M̧ool: Juon M̧wil An Kraist

Jisōs Kraist ej ad Waanjon̄ak. Mour juon mour m̧ool ej aikuji kōj n̄an m̧ool n̄an Anij, n̄an ro jet, im n̄an kadkad eo ad ekwojarjar. M̧ool ej jiōbtok jān kien eo eļap m̧oktata n̄an iakwe Anij. Kōnke kwoj iakwe Anij, kwoj m̧ool n̄an E ilo aolep iien. Kwoj meļeļe bwe ewōr jim̧we im bōd im ewōr lukkuun m̧ool—m̧ool an Anij. M̧ool ej meļeļe in kwoj jab door laļ tak jon̄ak ko am̧ ak m̧wilūm̧ n̄an kabwilōn̄ ak n̄an bōk jān ro jet.⁵ Kwoj “kōm̧m̧ane ta eo ejim̧we” im “kōtļo̧k bwe tōprak ko ren waļo̧k.”⁶ Kakkobaba ko rekāāl n̄an Kwaļo̧k Gospel eo Aō bok in katakin an mijenede ekar kobaik m̧ool āinwōt juon m̧wil an Kraist.⁷

Jet iiō ko remootļo̧k, Elder Uchtdorf kar kappeik n̄an bar ejake stake eo am. Ilo iien intōrpiu eo am, ekar kajjitōk ippa juon kajjitōk iban meļo̧kļo̧ke: “Enan̄in ke kar wōr jabdewōt men ilo mour eo am̧ me, eļan̄n̄e likuti ilo ilo̧bwilej, enaaj ke juon kajookok n̄an kwe im Kabun̄ in?” Ikar bwilōn̄, ļōmņak eo aō ekar m̧ōkaj an etale aolepān mour eo aō, kajjieon̄ keememej iien kein n̄e imaron̄ in kar likjab im kajjitōk ippa make, “eļan̄n̄e ro jet raar jeļā jabdewōt ikar kōm̧m̧ane, ta eo renaaj kar lōmņak kōn n̄a ak Kabun̄ in?”

Ilo iien eo, ikar ļōmņak Elder Uchtdorf ekar kajjitōk wōt kōn erreo, bōtaab ikar itok n̄an meļeļe ekar lukkuun juon kajjitōk kōn m̧ool. Ikar ke m̧ool n̄an ta eo ikar ba? Laļ in enaaj ke kar lo jokkuun wōt juon ikōtaan naan ko aō im kōm̧m̧an ko aō? Ro jet renaaj ke lo Anij kōn m̧wilū?

Būreejtōn Spencer W. Kimball ekar katakin, “M̧ool” ej ad “m̧ōņōņō im maron̄ n̄an mour kōn tōmak ko ad im kallim̧ur ko.”⁸

Juon mour in m̧ool ej aikuj ad m̧okta im ļap tata m̧ool n̄an Anij.

Jān ke jaar ajri wōt, jaar katak kōn bwebwenato eo an Daniel ilo ro̧n̄ in ļaion eo. Daniel ekar aolep iien m̧ool n̄an Anij Ro m̧ōttan raar ebanban “raar pukot bwe ren lo unin kinaakļo̧k [e]”⁹ im kar ļōmņak in ejake juon kilen jar n̄an anij waan ko aer make. Daniel ekar jeļā kōn kilen eo ak ekar ro̧o̧l n̄an m̧weo im—kōn “an wūntō ko an peļļo̧k”¹⁰—bukwelōlō im jar jilu alen juon raan n̄an Anij in Israel. Āinwōt juon tōprak, Daniel kar joļo̧k n̄an lowaan ron̄ in ļaion eo. Ilo jibbon̄, kiin̄ ekar lo ke Anij eo an Daniel ekar lo̧mo̧o̧re im ekar kōm̧m̧ane juon kien ekāāl bwe aolep rej aikuj “wūdiddid im mijak im̧aan Anij eo an Daniel: bwe e Anij emour.”¹¹

Kiin̄ eo ekar itok n̄an jeļā Anij kōn m̧ool eo an Daniel. Ro jet rej meļeļe Anij kōn—naan ko im kōm̧m̧an ko ad. Ainļo̧k wōt Daniel, m̧ool n̄an Anij enaaj kōļapļo̧k an kōjenolo̧k kōj jān laļ in.

Rilo̧mo̧o̧r ej kakeememej kōj, “Ilo laļ kom̧ij en̄taan: a kom̧win lan̄lōn̄; N̄a Iar bōk anjo̧ ioon laļ.”¹² Būreejtōn Russell M. Nelson ekar kapilōk: “[Anjo̧ ioon laļ in] ej meļeļein anjo̧ ioon kapo eo me ej kwaļo̧k ke eļapļo̧k ad kea kōn men ko an laļin jān men ko an Anij. Ej meļeļein lōke katak eo an Kraist eļapļo̧k jen katak ko an armej.”¹³ Ejja wōt, jej aikuj jum̧ae kapo eo n̄an etetal “ilo iaļ eo [ad] make, im ilo̧kin nememen anij eo [ad] make, nemeeme eo ej āinwōt eo an laļ.”¹⁴

Ļōmņak eo bwe jum̧ae ej juon jekjek an mour ilo laļ in ej juon m̧ōttan aorōk an karōk in lo̧mo̧o̧r an Anij. Ekōjkan ad uwaake jum̧ae eo ej juon loļātāt kōn wōn kōj—juon jon̄ak an m̧ool eo ad. Ļōmņak in jum̧ae eo an laļ emaron̄ in kajju āinwōt n̄an kakkure m̧ool eo ilo m̧are eo ak āinwōt an mera in naan ko kwaļo̧k ilo ittiņo kōn katak ko an Kabun̄ in ak m̧anit. Kōjerbal m̧ool ilo kāālet ko ad ej juon kakōļļe itulik kōn kallim̧ur eo ad itulowa n̄an ļoor Rilo̧mo̧o̧r Jisōs Kraist.

Ejja āinwōt an m̧ool jiōbtok jān kien eo eļap m̧oktata n̄an iakwe Anij, m̧ool n̄an doon ej jiōbtok jān eo kein karuo, n̄an iakwe ro rūturid āinwōt kōj make. Juon mour in m̧ool ejjab juon mour eweppān; ej juon mour eo me jej kajjieon̄ aolep raan n̄an eļap tata m̧ool n̄an Anij im ilowaan wōt jekjek in m̧ool n̄an ro jet. Būreejtōn Oaks ej kakeememej kōj, “Kōttōbar eo ad n̄an kōjparok kien [eo] kein karuo ejjab aikuj kōm̧m̧an bwe jen meļo̧kļo̧k eo m̧oktata.”¹⁵

Laļ in eļapļo̧k an kajeon meļeļe ippān m̧ool eo kōn kwaļo̧k kien ko kōn jetjet in kōjerbal ak kien ko an pedped in mour me rej peek jemjerā ko ikōtaan armej im kōmeļeļe ko. Ilo an em̧m̧an, kien kein ekkā aer jab pedped ioon lukkuun m̧ool eo im ekkā an ejaak pedped ioon men eo m̧anit ej ba em̧m̧an. Ejja ainļo̧k wōt kajjitōk eo kar kwaļo̧k jān Elder Uchtdorf, jet doulul ko rej kamineneik rijerbal ro aer n̄an ļōmņak eļan̄n̄e jokāālet ak jekjek in kōm̧m̧an jokāālet eo eaer enaaj āinwōt eļan̄n̄e kwaļo̧ke ilo online ak ilo peij eo im̧aan juon nuujpeba eļap. Āinwōt an Kabun̄ in kar waļoktok jān ņojak im jān marok,¹⁶ kōj, āinwōt Daniel, aikuj ļōn̄jak ilōn̄ in kōtmene ko an laļ im erom rijutak an m̧ool eo im Anij eo emour aolep iien ko im ilo aolep jikin ko.¹⁷

Ba ewōr ippād m̧ool ejjab bwe eļan̄n̄e kōm̧m̧an ko ad rejjab jokkun wōt juon ippān naan ko ad. Ejja āinwōt, jouj an Rikirijin ejjab juon ribōk jikin m̧ool. Āinwōt juon armej in bujen, im āinwōt ritōl ilo Kabun̄ eo An, jon̄ak ko ad rej aikuj utiej im jokkun wōt juon ippān jon̄ak ko Irooj ekar kajutaki.

Jerbal kōn m̧ool ej kalōk tōmak im lōke im kam̧ool n̄an ro jet bwe jej pukot wōt n̄an kōm̧m̧an ankilan Irooj. Ilo ko̧o̧njeļ ko ad, jej jum̧ae kareel ko an likin im ļoor jekjek in kappok ļōmņak ko kar kwaļo̧k jān Irooj jān kajjojo kōra im em̧m̧aan im jerbal jokkun wōt juon ippān ko̧o̧njeļ eo eim̧we kar bōke.¹⁸

M̧adjake eo ad ej ilo Rilo̧mo̧o̧r, im jej mejmejkaruo n̄an joļo̧k jerbal ko me remaron̄ kili āinwōt jerbal n̄an kōņaan ko ad make, kōjeraam̧man baam̧le eo ad, ak kabun̄ būruōn juon ilo kōņaan eo an bar juon. Jej etal jān wāween ko ad n̄an joļo̧k jabdewōt kile bwe jerbal ko ad remaron̄ in kareel jān nebar ko an armej,¹⁹ n̄an bōk kile an juon make, kwaļo̧k eļōn̄ļo̧k like ko ilo intōrnet, kouti ak kadiwojļo̧k.

Āliktata, juon mour in m̧ool ej aikuji ad m̧ool n̄an kadkad eo ad ekwojarjar.

Jejeļā jet ro me rejjab jeļā. Eo eļap tata jejeļā ej rijum̧ae-Kraist eo Korior, eo ekar tōlļo̧k bōro ko an elōn̄, kwaļo̧k n̄an “ļōmņak an kanniōk.”²⁰ Mekarta, ilo iien ko āliktata an mour eo an, ekar kwaļo̧k ruōn, “Ikar jeļā iien otemjej bwe wōr juon Anij.”²¹ Būreejtōn Henry B. Eyring ekar katakin bwe riab “ej jekkar n̄an lukkuun paotok eo an jetōb ko ad,”²² kadkad eo ad ekwojarjar. Korior ekar m̧oņe e make, im m̧ool eo ekar jab ilo e.²³

Ilo keidi, Rikanaan Josep Smith ekar kean̄ ilo lōke, “Iaar jeļā, im iaar jeļā bwe Anij ekar jeļā, im iban kar maron̄ kariab e.”²⁴

Ļeo jein Josep Hyrum ekar iakwe jān Irooj “kōnke m̧ool eo an būruōn.”²⁵ E im Josep raar m̧ool wōt n̄an jem̧ļo̧kin—m̧ool n̄an kadkad eo aer ekwojarjar, meram eo im jeļā eo raar bōke, im m̧ool n̄an armej eo raar jeļā remaron̄ kar erom.

Kōm̧m̧an bwe jen etale kōj make “n̄an ankilaan Anij”²⁶ im kōļapļo̧k m̧wil eo āinwōt an Kraist an m̧ool Kōm̧m̧an bwe jen ļoor ad Riwaanjon̄ak, Rilo̧mo̧o̧r an laļ in, im jab jenlik ak mour juon mour eo me ej m̧ool n̄an Anij, n̄an katakin doon, im n̄an kadkad eo ad ekwojarjar.

Āinwōt an Job kar ba, “Ren bo̧un eō kōn kein bo̧un e jim̧we, bwe Anij en jeļā aō wānōk.”²⁷ Ilo āt eo ekwojarjar etan Jisōs Kraist, amen.