Jutak! Ej Kūr Eok

Jet iien remootļo̧k ikar kajjitōk ippān kōrā eo ippa, “Kwomaron̄ ke jiron̄ eō etke, ilo aō baj keememej, ejjan̄in kar wōr jorrāān eļap n̄an mour ko ad?”

Eaar reitok n̄an eō, kar ettōn̄, im kar ba, “Aaet. Inaaj jiron̄ eok etke ejjan̄in kar wōr jabdewōt jorrāān ko reļlap, ej kōnke ekadu jetn̄akin am̧ ememej!”

Uwaak eo an em̧ōkaj im ekar kōm̧m̧an aō kile bar juon alen bwe mour kōn gospel eo an Jisōs Kraist ejjab joļo̧k metak im mālijjon̄ ko, ko rej menin aikuj n̄an eddōkļo̧k.

Gospel eo ejjab juon wāween n̄an joļo̧k apan̄ ko im jorrāān ko ak ej juon uwaak n̄an kōļapļo̧k ad tōmak im katak n̄an jeļā mejļaer.

Ekar wōr juon aō en̄jake kōn m̧ool in jejjo allōn̄ remootļo̧k ke ikar etetal juon raan, ekar jidimkij an tab aō loļo̧kjeņ, marok, im addeboulul. Ikar mijak. Innām, taktō ro raar jiron̄ eō: “Eļan̄n̄e kwoban jino taktō ilo iien eo em̧ōkaj, koban loļo̧kjeņ ilowaan jejjo wōt wiik ko.” Em̧ool ekar ļapļo̧k aō mijak.

Innām, raar ba: “Kwōj aikuj uno in wāik ko n̄an mejām̧—uno in māj—ej aikuj peļļo̧ke mejam̧—aolep emen wiik, ilo aolepān mour eo am̧.”

Ekar jab juon naan em̧m̧an ron̄jake.

Innām juon ļōmņak ekar itok ilo nemāme in juon kajjitōk. Ikar kajjitōk ippa make, “OK! Loļo̧kjeņ eo aō ilo kanniōk ejjab em̧m̧an, ak baj loļo̧kjeņ eo aō ilo jetōb? Ij ke aikuj jabdewōt kakōlkōl ijeņ? Im ta meļeļein n̄an bōk juon loļo̧kjeņ eo ealikkar ilo jetōb?”

Ikar ļōmņak kōn bwebwenato eo an em̧m̧aan eo epilo, ekar etan in Bartiameus, kar kōmeļeļeik ilo Gospel Mark. Jeje ko Rekwojarjar rej ba, “Im ke ej ron̄ bwe E Jisōs ri Nazeret, ej jino an lam̧ōj im ba, Jisōs, Nejin Devid, Kwōn tūriam̧okake eō.”¹

Ilo m̧ool, ilo mājen elōn̄, Jisōs ekar bajjōk nejin Joseph, kōn menin etke Bartimaeus ekar kūr e “Nejin Devid”? Kōnke ekar kile bwe Jisōs em̧ool ekar Messaia eo, eo kar kanaan kake bwe enaaj ļotak āinwōt ineen Devid.²

Ekaitoktok limo bwe em̧m̧aan in epilo, eo ekar ejjeļo̧k an loļo̧kjeņ ilo kanniōk, ekar kile Jisōs. Ekar loe ilo jetōb ta eo ekar jab maron̄ loe ilo kanniōk, ilo an elōn̄ kar jab maron̄ lo Jisōs ilo kanniōk bōtaab raar lukkuun in pilo ilo jetōb.

Jān bwebwenato in jej katak eļapļo̧k kōn loļo̧kjeņ eo ealikkar ilo jetōb.

Jej riit, “Im elōn̄ rej kauwe e bwe en ikōn̄, a e kanooj kaļapļo̧k an lam̧ōj, O Nejin Devid, Kwōn tūriam̧okake eō.”³

Aolep ro ipeļaakin raar jiron̄ e n̄an ikōn̄, bōtaab ekar lam̧ōj em̧ool eļapļo̧k kōnke ekar jeļā wōn eo kar lukkuun Jisōs. Ekar kōjekdo̧o̧n ainikien ko im lukkuun lam̧ōj.

Ekar kōm̧m̧an ijello̧kin kipel n̄an kōm̧m̧an. Kōjekdo̧o̧n likjab ko an, ekar kōjerbal an tōmak n̄an ilo̧k eļapļo̧k jān likjab ko an.

Kōn menin, pedped in katak eo m̧oktata jej katak ej Jen dāpij juon loļo̧k in jetōb alikkar n̄e jej kalimjōk Jisōs Kraist im m̧ool wōt n̄an ta eo jejeļā bwe em̧ool.

Ro jeiū im jatū, n̄an dāpij loļo̧kjeņ eo ad ilo jetōb, jej aikuj in kāālet n̄an jab ron̄jake ainikien ko an laļin ipeļaakid. Ilo an laļ in tarpok im kapokpok, jej aikuj tiljek wōt n̄an ta eo jejeļā, tiljek n̄an bujen ko ad, tiljek ilo kōjparok kien ko im bar kapen tōmak ko ad em̧ool kajoorļo̧k, āinwōt kar em̧m̧aan in. Jej aikuj lukkuun lam̧ōjkōn naan in kam̧ool eo ad kōn Irooj n̄an laļ in. Em̧m̧aan in ekar jeļā Jisōs, ekar tiljek wōt n̄an ta eo ekar tōmak, im ekar jab po kōn ainikien ko ipeļaakin.

Elōn̄ ainikien ko rainin rej kajjieon̄ kadikļo̧k ainikied āinwōt rikaļoor ro an Jisōs Kraist. Anikien ko an laļ in rej kajjieon̄ kaikōn̄ kōj, bōtaab en̄in ej lukkuun unin ad aikuj kōļaapļo̧k im kōkajoorļo̧k ad kwaļo̧k naan in kam̧ool eo ad kōn Rilo̧mo̧o̧r. Ibwilijin aolep ainikien ko an laļ in, Irooj ej kōjatdikdik ilo n̄a im kwe n̄an kwaļo̧k naan in kamool ko ad, n̄an ļōn̄aj ainikied, im erom Ainikien. Eļan̄n̄e jejjab kōm̧m̧ane, wōn enaaj kam̧ool kōn Jisōs Kraist? Wōn eo enaaj kōnono kōn Etan im kean̄ kōn mijen eo An ekwojarjar?

Ewōr juon ad eddo ilo jetōb me ej itok jān jeļā eo ad kōn Jisōs Kraist.

Bōtaab ta eo Bartimaeus ekar kōm̧m̧ane ālkin?

Ilo jiron̄ eo an Irooj n̄an jutak, ekar kōm̧m̧an bar juon alen ilo tōmak.

Jeje ko Rekwojarjar ej ba, “Im ej joļo̧k kopā eo an, im jutak, im itok n̄an Jisōs.”⁴

Em̧m̧aan in ettā im tiljek ekar meļeļe bwe emaron̄ kar jutak n̄an juon mour em̧m̧anļo̧k ilo kean̄ eo an Jisōs. Ekar jeļā bwe ekar em̧m̧anļo̧k jān jekjek ko an, im men eo im̧aantata ekar kōm̧m̧an ke ekar ron̄ an Jisōs kūri ekar n̄an joļo̧k kopā in eowar eo an.

Bar juon alen ekar kōm̧m̧an ijello̧kin kipel n̄an kōm̧m̧an.

Emaron̄ kar ļōmņak, “Ijjab aikuj menin n̄an jidik, kiiō ke Jisōs ekar itok n̄an mour eo aō. En̄in ej juon raan kāāl. Em̧ōj n̄a jān mour in enana. Kōn Jisōs imaron̄ jino juon mour ekāāl elem̧ōņōņō elan̄lōn̄ ilo E, Ippān, im kōn E. Ijjab kea ta eo laļ in ej ļōmņak kōn n̄a. Jisōs ej kūr eō, im Enaaj jipan̄ eō mour juon mour kāāl.”

Juon oktak ekabwilōn̄lōn̄!

Ke ekar joļo̧k kopā in eowar eo an, ekar joļo̧k aolep jekpen ņae ko.

Im en̄in ej pedped in katak eo kein karuo: jej kōjparok juon loļokjeņ ealikkar ilo jetōb n̄e jej doorļo̧k lukkuun piktok in armej eo itulik, ukweļo̧k, im jino juon mour kāāl ilo Kraist.

Wāween eo jej kōm̧m̧ane n̄an kōm̧m̧ane im kōjparok bujen ko n̄an jutak kōn juon mour em̧m̧anļo̧k kōn Jisōs Kraist.

To̧o̧n wōt ad kōm̧m̧an jekpen ņae ko n̄an en̄jake būrom̧ōj kōn kōj make, būrom̧ōj kōn jekjek ko im jorrāān ko ad im n̄an aolep men ko renana rej waļo̧k ilo mour eo ad, im em̧ool aolep armej ro renana bwe jej ļōmņak rej kōm̧m̧an ad jab m̧ōņōņō, jej dāpij wōt kopā in eowar eo ad ioon aerad. Ej m̧ool bwe, jet iien, armej kōn jeļā ak jaab, rej kōmetak kōj. Bōtaab jej aikuj kāālet n̄an kōm̧m̧an bwe tōmak ilo Kraist n̄an joļo̧k kopā in kōļmenļo̧kjeņ im en̄jake eo me jemaron̄ kōņake wōt n̄an ņooj jekpen ņae ko ak jerawiwi ko im joļo̧ke, jeļā bwe E emaron̄ im naaj kemour kōj.

Eban wōr juon jekpen ņae em̧m̧an n̄an ba, “N̄a jekjek eo ij bwe kōn jet jekjek ko rejerata im jab em̧m̧an. Im ijjab maron̄ oktak, im ebun̄ būruō.”

N̄e jej lōmņak ilo wāween rot in, jej kāālet n̄an kipel n̄an kōm̧m̧an.

Jej dāpij wōt kopā in eowar eo.

Jerbal ilo tōmak ej meļeļein pedped ioon ad Rilo̧mo̧o̧r, tōmak bwe kōn Pinmuur eo An, jemaron̄ jutak ilōn̄ in aolep men, ilo kean̄ eo An.

Pedped in katak eo kein kajilu ej ilo naan ko emen āliktata, “[e] etal n̄an Jisōs.”

Ekōjkan an maron̄ in kar etal n̄an Jisōs ke ekar pilo? Wāween eo de in ekar n̄an etetal ļo̧k n̄an ippān Jisōs ilo an ron̄ Ainikien.

Im en̄in ej pedped in katak eo kein kajilu: jen dāpij juon loļo̧kjeņ eo ealikkar ilo jetōb n̄e jej ron̄ ainikien Irooj im kōtļo̧k An tōl kōj.

Ejja āinwōt em̧m̧aan in ekar kotak ainikien ioon ainikien ko ipeļaakin, ekar maron̄ in ron̄jake ainikien Irooj ilo ioļapļap in aolep ainikien ko jet.

Ejja tōmak in wōt me ekar kōm̧m̧an an Piter etetal ioon dān to̧o̧n wōt an kar dāpij jetōbin mije eo an ioon Irooj im kar jab po jān kōto ko ipeļaakin.

Innām bwebwenato eo an em̧m̧aan in epilo ej kōjem̧ļo̧k kōn naan kein “e m̧ōkaj an loļo̧kjeņ im ļoor Jisōs ilo iaļ eo.”⁵

Juon iaan katak ko raorōktata ilo bwebwnato in ej bwe em̧m̧aan in ekar kōjerbal tōmak m̧ool ilo Jisōs Kraist im kar bōk juon kabwilōn̄lōn̄ kōnke ekar kajjitōk kōn lukkuun kōttōpar, lukkuun kōttōpar eo n̄an ļoor E.

Im en̄in ej un eo āliktata kōn kōjeraam̧m̧an ko jej būki ilo mour ko ad, eo ej n̄an ļoor Jisōs Kraist. Ej n̄an kile E, kōm̧m̧an im kōjparok bujen ko ippān Anij kōn wōt E, lukkuun ukōt pitok eo ad kōn E, im niknik n̄an jem̧ļo̧kin n̄an ļoor E.

N̄an n̄a, dāpij juon loļo̧kjeņ eo ealikkar ilo jetōb ej kalimjōk wōt Jisōs Kraist.

Kōn menin loļo̧kjeņ eo aō ealikkar ilo jetōb ilo aō bōk uno ko an meja? Ekwe, wōn n̄a bwe in ba? Bōtaab ij kam̧m̧oolol kōn ta eo ij loe.

Ej alikkar aō lo pein Irooj ilo jerbal in ekwojarjar im ilo mour eo aō.

Ij lo tōmak eo an elōn̄ jabdewōt jikin ij etal n̄ane, eo ej kōkajoorļo̧k tōmak eo aō make.

Ij lo enjeļ ro aolep ipeļaakū.

Ij lo tōmak eo an elōn̄ ro me rejjab lo Irooj ilo likio in armej bōtaab kile E ilo jetōb, kōnke rejeļā E ilo iien eo em̧ōkajtata.

Ij kam̧ool bwe gospel in ej uwaak eo n̄an aolep men, kōnke Jisōs Kraist ej uwaak eo n̄an aolep. Ij kam̧m̧oolol kōn ta eo imaron̄ loe ilo aō ļoor aō Rilo̧mo̧o̧r.

Ij kallim̧ur bwe ilo ad ron̄jake ainikien Irooj im ļoor im kōtļo̧k An tōl kōj ioon iaļ in bujen eo an Rilo̧mo̧o̧r, jenaaj jeraam̧m̧an kōn visōn alikkar, meļeļe ilo jetōb, im aenōm̧m̧an an bōro im ļōmņak ilo aolepān mour ko ad.

Kōm̧m̧an bwe jen lam̧ōj kōn naan in kam̧ool eo ad kōn E en eļļaaj jān ainikien ko ipeļaakid ilo juon laļ eo me aikuj in ron̄ eļapļo̧k kōn Jisōs Kraist im jab dikļo̧k. Kōm̧m̧an bwe jen joļo̧k kopā in eowar eo me jej kōņake wōt, im jutak ilōn̄ in laļ in, n̄an juon mour em̧m̧anļo̧k ilo im kōn Kraist. Kōm̧m̧an bwe jen jolo̧k aolep jekpen ņae ko n̄an jab ļoor Jisōs Kraist im lo aolep un ko rem̧m̧an n̄an ļoor E, ilo ad ron̄ Ainikien. En̄in ej jar eo aō ilo etan Jisōs Kraist, amen.