COVID-19 ’e te mau hiero

« E a’u mau taea’e ’e a’u mau tuahine here, ’ua fāri’i mau tātou i te mā’a vārua. E māuruuru rahi tō’u nō te mau pure, te mau parau poro’i, ’e te mau hīmene nō te ’āmuira’a tā’āto’a. Māuruuru ia ’outou tāta’itahi nō te ’āmuira’a mai ia mātou, i te vāhi tei reira ’outou.

I te ’ōmuara’a o te matahiti i ma’iri a’e nei, nō te ma’i pe’e te COVID-19 ’e nō tō tātou hina’aro ’ia riro ’ei mau ta’ata huira’atira maita’i i te ao ato’a, ’ua rave mātou i te fa’aotira’a fifi ’ia ’ōpani i te mau hiero ato’a nō te hō’ē taime. I roto i te mau ’āvae i muri iho, ’ua fa’auruhia mātou ’ia ’īriti marū noa i te mau hiero nā roto i te hō’ē ravera’a pāruru-maita’i-hia. I teienei, tē ’īritihia nei te mau hiero i roto e maha tuha’a, ma te ha’apa’o pāpū i te mau arata’ira’a ’e te mau ture pārurura’a a te fa’aterera’a hau nō te fenua iho.

Nō te mau hiero i roto i te tuha’a 1, te mau ta’ata fa’aipoipohia tei fāri’i a’ena i tō rātou iho ’ōro’a hiero, e nehenehe rātou e tā’atihia ’ei tāne ’e ’ei vahine fa’aipoipo.

Nō te mau hiero i roto i te tuha’a 2, e ravehia te mau ’ōro’a ato’a nō te feiā ora, te ’ōro’a hiero o te ta’ata iho, te tā’atira’a i te tāne ’e te vahine fa’aipoipo, ’e te mau tamari’i i ni’a i te mau metua. ’Aita i maoro a’e nei, ’ua taui mātou i te terera’a ’ohipa o te tuha’a 2 ’e e fa’ati’ahia tō tātou feiā ’āpī, te mau melo ’āpī ’e te tahi atu mau ta’ata e parau fa’ati’a tā’ōti’ahia tā rātou, ’ia ’āmui atu i roto i te mau bāpetitora’a mono nō tō rātou mau tupuna.

Nō te mau hiero i roto i te tuha’a 3, te feiā e fārereira’a tārenahia tā rātou, e nehenehe rātou e ’āmui atu i roto i te mau ’ōro’a nō te feiā ora ’e i roto ato’a i te mau ’ōro’a mono ato’a nō te mau tupuna pohe.

Te tuha’a 4 ’o te fa’aterera’a ïa i te tā’āto’ara’a o te mau ’ohipa o te hiero mai tei mātarohia.

Tē māuruuru nei mātou nō tō ’outou fa’a’oroma’i ’e te tāvinira’a ha’apa’o i roto i teie pu’e tau tāuiui ’e te fifi. Tē pure nei au ē ’ia ama māramarama atu ā tō ’outou hina’aro ’ia ha’amori ’e ’ia tāvini i roto i te hiero hau atu i teienei.

Tē uiui nei paha ’outou ē, a hea e ti’a ai ia ’outou ’ia ho’i fa’ahou i te hiero. Pāhonora’a : E ’īritihia tō ’outou hiero ’ia fa’ati’a ana’e te mau fa’aturera’a a te fa’aterera’a hau o te fenua iho. ’Ia tae ana’e te fifi o te COVID-19 i roto i tō ’outou fenua i roto i te mau ’ōti’a pāruruhia, e matara fa’ahou tō ’outou hiero. ’Ia rave ’outou i te mau mea ato’a e ti’a ia ’outou nō te fa’atopa i te fāito o te COVID i raro i roto i tō ’outou fenua ’ia nehenehe ’ia mara’a te mau rāve’a nō te haere i te hiero.

’A tīa’i noa ai, ’a tāpe’a noa i tā ’outou mau fafaura’a ’e te mau ha’amaita’ira’a nō te hiero i mua roa i roto i tō ’outou ferurira’a ’e tō ’outou ’ā’au. ’A ha’apa’o noa i te mau fafaura’a tā ’outou i rave.

Tē patu nei tātou i teienei nō a muri a’e ! E maha ’ahuru ma hō’ē hiero e patuhia nei ’aore rā e fa’a’āpīhia nei i teienei. I te matahiti noa i ma’iri a’e nei, noa atu te ma’i pe’e, ’ua tupu te tāpūra’a repo mātāmua nō e 21 hiero ’āpī !

Tē hina’aro nei mātou e ha’afātata i te fare o te Fatu i pīha’i roa i tō tātou mau melo, ’ia fāri’i ho’i rātou i te ha’amaita’ira’a mo’a o te haerera’a i te hiero ma te pinepine e au i tō rātou huru orara’a.

’A fa’aara atu ai au i tā tātou mau fa’anahora’a nō te patura’a nō e 20 atu mau hiero, tē ha’amana’o nei au ’e te ha’amāuruuru nei au i te mau pionie—nō tahito ra ’e i teienei—’o tei hōro’a i tō rātou ora nō te fa’atupu i teie ’ā’amu i teie mahana. E patuhia te hō’ē hiero ’āpī i te mau vāhi tāta’itahi i muri nei : Oslo, Norevētia ; Brussels, Peretita ; Vienna, ’Auteteria ; Kumasi, Kana ; Beira, Mōtāpīa ; Cape Town, ’Āfirita Apato’a ; Singapour, Repupirita nō Tinetāpora ; Belo Horizonte, Peretīria ; Cali, Toromepia ; Querétaro, Mēhiko ; Torreón, Mēhiko ; Helena, Montana ; Casper, Wyoming ; Grand Junction, Colorado ; Farmington, Niu Mēhiko ; Burley, Idaho ; Eugene, Oregon ; Elko, Nevada ; Yorba Linda, Californie ; ’e Smithfield, Utaha.

’Ua riro te mau hiero ’ei tuha’a faufa’a roa o te fa’aho’ira’ahia mai te ’evanelia a Iesu Mesia i roto i tōna ’īra’a. E fa’a’ī te mau ’ōro’a o te hiero i tō tātou orara’a i te mana ’e te pūai—e ’ore e noa’a nā roto i te tahi atu rāve’a. Tē ha’amāuruuru nei tātou i te Atua nō teie mau ha’amaita’ira’a .

’A ’ōpani ai tātou i teie ’āmuira’a, tē fa’a’ite fa’ahou atu nei mātou i tō mātou here ia ’outou. Tē pure nei mātou ’ia nīni’i mai te Atua i tāna mau ha’amaita’ira’a ’e tāna tīa’ira’a i ni’a ia ’outou tāta’itahi. Tei roto tātou pā’āto’a i tāna tāvinira’a mo’a. E tāmau noa tātou i te haere i mua ma te itoito i roto i te ’ohipa hanahana a te Fatu ! ’O tā’u ïa pure, i te i’oa o Iesu Mesia, ’āmene.