“Pād Wōt, im Jeļā bwe N̄a Anij”

Ilo 1833, Armej ro Rekwojarjar ilo Missouri rekkar jet ro rekar bōk eļap jorrāān ko. Rinana ro rekar kadiwōjļo̧k er jān m̧ōko m̧weer ilo Jackson County, im jet membōr in Kabun̄ in rekar kajjieon̄ ijjino mour ko aer ilo jikin ko jet repaak. Ak jorrāān ko ņae er rekar wōnm̧aanļo̧k wōt, im kamijak ko n̄an kamej elōn̄. Ilo jekjek kein rapan̄, Irooj ekar kwaļo̧k laajrak in kōmeļeļe in n̄an Rikanaan Josep Smith ilo Kirtland, Ohio:

“Kōn menin, būruōmi ren aenōm̧m̧an kōn Zaion; bwe kanniōk otemjej ej pād ilo Peiū; ikōn̄ wōt im jeļā ke N̄a Anij.”³

Ij tōmak bwe naan in rōjan̄ eo an Irooj n̄an “pād wōt” ej kōmeļeļeiki eļapļo̧k jān jab baj kōnono ak jab em̧m̧akūtkūt. Bōlen kōttōpar eo An ej n̄an kōj bwe jen keememej im pedped ilo E im ilo kajoor eo An “ilo aolep iien ko im ilo aolep men otemjeļo̧k, im ilo aolep jikin ko [jej] maron̄ pād ie.”⁴ Aaet, “pād wōt” emaron̄ erom̧ juon wāween kakeememej kōj n̄an mije wōt Rilo̧mo̧o̧r eo ilo ejjeļo̧k likjab āinwōt unjen jipan̄ eo eļaptata an lur in jetōb eo ad eo im ej kōkajoorļo̧k kōj n̄an kōm̧m̧an n̄an anjo̧ jān men ko reppen.

Tōmak eo em̧ool ej pedped wōt ilo im ioon Irooj Jisōs Kraist—ilo E āinwōt eo ekwojarjar im Nejin Emake Wōt im Jitōn Bōro Nejin Jemān im ilo E im jerbal in pinmuur eo Ekar kūrm̧ool.

“Bwe Eaar uwaake jem̧ļo̧k ko an kien eo, im Eaar bōk aolep ro raar tōmak ilo E; im ro eaar wōr aer tōmak ilo E renaaj eddāp n̄an men otemjej em̧m̧an; kōn menin E ej errā ilo jibadbad eo kōn ro nejin armej.”⁵

Jisōs Kraist ej ad Ripinmuur,⁶ ad Rijojom̧ar,⁷ im Rikōnono eo ad⁸ ippān Jemed Indeeo im ej ejm̧aan eo jej aikuj kalōke pedped in mour in jetōb ko ad.

Hilamōn ekar kōmeļeļeiki, “keememej, keememej bwe ej ioon ejm̧aan in ad Ripinmuur, eo ej Kraist, eo Nejin Anij, bwe kom̧ij aikuj kalōk pedped ko ami; bwe n̄e devil enaaj jilkintok kōto ko an rekajoor, aaet, m̧ade ko an ilo aire, aaet, n̄e aolep wōt dekā im lan̄ ko an rekajoor renaaj bun̄it eok, enaaj ejjeļo̧k an kajoor ioom̧ n̄an kinōōr laļļo̧k eok n̄an ron̄ in en̄taan im wo ejjeļo̧k jem̧ļo̧kin, kōnke ejm̧aan eo kom̧ ar ekkal ioon, eo ej pedped em̧ool, pedped eo eļan̄n̄e armej rej ekkal ioon rej jamin bun̄.”⁹

Kōkkaļļe eo an Kraist āinwōt “ejm̧aan” eo ioon jej aikuj kalōk pedped eo elukkuun in ļap tokjān ilo mour ko ad. Jouj im lale ilo eoon in bwe Rilo̧mo̧o̧r ejjab pedped eo. Ijjelo̧kin, em̧ōj rōjan̄ kōj n̄an kalōk pedped in jetōb ko ad make Ioon.¹⁰

Pedped eo ej m̧ōttan juon em̧ eo ekkejel ioon laļ. Juon pedped eo ekajoor ej letok kōjparok jān kakkure ko rej waļo̧k tok ilo laļ in im elōn̄ kain kakkure ko jet rekajoor. Juon pedped eo ejejjet ej barāinwōt leļo̧k eddo in m̧weo ipeļaakin juon jikin ekilep n̄an bōbrae tarjān jon̄an in eddo eo ilo bwidej eo ium̧win im ej leļo̧k ļābōļ eo ejejjōt n̄an ekkal.

Pija

M̧weeo epen pedped eo.

Juon dāpdep eo ekajoor im epen ikōtaan pedped eo im bwidej eo eaorōk eļan̄n̄e juon em̧ ej ekkal bwe en pen im kajoor ālkin elōn̄ iien ko. Im n̄an baj kain ekkal rot in, me dila ko im aen in dābdep ko maron̄ kōjerbali n̄an kapen pedped eo an juon em̧ n̄an “bwidej eo ak dōkā ko ium̧win m̧weeo,” reppen, dōkā ko repen ium̧win bwidej im men ko jet āinwōt bwidej im dōkā ko.

Pija

M̧weeo ekar ejaak ioon pedped eo epen.

Ilo juon wāween āinwōt in, pedped in mour ko ad rej aikuj ekkeijel n̄an ejm̧aan eo an Kraist eļan̄n̄e jej aikuj in dim im pen. Bujen ko rekwojarjar im kain̄i ko an gospel eo an Rilo̧mo̧o̧r eo em̧ōj aer jepļaaktok im maron̄ keidi n̄an dila (anchor pins) ko im aen in dāpdep ko kōjerbali n̄an kepen juon em̧ n̄an bwidej ak dōkā ko ium̧win m̧weeo. Aolep iien jej tiljek n̄an bōki, etali, keememeji, im kōkāāli bujen ko rekwojarjar, emjak eo ad ilo jetōb eaikuj in lukkuun dim im pen n̄an “ejm̧aan” eo an Jisōs Kraist.

“Kōn menin, jabdewōt eo ej lōke Anij emaron̄ kōjatdikdik ilo m̧ool kōn laļ eo em̧m̧anļo̧k, aaet, em̧ool jikin eo ianbwijmaron̄ in pein Anij, kōjatdikdik eo ej itok jān tōmak, kōm̧m̧an juon em̧jak n̄an jetōb ko an armej, eo en kar kōm̧m̧an bwe ren pen im dim, iien otemjej kōjatdikdik ilo jerbal ko rem̧m̧an, bōk tōl n̄an kaiboojoj Anij.”¹¹

Ļapļo̧k im eddōkļo̧k “ilo raan ko an,”¹² “erreo [kainōknōk ad] ļōmņak ko ilo ejjeļo̧k m̧wijkōk,” ad “peran [enaaj kanooj kajoor] ilo im̧aan mejān Anij,” im “Jetōb Kwojarjar eo [ej ad] m̧ōttad ilo iien otemjeļo̧k.”¹³ Jej kanooj in tōt, pen, koņ, im amņak.¹⁴ llo an pedped in mour ko ad ekkal ioon Rilo̧mo̧o̧r eo, jej jeraam̧m̧an n̄an “pād wōt”—n̄an bōk juon kam̧ool ilo jetōb bwe Anij ej Jemedwōj Ilan̄, kōj jej ajri ro Nejin, im Jisōs Kraist ej ad Rilo̧mo̧o̧r.

Irooj ej letok jim̧or iien ko rekwojarjar im jikin ko rekwojarjar n̄an jipan̄ kōj en̄jake im ekkatak kōn lur in jetōb ko ad.

N̄an waanjon̄ak, raan in Jabōt ej raan eo an Anij, juon iien ekwojarjar kōjenolo̧k n̄an keememej im kabun̄jar n̄an Jemed ilo etan Nejin, n̄an bōk koņaad ilo kain̄i ko an priesthood eo, im n̄an bōke im kōkāāl bujen ko rekwojarjar. Kajjojo wiik jej kabun̄jar n̄an Irooj ilo iien ad katak ilo m̧weo im āinwōt “citizen ippān ro rem̧m̧an”¹⁵ ilo iien kwojkwoj im kweilo̧k ko jet. Ilo raan eo An ekwojarjar, ļōmņak ko, m̧akūtkūt ko ad, im m̧wiliid rej kōkaļļe ko jej kwaļo̧k n̄an Anij im juon kōkaļļe kōn iakwe eo ad n̄an E.¹⁶ Aolep Jabōt, eļan̄n̄e jenaaj, jemaron̄ pād wōt im jeļā bwe Anij ej Jemedwōj Ilan̄, kōj jej ro Nejin, im Jisōs Kraist ej ad Rilo̧mo̧o̧r.

Men eo eaorōktata ilo ad kabun̄jar ilo Jabōt ej “ilo̧k n̄an m̧ōnjar eo im ajiļo̧k kwojkwoj ko [ad] n̄an [Irooj] ilo raan eo ekwojarjar.”¹⁷ “Mōnjar[ko]” ko me jej aiintok doon ilo Jabōt rej m̧ōnjar ko im m̧ōko jet em̧ōj kōmālimi—jikin ko rekwojarjar n̄an kautiej, kabun̄jar, im ekkatak. Kajjojo m̧ōnjar im em̧ kein kar aje jān ro ewōr ippāer kajoor eo an priesthood āinwōt juon jikin ijo Jetōb eo an Irooj emaron̄ pād ie im ijo Ajri ro nejin Anij remaron̄ itok “n̄an jeļāļo̧kjeņ eo kōn aer Ripinmuur.”¹⁸ Eļan̄n̄e jenaaj, jemaron̄ “pād wōt” ilo jikin ko ad rekwojarjar n̄an kabun̄jar im lukkuun jeļā bwe Anij ej Jemedwōj Ilan̄, jej ajri ro Nejin, im Jisōs Kraist ej ad Rilo̧mo̧o̧r.

Tampeļ ej bar jikin ekwojarjar eļaptata kōjenolo̧k n̄an kabun̄jar im jerbal n̄an Anij im ekkatak kōn m̧ool ko an indeeo. Jej ļōmņak, m̧akūtkūt, im nuknuk ko ad roktak ilo m̧weeo imōņ Irooj jān jabdewōt jikin ko me jemaron̄ kar pād ie. Ilo m̧weo Im̧ōn ekwojarjar, eļan̄n̄e jenaaj, jemaron̄ pād wōt im jeļā bwe Anij ej Jemedwōj Ilan̄, kōj jej ajri ro Nejin, im Jisōs Kraist ej ad Rilo̧mo̧o̧r.

Unleplep in pedped ko an iien ko rekwojarjar im jikin ko rekwojarjar rej lukkuun juon wōt: n̄an ad mije wōt Jemedwōj Ilan̄ im karōk eo An, Irooj Jisōs Kraist im Pinmuur eo An, ketak kōn kajoor eo an Jetōb Kwojarjar, im kallim̧ur ko rej ekkejel ippān kain̄i ko rekwojarjar im bujen ko an tarlep in gospel eo an Rilo̧mo̧o̧r.

Rainin ij bar āliji juon pedped in katak ikar kwaļo̧k m̧oktaļo̧k. Mōko im̧ōd rej aikuj in koba in men kein raorōk jim̧or iien ko rekwojarjar im jikin ko rekwojarjar ijo me kajjojo armej im baam̧le ko remaron̄ “pād wōt” im jeļā bwe Anij ej Jemedwōj Ilan̄, kōj jej ajri ro Nejin, im Jisōs Kraist ej ad Rilo̧mo̧o̧r. Em̧m̧akūt jān m̧ōko im̧ōd n̄an kabun̄jar ilo Jabōt ilo m̧weo im̧ōn Irooj em̧ool eaorōk. Ak ilo ad ro̧o̧l ļo̧k n̄an m̧ōko im̧ōd kōn jibadbad ko an jetōb im kajoor eo jekar bōke jān jikin kein im m̧akūtkūt ko jemaron̄ rie ilo ad mije wōt kōttōpar ko raorōk an mour in kanniōk in n̄an anjo̧ jān mālijjon̄ ko rej lukkuun ajedeed ilo laļ in ad.

Ad jab bōjrak in etal ilo Jabōt, tampeļ, im en̄jake ko an m̧weo im̧ōd rej aikuj in kōkjoorļo̧k kōj kōn kajoor eo an Jetōb Kwojarjar, im kōn juon bujen eo ej wōnm̧anļo̧k wōt im kajoorļo̧k im ej ekkejel n̄an Jemed im Nejin, kōn juon “juon kōjatdikdik emeram”¹⁹ ilo kallim̧ur ko an Anij n̄an indeeo.

Ilo an m̧weeo im Kabun̄ in aiintok doon ilo juon wōt ilo Kraist,²⁰ jemaron̄ ioon jorrāān ilo kajjojo kona ko, ak jej jāmin būrom̧ōj ilo ļōmņak ko ad im ilo būruwōd. Jemaron̄ in tarpok jān jekjek ko ad im apan̄ ko, ak ej jāmin jako ad kōjatdikdik. Jemaron̄ in jelm̧ae kakkure, ak jenaaj barāinwōt kile bwe jejjab make iaad.²¹ Jemaron̄ bōk kajoor eo an jetōb n̄an erom̧ im dim wōt, pen, im m̧ool.

Ij kallim̧ur bwe ilo ad kalōk pedped in mour ko ad ioon “ejm̧aan” eo ilo Jisōs Kraist, jemaron̄ in jeraam̧m̧an kōn Jetōb Kwojarjar n̄an bōk ad kajjojo im lur in jetōb eo an jetōb eo ej kōmaron̄ ad jeļā im keememej bwe Anij ej Jemedwōj Ilan̄, jej ajri ro Nejin, Jisōs Kraist ej ad Rilo̧mo̧o̧r, im jemaron̄ in jeraam̧m̧an n̄an kōm̧m̧an im anjo̧ ioon men ko reppen.

Ij lan̄lōn̄ in kam̧ool bwe Anij ej Jemedwōj Ilan̄, jej ajri ro Nejin, im Jisōs Kraist ej ad Ripinmuur im “ejm̧aan” in ad lo̧mo̧o̧r. Ij kam̧ool menin ilo āt eo ekwojarjar etan Irooj Jisōs Kraist, amen.