Tiljek n̄an Jem̧ļo̧kin

Em̧ōj ke am̧ ļōm̧nake ewi wāween am̧ maron̄ tiljek n̄an Anij ilo am̧ mour ilo juon laļ in jerawiwi? Ia eo kwōj bōk am̧ kajoor n̄an bun̄ m̧aanļo̧k im wōnm̧aanļo̧k wōt n̄an kōm̧m̧an em̧m̧an? Ewi wāween am̧ en̄jake lan̄lōn̄ eo em̧ool?

Ij ļōmņak kōn jekjek eo an Devid im Golaiat¹ emaron̄ jipan̄.

Ilo Kallim̧ur M̧okta, jarin tariņae eo an Palistia ro rekar tariņae ippān Riisrael ro, im aolep jibbon̄ im jota, juon lakijon̄jon̄ in Palistia kar etan Golaiat ekar kōketak jabdewōt Riisrael n̄an ire ippān.

Pija

Devid im Golaiat.

Ilubwiljin armej in Israel ro ekar mour Devid, juon rilale sheep euddikļok jān Golaiat bōtaab kōn juon tōmak kijon̄jon̄ ilo Jisōs Kraist! Devid ekar baļintier n̄an ire. Jon̄an kiin̄ eo eaar kabweer e, ak Devid ekar kāālet n̄an likūt an lōke ilo Jisōs Kraist.

M̧oktaļok, Devid eaar ire ippān juon ļaiōn im barāinwōt juon bear. Jān men kein ekar iooni, ekar jeļā bwe Anij ekar kōjparok e im kar kōm̧m̧an an anjo̧. N̄an Devid, jerbaļ eo an Anij ekar jerbal eo eaorōk tata eo. Kōn menin, obrak kōn tōmak ilo Anij eo eban kar eļļo̧k jān e, ekar ain ļalem dekā ko remetal, bōk buwat eo an, im ilo̧k in jelm̧ae lakijon̄jon̄ eo.

Pija

Dōkā ko lalem an Devid.

Jeje ko rekwojarjar rej jiron̄ kōj ke dekā eo m̧oktata Devid ekar joļok ekar kalel demān Golaiat, im kameje.²

Ilo an Devid kar kōjerbal wōt juon dekā n̄an kamej Golaiat, ekar pojak kōn ļalem. Kōn ļalem! Men in ekōm̧m̧an bwe in ļōm̧nak kōn ekōjkan aō maron̄ kōpooj eō make n̄an jelm̧ae laļ in.

Ta eo eļan̄n̄e dekā ko kajjojo an Devid rekar bōk jikin juon kajoor eo jej aikuji n̄an anjo̧ ilo mour ko ad? Ta ko emaron̄ nej kar āinwōt dekā ko ļalem? Ikar ļōmņak kōn men kein remaron̄ kar:

1. Dekā in iakwe eo aō n̄an Anij.

2. Dekā in tōmak eo aō ilo ad Rilo̧mo̧o̧r, Jisōs Kraist.

3. Dekā in jeļā eo aō kōn m̧ool in kadkad eo aō.

4. Dekā in aō ukweļok kajjojo raan.

5. Dekā in aō maron̄ delon̄e kajoor eo an Anij.

Jen kōnono kōn ekōjkan ad jeram̧m̧an jān kajoor kein.

Kein kajuon, Dekā in iakwe eo aō n̄an Anij. Iakwe Anij ej kien eo eļap m̧oktata.³ Unin tōl eo N̄an Kōkajoorļo̧k Jodrikdrik ro ej katakin kōj: “Anij ej iakwe eok. E ej Jem̧ōm̧. Iakwe eo An eweppān emaron̄ im̧we kwe n̄an iakwe E. N̄e iakwe eo am̧ n̄an Jemedwōj Ilan̄ ej kālet eo eaorōk tata ilo mour eo am̧, kālet ko relōn̄ renaaj pidodo.”⁴

Ad iakwe n̄an Anij im kadkad eo ad epaak Ippān ej letok n̄an kōj kōkajoor eo jej aikuji n̄an ukōt būruōd im kapidodikļo̧k ad anjo̧ ioon idajon̄jon̄ ko ad.

Kein karuo, Dekā in tōmak eo aō ilo ad Rilo̧mo̧o̧r, Jisōs Kraist. Ke Jisōs eaar itok n̄an laļ in, Eaar en̄taan kōn jerawiwi ko ad,⁵ im Ekar bōk ioon E make būrom̧ōj ko ad, metak ko ad, m̧ōjņo̧ ko ad, im nan̄inmej ilo kanniōk im kōļmenļo̧kjeņ ko ad. En̄in ej unin An jeļā ekōjkan an maron̄ jipan̄ kōj. Wōr tōmak ilo Jisōs Kraist ej meļeļein n̄an lukkuun lōke māletlet eo An, iien eo An, An iakwe, im An kajoor n̄an pinmuur kōn jerawiwi ko ad. Dekā in tōmak eo ad ilo Jisōs Kraist enaaj m̧an jabdewōt “kakijon̄jon̄” ilo mour ko ad.⁶ Jemaron̄ anjo̧ ioon laļ in jerawiwi in kōnke E eo im̧aan tata ekar anjo̧ ioon.⁷

Nōm̧ba jilu, Dekā in jeļā eo aō kōn m̧ool in kadkad eo aō. Rikanaan eo ad ejitōnbōro, Būreejtōn Russell M. Nelson, ekar katakin kōj bwe kadkad ko ad raorōk tata rej āinwōt, ajri ro nejin Anij, ajri in bujen eo, im rikaļoor ro an Jisōs Kraist.⁸

Aolep men rej oktak n̄e ijeļā wōn lukkuun n̄a.⁹ N̄e ij pere maron̄ ko aō, emakijkij aō kōn āliji n̄an n̄a make ilo ļōmņak eo aō ak eļļaaj, “N̄a ij juon leddik nejin Anij, N̄a ij juon leddik nejin Anij,” an lōn̄ in wōt eo ij aikuji m̧ae iien ij en̄jake lōke n̄an wōnm̧aanļo̧k wōt.

Kein kemān, Dekā in aō ukweļok kajjojo raan. Ilo Unin Tōl eo N̄an Kōkajoorļo̧k Jodikdik ro jej riit “Ukweļo̧k ejjab juon kaje kōn jerawiwi; ej wāween eo Rilo̧m̧o̧o̧r ej kōtļo̧k kōj jān jerawiwi. N̄an ukweļo̧k ej meļeļein n̄an oktak—n̄an eļļo̧k jān jerawiwi im wōnm̧aanļo̧k n̄an Anij. Ej meļeļein n̄an em̧m̧anļo̧k im bōk jeorļo̧k bōd. Oktak in ejjab juon kōttan in m̧akūtkūt; ej juon jerbal ej wōnm̧aanļo̧k wōt.”¹⁰

Ejjeļo̧k men eļapļok an kanemkwoj kōj jān en̄jake jeorļok bōd eo an Anij im jeļā bwe jerreeo im kar kapilōk Ippān. Jeorļok bōd ej n̄an aolep.

Dekā eo kein kōļalem ej dekā in aō maron̄ delon̄e kajoor eo an Anij. Bujen ko jej kōm̧m̧ani ippān Anij, ejja wōt ko jej kōm̧m̧ani ilo kain̄i eo an peptaij, ej letok n̄an kōj maron̄ eo n̄an bōk kajoor eo em̧m̧an an Anij.¹¹ Kajoor eo an Anij ej juon m̧ool in kajoor me ej jipan̄ kōj jelm̧ae apan̄ ko, kōm̧m̧ani jokāālet ko rem̧m̧an, im kōļapļo̧k ad ekkeke n̄an niknik ilo jekjek ko reppen. Ej juon kajoor eo me jemaron̄ eddōkļo̧k ie ilo maron̄ ko rejeņoļo̧k jej aikuji.¹²

Unin Tōl eo N̄an Kōkajoorļo̧k Jodikdik ro ej kōmeļeļeik: “Bujen ko rej koneeke kwe n̄an Jemedwōj Ilan̄ im̧ Rilo̧mo̧o̧r. Rej kōļapļo̧k kajoor eo an Anij ilo mour eo am̧.”¹³

Jen kōnono kōn ekkejeļļok jab in. Keememej ke iien eo Kraist ekar katakin oktak eo ikōtaan juon em̧ kar kalōk ioon bar im juon ioon bok?¹⁴ Elder Deiter F. Uchtdorf eaar kōmeļeļeik: “Juon em̧ ejjab jutak ilo iien ļan̄ kōnke ekajoor. Ejjab barāinwōt jutak kōnke pedped eo ekajoor. Em̧ in ej jutak ibūļōn ļan̄ kōnke em̧ōj kalōke ioon pedped eo epen. Kajoor in ekkejelļo̧k n̄an dōkā eo eaorōk.”¹⁵

Pija

M̧weo ej ekkal ioon juon bar.

Ekkejeļļok eo ad make n̄an Jisōs Kraist enaaj letok n̄an kōj peran eo im lōke eo n̄an bun̄ m̧aanļo̧k ilubwiljin armej ro me rejjab kautiej tōmak ko ad ak me rej kakkure kōj. Kraist ej kajjitōk ippād n̄an likūt wōt E ilo ļōmņak ko ad aolep iien; Ej jiron̄ kōj, “Reitok n̄an Eō ilo ļōmņak otemjeļo̧k.”¹⁶ Ļōm̧nak kōn Rilo̧mo̧o̧r eo ej letok n̄an kōj alikkar n̄an kōm̧m̧ani kālet ko, ilo ejjeļok mijak, im ba jab n̄an ta eo ej jum̧ae katak ko an Anij.¹⁷ N̄e raan eo aō ej pen im ij en̄jake āinwōt ijjab maron̄ bōke n̄an jidik, ļōmņak kōn an Kraist bōktok n̄an eō aenōm̧m̧an im ej letok n̄an eō kōjatdikdik.

Ekōjkan ad maron̄ kawōrtokjān kajoor in an Jisōs Kraist? Pokake bujen ko ad im kōļapļo̧k tōmak eo ad ilo Jisōs Kraist rej ki eo.

Ij lukkuun kōņaan bwe Devid en kar bar wōr juon an dekā; me enaaj kar dekā eo an naan in kam̧ool eo aō. Naan in kam̧ool ko ad rej ekkal kōn en̄jake in jetōb ko ad make me jej kūle kareel eo ekwojarjar ilo mour ko ad.¹⁸ Ejjeļo̧k juon emaron̄ bōk jeļā in jān kōj. Jeļā ta eo jejeļā jān ad kar mour kōn en̄jake in jetōb ko ad elukkun aorōk. M̧ool n̄an jeļā jab in ej letok n̄an kōj anemkwōj. Ej letok n̄an kōj lan̄lōn̄! Eļan̄n̄e jej iakwe m̧ool eo, jenaaj kappukote, im n̄e jej loe, jenaaj bōbraeik.¹⁹

Āinwōt aō kar kāālet dekā ko nōm̧ba jiljino, ij kūr kom̧ kajjojo n̄an kweilo̧k ippān kūlaaj eo, doulul eo ami, ak baam̧le eo im ļōmņak kōn ta kajoor ko jet kom̧ij aikuji n̄an bōk n̄an tiljek wōt n̄an Anij im, kōn menin, anjo̧ ioon laļ in.

Ro m̧ōtta rejitōnbōro, Kraist ej lukkuun kijooror n̄an koba ippād ilo iaļ in mour ko ad. Ij kallim̧uri kom̧,ilo ami jirōk aen in dāpdep eo, kom̧ naaj etetal jibwe pein doon ippān Jisōs Kraist.²⁰ E enaaj tōl kom̧, im̧ E enaaj katakin kom̧.²¹ Jān Pe ko Pein, kom̧ maron̄ anjo̧ ioon aolep men ko reppen me rej waļo̧k ilo mour eo ami.

Ij kam̧ool bwe ewōr lan̄lōn̄ ilo jar aolep raan, ij riiti Bok in Mormon aolep raan, ilo ad bōk kwojkwoj eo aolep Jabōt, im ilo etal n̄an jemenere—em̧ool ilo jibbon̄ tata! Ewōr lan̄lōn̄ ilo kōm̧m̧an em̧m̧an.

Ewōr lan̄lōn̄ ilo ad tiljek n̄an Anij eo an aolepān laļ in, Rilo̧mo̧o̧r an laļ, Kiin̄ in kiin̄ raņ. Ewōr lan̄lōn̄ ilo ad rikaļoor ro an Jisōs Kraist.

Anij ej Jemedwōj. E ejeļā ikdeelel ko an būruōm̧i im kōjatdikdik ko ami, im E ej lōke kom̧.

Jodikdik ro rejitōnbōro, Jisōs Kraist enaaj jipan̄ kom̧ tiljek n̄an jem̧ļo̧kin. Kōn m̧ool kein ij kwaļo̧k aō naan in kam̧ool ilo etan Jisōs Kraist, amen.