehara ia ’outou na. ’Ia paraparau ana’e au ia ’outou ’e ’ia fa’aro’o vau nō tō ’outou fa’aro’o rahi, tē ti’aturi nei au ē te mara’a noa atu rā te mana o te autahu’ara’a i roto i teie nei ao, ma te mau pupu autahu’ara’a pūai tāmau ’e te mau taea’e e mau nei i te autahu’ara’a hau atu i te ha’apa’o maita’i.

Nō teie taime ri’i poto i teie pō, e paraparau atu vau i te feiā i roto ia ’outou ’o tē hina’aro nei ’ia fa’arahi atu ā i te ’aravihi i roto i tā ’outou tāvinira’a autahu’ara’a tāta’itahi. ’Ua ’ite ’outou i te tuto tei tītauhia ia ’outou ’ia rave itoito i roto i tō ’outou pi’ira’a nō te tāvini.¹ Terā rā, tē māere nei paha ’outou e aha te aura’a o teie parau, ’ia rave itoitoi i tō ’outou pi’ira’a.

E nā mua atu vau i te parau nō te mau diakono, nō te mea ’o rātou ’o tē ’ore roa nei e ta’a maita’i ra e aha mau te aura’a e rave itoito i tā rātou tāvinira’a. Te mau peresibutero fa’atōro’a-’āpī-hia e hina’aro ato’a paha ’outou e fa’aro’o mai. ’E te ’episekōpo i roto i tāna mau hepetoma mātāmua tāvinira’a, e ’ana’anatae ato’a mai paha.

Mea faufa’a nō’u ’ia hi’o fa’ahou i muri i tō’u iho mau mahana ’a diakono ai au. E hina’aro ato’a vau i te hō’ē ta’ata ’ia parau mai ē i te mea tā’u e parau atu i teienei. E riro te reira i te tauturu rahi iā’u i roto i te mau hōpoi’a autahu’ara’a tei hōro’ahia iā’u ’ia rave mai te reira taime—tā’u ato’a i fāri’i i teie mahana.

’Ua fa’atōro’ahia vau ’ei diakono i roto i te hō’ē ’āma’a na’ina’i ’o vau ana’e te diakono ’e ’o tō’u tua’ana ana’e te ha’api’i. ’O mātou ana’e te ’utuāfare i roto i te ’āma’a. E putuputu te tā’āto’a o te ’āma’a i tō mātou fare. Te ti’a fa’atere nō tō’u tua’ana ’e nō’u iho, ’o te hō’ē ïa ta’ata fa’afāriu-’āpī-hia ’a tahi nei ’oia ’a fa’atōro’ahia ai i te autahu’ara’a. ’Ua mana’o vau ē tā’u hōpoi’a nō te autahu’ara’a ’o te ’ōpere-noa-ra’a ïa i te ’ōro’a mo’a i roto i tō’u iho fare tāmā’ara’a.

I tō mātou haerea’a e fa’aea i Utaha, ’ua tae au i roto i te hō’ē pāroita rarahi e mea rahi te mau diakono. I roto i tā’u purera’a ’ōro’a mātāmua i reira, ’ua hi’o maita’i au i te mau diakono—hō’ē nu’u, e au ra iā’u—i te ’ōperera’a i te ’ōro’a mo’a mā te pāpū maita’i, mai te hō’ē pupu tei ha’api’i-maita’i-hia.

Nō tō’u ri’ari’a rahi i te sābati i muri iho, ’ua haere ’oi’oi au i te fare purera’a a te pāroita, nō te vai ’ōtahi ’ia ’ore hō’ē ta’ata ’ia ’ite mai iā’u. Tē ha’amana’o nei au e pāroita nō Yalecrest i Roto Miti, tē vai ra hō’ē ti’i i ni’a i terā fenua. ’Ua haere au i muri i te ti’i ’e ’ua pure au ma te au maita’i nō te tauturu iā’u ’ia ’ore au ’ia hape ’a haere ai au i tō’u pārahira’a i roto i te ’ōperera’a o te ’ōro’a mo’a. ’Ua pāhonohia mai taua pure ra.

’Ua ’ite rā vau i teienei ē, tē vai ra hō’ē rāve’a maita’i a’e nō te pure ’e nō te feruri ’a tāmata ai tātou i te tupu i te rahi i roto i tā tātou tāvinira’a autahu’ara’a. ’Ua tae mai te reira ma tō’u māramaramara’a nō te aha te mau ta’ata e fāri’i ai i te autahu’ara’a. Te fā nō tō tātou fāri’ira’a i te autahu’ara’a ’oia ho’i ’ia nehenehe ia tātou ’ia ha’amaita’i i te ta’ata nō te Fatu, nā roto i tōna i’oa.²

E rave rahi mau matahiti i muri mai i tō’u rirora’a ’ei diakono, tō’u ta’a-maita’i-ra’a i tōna aura’a mau. ’Ei hi’ora’a, ’ei tahu’a rahi, ’ua fa’ata’ahia vau e haere i te hō’ē purera’a ’ōro’a nā te hō’ē pū utuutura’a. ’Ua anihia mai iā’u ’ia ’ōpere i te ’ōro’a mo’a. Maoti i te ferurira’a i te fa’anahora’a ’aore rā i te ’āfarora’a nō te huru ’ōperera’a i te ’ōro’a mo’a, ’ua hi’o atu vau maoti te hōho’a mata o te mau ta’ata pā’ari tāta’itahi. ’Ua ’ite atu vau e rave rahi ’o rātou e ta’i ra. Hō’ē vahine tei haru mai i tō’u rima ’ahu, ’ua hi’o mai nei iā’u ’e ’ua parau pūai mai ē, « auē, māuruuru, māuruuru ».

’Ua ha’amaita’i mai te Fatu i tā’u tāvinira’a tei hōro’ahia nā roto i tōna i’oa. I terā mahana, ’ua pure au ’ia tae fa’ahou mai teie huru temeio, ’eiaha rā e pure nō te ’ite e nāhea e ti’a ai iā’u ’ia rave maita’i i tā’u tuha’a. ’Ua pure au ’ia fāri’i te mau ta’ata i te here ’o te Fatu nā roto i tā’u tāvinira’a mā te here. ’Ua ha’api’i mai au ’o teie te tāviri nō te tāvinira’a ’e nō te ha’amaita’ira’a ia vetahi ’ē nā roto i tōna i’oa.

’Ua fa’aro’o vau i te hō’ē ’itera’a ’aita i maoro a’enei tei fa’aha’amana’o iā’u i te reira huru here. I te taime ’a tāpe’ahia ai te mau purera’a a te ’Ēkālesia nō te ma’i COVID-19, ’ua fāri’i te hō’ē taea’e aupuru i te pi’ira’a mai roto mai i tōna peresideni pupu peresibutero, ’ia ha’amaita’i ’e ’ia ’ōpere i te ’ōro’a mo’a nā te hō’ē tuahine tāna e aupuru nei. I tōna niuniura’a atu i te tuahine nō te ’āfa’i atu i te ’ōro’a mo’a, ’ua hepohepo ri’i te tuahine i te fāri’ira’a atu, ’aita ho’i ’oia e hina’aro ’ia haere mai tei taea’e i rāpae i tōna iho fare nō teie tau fifi, ’e ’ua feruri ato’a ē e ho’i ’oi’oi mai te mau mea ato’a i tōna vaira’a mau.

I te taera’a atu ’oia i te fare ’o te tuahine i terā sābati po’ipo’i, e anira’a tā te tuahine. E nehenehe ānei rāua e haere i pīha’i iho noa mai ’e ’ia rave ato’a te tuahine e 87 matahiti tāpiri noa mai i te ’ōro’a mo’a ? Mā te parau fa’ati’a a te ’episekōpo, ’ua nā reira ’oia.

E rave rahi hepetoma ’e mā te ha’apa’o maita’i i te mau fa’ahepora’a fa’aāteateara’a tōtiare ’e te tahi atu mau tītaura’a pāruru, ’ua ha’aputuputu noa taua pupu feiā mo’a ra i te mau sābati ato’a nō te hō’ē noa purera’a ’ōro’a mo’a. Te tahi ma’a tāpū faraoa tei ’ōfatifatihia ’e ma’a fa’ari’i pape—e rave rahi rā roi mata tei tahe nō te maita’i ’o te hō’ē Atua here.

I te taime tano, ’ua ti’a i te taea’e aupuru, tōna ’utuāfare ’e te tuahine i aupuruhia e ho’i fa’ahou i te fare purera’a. ’Āre’a rā, te tuahine ’ivi e 87 matahiti, te ta’ata tupu, ’ua fa’aea ïa i te fare ma te pāruruhia. Te taea’e aupuru—’a ha’amana’o na ē, tāna fa’auera’a e ’ere nō te tuahine pā’ari, nō te vahine rā tāpiri noa mai i tōna fare—e tae roa mai i teie mahana tē haere noa ra ’oia mā te tūrērua i tōna fare i te mau sābati ato’a, te mau pāpa’ira’a mo’a ’e te tahi ma’a faraoa iti i te rima, nō te ha’amaita’i i te ’ōro’a mo’a i te ’āmura’a hope’a a te Fatu.

Tāna tāvinira’a autahu’ara’a ’e tā’u i terā mahana i roto i te pū utuutura’a, ’ua hōro’ahia ïa nā roto i te here. ’Oia mau, ’aita i maoro a’enei, ’ua ani te taea’e aupuru i tōna ’episekōpo, tē vai ra ānei te tahi mau ta’ata i roto i te pāroita tāna e nehenehe e ha’apa’o. Nō tōna hina’aro ’ia rave maita’i i tāna tāvinira’a autahu’ara’a, ’ua tupu rahi atu ïa ’a tāvini ai ’oia nā roto i te i’oa o te Fatu ’e nā roto i te rāve’a i ’ite-noa-hia e āna ra. ’Aita vau i ’ite ’ua pure ānei te taea’e aupuru mai tā’u i rave, nō te mau ta’ata tāna e tāvini nei ’ia ’ite i te here o te Fatu, nō te mea rā tāna tāvinira’a ’ua ravehia nā roto i te i’oa ’o te Fatu, hō’ē ā ïa hope’ara’a.

Hō’ē ā hōpe’ara’a hanahana te tupu ’ia pure ana’e au nō te reira hou vau ’a hōro’a ai i te hō’ē ha’amaita’ira’a autahu’ara’a i te ta’ata ma’i ’aore rā, tei roto i te hepohepo. ’Ua tupu te reira hō’ē taime i roto i te hō’ē fare ma’i i te fa’arūra’ahia vau e te mau ta’ote fatimā’ū’ū—hau atu i te fa’arūra’a iā’u—’ua fa’auehia vau—e ha’avitiviti ’e ’ia fa’aātea ’ē ’ia nehenehe rātou e rave i tā rātou ’ohipa, maoti i te hōro’a mai iā’u i te hō’ē rāve’a nō te hōro’a i te ha’amaita’ira’a autahu’ara’a. ’Ua fa’aea atu vau ’e ’ua hōro’a i te ha’amaita’ira’a. E teie tamāhine iti tā’u i ha’amaita’i i taua mahana ra, ’o tā te mau taote i mana’o e pohe, ’ua ora mai ïa. Tē māuruuru nei au i teie taime ē i taua mahana ra, ’aita vau i vaiiho i tō’u iho mana’o ’ia fa’ataupupu iā’u, ’ua ’ite au ē ’ua hina’aro te Fatu ’ia fāri’i teie tamāhine iti i te hō’ē ha’amaita’ira’a. ’Ua ’ite au e aha te ha’amaita’ira’a : ’Ua ha’amaita’i au iāna ’ia fa’aorahia. ’E ’o te reira iho ā.

E rave rahi mau taime teie ’ohipa i te tupura’a i ni’a iā’u ’a hōro’a ai au i te ha’amaita’ira’a i te hō’ē ta’ata e fātata ra i te pohe, mā te fa’a’atihia te ro’i ’e te mau melo o te ’utuāfare, i roto i te tē tīa’ira’a ’ia fa’aorahia. Noa atu e ma’a taime ri’i noa tō’u, e pure noa vau ’ia ’ite e aha te ha’amaita’ira’a tā te Fatu e vai ra ’o tā’u e nehenehe e hōro’a nā roto i tōna i’oa. ’E e ani au ’ia ’ite e nāhea ’oia e hina’aro ai ’ia ha’amaita’i i terā ta’ata, ’e ’eiaha rā i te mea tā’u ’aore rā tā te mau ta’ata e ti’a ra nā pīha’i iho mai e hina’aro ra. Tō’u ’itera’a ’oia ho’i noa atu e ’ere te ha’amaita’ira’a mai tā vetahi i hina’aro nō rātou iho ’aore rā nō te mau ta’ata tā rātou i here, e fa’aputapū te Vārua i te mau ’ā’au nō te ’ite i te fāri’ira’a ’e e tāmarū ’eiaha ra te ’ino’ino.

Taua ā fa’aurura’a e tae mai ’ia ha’apae ana’e te patereareha i te mā’a ’e ’ia pure nō te arata’ira’a nō te hōro’a i te ha’amaita’ira’a tā te Fatu e hina’aro ra nō te ta’ata. Fa’ahou ā, ’ua fa’aro’o vau i te tahi mau ha’amaita’ira’a tei ha’amaere iā’u ’e tei fa’ahiti mau’e i te ta’ata tei fāri’i i te ha’amaita’ira’a. Pāpū roa nō ’ō mai te ha’amaita’ira’a i te Fatu ra—te mau fa’aarara’a e vai ra i roto ’oia ato’a te fafaura’a tei fa’a’itehia nā roto i tōna i’oa. E utu’a maita’i te pure ’e te ha’apaera’a mā’a a te patereareha nā te Fatu.

’Ei ’episekōpo, ’ua ha’api’i mai au nā roto i te mau uiuira’a nō te ti’amāra’a, ’ia pure ’ia ti’a i te Fatu ’ia fa’a’ite mai iā’u i tōna hina’aro nō te ta’ata, mā te tāpe’ara’a i te fa’aurura’a tāna e hōro’a mai ma te ’ore e fa’arumarumahia e tā’u iho ha’avāra’a. E mea fifi, mai te peu tē hina’aro nei te Fatu nā roto i te here, e hina’aro e ha’amaita’i i te hō’ē ta’ata ma te fa’autu’ara’a. E tītauhia te tauto’ora’a nō te ’ite e aha tā te Fatu e hina’aro nā roto i te mea tā ’oe e hina’aro ’e tā te tahi atu ta’ata e hina’aro ra.

Tē ti’aturi nei au ē e nehenehe tā tātou e rave maita’i i tā tātou tāvinira’a autahu’ara’a i te roara’a o teie orara’a ’e penei a’e i terā pae mai. Tei te huru o tō tātou ha’apa’o-maita’i-ra’a ’ia tāmata i te ’ite mai i te hina’aro ’o te Fatu ’e tā tātou tauto’ora’a nō te fa’aro’o i tōna reo ’ia ti’a ia tātou ’ia māramarama maita’i a’e i tōna hina’aro nō te ta’ata tā tātou e tāvini nei nōna. E tae mai taua tupura’a rahi mā te ta’ahira’a na’ina’i. E tae marū noa mai te reira, e tae mai rā. Teie tā te Fatu i fafau mai nō ’outou :

« Nō te mea ’o tei ha’apa’o maita’i ’e ’ua noa’a ho’i ia rātou teie nei nā autahu’ara’a e piti ’o tei parauhia ’e au, ’e ’ua fa’arahi ho’i i tō rātou paraura’ahia, ’ua ha’amo’ahia ïa rātou ’e te Vārua i te fa’a’āpīra’a i tō rātou ra mau tino.

« E riro ho’i rātou ’ei mau tamaiti nō Mose ’e nō Aarona ’e te hua’ai ho’i nō Aberahama, ’e te ’ēkālesia ’e te bāsileia, ’e tei mā’itihia e te Atua ra.

« ’E teie ato’a ’o rātou ato’a o te fāri’i i teie autahu’ara’a nei, e fāri’i ato’a mai ïa iā’u nei, te nā reira mai ra te Fatu ».³

’O tō’u ïa ’itera’a pāpū ē, ’ua fa’aho’i-fa’ahou-hia mai te mau tāviri o te autahu’ara’a e te peropheta Iosepha Semita. ’Ua haere mai te mau tāvini o te Fatu mai te ra’i mai nō te fa’aho’i fa’ahou mai i te autahu’ara’a nō te mau ’ohipa rarahi tei tupu ’e ’o tē vai nei i mua ia tātou. E ha’aputuputuhia ’Īserā’ela. E fa’aineinehia te mau ta’ata a te Fatu nō tōna Tae-piti-ra’a mai hanahana. E tāmau noa te Fa’aho’i-fa’ahou-ra’a mai. E heheu rahi mai ā te Fatu i tōna hina’aro i tāna mau peropheta ’e i tāna mau tāvini.

E mana’o paha ’outou e mea na’ina’i roa ’outou ’ia fa’aauhia i te tāmāra’a rahi ’o tā te Fatu e rave. Mai te mea e nā reira ’outou, tē ani nei au ia ’outou ’ia ani nā roto i te pure e nāhea te Fatu ’ia hi’o mai ia ’outou. ’Ua ’ite ’oia ia ’outou tāta’itahi, ’ua fa’atōro’a ’oia ia ’outou i te autahu’ara’a, ’e tō ’outou tupura’a rahi ’e tā ’outou ravera’a maita’i i te autahu’ara’a e mea faufa’a ïa nōna, nō te mea ’ua here ’oia ia ’outou ’e tē ti’aturi nei ’oia ia ’outou nō te ha’amaita’i i te mau ta’ata tāna i here nā roto i tōna i’oa.

Tē ha’amaita’i nei au ia ’outou i teienei ’ia fāri’i i tōna here ’e tāna ti’aturira’a nā roto i te i’oa ʼo te Fatu ’o Iesu Mesia, ’āmene.