Naan ko Raorōk

Ro jeiū, jatū, m̧ōtta aolepān laļ in, ij m̧ōņōņō in kōnono n̄an jarlepju in, elōn̄ iaami rej uwaan Kabun̄ in ad im elōn̄ iaami rej m̧ōttam im riron̄jake ro rekāāl n̄an kadiwōjļok in an kweilo̧k in. Kom̧ij ruwainene!

Ennaan ko kar kwaļo̧ki jān jikin kōnono in rekar waļo̧k ilo naan. Rej jeje ilo kajin In̄lij im kar ukook n̄an epakeļo̧k 100 kajin ko rooktak jān doon. Pedped eo ej aolep iien juon wōt. Naan ko. Im ekanooj lōn̄ naan ko raorōk. Bar juon alen in bar ba. Naan ko raorōk!

Rej juon pedped in wāween ad ekkejel; rej jutak kōn tōmak ko ad, unin tōl ko, im ad kōjatdikdik. Jet iien jej kōnono naan ko; iien ko jet jej ron̄jake. Karōk in naan ko. Rej ainikien ļōmņak ko ad, en̄jake ko, im iminene ko, n̄an em̧m̧an ak nana.

Ejerata, naan ko remaron̄ jej tokjeer, nana, im kōmmetak. N̄e jeba naan eo, jejjab maron̄ bar kōro̧o̧li. Remaron̄ kakinejnej, kaje, kakkure, im em̧ool tōlļo̧k n̄an jerbal nana. Remaron̄ kanooj kabūrom̧ōj kōj.

Ilo rejet eo juon, naan ko remaron̄ kaanjo̧, kōjatdikdik im kōketak. Remaron̄ un̄ur kōj n̄an bar ļōmņak, bar jinoe, im bar tōl iaļ eo ad. Naan ko remaron̄ kōpeļļo̧k ļōmņak ko ad n̄an m̧ool eo.

En̄in ej unin, jinoin im āliktata, naan ko an Irooj raorōk.

Ilo Bok in Mormon, rikanaan Alma im armej ro an ilo Amedka eo etto raar ioon tariņae ko ejjeļo̧k jem̧ļo̧kier ippān ro me raar kajejtokjān naan eo an Anij, kapen būruier, im kar kakkure m̧anit eo aer. Ro raar tiljek remaron̄ kar ire, ak Alma eaar ba, “Im kiiō, kōnke kwaļo̧k kōn naan eo eaar ļap an̄in n̄an tōl armej ro n̄an kōm̧m̧ane men eo ejim̧we—aaet, eaar ļapļo̧k kajoor in an jelōt ļōmņak ko an armej ro jān jāje eo, ak jabdewōt men, eo eaar waļo̧k n̄an er—kōn menin Alma eaar ļōmņak eaar emennin aikuj bwe ren kajjion̄ jelōt ewānōk an naan in Anij.”¹

“Naan an Anij” eļapļo̧k jān aolep en̄jake ko jet. Eļakkar baj pād wōt jān Kōm̧anm̧an eo an laļ in ke Irooj ekar kōnono : “En meram: im e meram.”²

Jān ke Rilo̧mo̧o̧r eo ekar itok kam̧ool kein ilo Kallim̧ur Ekāāl: “Lan̄ im laļ renaaj jako, a naan ko aō re jāmin jako.”³

Im menin: “Eļan̄n̄e armej ej yokwe eō, e naaj kōjparok aō in naan: im Jema enaaj yokwe e, im kōm naaj itok n̄an e, im jokwe ippān.⁴

Im jān Meri, kōrā eo jinen Jisōs ekar itok naan in kam̧ool in ettā: “Lo n̄a ri karijeran Irooj, en pād ippa āinwōt am̧in naan.”⁵

Tōmak im ron̄jake naan eo an Anij enaaj kepaakeļo̧k kōj n̄an E. Būreejtōn Russell M. Nelson ekar kallim̧ur, “Eļan̄n̄e kwonaaj ekkatak naan ko An, maron̄ eo am̧ n̄an eromļo̧k āinwōt E enaaj ļapļo̧k.”⁶

Ejjab ta eo jej aolep kōņaan in ke, āinwōt an al in jar eo ba, “eļapļo̧k kōjeraam̧m̧an im kōkwojarjar—eļapļo̧k, āinwōt e, Rilo̧mo̧o̧r eo”?⁷

Ij pijaikļo̧k Josep Smith eo edik ioon bukien ron̄jake naan ko an Jemān ilo Lan̄: “[Josep,] En̄in ej Nejū Jitōnbōro. Kwōn ron̄jake E!”⁸

Jej “ron̄jake E” ilo naan ko jān jeje ko rekwojarjar, ak jej ke kōm̧m̧an bwe ren jab jerbal ilo mour ko ad, ak jej ke kile E ej kōnono n̄an kōj? Jej ke oktak?

Jej “ron̄jake E” ilo revelesōn eo ad make im im̧we ko jān Jetōb Kwojarjar, ilo uwaak ko n̄an jar, im ilo iien ko n̄e Jisōs Kraist wōt, kōn kajoor eo an Pinmuur eo An, maron̄ ineek eddo ko ad, letok n̄an kōj jeorļo̧k bōk im aenōm̧m̧an, im jibur kōj “ilo pein iakwe eo An.”⁹

Ruo, naan ko an rikanaan ro raorōk.

Rikanaan ro rej kam̧ool kōn kwojarjar eo an Jisōs Kraist. Rej kwaļo̧k gospel eo An im kwaļo̧k An iakwe n̄an aolep.¹⁰ Ij kwaļo̧k aō kam̧ool bwe rikanaan eo ad emour, Būreejtōn Russell M. Nelson, ej ron̄ im ej kōnono naan eo an Irooj.

Būreejtōn Nelson ewejepedik ilo naan ko an. Ekar ba, “Pād wōt ilo iaļ in bujen eo,”¹¹Aiintok Israel,”¹² “Anij En Anjo̧,”¹³ “Ejaaki kōtaan ko ippān ro roktak bwe en em̧m̧anļok meļeļe,”¹⁴ “Leļo̧k kam̧m̧oolol,”¹⁵ “Kōļapļo̧k tōmak ilo Jisōs Kraist,”¹⁶ “Bōk eddo in naan in kam̧ool eo am̧,”¹⁷ im “Erom juon rikaenōm̧m̧an.”¹⁸

Eo ekāāl tata ekar kajjitōk ippād n̄an “ļōmņak kōn selestial.” “N̄e kwoj ioon jum̧ae ļōmņak kōn selestial!,” ekar ba, “ļōmņak kōn selestial! N̄e kwoj po ilo kapo, ļōmņak kōn selestial! N̄e mour ak ro rejitōnbōro rej kōm̧m̧an am̧ m̧ōjņo̧, ļōmņak kōn selestial! N̄e juon armej ej mej ilo ejjeļo̧k kōtmāne, ļōmņak kōn selestial. …N̄e apan̄ ko an mour in rej kobrak ļōmņak ko am̧, ļōmņak kōn selestial! … Ilo am̧ ļōmņak kōn selestial, būruwōm̧ enaaj lukkuun oktak, … kwonaaj kalimjōk mālijjon̄ ko im jum̧ae ko ilo juon meram ekāāl, … [im] tōmak eo am̧ enaaj eddōkļo̧k.”¹⁹

“N̄e jej ļōmņak kōn selestial, jej lo men ko āinwōt aer lukkuun waļo̧k, im … kōn men ko āinwōt aer naaj waļo̧k.”²⁰ Ilo laļ in edodo kōn tarpok im akweel, jej aolep aikuj kōļmenļo̧kjeņ jab in.

Elder George Albert Smith, m̧okta jen an erom̧ Būreejtōn eo an Kabun̄ in, ekar kōnono kōn rejetake rikanaan eo im ron̄jake naan ko an. Ekar ba: “wāween eo jej kōm̧m̧ane ilo ad kajutak peid … ej juon wāween ekwojarjar. … Ej meļeļe in … bwe jenaaj jutak likin; jenaaj jar kōn e; … im jenaaj kajjieon̄ in kōm̧m̧ani naan in katak ko an āinwōt an Irooj naaj tōl.”²¹ Ilo bar juon wāween ba, jenaaj niknik jerbale naan ko an rikanaan eo ad.

Āinwōt juon iaan rikanaan ro 15, rilolo ro, im ribōk revelesōn ro kar rejtake inne jān Kabun̄ in ad aolepān laļ in, ikōņaan kwaļo̧k ippāmi juon iaan en̄jake ko aō n̄an rejtake rikanaan eo im kaorōk naan ko an. Ikar āinwōt rikanaan Jekab, eo ekar ba, “iaar ron̄ ainikien Irooj ej kōnono n̄an eō ilo lukkuun naan.”²²

Oktoba eo ļo̧klio pāleō, Melanie, im n̄a kar pād ilo Bangkok, Thailand, ke ikar kōppopo n̄an aje ta eo enaaj kar kein 185 tampeļ eo an Kabun̄ in.²³ N̄an n̄a, ijjitōn eo ekar jim̧or jej uwaan im ettā. Menin ekar tampeļ eo kein kajuon ilo turōk in Southeast Asia peninsula.²⁴ Ekar kanooj jetjet design i—jiljino po, nine-spired em̧, “em̧man aer karōke”²⁵ n̄an m̧weo im̧ōn Irooj. Ium̧win allōn̄ ko ikar kōļmenļo̧kjeņ kōn aje eo. Ta eo ekar tōt ilo jetōb eo im ļōmņak eo aō ej bwe laļ eņ im tampeļ eo raar rie im kwaļo̧k jān rikanaan ro im rijjilōk ro. Būreejtōn Thomas S. Monson ekar kōjjeļā kōn tampeļ in²⁶ im Būeejtōn Nelson ekar aje.²⁷

Ikar kōpooj jar in aje eo allōn̄ ko m̧oktakļo̧k. Naan kein rekwojarjar em̧ōj kar ukōti n̄an 12 kajin ko. Kōm kar pojak. Ak āinwōt ikar ļōmņak.

Bon̄ōn eo m̧okta jān aje eo, ikar ruj jān aō kiki kōn juon en̄jake ejjab tōt, aorōk kōn jar in aje eo. Ikar kajjieon̄ in jujurļo̧k en̄jake eo, ļōmņak bwe jar eo epojak. Bōtaab Jetōb eo eban kar kōmakeikļo̧k n̄a. Ikar aromeļo̧k jet naan ko raar jako, im kōn karōk ekwojarjar raar itok n̄a eō ilo revelesōn, im ikar kadeļo̧n̄i naan kein iturinļo̧k jem̧ļo̧kin jar eo: “Kōm̧m̧an bwe jen ļōmņak kōn selestial, kōtļo̧k an Jetōb eo An en anjo̧ ilo mour ko ad, im kajjieon̄ in erom rikōm̧m̧an aenōm̧m̧an ro aolep iien.”²⁸ Irooj ekar kakeememej eō n̄anr ron̄jake naan ko an rikanaan eo ad emour: “Ļōmņak kōn selestial,” “kōm̧m̧an bwe Jetōb eo en anjo̧” “kajjieon̄ erom rikōm̧m̧an aenōm̧m̧an.” Naan ko an rikanaan eo raorōk n̄an Irooj im n̄an kōj.

Jilu, rej naan ko ad make, relukkuun in aorōk. Tōmak eō, ilo ilo emoji ko ad rej obrak²⁹ laļ in, naan ko ad raorōk.

Naan ko ad remaron̄ in rie ak illu, lem̧ōņōņō ak lāj, meanwōd ak kōjekdo̧o̧ni. Ilo juon iien elim̧otak, ewōr juon en̄jake ekōmettak em̧wilaļ ej jelet jetōb eo—im pād wōt ijo. Naan ko ad ilo intōrnet, texting, social media, ak tweet ko ekanooj ļap kilaer. Kōn menin lale ta eo kwoj ba im wāween am̧ ba. Ilo baam̧le ko ad, eļaptata ippān ļōm̧aro pālele, lim̧aro pālele, im ajri ro, naan ko ad remaron̄ kobaik kōj ak kōm̧m̧an jepeļļo̧k ikōtaad.

In kwaļo̧k jilu naan ko reļem waan me jemaron̄ kōjerbali n̄an joļo̧k metak in en̄jake eo jān apan̄ ko im oktak ko, wōr kilaan em̧m̧an, im kallim̧ur n̄an doon:

“Kom̧m̧ool.”

“Joļo̧k aō bōd.”

Im “Ij iakwe eok.”

Jab kakoņ naan kein rem̧m̧an n̄an juon iien ejenolo̧k em̧m̧an ak juon iien ejerata. Kōmakijkij kōjerbali ilo m̧ool, bwe rej kwaļo̧k ļōmņak ko kōn ro jet. Naan ko an armej edikļo̧k meļeļeier; rejjab ļoor jon̄ak jab in.

Jemaron̄ ba “kom̧m̧ool” ilo eleveator eo, ilo parking lot eo, ilo m̧ōn wia eo, ilo opiij eo, ilo juon ļain ilo ad kōttar, ak ippān ro rūturid ak ro m̧ōttad. Jemaron̄ ba “Joļo̧k aō bōd” n̄e jej kōm̧m̧an bōd, jako jān juon kweilo̧k, meļo̧kļo̧ke juon keemem, ak lo juon ilo an metak. Jemaron̄ ba “Ij iakwe eok” im naan ko rej bōkļo̧k juon ennaan “Ij ļōmņak kake eok,” “Ij kea kōn kwe,” “Ijpojak in jipan̄ eok,” ak “Kwolukkuun aorōk ippa.”

In kwaļo̧k juon aō make waanjon̄ak. Ļōm̧aro pālele, ron̄jake. Kōrā ro, menin enaaj jipan̄ kom̧ barāinwōt. M̧okta jān jerbal eo aō aolep iien ilo Kabun̄ in, eļap aō kar ito-itak kōn company eo aō. Ikar jako ebwe an lōn̄ iien ko n̄an jikin ko rettoļo̧k ilo laļ in. Ilo jem̧ļo̧k in raan eo aō, jekdo̧o̧n ia eo ij pād ie, ikar aolep iien kūrļo̧k m̧weo. Ilo an lio pāleō, Melanie, kotak talboon eo im ij ba n̄a e, bwebwenato eo am̧ro ekōn aolep iien tōlļo̧k kōm n̄an kwaļo̧k “Ij iakwe eok.” Aolep raan, naan kein raar jerbal āinwōt juon an̄kō n̄an aō im aō m̧wil; raar juon kein kōjparok n̄an eō jān kōm̧m̧an ko an nana. “Melanie, ij iakwe eok” kōnono kōn lōke eo eaorōk ikōtaam̧ro.

Būreejtōn Thomas S. Monson ekōn ba, “Ewōr ne n̄an jutak pen, pā ko n̄an jibwe, ļōmņak ko n̄an kōketak, bōro ko n̄an im̧we, im jetōb ko n̄an lo̧mo̧o̧ren.”³⁰ Ba “kom̧m̧ool,” “joļo̧k aō bōd,” “Ij iakwe eok” naaj kōm̧m̧ane āindein.

Ro jeiū im jatū, naan ko raorōk.

Ij kallim̧ur bwe eļan̄n̄e jej “kwōjkwōj ioon naan ko an Kraist”³¹ menin ej tōlļo̧k n̄an lo̧mo̧o̧r, naan ko an rikanaan eo ad me rej tōl im kōketak kōj, im naan ko ad make me rej kōnono kōn wōn kōj im ta eo jej kaorōke, kajoor ko an lan̄ renaaj lutōktok iood. “Naan ko an Kraist renaaj jiron̄ kom̧ aolep men ko kom̧ij aikuj kōm̧m̧an.”³² Jej ajri ro nejin Jemedwōj Ilan̄ im E ej ad Anij, im E ej kōtmene kōj n̄an kōnono kōn “lo an enjeļ raņ”³³ kōn kajoor eo an Jetōb Kwojarjar.³⁴

Ij iakwe Irooj Jisōs Kraist. E ej, ilo naan ko an rikanaan Aiseia ilo Kallim̧ur M̧okta, “Ri Pepe e kabwilōn̄lōn̄, Anij e kajoor bōtata, Jemān iien indeeo, Irooj in Aenōm̧m̧an.”³⁵ Im āinwōt an Rijilōk Jon kar kalikkare, Jisōs Kraist E make ej Naan eo.³⁶

Jān menin ij kam̧ool āinwōt juon Rijilōk kar kūr n̄an jerbal in jipan̄ kwojarjar eo an Irooj—n̄an kwaļo̧k An in naan—im kar kūr n̄an jutak āinwōt juon An rikam̧ool ejenoļo̧k. Ilo etan Irooj Jisōs Kraist, amen.