Aolep Men Otemjeļo̧k N̄an Em̧m̧an Eo Ad
Ilo iien ko im indeeo, jibadbad eo an Kōm̧anm̧an eo im lukkuun piktok in Anij Make rej bōktok aolep men ko rem̧m̧an n̄an em̧m̧an eo ad.
Rainin ej Eprōļ 6, raan eo Jisōs Kraist ekar kōjepļaaktok Kabun̄ eo An ilo raan ko āliktata im m̧ōttan jijen in Ijtō ilo ad lan̄lōn̄ n̄an kam̧ool kōn mour eo eweppān an Jisōs Kraist, en̄taan in pinmuur eo, im Jerkakpeje eo eaiboojoj.
Juon bwebwenatoin China ej ijjino ilo an jemān ļaddik eo loe juon kidia em̧m̧an.
“Ejeraam̧m̧an,” eo itūrin eaar ba.
“Jenaaj lale,” em̧m̧aan eo eaar ba.
Innām ļeo nejin ej wōtlo̧k jān raan kidia eo im ekar lukkuun jorrāān.
“Ejerata wōt,” ro rūturin raar ba.
“Jenaaj lale,” em̧m̧aan eo ej ba.
Juon ritariņae ekar itok ak ekar jab bōk ļaddik eo nejin eo ejorrāān.
“Ejeraam̧m̧an,” ro rūturin raar ba.
“Jenaaj lale,” em̧m̧aan eo eaar ba.
Laļ in emakijkij wōt an āinwōt ļap poktak, jab jeļā, jet iien jeraam̧m̧an, im—ekutkut wōt an—jerata. Mekarta, ilo laļin an en̄taan,1 “jej jeļā bwe men otemjej rej jim̧or jerbale em̧m̧an n̄an ro rej yowke Anij.”2 Ilo m̧ool, ilo ad etetal jim̧we im keememej bujen ko ad, “men ko naaj jerbal ippān doon n̄an em̧m̧an eo ami”3
Aolep men otemjeļo̧k n̄an em̧m̧an eo ad.
Juon kallim̧ur ekabwilōn̄lōn̄! Kallim̧ur in kaenōm̧m̧an eo jān Anij Make! Ilo juon wāween ekabwilōn̄lōn̄, jibadbad in Kōm̧anm̧an eo im paoktokin Anij rej n̄an jeļā jinoin im jem̧ļo̧kin,4 n̄an bōktok aolep n̄an em̧m̧an eo ad, n̄an jipan̄ kōj ekwojarjar n̄an erom̧ kwojarjar jouj im tūriam̧okake im Pinmuur eo an Jisōs Kraist.
Pinmuur eo an Jisōs Kraist emaron̄ kanemkwoj im lo̧mo̧o̧ren kōj jān jerawiwi. Bōtaab Jisōs Kraist ebarāinwōt m̧ōkaj an meļeļe aolep ad metak, en̄taan, nan̄inmej,5 būrom̧ōj, jepeļļo̧k. Ilo mour in im eo ej itok, An anjo̧ ioon mej im hell emaron̄ kōm̧m̧an bwe aolep men ko ren jim̧we.5 E ej kōmour eo erup būruōn im kajejtokjān, kaenōm̧m̧an eo ellu ak ejepeļļo̧k, kaenōm̧m̧an eo ajimakeke im makeļo̧k, kōketak eo ejjab jeļā im likjab, im bōktok kabwilōn̄lōn̄ ko rej maron̄ wōt ippān Anij.
Jej al hallelujah im lam̧ōj hosanna! Kōn kajoor indeeo eo im em̧m̧an ejjeļo̧k jem̧ļo̧kin, ilo karōk in m̧ōņōņō eo an Anij, aolep men maron̄ jerbal ippān doon n̄an em̧m̧an eo ad. Jemaron̄ jelm̧ae mour in kōn lōke im jab mijak.
Kōmakeikļo̧k kōj, jemaron̄ jab jeļā em̧m̧an eo ad make. N̄e “Ij kāālet eō,” Ij barāinwōt kāālet likjab ko aō make, m̧ōjņo̧ ko, im jipikpik ko. Āliktata, n̄an kōm̧m̧ane men eo em̧m̧antata, jej aikuj em̧m̧an.7 Kōnke ejjeḷọk armej eṃṃan, ak Anij wōt,8 jej pukot weppān ilo Jisōs Kraist.9 Jej lōke kōj make, em̧m̧an eo ad make ilo ad utūkļo̧k em̧m̧aan im kōra eo ilo lukkuun piktokiid n̄an erom juon ajri im̧aan Anij.
Kōn ad lōke im tōmak ilo Anij, mālijjon̄ ko im kaen̄taanan ko remaron̄ kakwojarjar em̧m̧an eo ad. Josep, kar wia kake n̄an kōm̧akoko ilo Ijipt, tokālik ekar lo̧mo̧o̧ren baam̧le eo an im armej ro. Ke Rikanaan Josep Smith ikar dāpiji lo Liberty Jail ekar katakin e “men kein otemjeļo̧k renaaj lewōj n̄an eok en̄jake, im naaj n̄an em̧m̧anļo̧k eo am.”10 Mour kōn tōmak, mālijjon̄ ko im kaarmejete ko jeban kar kāālet maron̄ kōjeraam̧m̧an kōj im ro jet ilo wāween ko jejjan̄in kar ļōmņaki.11
Jej kōļapļo̧k tōmak, lōke ilo Irooj bwe aolep men otemjej ren maron̄ jerbal ippān doon n̄an em̧m̧an eo ad ilo ad bōk juon ļōmņak indeeo;12 meļeļe mālijjon̄ ko ad maron̄ in “n̄an jidik wōt tōrean”;13 kile en̄taan eo emaron̄ in kōkwojarjare n̄an ad bōk;14 kile bwe jorrāān ko, idin̄ in mej, nan̄inmej eļļap, im kūj ko rej m̧ōttan mour in, im lōke Jemādwōj Ilan̄ eo em̧m̧an ejjab letok mālijjon̄ ko n̄an kaje ak ekajet. E ejjamin kar leļo̧k juon dekā n̄an juon eo ej kajjitōk pilawe ak juon jedpānit n̄an juon eo ej kajjitōk juon ek.15
N̄e ej itok mālijjon̄, enan̄in aolep iien jej kōņaan bwe ro jet ren ron̄jake im kobatok ippād.16 Ilo iien eo, uwaak ko remaron̄ in jab jipan̄, ijoke bak kaenōm̧m̧an wōt er. Jet iien jej būrom̧ōj kōn ro jet rej būrom̧ōj, metak, im jan̄ ippād; jej kwaļo̧k metak, inepata, aaet jet iien illu; im kwaļo̧k men ko jejjab jeļā kaki.
N̄e jej lōke Anij im An iakwe n̄an kōj, jekdo̧o̧ņ n̄e rub bōro ko ad reļļaptata maron̄, ilo jem̧ļo̧kin, jerbal ippān doon n̄an em̧m̧an eo ad.
Ij keememej raan eo iaar bōk juon naan kōn juon itaak in wa eļap eo ekitbuuj ro ij iakwe er. Ilo iien rōt kein, kōn eļap metak im tōmak, jemaron̄ ba āinwōt kar Job, “Irooj ear letok, im Irooj ear bōkḷọk, en utiej etan Irooj.”17
Ilo Kabun̄ in ipeļaakin laļin, 3,500 stake im district ko im 30,000 ward im branch ko rekar jipan̄ kōn jikin kone im jikin kōjparok.18 Ak ilo stake im ward ko amim, elōn̄ baam̧le ko im kajjojo armej raar ioon apan̄ ko reppen, jekdo̧o̧n ne raar jeļā ke (rejjab jeļā eļemen) an aolep men naaj jerbl n̄an em̧m̧an eo ad.
Ilo Huddersfield, England, Brother Samuel Bridgstock ekar loe bwe ewōr an stage-four cancer ejjab to m̧okta jān kūr n̄an juon stake būreejtōn kāāļ. Kōn nan̄inmej in eļap an, eaar kajjitōk ippān kōrā eo ippān, Anna, etke ekar aikuj in etal in kar intōrpiu.
“Kōnke,”Sister Bridgstock eaar ba, “kwonaaj kūr āinwōt stake būreejtōn.”
M̧okta kar leļok n̄an e juon ak ruo iiō in mour, Būreejtōn Bridgstock (eo ej pād ijin rainin) ej pād kiiō ilo iiō eo kein kāmen in an jerbal. Ewōr an raan ko rem̧m̧an im raan ko reppen. Stake eo an rej ippān doon kōn eļapļo̧k tōmak, jerbal in jipan̄, im jouj. Ejjab pidodo, bōtaab lio pāleen im baam̧le eo rej mour kōn tōmak, kam̧m̧oolol, im būromōj eo meļeļe kake rej lōke naaj erom lan̄lōn̄ indeeo kōn Pinmuur eo an Jisōs Kraist.19
N̄e jej m̧ōņōņō, peļļo̧k, im kautiej, jemaron̄ en̄jake aenōm̧m̧an eo, jibadbad eo, kōn em̧m̧an in bujen eo Irooj ej letok. Ilo iien ko rōkwojarjar, E emaron̄ kōm̧m̧an bwe jen lo m̧ool indeeo eļapļo̧k kōn mour ko ad raan otemjej rej m̧ōttan, ijo men ko reddik im ļam waan rej jerbal ippān doon n̄an em̧m̧an eo an ro rej leļo̧k im ro rej bōk.
Rebekah, leddik eo nejin mijen būreejtōn eo aō kein kajuon, ekar kwaļo̧k ekōjkan an Irooj kar uwaake jar eo an kōn kaenōm̧m̧an kōn juon iien em̧m̧an jab kōtmene n̄an uwaake jar eo an bar juon.
Ilo juon jota, Rebekah, būrom̧ōj kōn jako eo an jinen, ekar wōr juon im̧we alikkar n̄an etal in wia kiaaj n̄an wa eo waan. Ke ekar itakļo̧k ilo m̧ōn ettein̄ kiaj eo, ekar ioon juon leļļap ej kakkōt emenono kōn juon tāān̄ in oxygen ekilep. Tokālik, Rebekah ekar maron̄ leļo̧k n̄an kōrā eo portable oxygen mechine eo an jinen. Obrak kōn kam̧m̧oolol sister in eaar ba, “Em̧ōj am̧ bar karo̧o̧ltok aō anemkwoj.” Men ko rej jerbal ippān doon n̄an em̧m̧an n̄e jej jerbal in karejar āinwōt Jisōs Kraist.
Juon baba eo kar kappeik ļaddik eo nejin bwe en m̧ōttanļo̧k ilo jerbal in karejar, “Jerbal in karejar ej n̄e jej etal jān ro rūturiid me rej bōkļo̧k cookies ko n̄an ro m̧ōttad, ro im̧aantata in mej ko an jetōb.” Bujen uwaan ilo Jisōs Kraist ej kaenōm̧m̧an, ej kakkejel, ej kōkwojarjar.
Jekdo̧o̧n ilo jorrāān, kōppopo ilo jetōb emaron̄ kakeememej kōj bwe Jemedwōj Ilan̄ ejeļā kajjeed n̄e jej en̄jake jekjek ko ad ilo ad ajimakeke. N̄an waanjon̄ak, baam̧le eo me ajri eo nejier bōkļo̧k e n̄an aujipitōļ eo tokālik kar lo kaenōm̧m̧an ilo keememej Jetōb Kwojarjar eo kar unoojodidik im̧aanļok ta eo n̄an kōtmene.
Jet iien indeeo eo eļap Irooj ej kōm̧m̧an bwe jen en̄jake ekitbuuj ro uwaan baam̧le eo ilo ron̄ol eo. Juōn sister ej lo m̧ōņōņō ilo an oktaktok n̄an gospel eo kar kōjepļaaktok an Jisōs Kraist Ruo men ko rekar jelet mour eo an—juon itaak in ļoon im jako eo an jinen, eo eaar bōk make mour eo an.
Aaet sister in ekar anjo̧ jen an mijak dān n̄an an peptaij im tuļo̧k ilo dān. Im kōn ta eo ekar erom juon raan elukkuun m̧ōņōņō, liin ekar kam̧ool an juon jerbal in bōk jikin n̄an eo jinen ekar mej n̄an, peptaij ilo tampeļ. “Peptaij ilo tampeļ ekar kemour jinō, im ekar kanemkwoj eō,” sister in ekar ba. “Ekar iien eo m̧oktata ikar en̄jake aenōm̧m̧an jān ke jinō ekar mej.”
Al eo ad ekwojarjar ej ālij kam̧ool eo An bwe aolep men otemjej maron̄ jerbal ippān doon n̄an em̧m̧an eo ad.
Be still, my soul: Thy God doth undertake
To guide the future as he has the past.
Thy hope, thy confidence let nothing shake;
All now mysterious shall be bright at last.20
Armej, ro, Rekwojarjar, wōnm̧anļo̧k iben mōnōnō;
Ak kom naj bōk An joij,
Bolen ial eo ebin kio,
Ak kom naj bōk An joij. …
Im anjo̧ jen mōjno ko an lal in,
Lan̄lōn̄! Aolep men naaj emman!21
Bok in Mormon ej kein kam̧ool eo jemaron̄ jibwe ilo peid bwe Jisōs ej RiKraist eo im Anij ej kakūrm̧ool kanaan ko An. Kar je jān rikanaan ro reim̧we me raar lo raan kein ad, Bok in Mormon ej ijjino kōn poktak—juon baam̧le ej ioon elōn̄ apan̄ ko. Ijoke, ilo ad ekkatak im kejekļo̧kjeņ kale 1 Nipai1n̄an Moronai 10 jej epakeļo̧k Jisōs Kraist kōn juon naan in kam̧ool edim bwe ta eo ekar waļo̧k ijōņ im tōre eo maron̄ kōjeraam̧m̧an kōj ijin im kiiō.
Ilo an Irooj, kōn rikanaan eo An emour kepaaktok wōt m̧ōko im̧ōn Irooj n̄an elōn̄ iaad ilo elōn̄ jikin ko, kōjeraam̧m̧an ko an tampeļ rej jim̧or jerbal ippān doon n̄an em̧m̧an eo ad. Jej itok kōn bujen im kain̄i n̄an Anij Jemād im Jisōs Kraist im bōk ļōmņak indeeo an mour wabanba. Juon ilo̧k juon, etaer ilo̧k etaer, jej leļo̧k ro uwaan baam̧le eo ad ejitenbōro—rūtto ro jibūd im jim̧m̧ad—kain̄i ko rekwojarjar im bujen kōjeraam̧m̧an ko ilo jon̄ak eo rilo̧mo̧o̧r ro an Irooj ilo Toļ Zaion.22
Ilo an tampeļ ko epaaktok n̄an kōj ilo elōn̄ jikin ko, juon katak an tampeļ eo jemaron̄ leļo̧k ej n̄an kappukot kwojarjar ilo m̧weo im̧ōn Irooj emakijkijļo̧k. Ium̧win elōn̄ iiō ko, jaar kakkoņkoņ, karōk, im kaarmejete n̄an itok n̄an tampeļ. Kiiō, ilo an jekjek ko kōtļok, jouj im itok em̧ool emakijkijļo̧k n̄an Irooj ilo m̧weo Im̧ōn ekwojarjar. Kōm̧m̧an bwe kabun̄jar im jerbal ko ilo tampel ren kōjeram̧m̧an, kōjparok, im̧ kareilok eok im̧ baam̧le eo am̧—baam̧le ņe am̧ ak baam̧le eo enej am̧ im̧ erom̧ juōn raan.
Barāinwōt, ijo ekkar n̄an maron̄ eo am̧, jouj im ļōmņake kōjeraam̧m̧an ko n̄an bōk nuknuk in tampeļ eo am̧ make.23 Juon būbū jān juon baam̧le eo ettā ekar ba kōn jabdewōt men ko ilo laļin, ta eo ekar kanooj kōņaan ej ebbōk an make nuknuk in tampeļ. Ļaddik eo jibūn ekar ba, “Būbū ekar unoojdikdik tok, ‘Inaaj jerbal kōn nuknuk in tampeļ ko aō make, im ālkin aō imej, inaaj kallib kaki.’” Im n̄e iien eo ekar itok, liin ekar.
Ilo an būreejtōn Russell M. Nelson katakin, “Men otemjej jej tōmak im aolep an Anij kallim̧ur rej kōm̧m̧an n̄an armej in bujen ro An rej itok ippān doon ilowaan tampeļ eo.”24
Ilo iien ko im indeeo, jibadbad eo an Kōm̧anm̧an eo im lukkuun piktok in Anij Make rej bōktok aolep men ko rem̧m̧an n̄an em̧m̧an eo ad.
En̄in ej jibadbad eo an Irooj indeeo. Ej An ļōmņak indeeo. Ej An kallim̧ur indeeo.
Ilo an mour in poktak im jibadbad eo ejjab alikkar, n̄e kwoj kōņaan mour em̧m̧anļok ak jab jeļā wāween, jouj itok n̄an Anij Jemād im Jisōs Kraist. Ļōke Rej mour, iakwe eok, im kōņaan aolep men otemjej n̄an em̧m̧an eo am̧. Ij kam̧ool Rej kōm̧m̧ane, ejjeļo̧k jemļo̧kin im indeeo, ilo āt eo ekwojarjar im kwojarjar etan Jisōs Kraist, amen.