Kūrļo̧k, Jab Likjab

Rainin, ikōņaan jino ilo aō kam̧ool kōn lōke eo elikio ilo būruwō bwe Anij ej ron̄ jar ko ad im ej uwaaki ilo wāween eo An make.

Ilo juon laļ ej jelm̧ae iien ko jejaje kaki, rekōm̧etak, kainepata, im rub būruwōd, jemaron̄ en̄jake ad erļo̧k n̄an pedped elapļo̧k ioon maron̄ ko ad make im kālet ko jekōņaan, barāinwōt jeļāļo̧kjeņ im kōjparok eo me ej itok jān laļ in. Menin emaron̄ kōm̧m̧an bwe jen jab lukkuun leļo̧k ad n̄an lukkuun kein jipan̄ eo im emaron̄ jum̧aeiki apan̄ ko an mour in.

Pija

Aujpitōļ ruum.

Ij keememej juon iien ke ikar delo̧n̄ hospital kōn juon nan̄inmej, im ekar pen n̄an aō kiki. Ke ikar kune tōma ko im ruum̧ eo ekar jino marok, ikar loe juon kōkkaļļe ej kakilaajaj tok jān ioon jiliin̄ eo im̧aan meja ekar ba, “Kūrļo̧k, jab likjab.” Ilo aō jab kōtmāne, raan eo juon, ikar lo ejja ennaan eo wōt ekar bar pād ilo jejjo m̧ōttan ko ilo ruum̧ eo.

Pija

Kūrļo̧k, jab likjab jen kōkaļļe ko.

Etke ennaan in ekar lukkuun aorōk? Ke ikar kajjitōk ippān nōōj eo kake, ekar ba, “Ej n̄an bōbrae juon jorrāān eo me emaron̄ kōļapļo̧k metak eo epād kadede ippem.”

Mour in, kōn piktokin, ej bōktok en̄jake ko re kemetak, jet rej itok jān anbwin ko ad, jet rej itok jān m̧ōjņo̧ ko ad ak nan̄inmej ko, jet rej itok ilo wāween an ro jet kōjerbale anemkwoj ko aer, im jet rej itok kōn ad kōjerbale anemkwoj ko ad.

Ewōr ke juon kallim̧ur eļapļo̧k an kajoor jān eo im Rilo̧mo̧o̧r Make ekar kōm̧m̧ane ke Ekar ba, “Kajjitōk, im naaj lewōj n̄an kom̧; kappukot im kom̧ naaj lo; kaļļaļlaļ,” ak kūrļo̧k, “im naaj kapeļļo̧k n̄an e”?¹

Jar ej iaļ in ekōnono eo ippān Jemedwōj Ilan̄ eo ej kōtļo̧k ad “kūrļo̧k im jab likjab.” Ijoke, ewōr jekjek ko me jemaron̄ ļōmņak bwe kūr eo ejjab maron̄ ron̄ kōnke jejjab bōk uwaak ko ilo tum̧ōkaj aer itok ak juon eo ekkar n̄an kōtmāne ko ad.

Jet iien menin ej tōlļo̧k n̄an inepata, būrom̧ōj, ak en̄taan. Ak keememej ta eo Nipai ekar ba kōn tōmak ilo Irooj ke ekar ba, “Ekōjkan An jab naaj tōl eō, bwe in aikuj jek juon wa?”² Kiiō, ij kajjitōk ippem, ekōjkan an Irooj jab maron̄ tōl eok, bwe kwon jab likjab?

Lōke ilo uwaak ko an Anij ej kwaļo̧k ke jej errā ke wāween ko An rejjab wāween ko ad³ im bwe “Men otemjeļo̧k reaikuj kūrm̧ool ilo iien eo aer.”⁴

Ilo ad lukkuun jeļā bwe jej ajri ro nejin juon Jemedwōj Ilan̄ eo ej iakwe im tūriam̧o̧ kake eaikuj in ikdeleel eo n̄an “kūrļo̧k” ilo wūjlepļo̧k n̄an jar kōn juon m̧wil “j[ar] iien otemjej, im jab kije[ļo̧k]; … bwe kōm̧m̧an eo [ad] en maron̄ em̧m̧anļo̧k n̄an jetōb eo [ad].”⁵ Baj kōļmenļo̧kjeņ kake en̄jake ko an Jemedwōj Ilan̄ n̄e kajjojo jar jej kōm̧m̧ane ilo juon jar ettā ilo etan Nejin, Jisōs Kraist. Ewi jon̄an kajoor im iakwe eo, ij tōmak, rej waļo̧k n̄e jej kōm̧m̧an āindein!

Jeje ko rekwojarjar robrak kōn waanjon̄ak in ro otemjej raar “kūr ioon Anij bwe ren jāmin likjab. Hilam̧ōn im jarin tariņae eo an, ke rekar jelm̧ae en̄taan ko aer, kar kūr ioon Anij, ilo aer lutōkļo̧k jetōb ko aer ilo jar. Rekar bōk kam̧ool, aenōm̧m̧an, tōmak, im kōjatdikdik, bōk peran im kijejeto m̧ae iien rekar bōk kōttōbar eo aer.⁶

Ļōmņak mōk ewi wāween an naaj Moses kar kūr im jan̄ ļo̧k n̄an Anij ke ekar loe e make ikōtaan Lom̧aļo Ekilmūr im Riijept ro rej epaaktok n̄an m̧ane, ak Ebream ke ej pokake kajjitōk eo n̄an katok kake ļeo nejin Aisek.

Ij jeļā bwe kom̧ kajjojo em̧ōj ami kar im naaj bōk en̄jake ko n̄e kūrļo̧k enaaj uwaak eo n̄an jab likjab.

Jiln̄uuļ iiō ko remootļo̧k, ke kōrā eo pāleeō im n̄a kar m̧aanjabpopo n̄an m̧are eo am̧ro ilo kien im m̧are an tampeļ , kōm̧ ar bōk juon kūr ilo taļboon eo ej kōjjeļļāik kōm̧ bwe m̧are eo ilo kien ekar kāānjeļ kōn wōt an kar bōjrak jerbal. Kōm̧ ar bōk kūr eo ilo taļboon jilu raan ko m̧okta jān an kōm̧m̧an kar kwojkwoj in pālele eo kar jikejuuļ. Ālkin jejjo kajjieon̄ ko n̄an jikejuuļ m̧are eo am̧ ilo opiij ko jet an kien im kar jab maron̄ tōbrak, kōm̧ ar jino en̄jake inepata im pere bwe kōm̧ maron̄ jab j m̧are āinwōt kar karōke.

Kōrā eo nej pāleeō im n̄a “kar kūrļo̧k,” lutōkļo̧k jetōb ko am̧ n̄an Anij ilo jar. Āliktata, juon armej ekar jiron̄tok kōm̧ kōn juon opiij ilo juon bukwōn jidikdik ettoļo̧k jān bukwōn eo ijo im mayor eo ie ekar juon eo im jekar jeļā kajjeen. Ilo am̧ jab eliklik, kōm̧ ar etal im loļo̧k e im kar kajjitōk ippān eļan̄n̄e emaron̄ in kōm̧areik kōm̧. Kōn lan̄lōn̄ eo am̧, ekar errā. Rijeje eo an ekar ba n̄an kōm bwe kōm̧ij naaj aikuj bōk juon peba in kōm̧are ilo bukwōn eo im būkļo̧k aolep peba ko m̧okta jān ālkin rālepen raan eo tok juon.

Raan eo tok juon, kōm̧ ar em̧m̧akūt n̄an bukwōn jidikdik eo im kar etal n̄an m̧ōn buulijm̧an n̄an kajjitōk peba ko remennin aikuj. Ilo ann ļo̧kjeņam̧ro, opiija eo ekar ba bwe ej jāmin letok n̄an kōm̧ kōnke ebooļ ripālele ro reddik rekar ko jān baam̧le ko aer bwe ren kittileek in m̧are ilo bukwōn eo, eo im aaet ekar jab jekjek eo n̄an kōm̧ro. Bar juon allen, mijak im būrom̧ōj ekar itok ioom̧ro.

Ij keememej wāween aō kar unoojdikdik im kar kūrļo̧k Jema Ilan̄ bwe in jab likjab. Ikar bōk juon im̧we eo ealikkar ilo kōļmenļo̧kjeņ eo aō, ej ba im bar ba, “Peba in mālim n̄an deļo̧n̄e tampeļ, peba in mālim n̄an deļo̧n̄e tampeļ.” Ikar m̧ōkaj im kadiwōjtok peba in mālim n̄an deļo̧n̄e tampeļ eo aō im leļo̧k n̄an opiija eo, ilo an tarpok kōrā eo nej pāleeō.

Ekar juon men kōm̧ ar jab kōtmāne ke kōm̧ ar ron̄ an opiija eo ba, “Etke kwaar jab ba ke kwoj jān Kabun̄ eo an Jisōs Kraist im Armej ro Rekwojarjar ilo Raan Ko Āliktata? Ilukkuun jela kōn kabun̄ eo am̧.” Ekar m̧ōkaj im jino kōpooje peba ko. Ekar ļapļo̧k an ļo̧kjenam̧ro ke opiija eo ekar etal jān jekjek eo ilo an jab ba jabdewōt.

Lemn̄oul minit rekar eļļā, im ej jan̄in ro̧o̧ltok. Em̧ōj an 11:55 ilo jibbon̄, im ekar wōr jidik iien eo m̧ae ālkin rālep n̄an am būkļo̧k peba ko. Ekar jab etto, ekar jedetok kōn juon kidu jidikdik im kar jiron̄ kōm̧ bwe ekar juon mennin letok an kōm̧are eo im ekar letok n̄an kōm̧ippān peba ko.

Kōm̧ ar ettōrļo̧k n̄an opiij eo an mayor eo kōn peba ko im kidu eo ekāāl nejūm. Innām kōm̧ ar lo juon waan rijerbal in kien ej jibadōktok kōm. Ikar bōjrak im̧aan wa eo. Wa eo ekar bōjrak, im kōm̧ ar loe rijeje eo ilowaan. Ilo an lo kōm̧, ekar ba, “Joļo̧k aō bōd, iaar ba rālep. Ij aikuj etal n̄an bar juon jerbal.”

Ikar kōttāik eō make kōn unoojdikdik, kūrļo̧k Jema Ilan̄ kōn aolepān būruwō, kajjitōk kōn jipan̄ bar juon alen n̄an “jab likjab.” Ejjab etto, kabwilōn̄lōn̄ eo ekar waļo̧k. Rijeje eo ekar ba n̄an kōm̧, “Kidu ņe nejūm̧i ej juon kidu eaiboojoj. Ia eo imaron̄ loe juon āinwōt ņe n̄an ļaddik eo nejū?”

“Ej n̄an kwe,” kōm̧ ar m̧ōkaj im uwaak.

Rijeje eo ekar reitok n̄an kōm̧ kōn ļo̧kjenan im ba, “EMMAN, jen etal n̄an opiij eo im kōm̧m̧an karōk ko.”

Ruo raan tokālik, Carol im n̄a kar m̧are ilo kien, āinwōt kar pepe, innām kōm̧ ar liāp ilo Lima Peru Temple.

Aaet, jej aikuj in keememej bwe kūrļo̧k ej juon men eaorōk an tōmak im kōm̧m̧an—tōmak n̄an kile bwe ewōr juon Jemedwōj Ilan̄ eo ej uwaake jar ko ad ekkar n̄an māletlet eo An eļap, innām kōm̧m̧ane iien otemjej ta eo jej kajjitōk kake. Jar—kūrļo̧k—emaron̄ kōkaļļe in ad kōjatdikdik. Ilo ad emakūt n̄an jerbal ālikin jar ej juon kōkaļļe bwe tōmak eo ad ej m̧ool—tōmak eo ej me ej ioon mālijon̄, mijak, ak inepata.

Ij kajjitōk bwe kwōn ļōmņak im kile laajrak in men kein:

1. Aolep iien ļōmņak kōn Irooj āinwōt kālet eo am̧ jinointata kōn jipan̄.

2. Kūrļo̧k, jab likjab. Oktakļo̧k n̄an Anij kōn jar em̧ool.

3. Ālkin jar, kōm̧m̧ane aolep men komaron̄ n̄an bōk kōjeraam̧m̧an ko kwaar jar kaki.

4. Kōttāik eok make n̄an bōk uwaak eo ilo iien eo An im wāween eo An.

5. Jab bōjrak! Wōnm̧aanļo̧k wōt im bun̄m̧aanļo̧k ilo iaļ in bujen eo ilo am̧ kōttare juon uwaak.

Bōlen ewōr juon armej kiiō eo, kōn jekjek ko, ej en̄jake āinwōt rej itōn likjab im naaj kōņaan in kūrļo̧k āinwōt Josep Smith ekar kōm̧m̧ane ke ekar ba: “O Anij, Kwo pād ia? … Ewi toun naaj an Peim tōt wōt?”⁷

Aaet ilo jekjek āinwōt kein, jar kōn “kajoor in jetōb eo ej im̧we jerbal eo,” āinwōt Būreejtōn Russell M. Nelson ekar katakin,⁸ kōnke jar ko am̧ rej aolep iien ron̄jaki!

Keememej al in:

Ilo ad jar jemaron̄ en̄jake iakwe eo an Jemedwōj Ilan̄, eo ekar jilkintok Nejin Jitōn Bōro Emake Wōt n̄an deo̧o̧r eddodo ko ad, kōnke eļan̄n̄e jej kūr ioon ad Anij, Ij kam̧ool bwe jej jāmin likjab. Ilo etan Jisōs Kraist, Amen.