Jesús Kristur er styrkur ungmenna

Kæru ungu vinir, hvað myndi frelsarinn segja við ykkur ef hann væri hér einmitt núna?

Ég held að hann myndi byrja á því að tjá djúpa elsku sína til ykkar. Hann gæti tjáð hana með orðum, en hún myndi líka flæða svo sterkt – bara vegna nærveru hans – að hún væri greinileg, snerti ykkur djúpt í hjarta og fyllti sál ykkar!

Þrátt fyrir þetta, vegna þess að við erum öll þróttlítil og ófullkomin, gætu áhyggjur smeygt sér í huga ykkar. Þið gætuð munað eftir mistökum sem þið hafið gert, þau skipti sem þið létuð undan freistingum, eitthvað sem þið vilduð ekki hafa gert – eða óskið þess að að hafa gert betur.

Frelsarinn myndi skynja það og ég held að hann myndi fullvissa ykkur með orðum sem hann mælti í ritningunum:

„Óttist ekki.“¹

„Efist ekki.“²

„Verið vonglöð.“³

„Hjarta yðar skelfist ekki.“⁴

Ég held ekki að hann myndi afsaka mistök ykkar. Hann myndi ekki gera lítið úr þeim. Nei, hann myndi bjóða ykkur að iðrast – að skilja syndir ykkar eftir, að breytast, svo hann geti fyrirgefið ykkur. Hann myndi minna ykkur á að fyrir 2.000 árum tók hann þessar syndir á sig svo þið gætuð iðrast. Þetta er hluti af sæluáætluninni sem ástríkur himneskur faðir gaf okkur.

Jesús gæti bent á að sáttmálar ykkar við hann – gerðir þegar þið voruð skírð og endurnýjaðir í hvert sinn sem þið meðtakið sakramentið – tengja ykkur við hann á sérstakan máta. Tenging sem ritningarnar lýsa á þann hátt að við tökum á okkur ok hans, svo að með hans hjálp getum við borið hvers kyns byrði.⁵

Ég held að frelsarinn Jesús Kristur myndi vilja að þið sæjuð, fynduð fyrir og vissuð að hann er styrkur ykkar. Að með hans hjálp eru engin takmörk fyrir því hverju þið getið fengið áorkað. Möguleikar ykkar eru takmarkalausir. Hann myndi vilja að þið sæjuð ykkur sjálf eins og hann sér ykkur. Það er afar frábrugðið því hvernig heimurinn sér ykkur.

Frelsarinn myndi segja á skýran hátt að þið séuð dætur og synir hins almáttuga Guðs. Himneskur faðir ykkar er dýrlegasta vera alheimsins, full af elsku, gleði, hreinleika, heilagleika, ljósi, náð og sannleika. Hann vill að þið erfið allt það sem hann á dag einn.⁶

Þetta er ástæða þess að þið eruð á jörðu – til að læra, vaxa, taka framförum og verða allt það sem faðir ykkar á himnum hefur gert ykkur mögulegt að verða.

Til að gera þetta mögulegt, sendi hann Jesú Krist til að vera frelsari ykkar. Þetta er tilgangur hinnar miklu sæluáætlunar hans, kirkju hans, prestdæmis hans, ritninganna – alls saman.

Þetta er hlutskipti ykkar. Þetta er framtíð ykkar. Þetta er val ykkar!

Kjarni sæluáætlunar Guðs er máttur ykkar til að velja.⁷ Auðvitað vill himneskur faðir að þið veljið eilífa gleði með sér og hann mun hjálpa ykkur að ná því fram, en hann myndi aldrei þvinga ykkur til þess.

Hann gerir ykkur því kleift að velja: Ljós eða myrkur? Gott eða illt? Gleði eða eymd? Eilíft líf eða andlegan dauða?⁸

Þetta hljómar eins og einfalt val, ekki satt? Á einhvern hátt virðist það samt flóknara hér á jörðu en það ætti að vera.

Vandamálið er að við sjáum hlutina ekki alltaf eins skýrt og við vildum. Postulinn Páll líkti þessu við að líta „í skuggsjá, í ráðgátu.“⁹ Í heiminum er mikill ruglingur um hvað er rétt eða rangt. Sannleikanum er brenglað svo hið illa virðist gott og hið góða virðist illt.¹⁰

Þegar þið hins vegar leitið sannleikans einlæglega – eilífs, óbreytanlegs sannleika – verða valkostir ykkar mikið skýrari. Já, þið munið enn glíma við freistingar og raunir. Slæmir hlutir munu enn gerast. Óskiljanlegir hlutir. Hörmulegir hlutir. Þið getið þó þraukað þegar þið vitið hver þið eruð, af hverju þið eruð hér og þegar þið treystið Guði.

Hvar finnur maður sannleika?

Hann er að finna í fagnaðarerindi Jesú Krists. Fylling þessa fagnaðarerindis er kennd í Kirkju Jesú Krists hinna Síðari daga heilögu.

Jesús Kristur sagði: „Ég er vegurinn, sannleikurinn og lífið. Enginn kemur til föðurins nema fyrir mig.“¹¹

Þegar þið hafið mikilvægar ákvarðanir að taka, eru Jesús Kristur og hið endurreista fagnaðarerindi hans besti valkosturinn. Þegar þið hafið spurningar, eru Jesús Kristur og hið endurreista fagnaðarerindi hans besta svarið. Þegar þið eruð þróttlítil, er Jesús Kristur styrkur ykkar.

Hann veitir þreyttum mátt og vanmáttugum eykur hann styrk.

Þeir sem vona á Drottin verða endurnýjaðir með styrk hans.¹²

Til að hjálpa ykkur að finna veginn og að gera kenningu Krists að leiðandi áhrifavaldi í lífi ykkar, hefur Kirkja Jesú Krists hinna Síðari daga heilögu útbúið nýtt úrræði, endurskoðaða útgáfu af Til styrktar æskunni.

Ljósmynd

Útgáfa Til styrktar æskunni frá 2011

Í yfir 50 ár hefur Til styrktar æskunni verið til leiðsagnar fyrir fjölda kynslóða ungmenna Síðari daga heilagra. Ég geymi alltaf eintak í vasanum og deili því með fólki sem er forvitið um staðlana okkar. Bæklingurinn hefur verið uppfærður og endurnýjaður til að betra sé að standast áskoranir og freistingar okkar tíma. Ný útgáfa Til styrktar ungmennum er fáanleg á netinu á yfir 50 tungumálum og verður einnig í boði útprentuð. Hún verður gagnleg við ákvarðanatöku í lífi ykkar. Takið henni vinsamlegast opnum örmum fyrir ykkur sjálf og miðlið henni með vinum ykkar.

Ljósmynd

Útgáfa Til styrktar ungmennum frá 2022

Þessi nýja útgáfa Til styrktar ungmennum hefur undirtitilinn Leiðarvísir til ákvarðanatöku.

Svo það sé á hreinu, þá er Jesús Kristurbesti leiðarvísir sem þið getið nokkurn tíma haft til að taka ákvarðanir. Jesús Kristur er styrkur ungmenna.

Tilgangur Til styrktar ungmennum er að beina ykkur til hans. Leiðarvísirinn kennir ykkur eilífan sannleika hins endurreista fagnaðarerindis hans – sannleika um hver þið eruð, hver hann er og hverju þið getið fengið áorkað með styrk hans. Hann kennir ykkur hvernig hægt er að taka réttlátar ákvarðanir með þennan eilífa sannleika til hliðsjónar.¹³

Einnig er mikilvægt að vita hvað Til styrktar ungmennum gerir ekki. Bæklingurinn tekur ekki ákvarðanir fyrir ykkur. Hann veitir ykkur ekki „já“ eða „nei“ um alla þá valkosti sem þið gætuð staðið frammi fyrir. Til styrktar ungmennum einblínir á þann grunn sem þið byggið ákvarðanir ykkar á. Hann einblínir á gildi, reglur og kenningar en ekki á ákveðna og afmarkaða breytni.

Drottinn hefur alltaf leiðbeint okkur á þann hátt með spámönnum sínum. Hann biður okkur að „efla andlegt atgervi [okkar] til að hljóta opinberun.“¹⁴ Hann býður okkur að „hlýða á [sig].“¹⁵ Hann kallar okkur til þess að fylgja sér á æðri og helgari hátt.¹⁶ Við erum að læra með þessum hætti í Kom, fylg mérí hverri viku.

Ég geri ráð fyrir að leiðarvísirinn hefði getað séð ykkur fyrir löngum lista af fatnaði sem þið ættuð ekki að klæðast, orðum sem þið ættuð ekki að segja og kvikmyndum sem þið ættuð ekki að horfa á. Hefði það samt í raun verið gagnlegt í alþjóðlegri kirkju? Myndi slík nálgun raunverulega búa ykkur undir ævilangt kristið líf?

Joseph Smith sagði: „Ég kenni þeim réttar reglur og þeir stjórna [sér] sjálfir.“¹⁷

Benjamín konungur sagði þjóð sinni í Mormónsbók: „Ekki er mér mögulegt að benda á allt, sem getur leitt yður í synd. Leiðirnar og aðferðirnar eru svo margvíslegar og svo margar, að ég get ekki komið á þær tölu.“¹⁸

Benjamín konungur sagði enn fremur: „En það get ég sagt yður, … gætið yðar… hugsana yðar, orða yðar og gjörða, og virðið … boðorð Guðs og haldið … áfram í trú á … [Drottin vorn], allt til enda yðar ævidaga.“¹⁹

Ljósmynd

Frelsarinn Jesús Kristur

Er rangt að hafa reglur? Auðvitað ekki. Við þörfnumst þeirra öll á hverjum degi. Það er samt rangt að einblína eingöngu á reglur, í stað þess að einblína á frelsarann. Þið þurfið að þekkja af hverju og hvernig og íhuga síðan afleiðingar ákvarðana ykkar. Þið þurfið að leggja traust ykkar á Jesú Krist. Hann mun leiða ykkur í rétta átt. Hann er styrkur ykkar.²⁰

Til styrktar ungmennum kunngerir djarflega kenningu Jesú Krists. Leiðarvísirinn býður ykkur einarðlega að taka ákvarðanir byggðar á kenningu Krists. Hann lýsir djarflega þeim blessunum sem Jesús Kristur lofar þeim sem fylgja vegi hans.²¹

Russell M. Nelson forseti kenndi: „Þegar sterkasta þrá okkar verður að láta Guð ríkja [í lífi okkar], … munu svo margar ákvarðanir verða einfaldari. … Svo mörg vandamál leysast! Þið vitið hvernig best er að huga að útliti ykkar sjálfra. Þið vitið hvað má horfa á og lesa, hvar má verja tíma sínum og hverja má umgangast. Þið vitið hverju þið viljið fá áorkað. Þið vitið hvers konar manneskja þið viljið verða.“²²

Jesús Kristur hefur afar háan staðal fyrir fylgjendur sína. Boðið um að leita vilja hans af einlægni og lifa eftir sannleika hans er hæsti mögulegi staðallinn!

Mikilvægar stundlegar og andlegar ákvarðanir ættu ekki aðeins að byggja á persónulegum óskum eða því sem er hentugt eða vinsælt.²³ Drottinn er ekki að segja: „Gerið hvað sem þið viljið.“

Hann segir: „Látið Guð ríkja.“

Hann segir: „Kom, … fylg mér.“²⁴

Hann segir: „Lifið á helgari, æðri, þroskaðri máta.“

Hann segir: „Haldið boðorð mín.“

Jesús Kristur er okkar fullkomna fordæmi og af öllum mætti sálar okkar reynum við að fylgja honum.

Kæru vinir, ég endurtek, ef frelsarinn stæði hér í dag, þá myndi hann tjá óendanlega elsku sína til ykkar, algjört traust sitt til ykkar. Hann myndi segja ykkur að þið gætuð náð takmarkinu. Þið getið byggt upp líf fullt af gleði og hamingju, vegna þess að Jesús Kristur er styrkur ykkar. Þið getið fundið traust, frið, öryggi, hamingju og að þið eigið samleið nú og að eilífu, því þið munið finna allt þetta í Jesú Kristi, í fagnaðarerindi hans og í kirkju hans.

Um það ber ég hátíðlegt vitni sem postuli Drottins Jesú Krists og veiti ykkur einlæga blessun mína af djúpu þakklæti og elsku til ykkar, í nafni Jesú Krists, amen.