Կառուցենք հակառակորդին դիմակայող կյանք

Տարիների ընթացքում համաժողովների կենտրոնի այս գեղեցիկ ամբիոնից մենք ստացել ենք հոյակապ խորհուրդներ, ոգեշնչում, հրահանգ և հայտնություն: Խոսնակները բազմիցս օգտագործել են համեմատություններ՝ կապված իրենց գիտելիքների և փորձառության ոլորտների հետ՝ պարզ ու հզոր կերպով ցույց տալով Հիսուս Քրիստոսի ավետարանի սկզբունքը:

Այս կերպ, օրինակ, մենք սովորել ենք ինքնաթիռների և թռիչքների մասին, որոնցում մի փոքր սկզբնական շեղումը կարող է մեզ տանել մի վայր, որը հեռու է մեր սկզբնական նպատակակետից:¹ Այս կերպ մենք սովորել ենք նաև այն համեմատությունից, երբ մեր ֆիզիկական սրտի գործառույթը համեմատվում է սրտի հզոր փոփոխության հետ, որը պահանջվում է՝ Իրեն հետևելու Տիրոջ հրավերին արձագանքելու համար:²

Այս անգամ ես կցանկանայի խոնարհաբար ավելացնել իմ մասնագիտական պատրաստվածության ոլորտից ներշնչված մի համեմատություն։ Ես նկատի ունեմ քաղաքացիական շինարարության աշխարհը: Համալսարանական ուսումնառության սկզբից ես երազում էի այն օրվա մասին, երբ կհամապատասխանեմ այն դասընթացի պահանջներին, որն ինձ կսովորեցնի, թե ինչպես նախագծել շենքեր և այլ կառույցներ, որոնք այնուհետ կարող են համարվել «հակասեյսմիկ»:

Վերջապես եկավ այդ թեմայով իմ առաջին դասի օրը: Պրոֆեսորի առաջին խոսքերը հետևյալն էին. «Դուք, անշուշտ, ցանկանում եք սկսել այս դասընթացը և սովորել, թե ինչպես նախագծել հակասեյսմիկ կառույցներ», որին ի պատասխան, մեզանից շատերը անհամբեր գլխով արեցին: Այնուհետև պրոֆեսորն ասաց. «Ցավում եմ, բայց պետք է ասեմ, որ դա հնարավոր չէ, քանի որ ես չեմ կարող սովորեցնել ձեզ, թե ինչպես նախագծել մի շենք, որը «հակա-» է կամ դիմադրում է երկրաշարժին»: Նա ասաց․ «Դա անիմաստ է, քանի որ, ուզենք, թե չուզենք, ամեն դեպքում երկրաշարժեր կլինեն»:

Այնուհետև նա ավելացրեց. «Ես կարող եմ ձեզ սովորեցնել, թե ինչպես պետք է նախագծեք կառույցներ, որոնք սեյսմակայուն են, կառույցներ, որոնք կարող են դիմակայել երկրաշարժից եկող ուժերին, որպեսզի կառույցը մնա կանգուն՝ առանց որևէ լուրջ վնասի, այնուհետև շարունակի ծառայել այն նպատակին, որի համար ի սկզբանե նախագծված էր»:

Ճարտարագետը կատարում է հաշվարկներ, որոնք ցույց են տալիս հիմքերի, սյուների, հեծանների, բետոնե սալերի և այլ կառուցվածքային տարրերի չափերը, որակներն ու բնութագրերը: Այս արդյունքները վերածվում են հատակագծերի և տեխնիկական բնութագրերի, որոնք պետք է խստորեն պահպանվեն շինարարի կողմից, որպեսզի աշխատանքը նյութական տեսք ստանա և այդպիսով իրականացնի այն նպատակը, որի համար նախագծվել ու կառուցվում է:

Թեև սեյսմակայուն շինարարության առաջին դասից անցել է ավելի քան 40 տարի, ես հիանալի հիշում եմ այն պահը, երբ սկսեցի ավելի խոր և ամբողջական պատկերացում կազմել այն կենսական կարևորության մասին, որով այս գաղափարը ներկա կլիներ կառույցներում, որոնք ես կնախագծեի իմ հետագա մասնագիտական կյանքում: Եվ ոչ միայն դա. նույնիսկ ավելի կարևոր է, որ այդ գաղափարը մշտապես կիրառվի իմ սեփական կյանքի շինությանը և նրանց, ում վրա ես կարող եմ դրական ազդեցություն գործադրել:

Որքա՜ն օրհնված ենք մենք, որ կարող ենք մեր հույսը դնել Երկնային Հոր կողմից ստեղծված փրկության ծրագրի գիտելիքի վրա, և ունենալ Հիսուս Քրիստոսի վերականգնված ավետարանը, նաև ապավինել կենդանի մարգարեների ոգեշնչված առաջնորդությանը: Բոլոր վերը նշվածները կազմում են աստվածայնորեն մշակված «ծրագրերն» ու «տեխնիկական բնութագրերը», որոնք մեզ հստակ սովորեցնում են, թե ինչպես կառուցել երջանիկ կյանք. կյանք, որը դիմակայում է մեղքին, դիմակայում է գայթակղություններին, դիմակայում է սատանայի հարձակումներին, որը հուսահատորեն փորձում է խափանել մեր Երկնային Հոր և մեր սիրելի ընտանիքների հետ միասին լինելու հավերժական ճակատագիրը:

Ինքը՝ Փրկիչը, Իր ծառայության սկզբում «ենթարկվեց սատանայի գայթակղությանը»:³ Բայց Հիսուսը հաջողությամբ դուրս եկավ այդ մեծ փորձությունից: Սատանայի կամ գայթակղության դեմ հակազդող վերաբերմունքն ինչպե՞ս ծառայեց Հիսուսին: Այն, ինչը ստիպեց Հիսուսին հաղթած դուրս գալ այդ ամենադժվար պահերից, Նրա հոգևոր պատրաստվածությունն էր, որը թույլ տվեց նրան լինել հակառակորդի գայթակղություններին դիմակայելու վիճակում:

Ի՞նչ գործոններ օգնեցին Փրկչին պատրաստ լինել այդ վճռական պահին:

Նախ՝ Նա ծոմ էր պահել 40 օր և 40 գիշեր, ծոմ, որը պետք է ուղեկցվեր մշտական աղոթքով: Այսպիսով, չնայած Նա ֆիզիկապես թույլ էր, Նրա ոգին շատ ուժեղ էր: Թեև, բարեբախտաբար, մեզ չեն խնդրում ծոմ պահել նման տևողությամբ, այլ միայն 24 ժամ և ամիսը մեկ անգամ, ծոմը մեզ բերում է հոգևոր ուժ և պատրաստում դիմակայելու այս կյանքի փորձություններին:

Երկրորդ՝ գայթակղությունների նկարագրության մեջ, որոնց ենթարկվել էր Փրկիչը, մենք տեսնում ենք, որ Նա միշտ պատասխանում էր սատանային՝ ունենալով սուրբ գրություններ Իր մտքում, մեջբերելով դրանք և կիրառելով ճիշտ պահին:

Երբ սատանան գայթակղեց, որ Նա քարերը դարձնի հաց, որպեսզի Նա կարողանա հագեցնել Իր քաղցը Իր երկար ծոմից հետո, Տերն ասաց նրան. «Գրված է. «Ոչ միայն հացով է մարդն ապրում, այլև այն ամեն խոսքով, որ Աստծու բերանից է ելնում»:⁴ Այնուհետև, երբ Տերը տաճարի աշտարակի վրա էր, սատանան փորձեց գայթակղել Նրան, որ ցույց տա Իր զորությունը, ինչին Տերը իշխանությամբ պատասխանեց. «Դարձյալ գրված է. «Տիրոջը՝ քո Աստծուն, չփորձես»:⁵ Իսկ սատանայի երրորդ փորձին Տերը պատասխանեց. «Հեռո՛ւ գնա, սատանա՛, որովհետև գրված է. «Տիրոջը՝ քո Աստծուն, կերկրպագես ու միայն նրան կպաշտես»:⁶

Երկրաշարժը իր հետևանքներն է թողնում նույնիսկ այն կառույցների վրա, որոնք ճիշտ են նախագծված և կառուցված, օրինակ՝ ճաքեր, ընկած կահույք կամ առաստաղներ, կոտրված պատուհաններ և այլն: Սակայն այդ լավ նախագծված և լավ կառուցված շենքը կկատարի բնակիչներին պաշտպանելու իր նպատակը, և որոշ վերանորոգումներից հետո կվերականգնի իր սկզբնական վիճակը:

Նմանապես, հակառակորդի հարվածները կարող են նաև «ճաքեր» կամ որոշ մասնակի վնասներ պատճառել մեր կյանքում՝ չնայած մեր կյանքը կառուցելու աստվածային կատարյալ նախագծին համապատասխան մեր ջանքերին: Այս «ճեղքերը» կարող են դրսևորվել տխրության կամ զղջումի զգացումներով՝ որոշ սխալներ թույլ տալու և ամեն ինչ անթերի չանելու համար, կամ զգալով, որ մենք այնքան լավը չենք, որքան ցանկանում ենք լինել:

Բայց իսկապես տեղին է այն հանգամանքը, որ հետևելով աստվածայնորեն մշակված ծրագրերին և առանձնահատկություններին, այսինքն՝ Հիսուս Քրիստոսի ավետարանին, մենք դեռ կանգնած ենք: Մեր կյանքի կառուցվածքը չի ավերվել հակառակորդի ջանքերի կամ դժվար իրավիճակների պատճառով, որոնց մենք ստիպված ենք եղել դիմակայել. ավելի շուտ, մենք պատրաստ ենք առաջ շարժվել։

Սուրբ գրություններում խոստացված ուրախությունը՝⁷ որպես մեր գոյության նպատակ, չի ենթադրում, որ մենք չենք ունենա դժվարություններ կամ վշտեր, որ մենք չենք ունենա «ճաքեր»՝ որպես մեր երկրային կյանքի գայթակղությունների, դժբախտությունների կամ իրական փորձությունների հետևանք:

Այդ ուրախությունը կապված է Նեփիի կյանքի հեռանկարի հետ, երբ նա ասաց. «Տեսած լինելով շատ չարչարանքներ իմ օրերի ընթացքում, այնուամենայնիվ, մեծապես հովանավորված լինելով Տիրոջ կողմից իմ բոլոր օրերում»։⁸ Նրա բոլո՛ր օրերը։ Նույնիսկ այն օրերը, երբ Նեփին տառապեց, քանի որ իր եղբայրները չհասկացան և մերժեցին նրան, նույնիսկ երբ նրան կապեցին նավի վրա, նույնիսկ այն օրը, երբ նրա հայրը՝ Լեքին, մահացավ, նույնիսկ երբ Լամանը և Լեմուելը դարձան Նեփիի ժողովրդի մահացու թշնամիները: Նույնիսկ այդ դժվարին օրերին Նեփին Տիրոջ կողմից մեծ հավանություն զգաց:

Մենք կարող ենք հանգիստ ու խաղաղ լինել՝ իմանալով, որ Տերը երբեք թույլ չի տա մեզ գայթակղվել այն սահմանից ավելին, ինչին մենք կարող ենք դիմակայել: Ալման հրավիրում է մեզ, որ «արթուն կենա[ն]ք ու շարունակ աղոթե[ն]ք, որպեսզի չլինի թե [մենք] փորձվեք ավելի, քան [մենք] կարող ե[ն]ք դիմանալ, և այսպես առաջնորդվե[ն]ք Սուրբ Հոգուց՝ դառնալով խոնարհ, հեզ, հլու, համբերատար, սիրով և ողջ երկայնամտությամբ լի»:⁹

Նույնը կարելի է կիրառել կյանքի փորձությունների ժամանակ: Ամմոնը մեզ հիշեցնում է Տիրոջ խոսքերը. «Գնացե՛ք … և համբերությամբ տարեք ձեր չարչարանքները, և ես ձեզ հաջողություն կտամ»:¹⁰

Տերը մեզ միշտ օգնում է, երբ մենք բախվում ենք դժբախտության, գայթակղության, թյուրըմբռնման, թուլությունների և նույնիսկ՝ մահվան: Նա ասել է. «Եվ այժմ, ճշմարիտ ասում եմ ձեզ, և ինչ ես ասում եմ մեկին, ասում եմ բոլորին. Ուրախ եղեք, փո՛քր երեխաներ. քանզի ես ձեր մեջ եմ, և ես չեմ լքել ձեզ»:¹¹ Նա երբե՛ք չի լքի մեզ։

Ես աղոթում եմ, որ մենք շարունակենք կառուցել մեր կյանքը՝ հետևելով մեր Հոր կողմից հեղինակված աստվածային նախագծման ծրագրերին և տեխնիկական բնութագրերին, և իրականացված մեր Փրկիչ Հիսուս Քրիստոսի միջոցով: Ուստի, այն շնորհի շնորհիվ, որը հասնում է մեզ մեր Փրկչի Քավության միջոցով, մենք հաջողությամբ կառուցելու ենք մի կյանք, որը դիմակայում է մեղքին, դիմակայում է գայթակղություններին և զորացվում է՝ դիմանալու մեր կյանքի տխուր, դժվարին ժամանակներին: Եվ ավելին, մենք կստանանք մեր Հոր և մեր Փրկչի սիրո միջոցով խոստացված բոլոր օրհնությունները: Հիսուս Քրիստոսի անունով, ամեն։