Kweilo̧k Eo Eļap
Ej Menin Māletlet ilo Irooj Bwe En Wōr Ippād Bok in Mormon
Eprōļ 2024 kweilo̧k eo eļap

Ej Menin Māletlet ilo Irooj Bwe En Wōr Ippād Bok in Mormon

Jān Būreejtōņ Mark L. Pace

Būreejtōn eo Eutiej an Jabōt Jikuuļ

Ej aō jar bwe riiti Bok in Mormon iiō in naaj juon lan̄ļōn̄ im juon kōjeraam̧m̧an n̄an kōj kajjojo.

Ro jeiū im jatū jitōnbōro, ekanooj ļap am kam̧m̧oolol kom̧ kōn kijejeto ko ami ilo riiti jeje ko rekwojarjar ippān Itok, Ļoor Eō. Kom̧ em̧m̧ol kōn aolep ami kōm̧m̧an. Ekkejel eo ami raan otemjej ippān Anij im An naan ekanooj m̧wilaļ tōprak ko. “Kom̧ij likūt pedped in juon jerbal eļap.” Im jān men ko reddik ej jebarļo̧k men eo eļap.”1

Riiti katak ko an Rilo̧mo̧o̧r ilo jeje ko rekwojarjar enaaj jipan̄ kōj ukōt m̧oko̧ m̧ōd n̄an m̧ōn tōmak im̧ jikin katak gospel eo.2 Ej karuwaineneik tok Jetōb eo n̄an m̧oko̧ m̧ōd. Jetōb Kwojarjar eo ej koobrak ad kōn lan̄lōn̄3 im̧ ej ukōt kōj n̄an to̧o̧n wōt mour an rikaļoor ro an Jisōs Kraist.

Ium̧win jejjo iiō ko remo̧o̧tļok, ke kar riiti bok in jeje ko rekwojarjar, jaar lo elōn̄ katak ko an Anij katakin ajri ro nejin ilo aolep tōre in bōk eddo ko reļļap an gospel eo.4

Ilo aolep tōre in bōk eddo, emōj ad lo juon jon̄ak jemeleļe. Anij ej kōjepļaaktok ak ej kwaļo̧k gospel eo an Jisōs Kraist kōn rikanaan ro An. Armej rej ļo̧o̧r rikanaan ro im eļap aer jeraam̧m̧an. Mekarta, ilo iien ko, jet amej raar bōjrak jān ron̄jake naan ko an rikanaan ro im kōttoļo̧k er make jān Irooj im gospel eo An. En̄in ej ta eo jej ņa etan bun̄ jān tōmak. Gospel eo kar m̧oktata kwaļo̧k n̄an Adam, bōtaab jet iaan ajri ro nejin Adam im Iv raar oktakļo̧k jān Irooj ilo maroklep.5 Jej lo juon jon̄ak an jepļaaktok im bun̄ jān tōmak kar waļo̧k im bar waļo̧k ilo tōre in iien bōk eddo ko an Inōk, Noa, Ebream, Moses, im ro jet.

Kiiō, rainin, jej mour ilo tōre in iien bōk eddo eo an tarlep in iien ko.6 En̄in ej tōre in iien bōk eddo eo wōt me enaaj jem̧ļo̧k ilo juon maroklep.7 Ej ilo epepen in eo enaaj tōlļo̧k n̄an Itok eo Kein Karuo an Rilo̧mo̧o̧r Jisōs Kraist im irooj eo An ilo taujin iiō.

Kiiō, ta oktak eo kōn epepen in? Ta eo Irooj ekar letok n̄an kōj rainin, eļap tata tōre in ad, me enaaj jipan̄ kōj epakeļo̧k Rilo̧mo̧o̧r eo im jamin ilo̧k jān E?

Juon uwaak ejiktok ilo ļōmņak eo aō ej jeje ko rekwojarjar—im eļap tata Bok in Mormon: Bar Juon Kallim̧ur kōn Jisōs Kraist.

Ilo an Anij kar kallim̧ur ejjamin bar wōr juon bun̄ jān tōmak eo eļap, jej aikuj ļōmņak im tiljek n̄an bōbrae jān bun̄ jān tōmak an juon make—kemeemej, an būreejtōn Russell M. Nelson katakin, “Kōj kajjojo rej bōk eddo in eddōkļo̧k eo ad kajjojo ilo jetōb.”8 Ekkatak Bok in Mormon, ilo ad kōm̧m̧ane iiō in, iien otemjej ej kepaakeļo̧k kōj n̄an Rilo̧mo̧o̧r eo—im ej jipan̄ kōj pād epaake E.

Jej ņae etan “ekkatak,” im bwe em̧m̧an kōnke ej kōjerbal kijejeto. Bōtaab jejjab aolep iien aikuj in katak jet m̧ool kāāl. Jet iien riiti Bok in Mormon ej kōn en̄jake ekkejel n̄an Anij rainin—naajdik jetōb eo, kōkajoorļo̧k ilo jetōb m̧okta jān ilo̧k n̄an jelm̧ae laļ in, ak pukōt kemour eo ālikin juon raan enana ilo laļ in.

Jej ekkatak jeje ko rekwojarjar bwe Jetōb Kwojarjar eo, rūkaki ļapļap eo, emaron̄ kam̧wilaļļo̧k oktakļo̧k eo ad n̄an Jemādwōj Ilan̄ im Jisōs Kraist im jipan̄ kōj eromļo̧k āinwōt Er.9

Kōn ļōmņak kein ilo kōļmenļo̧kjeņ, jemaron̄ ļōmņak, “Ta eo Jetōb Kwojarjar eo ekar katakin kōj wiik in ilo iien ekkatak eo ad kōn Bok in Mormon?” im “Ekōjkan an menin kepaakļo̧k kōj n̄an Rilo̧mo̧o̧r eo?”

Ewōr kajjitōk ko rem̧m̧an n̄an ekkatak jeje ko rekwojarjar ad ilo m̧weo. Ebar wōr kajjitōk ko relukkuun jetjet n̄an jino juon kūlaaj in Jabōt ilo m̧ōn jar eo. Ej em̧m̧anļo̧k ad katakin ilo m̧ōn jar eo ilo Jabōt kōn kōm̧anm̧anļo̧k ad katak ilo m̧weo ilo wiik eo. Kōn menin ilo kūlaaj in Jabōt ko ad, “eo ej kwaļo̧k naan im eo ej bōke, remeļeļe doon, im jim̧or rej ketak im lan̄lōn̄ ippān doon.”10

Erkein jejjo eoon ko Jetōb eo ekar im̧we ļōmņak eo aō jān Bok in Mormon ekkatak eo ilo wiik in:

  • Nipai ekar katakin Jekab n̄an “kōjparoki pileij kein im lilaļļo̧k … jān epepen n̄an epepen. Im eļan̄n̄e eaar wōr kwaļo̧k eo eaar ekwōjarjar, ak revelesōn … , ak kanaan ,” Jekab aikuj “m̧wijiti … ioon pileij kein … ekkar n̄an an armej ro [aer].”11

  • Jekab ekar kam̧ool tokālik, “Kōmij lin̄ōri [jeje ko rekwojarjar], … im kōn aolep kam̧ool kein repād ippām kōmij bōk juon kōjatdikdik, im am tōmak jab maron̄ idiki”12

Kiiō, eoon kein rekar kōm̧m̧an bwe in keememej ta eo Nipai eaar ba m̧oktaļo̧k kōn pileij brass ko:

“Im kōm ar būki ļo̧o̧k kein … im lin̄ōri im lo bwe … aer aorōk eaar ļap n̄an kōm, jon̄an kōm ar maron̄ oņaaki kien ko an Irooj n̄an ajri ro nejim.

“Kōn menin, eaar mennin mālōtlōt ilo Irooj bwe kōmin būki ippām, ke kōmij ito-itak ilo āne jem̧aden ļo̧k n̄an āneen kallim̧ur.”13

Kiiō, eļan̄n̄e ekar māletlet n̄an Liai im baam̧le eo an n̄an wōr jeje ko rekwojarjar, ej menin māletlet n̄an kōj rainin barāinwōt. Aorōk ļapļap eo im kajoor in jetōb eo an jeje ko rekwojarjar rej wōnm̧aanļo̧k wōt ilo mour ko ad rainin āinwōt kar etto.

Ejjan̄in wōr juon armej ilo bwebwenato me ej bōk Bok in Mormon im jeje ko rekwojarjar jet me jej jeraam̧m̧an jāni rainin.14 Aaet, Liai im baam̧le eo an raar jeram̧m̧an n̄an bōk piliej brass ko ippāer, ak ekar ejjeļo̧k juon kape n̄an kajjojo em̧. Kape eo aorōk tata an Bok in Mormon ej kape eo ad make. Ej kape eo me jej riiti.

Ilo visōn eo an Liai kōn wōjke in mour eo, Liai ekar katakin kōj aorōk eo an en̄jake an juon make kōn iakwe eo an Anij. Ālikin an kar m̧ōn̄ā jen leen wōjke eo, Liai ekar lo kōrā eo pāleen, Saraia, im ļaddik ro nejin Nipai im Sam rōttoļo̧k jidik.

“Rej jutak āinwōt rej jab jeļā ia rej aikuj etal ie.

“… Iaar jeeaaļetok er,” Liai ej ba, “im barāinwōt ba n̄an er kōn juon ainikien eļļaaj bwe ren aikuj itok n̄an ippa, im m̧ōn̄ā leen wōjke eo, eo eaar enno̧ļo̧k jān leen ko jet.

“Im̧ … raar itok n̄an iba im m̧ōn̄ā leen eo barāinwōt.”15

Ij iakwe waanjon̄ak in jekjek in katakin eo an Liai. Saraia, Nipai, im Sam raar mour em̧m̧an, im mour jim̧we. Bōtaab ewōr juon men em̧m̧anļo̧k ippān Irooj, juon men ejetjetļo̧k n̄an er. Raar jab jeļā ia eo n̄an pukōte, bōtaab Liai ekar jeļā. Kōn menin ekar kūr er, “kōn juon ainikien eļļaaj,” n̄an itok n̄an wōjke in mour eo im mōn̄ā kōn er make. Tōl eo an ekar alikkar. Eban kar wōr likjab.

Ij tōprak in ejja kain jekjek in katakin in wōt.16 Ke ikar juon ļaddik edik, bōlen 11 ak 12 iiō rūtto, jinō ekar kajjjitōk ippa, “Mark, kwojeļā ke kōn kwe make, jān Jetōb Kwojarjar, bwe gospel eo ej m̧ool?”

Kajjitōk ko an raar kailbōk eō. Ikar aolep iien kajjieon̄ in erom juon “ļaddik em̧m̧an,” im ikar ļōmņak bwe ekar bwe. Bōtaab jinō, āinwōt Liai, ekar jeļā bwe juon men eļapļo̧k kar aikuji. Ikar aikuji in jerbal im jeļā kōn n̄a make.

Ikar uwaak bwe ejjan̄in de wōr aō en̄jake jab in. Im ekar jab āinwōt ilbōk n̄an jidik kōn uwaak eo aō.

Innām ekar ba juon men ijjan̄in meļo̧kļo̧ke. Ij keememej wōt naan ko an tok n̄an rainin: “Jemādwōj Ilan̄ ekōņaan bwe kwon jeļā kōn kwe make. Bōtaab kwoj aikuj kōm̧m̧ane kijejeto eo. Kwōj aikuj in riiti Bok in Mormon im jar n̄an jeļā jān Jetōb Kwojarjar eo. Jemādwōj Ilan̄ enaaj uwaaki jar ko am̧.”

Ekwe, ijjan̄in kar riiti Bok in Mormon m̧okta. Ikar jab ļōmņak ekar bwe aō rūtto n̄an kōm̧m̧nae men jab in. Bōtaab jinō ekar ļap an jeļā.

Kajjitōk eo an ekar ļujur aō ikdeelel n̄an jeļā kōn n̄a make.

Kōn menin, kajjojo bon̄, ilo ruum̧ in kiki eo ikar kōjjebare ippān ļeo jeiū im jatū, ikar kabbōl tōm̧a eo ijjabōn peet eo aō im riiti juon jepta in Bok in Mormon. Innām, kune tōm̧a eo, ikar to jān peet eo aō n̄an kar bukwelōlō im jar. Eļapļo̧k an kar m̧ool aō jar im kōn eļapļo̧k ikdeelel jān kar m̧okta. Ikar kajjitōk ippān Jemedwōj Ilan̄ n̄an jouj in kōm̧m̧an bwe in jeļā kōn tarlep in m̧ool eo an Bok in Mormon.

Jān iien eo ikar jino riit Bok in Mormon, ikar en̄jake bwe Jemādwōj Ilan̄ ekar jeļā kōn kijejeto ko aō. Im ikar en̄jake bwe ikar aorōk n̄an E. Ilo aō kar riit im jar, en̄jake ko rōkaenōm̧m̧an, im aenōm̧m̧an raar pād ilo n̄a. Jepta kōn jepta, meram in tōmak eo ekar romaakļo̧k itulowaan in aō jetōb. Ilo iien ko, ikar kile bwe en̄jake kein raar kapene ko an m̧ool eo jān Jetōb Kwojarjar.17 Ikar itok n̄an jeļā kōn n̄a make bwe Bok in Mormon ej m̧ool im bwe Jisōs Kraist ej Rilo̧mo̧o̧r eo an laļ. Ekanooj ļap aō kam̧m̧oolol kōn karuwainene eo eim̧we an mama.

En̄jake in kōn riiti Bok in Mormon āinwōt juon ļaddik ekar jino kōn juon jon̄ak an ekkatak jeje ko rekwojarjar me e wōnm̧aanļo̧k wōt n̄an kōjeraam̧m̧an eō n̄an rainin. Ij riiti wōt Bok in Mormon im bukwelōlō ilo jar. Im Jetōb Kwojarjar eo ej kapen m̧ool ko an aolep iien.

Ekar jim̧we an Nipai ba. Ekar menin māletlet ilo Irooj bwe jen ineke jeje ko rekwojarjar ilo aolepān mour ko ad. Bok in Mormon ej “dekā in jabōn em̧” me ej kōm̧m̧an an epepen in oktak jān aolep epepen ko im̧aanļo̧k. Ilo ad ekkatak Bok in Mormon im ļoor rikanaan emour, ejjamin naaj wōr bun̄ jān tōmak an juon make ilo mour ko ad.18

Kūr eo n̄an itok n̄an wōjke in mour eo kōn jirok likatōttōt n̄an naan an Anij ejjab baj juon kūr jān Liai n̄an baam̧le eo an, im ejjab baj juon kūr jān jinō n̄an n̄a n̄an riit im jar kōn Bok in Mormon. Ej barāinwōt juon kūr jān rikanaan eo ad, Būreejtōn Russell M. Nelson, n̄an kōj kajjojo.

“Ij kallim̧ur,” ekar ba “bwe ilo am̧ lukkuun ekkatak Bok in Mormon eo aolep raan, kwonaaj kōm̧m̧ani jokāālet ko rem̧m̧anļo̧k—aolep raan. Ij kallim̧ur bwe ilo am̧ kejo̧kļo̧kjeņ kōn ta eo kwoj ekkatak, wintō in lan̄ enaaj peļļo̧k, im kom̧ naaj bōk uwaak ko n̄an kajjitōk ko am̧ im tōl n̄an mour eo ami make.”19

Ej aō jar bwe riiti Bok in Mormon iiō in naaj juon lan̄ļōn̄ im juon kōjeraam̧m̧an n̄an kōj kajjojo im naaj kepaakļo̧k wōt kōj n̄an Rilo̧mo̧o̧r eo.

Jemādwōj Ilan̄ ej mour. Jisōs Kraist ej ad Rilo̧mo̧o̧r im ad Ripinmuur. Bok in Mormon epād ie naan ko An im ej kwaļo̧k iakwe eo An. Būreejtōn Russell M. Nelson ej rikanaan eo emour an Irooj ioon laļ in rainin. Ijeļā bwe men kein rem̧ool kōnke kōn kapen in kam̧ool eo an Jetōb Kwojarjar, eo kam̧ool eo im̧aan tata ikar bōk ke kar riiti Bok in Mormon āinwōt juon ļaddik. Ilo etan Jisōs Kraist, amen.

Kakeememej ko

  1. Katak im Bujen Ko 64:33.

  2. “Pedped wōt ilo m̧weo, kein katak in ekāāl im Kabun̄ in ej rie ewōr ippān maron̄ eo n̄an jab kabōjrak kajoor an baam̧le ko, āinwōt kajjojo baam̧le kajjieon̄ ilo aolepān iien in kijejeto im kōjparok n̄an ukōt m̧ōko m̧weer n̄an juon jikin kone an tōmak. Ij kallim̧ur bwe ilo ami tiljek jerbal n̄an bar kōkāāl m̧weo im̧ōmi n̄an juon jikin ekkatak gospel eo, ilo m̧ool raan in Jabōt ko ami renaaj em̧ool erom̧ juon men elan̄lōn̄. Ajri ro nejimi renaaj m̧ōņōņō in ekkatak im mour kōn katak ko an Rilo̧mo̧o̧r eo, im kareel ko an rikapo eo ilo mour eo ami im ilo m̧weo imōmi enaaj dikļo̧k. Oktak ko ilo baam̧le eo ami renaaj em̧m̧an im kajoorļo̧k” (Russell M. Nelson, “Erom̧ Riwaanjon̄ak ro rej Armej ro Rekwojarjar ilo Raan Ko Āliktata,” Liaona, Nob. 2018, 113).

  3. “Em̧ool, em̧ool, Ij ba n̄an eok, Inaaj ajejewaj n̄an eok Jetōb eo Aō, eo enaaj kōmeam am ļōmņak, eo enaaj koobrak am kōn m̧ōņōņō” (Katak im Bujen Ko 11:13).

  4. “Tōre in iien bōk eddo ko rej tōre in iien ko me Irooj ekar diktata kōmālim juon rikarejeran ioon laļ in n̄an kabwijer priesthood eo ekwojarjar im ki ko, im eo ekar wōr ippān kappe kwojarjar eo n̄an leto letak gospel eo n̄an armej ro an laļ in” (Topics and Questions, “Dispensations,” Gospel Library).

  5. Lale Moses 5:12-16.

  6. Rikanaan Daniel eaar lo raan kein ad, epepen in ad, ke eaar kwaļok tōņak eo an Nebuchadnezzar. Kabun̄ eo an Jisōs Kraist im Armej ro Rekwojarjar ilo Raan-ko Āliktata ej dekā eo ilo ettōņak jab in, m̧wijitļo̧k jān toļ eo kōn ejjeļok pā, dāpilļo̧k n̄an kobrak aolepān lal in (lale Daniel 2:34–35, 44–45; Katak im Bujen Ko 65:2).

  7. “Anij Jemādwōj Ilan̄ im Jisōs Kraist rekar kūr ioon Josep Smith bwe en juon rikanaan eo an tōre in iien bōk eddo in. Aolep kajoor ko rekwojarjar ilo epepen ko m̧oktaļok rekar jepļaaktok n̄an e. Epepen in emōj karōke im̧ letok ejjamin naaj wōr jon̄an ilo iien ak ilo jikin. Eban jem̧ļok ilo bun̄ jān tōmak, im̧ enaaj kaobrak laļin” (Russell M. Nelson, “The Gathering of Scattered IsraelAiintok Doon eo an Bwijin Israel eo Ekar Ejjeplōklōk,” Liaona, Nob. 2006, 79–80).

  8. Russell M. Nelson, ““Naan In Kōppeļļo̧k ko,” Liaona, Nob. 2018, 8.

  9. Lale “Oktak Ej Ad Kōttōbar,” Itok, Ļoor Eō—N̄an M̧weeo im Kabun̄: Bok in Mormon 2024, v.

  10. Katak im Bujen Ko 50;22; bar lale eoon 17–21.

  11. Jekab 1:3-4.

  12. Jekab 4:6.

  13. 1 Nipai 5:21-22.

  14. Kiiō epaak kar kōjjeļā bwe 200 milien kape ko an Bok in Mormon em̧ōj kar litok litak ilo tōre in iien bōk eddo in. Ilo m̧ool juon kabwilōn̄lōn̄. Bok in Mormon em̧ōj kiiō kar ukōte n̄an 113 kajin ko, kōn 17 ukook ko rekāāl rej kōm̧m̧an wōt. Ej juon kōjeraam̧m̧an n̄an an Bok in Mormon būriin, pād ilo digital, audio, video, im ļamļam ko jet. (Lale Ryan Jensen, “Church Distributes 200 Millionth Copy of the Book of Mormon,” Church News, Dec. 29, 2023, thechurchnews.com.)

  15. 1 Nipai 8:14-16; kōmejaja kar kobaitok.

  16. “Kajoor eo im̧we jen jetōb ekajoor tata ilo mour eo an juon ajri ej itok jen waanjon̄ak eo etiljek an mama im baba im bubu im jimma ro retiljek ilo kojparok bujen ko aer rekwojarjar. Jinen im jemen rej katakin ajiri ro nejier tōmak ilo Irooj Jisōs Kraist bwe er barāinwōt ‘ren maron̄ jeļā n̄an ia rej maron̄ reilo̧k n̄an jeorļo̧k jero̧wiwi ko aer.’[2 Nephi 25:26]. Bajjok im jab tiljek ilo kōjparok bujen ko ej tōl n̄an jetōb bajjok. Jetōbin jorrāan ej ekkā an ļap n̄an ajri ro nejid im ajri ro jibūd” (Kevin W. Pearson, “Kwoj Ke Mōnōnō Wōt?,” Liaona, Nob. 2022, 69).

  17. Lale Katak im Bujen Ko 6:22–24.

  18. Rikanaan Josep Smith ekar ba: “Iaar jiron̄ em̧m̧aan ro jeiū im jatū bwe Bok in Mormon eaar bok eo ejim̧we tata jān bok otemjej ioon laļ, im bwe ej dekā in jabōn em̧ n̄an tōmak in ad, im juon armej enaaj epaakeļo̧k Anij jān an mour ekkar n̄an katak ko ie, jān jabdewōt bok ko jet” (ilo Kadkad in Bok in Mormon).

  19. Russell M. Nelson, “Bok in Mormon eo: Eļan̄n̄e en kar Ejjeļo̧k Elmen Nej Kar Mour eo Am̧?,” Liaona, Nob. 2017, 62–63.