Խոսքի ուժը

Իսկապես, սուրբ գրությունների էջերից մենք կարդում ենք հրաշալի օրհնությունների մասին, որոնք հեղվել են նրանց վրա, ովքեր իրենց կյանքում փորձել են Աստծո խոսքի ուժը։¹⁰ Եկեք միասին խորհենք երեք օրինակների շուրջ, կենտրոնանալով Մորմոնի Գրքի վրա. գիրք, որի մասին նախագահ Ռասսել Մ. Նելսոնն ասել է. «Այն մեր գոյատևման ուղեցույցն է վերջին օրերի համար»։¹¹

Առաջինը՝ հիշեցնելով իր ժողովրդին, թե Տերն ինչպես Տերն ազատեց իրենց հայրերին, Ալման ուսուցանել է. «Ահա, նա փոխեց նրանց սրտերը. այո, նա զարթնեցրեց նրանց խորը քնից, և նրանք զարթնեցին առ Աստված: Ահա, նրանք խավարի մեջ էին. սակայն նրանց հոգիները լուսավորվեցին հավիտենական խոսքի լույսով»։¹² Գուցե դուք զգացում ունեք, կարծես խավարի մեջ եք: Ձեր հոգին ձգտո՞ւմ է լուսավորության։ Եթե այդպես է, խնդրում եմ, փորձե՛ք Աստծո խոսքի ուժը։

Երկրորդ՝ խորհելով լամանացիների՝ դեպի Տերը դարձի գալու մասին, ինչին ականատես լինելով որպես միսիոներ, Ամմոնն ասաց. «Ահա, մեր եղբայրներից քանի՜-քանի հազարների նա արձակեց դժոխքի ցավերից. և նրանք բերվել են՝ երգելու քավիչ սերը, և դա՝ նրա խոսքի զորության պատճառով, որը մեր մեջ է»։¹³ Եղբայրնե՛ր և քույրե՛ր, մեր մեջ շատերը կան, որոնք փափագում են մեր սիրելիներին բերել՝ երգելու քավիչ սիրո երգը: Մեր բոլոր ձգտումներում եկեք հիշենք, որ փորձենք Աստծո խոսքի ուժը, որը մեր մեջ է:

Երրորդ՝ Հելամանի գրքում մենք կարդում ենք․ «Այո, մենք տեսնում ենք, որ ով որ կամենա, կարող է կառչած մնալ Աստծո խոսքին, որը կենդանի է և հզոր, որը կտոր-կտոր է անում դևի ողջ խորամանկությունը և ծուղակները և խաբեությունները, և առաջնորդում է Քրիստոսի մարդուն մի անձուկ ու նեղ ուղիով՝ այն հավիտենական թշվառության անդունդի վրայով … և նրանց հոգիները … հասցնում է Աստծո աջ կողմը՝ երկնքի արքայություն»։¹⁴ Արդյոք ձգտո՞ւմ եք հաղթահարել սատանայի ողջ խորամանկությունը, ծուղակներն ու խաբեությունները, որոնք շատ տարածված են մեր օրերի փիլիսոփայություններում։ Ցանկանու՞մ եք ցրել տեղեկատվության գերառատության պատճառով առաջացած շփոթության ամպերը, որպեսզի ավելի դիպուկ կենտրոնանաք ուխտի ուղու վրա: Խնդրում եմ, փորձե՛ք Աստծո խոսքի ուժը։

Որպես մեկը, ով փոխվել է խոսքի զորության շնորհիվ, ես անձամբ վկայում եմ այս ճշմարտության մասին, որը շատ գեղեցիկ է ուսուցանվել մեր սիրելի մարգարեի՝ նախագահ Ռասսել Մ. Նելսոնի կողմից. «Ինձ համար Մորմոնի Գրքի զորությունն առավել ակնհայտ է զորեղ փոփոխության փաստով, որը տեղի է ունենում նրանց կյանքում, ովքեր այն կարդում են «մաքուր սրտով, անկեղծ միտումով, հավատք ունենալով առ Քրիստոս»: Շատ նորադարձներ հրաժարվում են բաներից, որոնք ժամանակին թանկ են եղել իրենց համար, որպեսզի պահեն այս գրքի ցուցումները: … Դա կլինի ձեր ամենից արդյունավետ գործիքը Հիսուս Քրիստոսի մոտ հոգիներ բերելու գործում»:¹⁵

Այս և այլ օրինակներում մենք տեսնում ենք Աստծո խոսքի ուժը Նրա զավակների կյանքում: Կարող ենք հարցնել՝ ո՞րն է այդ ուժի կամ զորության աղբյուրը։

Այս հարցը դիտարկելիս անհրաժեշտ է հիշել, որ սուրբ գրություններում օգտագործվող «խոսք» բառն ունի առնվազն երկու իմաստ։ Երեց Դեյվիդ Ա. Բեդնարը վերջերս ուսուցանել է, որ «Հիսուս Քրիստոսի անուններից մեկը «Բան» է», և որ «սուրբ գրություններում արձանագրված Փրկչի ուսմունքները նույնպես «խոսք» են»:¹⁶

Մարգարե Նեփին պարզաբանել է, թե որն է կապը այս երկու իմաստների միջև, գրելով. «Լսեք այս խոսքերը և հավատացեք Քրիստոսին. և եթե դուք չեք հավատում այս խոսքերին, հավատացեք Քրիստոսին: Եվ եթե դուք հավատաք Քրիստոսին, դուք կհավատաք այս խոսքերին, քանզի դրանք Քրիստոսի խոսքերն են, և նա է դրանք տվել ինձ»։¹⁷ Այսպիսով, մենք սովորում ենք, որ վաղեմի և ժամանակակից մարգարեների խոսքերում զորություն կա հենց այն պատճառով, որ նրանց խոսքերը Տիրոջ խոսքերն են:¹⁸ Իմ սիրելի ընկերնե՛ր, այս հավերժական ճշմարտությունն ընդունելը կարևոր է մեր հոգևոր գոյատևման համար այս վերջին օրերում¹⁹, երբ, ինչպես մարգարեությունն է ասում, կա «սով … երկրի վրա. ոչ թե հացի սով կամ ջրի ծարավ, այլ Տիրոջ խոսքը լսելու»։²⁰

Ի վերջո, Աստծո խոսքի ուժը Տեր Հիսուս Քրիստոսն է։²¹ Երբ մենք սա լիարժեք ըմբռնենք, կարող ենք հավերժական կարևոր կապ տեսնել Նրա մարգարեների և հենց Քավչի դերերի միջև: Նրա հանդեպ մեր սերը, Նրան ավելի մոտենալու և Նրա սիրո մեջ մնալու մեր ցանկությունը²² կմղի մեզ փորձել խոսքի ուժը մեր կյանքում, և՛ ուժը, որը բխում է Նրանից՝ որպես մեր անձնական Փրկիչ և Քավիչ,²³ և՛ ուժը, որը բխում է Նրանից «Տիրոջ ընտրյալ անոթների» խոսքերի միջոցով։²⁴ Մենք կսկսենք հասկանալ, որ ինչքան էլ օգտակար լինեն Փրկչի և Նրա մարգարեների խոսքերի մեր ուսումնասիրության մյուս աղբյուրները, դրանք չպետք է փոխարինեն սկզբնաղբյուրին: Մենք պետք է խորապես ու հաճախ օգտվենք²⁵ անմիջապես այդ աղբյուրից։²⁶