Kom̧win Kōņak Irooj Jisōs Kraist
Ilo ad kautiej bujen ko ad, jej kōtļo̧k an Anij lutok tok kallim̧ur in kōjeraam̧m̧an ko rellōn̄ me rej ekkeijel ippān bujen ko.
Ke ajri ro ruo neju rediktata rej rittoļo̧k, iaar lo bok ko me rekar kalimomo im kōm̧ad ak rekar bar kōjerbal kakōļļe ko ilo bwebwenato ko aer. Ilo am riit ippān doon in jota, em̧m̧an ippa jipan̄ ajri ro neju meļeļe kōn kakōļļe ko rijeje eo ekar kōjerbali n̄an katakin pedped ko rem̧wilaļļo̧k, barāinwōt pedped in gospel in.
Ikar jeļā ke menin ekar delo̧n̄ ke juon raan ļaddik eo edik neju ekar jodikdik wōt. E kar ijjino juon bok im kar kōņaan wōt itok limo in ilo bwebwenato eo, ak kōļmenļo̧kjen eo an ekar kajjieon̄ pukot meļeļe eo em̧wilaļļo̧k ilo aolep men ekar riiti. E kar kūtōtō, bōtaap ikar etton̄ itulowa.
Jisōs ekar katakin ilo bwebwenato im kakōļļe ko1—juon ine n̄an katakin kajoor in tōmak,2 juon siip ejabwābwe n̄an katakin aorōk in jetōb ko,3 juon nejin eo ejerwaan n̄an katakin m̧wil an Anij.4 Pārabōḷ ko an raar kakōļļe ko me E kar katakin katak ko rem̧wilaļ n̄an ro ekar wōr “lojiln̄ier n̄an ron̄jak.”5 Ak ro rejjab pukot meļeļe ko rem̧wilaļļo̧k rebban meļele,6 ejja āinwōt an armij ro rej riiti ejja bok ko n̄aij riiti n̄an ajri ro neju rejamin jeļā ke ewōr meļeļe ko rem̧wilaļļo̧k im eļapļo̧k men ko jemaron̄ bōk jān bwebwenato kein.
Ke Anij Jemed ekar leļo̧k Eo Nejin Emake Eaar Keotak n̄an mej kōn kōj, Jisōs Kraist Make ekar erom̧ juon kakōļļe eo eutiejtata ilo iakwe eo an Jemed ilo Lan̄ ejamin jako.7 Jisōs Kraist eaar erom̧ Ļamb an Anij.8
Ewōr ad jim̧we im kōjeraam̧m̧an n̄an bōk karuwainene n̄an juon bujen jemjerā ippān Anij, eo me mour ko ad remaron̄ erom̧ juon kakōļle in bujen in. Bujen ko rej ejaak eo kain jemjerā eo me ej kōtļo̧k bwe Anij en kōkm̧anm̧an im ukōt kōj iumin iien im lelōn̄tak kōj bwe jen āinwōt Rilo̧mo̧o̧r, kepaaktok kōj n̄an E im eo Jemed9 im kepooj kōj n̄an delo̧n̄ im̧aan Mejaer.
Kajjojo armej ioon laļin rej ļaddik im leddik ro nejin Anij rejitōnbōro.7 N̄e jej kāālet n̄an m̧ōttan juon bujen, ej kōļapļo̧k im kam̧wilaļļo̧k jemjerā eo ad Ippān. Būreejtōn Russell M. Nelson ekar katakin bwe n̄e jej kāālet n̄an kōm̧m̧an bujen ippān Anij, jemjerā eo ad Ippān emaron̄ epaakļo̧k, im ej kōtļo̧k bwe E en kōjeraam̧m̧an kōj kōn juon jon̄ak in tūriam̧o̧ im iakwe eo An, juon bujen iakwe ņaetan hesed ilo kajin Hibru.11 Iaļ in bujen eo ej kōn jemjerā eo ad ippān Anij—ad hesed jemjerā eo Ippān.12
Eo Jemed ekōņaan juon jemjerā emwilaļ ippān aolep ļaddik im leddik ro Nejin,13 bōtaab ej ad kāālet. Ilo ad itok epaak E ilo juon bujen jemjerā, ej kōtļo̧k bwe E en epaake tok kōj14 im lukkuun kōjeraam̧m̧an kōj.
Anij ej letok jekjek ko im jerbal ko an juon bujen ko jej kōm̧m̧ani.15 N̄e jej kāālet n̄an deļo̧n̄ ilo jemjerā eo, jej kam̧ool n̄an E, ilo kakōļļein m̧akūtkūt ko an kajjojo bujen, bwe jej m̧ōņōņō in mour kōn jekjek ko E kar ejaaki.16 Ilo ad kautiej bujen ko ad, jej kōtļo̧k an Anij lutok tok kallim̧ur in kōjeraam̧m̧an ko rellōn̄ me rej ekkeijel ippān bujen ko,17 ekoba ļapļo̧k kajoor n̄an oktak im āinwōt ad Rilo̧mo̧o̧r. Jisōs Kraist ej pād ioļapļap in aolep bujen ko jej kōm̧m̧ani, im kōjeraam̧m̧an in bujen ko rej waļo̧k kōnke kōn en̄taan in pinmuur eo An.18
Peptaij kōn tulo̧k ej kakōļļein kōjem̧ eo jej delo̧n̄e ilo juon bujen jemjerā ippān Anij. Ilo ad tulo̧k ilo dān im bar walōn̄tak ej juon kakōļļe in mej eo an Rilo̧mo̧o̧r im Jerkakpeje n̄an mour ekāāl.19 Ilo ad peptaij, jej kakōļļein mej im bar ļo̧tak ilo baam̧le eo an Kraist im kwaļo̧k ke jej mōņōņō in bōk Etan iood.20 Kōj make jej ānbwin eo an kakōļļein bujen in. Ilo Kallim̧ur Ekāāl jej riit, “ Bwe ro otemjej iaami em̧ōj peptaij er ilo Kraist rar kōṇak Kraist.”21 Jān ad kar peptaij jej kakōļļein kōņak tok Kraist.
Kain̄i eo an kwojkwoj eo ej bar jitōn̄ļo̧k n̄an Rilo̧mo̧o̧r. Pilawe im dān eo rej kakōļļein kanniōk im bōtōktōk in Kraist me ekar rup kōn kōj.22 Mennin letok in Pinmuur eo An ej juon kakōļļe kar letok n̄an kōj kajjojo wiik n̄e rikapjer priesthood, pinej jenkwan Rilo̧mo̧o̧r Make, ej letok n̄an kōj pilawe im dān eo. Ilo ad m̧ōn̄ā im idaak kakōļļein Ānbwinnin im Bōtōktōkin, Kraist ej erom̧ juon m̧ōttad.23 Jej bar kōņak Kraist ilo ad kōm̧m̧an juon bujen kajjojo wiik.24
Ilo ad kōm̧m̧an bujen ippān Anij ilo m̧weeo im̧ōn Irooj, jej kam̧wilaļļo̧k jemjerā eo ad Ippān.25 Aolep men ko jej kōm̧m̧ani ilo tampeļ rej jitōn̄ļo̧k n̄an karōk eo an Jemed n̄an kōj, eo ioļapļap in ej Rilo̧mo̧o̧r im en̄taan in pinmuur eo An.26 Irooj enaaj katakin kōj ļain ioon ļain27 jān kakōļlein kain̄i im bujen ko ilo ad kōpeļo̧k būruōd im jar n̄an kappukot meļeļe ko rem̧wilaļ.
Āinwōt juon m̧ōttan mennin letok kwojarjar eo an tampeļ, em̧ōj kar kōmālim kōj n̄an kōņak kaarmen eo an priesthood eo ekwojarjar. Ej juon mennin aikuj im juon maron̄ ekwojarjar.
Ilo iminene ko an elōn̄ tōmak ko, nuknuk ko rejenolo̧k rej kōņaki āinwōt juon kakōļļe in tōmak ko an armij eo im kallim̧ur n̄an Anij,28 im nuknuk ko rejenolo̧k ekkā an ro rej tōl kabun̄-jar ko kōņaki. Nuknuk kein rekwojarjar ewōr ie m̧eļeļe ko rem̧wilaļ n̄an ro rej kōņaki. Jej riit ilo jeje ko rekwojarjar me ilo iien ko etto, nuknuk ko rekwojarjar kar kōņaki ilo iien kōm̧m̧an jerbal ko an tampeļ.29
Āinwōt ro uwaan Kabun̄ eo an Jisōs Kraist im Armij ro Rekwojarjar ilo Raan Ko Āliktata, kōj ro me jekar kāālet n̄an kōm̧m̧ani bujen ko ippān Anij ilo m̧weeo im̧ōn Irooj jej kōņak nuknuk ko rekwojarjar ilo iien kabun̄-jar in tampeļ, kakōļļein nuknuk ko kōņaki ilo jerbal ko an tampeļ etto. Jej bar kōņak kaarmen eo an priesthood eo ekwojarjar, jim̧or ilo iien kabun̄jar an tampeļ im ilo aolepen mour ko ad kajjojo raan.30
Garmet eo an priesthood eo ekwojarjar ej juon kakōļļe em̧wilaļ im barāinwōt ej jitōn̄ļo̧k n̄an Rilo̧mo̧o̧r. Ke Adam im Iv raar bōk leen im kar em̧m̧akūt jān Jikin Kallib Eden, kar leļo̧k n̄an er m̧ōttan nuknuk n̄an kabare er.31 Emaron̄ kar bwe rekar m̧an juon mennin mour n̄an katok kake n̄an kōm̧m̧ane m̧ōttan nuknuk kein—kakōļļein en̄taan eo an Rilo̧mo̧o̧r make n̄an kōj. Kaphar ej naan in Hibru eo n̄an pinmuur, im juon iaan meļeļein naan in ej “n̄an pinej.”32 Kaarmen in tampeļ ko ad rej kakeememej kōj bwe Rilo̧mo̧o̧r im kōjeraam̧m̧an ko an Pinmuur eo An rej bōbrae kōj ilo aolepen mour ko ad. Ilo ad kōņaki kaarmen ko an priesthood eo ekwojarjar kajjojo raan, kakōļļe in eaibojooj ej erom̧ m̧ōttad.
Ilo Kallim̧ur Ekāāl ilo bok in Rom, jej riit: “Bon̄ e nan̄in mootļo̧k, raan epaaktok. Innām jān utūk jerbal in marok, im kōṇak kein tariṇae in meram. … Kom̧win Kōņak Irooj Jisōs Kraist.”33
Ij lukkuun kam̧m̧oolol kōn maron̄ eo n̄an kōņak kaarmen eo an priesthood eo ekwojarjar n̄an kakeememej eō ke Rilo̧mo̧o̧r im kōjeraam̧m̧an ko an Pinmuur eo An ejeļo̧k jem̧ļo̧kin ej bōbrae eō ilo aolepen iaaļ eo aō ilo mour in. Ej bar kakeememej eō bwe ilo aō kōjpārok bujen ko iaar kōm̧m̧ani ippān Anij ilo m̧weeo im̧ōn Irooj, em̧ōj aō kōņaktok Kraist āinwōt juon kōkaļļe, eo E make ej juon libooror in meram. Enaaj kōjpārok eō jān nana,34 letok n̄an eō kajoor im ļapļo̧k maron̄,35 im aō meram̧ im tōl36 ilo marok im men ko reppen an laļin.
Ewōr meļeļein kōkaļļe in em̧wūlaļ im aiboojoj ilo karmen ko an priesthood eo ekwojarjar im koneekjen eo an n̄an Kraist. Ij tōmak bwe kōņaan eo aō37 n̄an kaņōk karmen eo ekwojarjar ej erom̧ aō kōkaļļe n̄an E.38 Menin ej ad make kakōļļe n̄an Anij, im ejjab juon kakkōļļe n̄an ro jet.39
Eļap aō kam̧m̧oolol kōn ad Rilo̧mo̧o̧r, Jisōs Kraist.40 En̄taan in pinmuur eo An n̄an kōj ekar erom̧ kakōļļe eo eļaptata in iakwe eo An im Jemed ilo Ilan̄ n̄an kōj kajjojo,41 ippān kakōļļe ko an iakwe im karmejjet—anan̄ ko ilo pein Rilo̧mo̧o̧r, neen, im katin—raar pād wōt ālkin Jerkakpeje eo An.42
Ilo aō kōjpārok bujen ko im eddo ko aō ippān Anij, ekoba kōņak kaarmen eo an priesthood eo ekwojarjar, mour e eō ej erom̧ juon kakōļļeen iakwe im aō kam̧m̧oolol eļap n̄an aō Rilo̧mo̧o̧r, Jisōs Kraist, im ikdeelel eo aō n̄an bok E wōt ippa aolep iien.
Eļan̄n̄e kojan̄in kar, n̄aij karwuaineneik eok n̄an kāālet juon jemjerā em̧wilaļļo̧k ippān Anij ilo am̧ kōm̧m̧ani bujen ko Ippān ilo m̧weeo im̧ōn Irooj. Ekkatak ekkōnono ko an rikanaan (ekoba katak ko raiboojoj ilo footnoot ko ilo kōnonno ko aer, eo epād ilo eiten aolep ekkōnono ilo kweilo̧k ko reļļap). Ekar āliji elōn̄ kōttan kōn bujen ko elōn̄ iiō ko im eļaptata jān ke ekar erom̧ Būreejtōn an Kabun̄ in. Ekkatak jān katak ko an kōn kōjeram̧m̧nan ko raibojooj im kajoor eo eļapļo̧k im maron̄ eo me emaron̄ ami ilo ami kōm̧m̧ani im kōjparok bujen ko ippān Anij.43
Bok in Bōk Meļeļe Eļap ej kwaļo̧k bwe ejjab menin aikuj n̄an bōk juon kūr n̄an etal im mijen ak n̄an pojak n̄an m̧are n̄an kōm̧m̧ani bujen ko ilo tampeļ.44 Juon armej ej aikuj bwe en 18 iiō dettaer, diwōjļo̧k jān high school ak ļābōļ ko jet āinwōt, ren juon uwaan Kabun̄ in iumwin juon iiō. Ewōr bar jon̄an ko ikkijeen ekwojarjar an juon make remenin aikuj.45 Eļan̄n̄e ewōr am̧ ikdeleel n̄an kam̧wilaļ jem̧jerā eo am̧ ippān Jemam̧ Ilan̄ im Jisōs Kraist ilo am̧ kōm̧m̧ani bujen ko ilo m̧weo im̧ōn Irooj, ij karuwainene kom̧ n̄an kōnono ippān bisop ak būreejtōn eo am̧ im kwaļo̧k ikdeleel eo am̧. E naaj jipañ eok jeļā ta eo kwon kōpooje n̄an bōk im kautiej bujen ko.
Jān juon jemjerā in bujen ippān Anij, mour ko ad make remaron̄ erom̧ kakōļļeen kallim̧ur ko ad n̄an im iakwe eo ad em̧wilaļ n̄an Jemedwōj Ilan̄, ad hesed n̄an E,46 im ikdeelel eo ad n̄an em̧m̧anļo̧k im naaj erom̧ āinwōt Rilo̧mo̧o̧r, keppopo n̄an juon raan deļo̧n̄ļo̧k im̧aan Mājeer. Ij kam̧ool kōn kōjeraam̧m̧an kein reļļap an bujen jemjerā eo eļap tokjaer. Ilo etan Jisōs Kraist, amen.