Tapuai

Vaaiga Aoao

O le tapuai i le Atua, o le avatu lea ia te Ia o lo tatou alofa, faaaloalo, auaunaga, ma le tuuto. Na poloaiina e le Alii ia Mose, “Ifo atu i le Atua, aua nao ia lava e te auauna atu i ai” (Mose 1:15). Ua Ia poloai mai foi, “Ia e alofa atu i le Alii lou Atua ma lou loto atoa, ma lou manatu atoa, mafaufau, ma le malosi; ma ia e auauna atu ia te ia i le suafa o Iesu Keriso” (Mataupu Faavae ma Feagaiga 59:5). O le tapuai e le gata ina faaali atu ai lo tatou alolofa mo le Atua ma le tautinoga ia te Ia, e aumaia ai ia i tatou le malosi e tausi ai Ana poloaiga. E ala i le tapuai tatou te tuputupu ae ai i le poto ma le faatuatua. A tatou tuu soo se tagata po o se mea i luga atu o le alofa o le Atua, ua tatou tapuai i lena mea po o lena tagata. Ua ta’ua lea mea o le ifo i tupua (tagai Esoto 20:3–6).

O le tatalo o se tasi lea o auala e tapuai ai i le Tama Faalelagi. Na aoaoina e Alema lona atalii o Helamana: “Tagi atu i le Atua mo lou tausiga atoa; ioe, tuu atu i le Alii au mea uma e fai, ma soo se mea e te alu i ai ia tuu atu i le Alii; ioe, ia tuu atu ou manatu uma i le Alii; ioe, ia tuu atu alofaaga o lou loto i le Alii e faavavau” (Alema 37:36).

O le isi auala e tapuai ai i le Tama Faalelagi o le auai faatasi i le faaaumeaina o isi o e tapuai ia te Ia. Ua faaali mai e le Tusi a Mamona, “Sa poloaiina fanau a le Atua e tatau ona latou faapotopoto faatasi soo i latou lava, ma aufaatasi i le anapogi ma le tatalo malosi mo le manuia o agaga o i latou o e sa latou lē iloaina le Atua” (Alema 6:6) I faaaliga aupito lata mai, na poloai mai ai le Alii: “Ma ina ia mafai ona e tausi atili atoatoa oe lava i le lē pisia mai le lalolagi, ia e alu atu i le fale tatalo ma osi aʼe i luga au faamanatuga i loʼu aso paia; aua e moni o se aso lenei ua tofia mo oe e te malolo ai mai au galuega, ma avatu ai au tapuaiga i le Silisili Ese” (Mataupu Faavae ma Feagaiga 59:9–10).

O le auai i sauniga o le perisitua o se vaegea foi o le tapuai. A o tatou taumamafa ma le migao i le faamanatuga ma auai i le malumalu, ua tatou manatua ma tapuai atu i lo tatou Tama Faalelagi ma faaailoa atu lo tatou agaga faafetai mo Lona Alo o Iesu Keriso.

E faaopoopo atu i le tapuai i soo se nofoaga, e tatau ona i ai so tatou uiga faaaloalo o le tapuai i soo se mea tatou te o i ai, ma soo se mea tatou te faia. Sa aoao atu e Alema lenei mataupu faavae i se vaega o tagata o e sa taofia mai le ulufale atu i o latou nofoaga mo tapuaiga. Sa fesoasoani o ia ia latou iloa o le tapuai moni e le faatapulaaina i se aso e tasi o le vaiaso (tagai Alema 32:11). O le saunoa atu i lea lava vaega o tagata, sa faamalosiauina ai i latou e le soa a Alema o Amoleka ia “Tapuai i le Atua, i soo se mea atonu tou te i ai, i le agaga ma le upumoni” (Alema 34:38).

Tusifaamaumau Ou Lagona Uunai