M̧ōņōņō kōn Menin Letok eo an Priesthood Kii ko

Ro jeiū im jatū rejitenbōro, rainin ej pād ilo bwebwenato n̄an Būreejtōn Dallin H. Oaks im n̄a. Emootļo̧k 40 iiō, ilo Eprōļ 7, 1984, ke kom̧ro kar rejtak n̄an Doulul eo an Jon̄oulruo Rijilōk ro.¹ Kom̧ro ej lan̄lōn̄ ilo kajjojo im aolep iien kweilo̧k eo eļap m̧okta, ekoba kweilo̧k in. Kom̧ro kar bar juon alen jeraam̧m̧an kōn ekwojarjar eo elutōkļo̧k an Jetōb. Ij kōjatdikdik kwonaaj bar ekkatak ennaan ko ilo kweilo̧k in ilo allōn̄ kaņe rej itok.

Ke iaar ļotak,² ekar wōr jiljino tampeļ ko rej jerbal ilo Kabun̄ in—juon ekar pād ilo St. George, Logan, Manti, im Salt Lake City, Utah, im barāinwōt ilo Cardston, Alberta, Canada, im Laie, Hawaii. Tampeļ ko ruo raar jerbal m̧oktaļo̧k ilo Kirtland, Ohio, im Nauvoo, Illinois. Āinwōt ro uwaan Kabun̄ in raar em̧m̧akūt turōkļo̧k, kar kipel Armej ro Rekwojarjar n̄an likūt tampeļ kein ruo.

Raar kakkure im tile Nauvoo Tampeļ. Kar bar kalōke innām Būreejtōn Gordon B. Hinckley eaar aje.³ Rinana ro rekar dike Kabun̄ in raar kakkure Kirtland Tampeļ. Tokālik Kirtland Tampeļ kar bōke jān ro uwaan Church of Christ, eo me raar bōke ium̧win elōn̄ iiō ko.

Allōn̄ eo ļo̧k jaar kwaļo̧k bwe Kabun̄ eo an Jisōs Kraist im Armej ro Rekwojarjar ilo Raan Ko Āliktata eaar wiaik Kirtland Tampeļ, ippānļo̧k jet iaan jikin kein raorōk ilo bwewenato ko ilo Nauvoo. Kōmij lukkuun kam̧m̧oolol kōn ekōnono ko ad ippān ritōl ro jān Church of Christ bwe menin en juon kwoņ.

Pija

Kirtland Tampeļ.

Kirtland Tampeļ eaar jikin eo eaorōk ilo Jepļaaktok eo an gospel in an Jisōs Kraist. Jet iaan m̧akūtkūt ko raar bōk jikier ijeņ me kar kanaan kake ium̧win taujin iiō im raar aorōk ilo jepļaaktok eo an Kabun̄ in an Irooj n̄an kakūrm̧ool mijen eo an ilo raan kein āliktata.

Juon iaan m̧akūtkūt ko raorōktata eaar bōk jikin ilo Jabōt in Ijtō eo, Eprōļ 3, 1836.⁴ Ilo raan eo, Josep Smith im Oliver Cowdery raar lo juon loļo̧k eo ekabwilōn̄lōn̄. M̧oktata, Irooj Jisōs Kraist ekar waļo̧k. Rikanaan eo ekar je bwe mejān “Rilo̧mo̧o̧r rekar āinwōt urur in kijeek; kooļan bōran ekar mouj āinwōt sno erreo; turin mejān eaar romaak ilōn̄inļo̧k meram eo an al; im ainikien eaar āinwōt ainikien ibeb in dān ko reļļap.”⁵

Ilo loļo̧k in, Irooj eaar lukkuun kwaļo̧k Kadkadin. Eaar ba, “N̄aij eo m̧oktata im eo āliktata; N̄aij E eo ej mour, N̄aij E eo kar m̧ane; N̄aij ami rijojomar ippān Jemān.”⁶

Innām Jisōs Kraist ekar kwaļo̧k bwe E bōk tampeļ in āinwōt m̧weeo Im̧ōn im kar kōm̧m̧ane kallim̧ur in: “Inaaj kwaļo̧k Eō make n̄an armej ro Aō ilo tūriam̧o ilo m̧wiin.”⁷

Kallim̧ur in eaorōk ej jerbal n̄an aolep tampeļ ko kar aje rainin. Ij kajjitōk ippāmi n̄an kōļmenļo̧kjeņ kōn ta eo Irooj ekar kallim̧ur kake n̄an kwe make.

Ālkin loļo̧k eo an Rilo̧mo̧o̧r, Moses ekar waļo̧k. Moses ekar leļo̧k ioon Josep Smith kii ko n̄an aiintok Israel im jepļaaktok eo an bwij ko jon̄oul.⁸

Ke ej m̧ōj visōn in, “Elias eaar waļo̧k, im wūjleptok tōrean bōk eddo in gospel eo an Ebream” n̄an Josep.⁹

Innām Ilaija rikanaan eo eaar waļo̧k. Waļo̧ktok eo an eaar kakūrm̧ool kallim̧ur eo an Malakai m̧okta jen Itok eo Kein Karuo, Irooj enaaj jilkintok Ilaija n̄an “ukōt būruon jemaer n̄an ro nejier, im būruon nejier n̄an ro jemaer, n̄e ab Ij itok im kaliaik āneo.”¹⁰ Ilaija eaar leļo̧k kajoor in kii ko an liāp ioon Josep Smith.¹¹

Aorōk eo an kii kein kar kōjepļaaktok n̄an laļin jen ribōk ennaan rein jilu jen lan̄ ium̧win tōl eo an Irooj eban bar jako. Priesthood kii ko ej ekeijel ippān mālim eo im kajoor eo an būreejtōnji eo. Priesthood kii ko rej tōl wāween an priesthood eo an Anij maron̄ jerbal n̄an bōktok kōttōpar eo an Irooj n̄an kōjeraam̧m̧an aolep ro rej bōk gospel in em̧ōj an jepļaaktok an Jisōs Kraist.

Eaorōk n̄an keememej bwe m̧okta jen ejaak eo an Kabun̄ in, ribōk ennaan ro jen lan̄ raar leļo̧k Priesthood ko an Aaron im Melkisedek ioon Rikanaan Josep im kar leļo̧k n̄an e kii ko n̄an priesthood kein jim̧or.¹² Kii kein kar leļo̧k ej n̄an kōmālim Josep Smith n̄an ejake Kabun̄ in ilo 1830.¹³

Innām ilo Kirtland Tampeļ ilo 1836, kar leļo̧k bar jilu priesthood kii ko—etaer, kii ko n̄an aiintok Israel, kii ko an gospel eo an Ebream, im kii ko n̄an kajoor in liāp—rekar aorōk. Kii kein kar kōmālim Josep Smith—im aolep Būreejtōn ro ālkin ilo Kabun̄ in an Irooj—n̄an aiintok Israle jim̧or ilo ron̄ōl eo juon, n̄an kōjeraam̧m̧an aolep ajri in bujen eo kōn kōjeraam̧m̧an ko an Ebream, n̄an likūti im liāpe kain̄i ko an priesthood im bujen ko, im n̄an liāpe baam̧le ko indeeo. Kajoor eo an priesthood kii kein ej indeeo im ejjeļo̧k jem̧ļo̧kin.

Ļōmņak elmen an mour eo am̧ naaj kar oktak n̄e priesthood kii ko ren kar jab jepļaaktok n̄an laļin.¹⁴ N̄e ejjeļo̧k priesthood kii, koban kar bōk menin letok kwojarjar eo kōn kajoor eo an Anij.¹⁵ N̄e ejako priesthood kii ko, Kabun̄ in emaron̄ kwaļo̧k wōt katak ko raorōk im kwaļo̧k menin jipan̄ ko ak eban aolepeer. N̄e ejjeļo̧k priesthood kii, ejjeļo̧k iaad enaaj kar būki kain̄i im bujen ko raorōk me rej kapen kōj n̄an ro jej iakwe er indeeo im kōtļo̧k ad mour ippān Anij.

Priesthood kii kein rej kōjenoļo̧k Kabun̄ eo an Jisōs Kraist im Armej ro Rekwojarjar ilo Raan Ko Āliktata jān jabdewōt kabun̄ ioon laļin. Elōn̄ kabun̄ ko jet remaron̄ im kōm̧m̧an bwe mour eo am̧ en em̧m̧anļo̧k ilo mour in. Ak ejjeļo̧k bar juon kabun̄ emaron̄ im enaaj im̧we mour eo am̧ ālkin mej.¹⁶

Priesthood kii ko rej letok n̄an kōj mālim n̄an leļo̧k aolep kōjeraam̧m̧an ko kar kallim̧ur kaki n̄an Ebream n̄an aolep em̧m̧aan im kōrā ro rej kōjparok bujen ko. Jerbal ko an tampeļ ej kōm̧m̧an bwe kōjeraam̧m̧an kein ren pād n̄an aolep ro nejin Anij, jekdo̧o̧n ia ak n̄āāt eo raar mour ak rej mour kiiō. Jen m̧ōņōņō bwe priesthood kii ko em̧ōj aer bar pād ioon laļin!

Ij kajjitōk ippāmi n̄an lukkuun ļōmņake naan kein jilu ilaļ:

1. Aiintok eo an Israel ej menin kam̧ool bwe Anij ej iakwe aolep ro Nejin aolep jikin.

2. Gospel eo an Ebream ej lukkuun kam̧ool bwe Anij ej iakwe aolep ro nejin aolep jikin. Ej kūr aolep n̄an itok n̄an Ippān—“kilmeej im mouj, rilokjak im rianemkwoj, m̧aan im kōrā; … aolep rej āinwōt juon n̄an Anij.”¹⁷

3. Kajoor eo an liāp ej lukkuun kam̧ool wāween an Anij lukkuun iakwe aolep ro Nejin im kōņaan bwe kajjojo iaer ren kāālet n̄an jepļaakļo̧k n̄an Ippān.

Priesthood kii ko kar kōjepļaaktok kōn Rikanaan Josep Smith ekōm̧m̧an bwe en pidodo n̄an aolep em̧m̧aan ro im kōrā ro rej kōjparok bujen eo n̄an jetōbin lan̄lōn̄ eo ekabwilōn̄lōn̄ an juon make kar leļo̧k. Ijin, ekanooj lōn̄ men ko jemaron̄ ekkatak kōn bwebwenatoin Kirtland Tampeļ.

Jar in aje eo an Josep Smith kōn Kirtland Tampeļ ej juon ekkatak kōn wāween an jetōbin tampeļ kōkajoor kwe im n̄a n̄an dipuk mālijjon̄ ko an mour in ilo raan kein āliktata. Ij rōjan̄ kom̧ n̄an katak jar in kar je ilo Katak im Bujen Ko jekjōn 109. Jar in aje in, eo kar bōke kōn revelesōn, ej kwaļo̧k bwe tampeļ ko rej “juon im̧ōn jar, juon im̧ōn jitlo̧k, juon im̧ōn tōmak, juon im̧ōn ekkatak, juon im̧ōn aiboojoj, juon im̧ōn koņ, juon im̧ōn Anij.”¹⁸

Elaajrak in eļapļo̧k jen bajjōk kōmeļeļein juon tampeļ. Ej juon kallim̧ur in ta eo enaaj waļo̧k n̄an ro rej jerbal im kabun̄jar ilo m̧weeo im̧ōn Irooj. Remaron̄ kōtmene n̄an bōk uwaak in jar, revelesōn an juon make, eļap tōmak, kajoor, aenōm̧m̧an, eļap jeļāļo̧kjeņ, im eļap kajoor.

Iien ko ilo tampeļ enaaj jipan̄ eok n̄an ļōmņak kōn selestial im n̄an bōk visōn eo kōn wōn lukkuun kwe, wōn eo kwomaron̄ erom̧, im kain rot mour eo kwoj kōņaan bōke n̄an indeeo. Emakijkij kabun̄jar ilo tampeļ enaaj kōļapļo̧k wāween am̧ lo eok make im elmen am̧ mije karōk eo ekabwilōn̄lōn̄ an Anij. Ij kallim̧uri n̄an eok menin.

Jej bar kallim̧ur bwe ilo tampeļ jemaron̄ “bōk tarlep in Jetōb Kwojarjar”¹⁹ Ļōmņake ta meļeļein kōjeraam̧m̧an eo n̄an bōk kōjeraam̧m̧an ko an lan̄ n̄an kajjojo ro rej pukot m̧ool eo indeeo.

Jaar ekkatak bwe aolep ro rej kabun̄jar ilo tampeļ ko renaaj pād ippeer kajoor eo an Anij im enjeļ ro “maron̄ pād ioer.”²⁰ Ewi jon̄an an kōļapļo̧k lōke eo am̧ n̄an jeļā kake, āinwōt juon em̧m̧aan eo im kōrā eo em̧ōj an pelpel im bōk menin letok kwojarjar kōn kajoor eo an Anij, kwojjab make jelm̧ae mour in? Ta peran eo kar lewaj n̄an eok n̄an jeļā bwe enjeļ renaaj lukkuun jipan̄ eok?

Āliktata, jaar bar kallim̧ur bwe “ejjeļo̧k kōttōbalbal in nana” enaaj anjo̧ n̄an ro rej kabun̄jar ilo m̧weeo im̧ōn Irooj.²¹

Meļeļe bwe jetōb eo letok kar kōm̧m̧ane ilo tampeļ eļap an aorōk n̄an kōj rainin.

Ro jeiū im jatū rejitenbōro, en̄in ej aō kallim̧ur. Ejjeļo̧k men enaaj jipan̄ eok eļapļo̧k jen jirōk likatōttōt n̄an aen in dāpdep eo²² ijello̧kin kabun̄jar ilo tampeļ ko emakijkij n̄e jekjek ko am̧ rekkar. Ejjeļo̧k men enaaj kōjparok eok eļapļo̧k ilo am̧ ioon tab in marok ko an laļin. Ejjeļo̧k men enaaj kam̧ōjņo̧ik naan in kam̧ool eo am̧ kōn Irooj Jisōs Kraist im Pinmuur eo An ak jipan̄ eok meļeļe karōk eo eļapļo̧kan Anij Ejjeļo̧k men enaaj kaenōm̧m̧an jetōb eo am̧ eļapļo̧k ilo iien ko reppen. Ejjeļo̧k men enaaj kōpeļļo̧k lan̄ ko eļapļo̧k. Ejjeļo̧k!

Tampeļ ej juon iaļ n̄an kōjeraam̧m̧an ko reļļap emōj an Anij kepooj n̄an kōj kajjojo, bwe tampeļ juon jikin eo wōt ioon laļin ijo jemaron̄ bōk aolep kōjeraam̧m̧an ko kar kallim̧ur kaki n̄an Ebream.²³ En̄in ej unin ad kōm̧m̧ani kōn aolep ad kajoor, ium̧win tōl eo an Irooj, n̄an kōm̧m̧ani eļapļo̧k kōjeraam̧m̧an ko an tampeļ rekkar n̄an membōr ro an Kabun̄ in. Kiiō, kōmij m̧ōņōņō in kōjjeļā bwe jej ļōmņak in kalōk tampeļ ko rekāāl ilo jikin kein ilaļ 15:

• Uturoa, French Polynesia

• Chihuahua, Mexico

• Florianópolis, Brazil

• Rosario, Argentina

• Edinburgh, Scotland

• Brisbane, Australia south area

• Victoria, British Columbia

• Yuma, Arizona

• Houston, Texas south area

• Des Moines, Iowa

• Cincinnati, Ohio

• Honolulu, Hawaii

• West Jordan, Utah

• Lehi, Utah

• Maracaibo, Venezuela

Ro jeiū im jatū rejitenboro, en̄in ej ej Kabun̄ eo an Jisōs Kraist im Armej ro Rekwojarjar ilo Raan Ko Āliktata. E ej jeban Kabun̄ in. Jej ro Rikarejeran.

Jen m̧ōņōņō kōn jepļaaktok in priesthood kii ko eo ekōm̧m̧an bwe en pidodo n̄an kwe im n̄a n̄an lan̄lōn̄e aolep jetōbin kōjeraam̧m̧an eo jej m̧ōņōņō im erreeo n̄an bōke. Āindein ij kam̧ool ilo āt eo ekwojarjar etan Jisōs Kraist, amen.