ʻOfá—ko e ʻElito ʻo e Ongoongoleleí

ʻE hoku kāinga ʻofeina, ko e taimi naʻe ngāue ai hotau Fakamoʻuí he lotolotonga ʻo e kakaí, naʻe fehuʻi kiate Ia ʻe ha loea, “ʻEiki, ko e fekau fē ʻi he fonó ʻoku lahí?”

ʻOku lekooti ʻe Mātiu ʻa e tali ʻa Sīsuú:

“Ke ke ʻofa ki [he ʻEiki] ko ho ʻOtuá ʻaki ho laumālié kotoa, mo hoʻo moʻuí kotoa, mo ho lotó kotoa.

“Ko e ʻuluaki pea ko e lahi ia ʻo e fekaú.

“Pea ko hono ua ʻoku tatau mo iá, Ke ke ʻofa ki ho kaungāʻapí ʻo hangē pē ko koé.”¹

ʻOku fakaʻosi ʻe Maʻake ʻa e fakamatalá ʻaki e folofola ʻa e Fakamoʻuí: “ʻOku ʻikai ha fekau ʻe lahi hake [ʻi] he ongo fekaú ni.”²

He ʻikai ke tau lava ʻo ʻofa moʻoni ʻi he ʻOtuá kapau ʻoku ʻikai ke tau ʻofa ʻi hotau kaungā fononga he moʻui fakamatelié. Ko e meʻa tatau pē, he ʻikai ke tau lava ʻo ʻofa kakato ʻi hotau kāingá kapau ʻoku ʻikai ke tau ʻofa ʻi he ʻOtuá, ko e Tamai kiate kitautolú kotoa. ʻOku talamai ʻe he ʻAposetolo ko Sioné, “Pea ko e fekaú ni ʻoku tau maʻu meiate Ia, Ko ia ia ʻoku ʻofa ki he ʻOtuá ke ʻofa foki ia ki hono tokouá.”³ Ko e fānau fakalaumālie kotoa kitautolu ʻa ʻetau Tamai Hēvaní pea, ʻi heʻene peheé, ko e ngaahi tokoua mo e tuofāfine. ʻI heʻetau manatuʻi ʻení, ʻe fakaʻau ʻo faingofua ange ʻa e ʻofa ʻi he fānau kotoa ʻa e ʻOtuá.

Ko hono moʻoní, ko e ʻofá ko e ʻelito moʻoni ia ʻo e ongoongoleleí pea ko Sīsū Kalaisi hotau Faʻifaʻitakiʻangá. Naʻe hoko ʻEne moʻuí ko ha tukufakaholo ʻo e ʻofá. Naʻá Ne fakamoʻui ʻa e mahakí, hiki hake e liʻekiná pea fakahaofi ʻa e angahalá. Ko e fakaʻosí naʻe toʻo ʻene moʻuí ʻe he kakai ʻitá. Ka ʻoku kei ongona mai pē mei he moʻunga ko Kolokotá ʻa e ngaahi lea: “Tamai, fakamolemoleʻi ʻa kinautolu; he ʻoku ʻikai te nau ʻilo ʻa ia ʻoku nau faí”⁴—ko e fakafōtunga fungani ʻi he moʻui fakamatelié ʻo e ongoʻi ʻofá mo e ʻofá.

ʻOku lahi ha ngaahi ʻulungaanga ʻoku hāsino ai ʻa e ʻofá, hangē ko e manavaʻofá, faʻa kātakí, taʻe-siokitá, loto mahinó, mo e faʻa fakamolemolé. ʻI heʻetau ngaahi feohí kotoa, ʻe tokoni ʻeni mo ha ngaahi ʻulungaanga lelei kehe ke hā mahino ʻa e ʻofa ʻi hotau lotó.

ʻOku angamaheni ke hā ʻetau ʻofá ʻi heʻetau fengāueʻaki fakaʻahó. Ko e founga mahuʻinga tahá ke fakatokangaʻi siʻa fie maʻu ʻa ha taha pea tokoni. Kuó u mahuʻingaʻia maʻu pē ʻi ha ongo naʻe fakamatalaʻi ʻi ha maau nounou:

Naʻe toki fakahā mai kiate au kimuí ni ha sīpinga ongo ʻo e ʻaloʻofá—ko e taha naʻe taʻeʻiloa hono ngaahi olá. Ko e taʻu 1933 ʻeni, pea koeʻuhí ko e Tō-lalo Fakaʻekonōmiká, ne siʻisiʻi e ngaahi faingamālie ngāué. Ko e feituʻú ko e tafaʻaki fakahahake ʻo e ʻIunaiteti Siteití. Naʻe toki ʻosi pē ʻa ʻAilini Paseka mei he ako māʻolungá. Hili haʻane kumi ngāue ʻi ha taimi lōloa, naʻe fāifai pea maʻu haʻane ngāue ʻi ha fale tuitui valá ko ha taha tuitui. Naʻe totongi ʻa e kau ngāue tuituí ʻo fakatatau mo e lahi ʻo e ngaahi vala naʻa nau tuitui fakaʻaho totonu mo kakató. Ko e lahi ange ʻo e vala naʻa nau tuituí, ko e lahi ange ia honau totongí.

ʻI ha ʻaho ʻe taha, hili pē ʻene toki kamata ngāue he fale tuituí, naʻe fehangahangai ʻa ʻAilini mo ha founga ngāue naʻe puputuʻu ai mo taʻe-fiemālie. Naʻe tangutu ʻi heʻene mīsini tuituí ʻo feinga ke vete matatuitui ʻo e meʻa naʻe ngāue aí. Naʻe hangē ne ʻikai ha taha ai ke tokoni ki ai, he ko e toenga kotoa ʻo e kau tuituí naʻa nau fakavavevave ke lahi taha e ngaahi vala ne nau tuituí. Ne ongoʻi liʻekina ʻa ʻAilini pea mole e ʻamanakí. Naʻá ne tangi fakalongolongo pē.

Naʻe hanga mai mei he tafaʻaki ʻe taha ʻo ʻAiliní ʻa Pānisi Maka. Ko ha taha tuitui naʻe motuʻa mo taukei ange. ʻI heʻene sio ki he mamahi ʻa ʻAiliní, naʻe tuku leva ʻe Pānisi ʻene ngāué kae ʻalu ki he tafaʻaki ʻo ʻAiliní, ʻo fakahinohinoʻi fakalelei mo tokoniʻi ia. Naʻe nofo ai kae ʻoua kuo maʻu ʻe ʻAilini ha lotofalala mo lava ke fakaʻosi lelei ʻene tuituí. Naʻe toki foki leva ʻa Pānisi ki heʻene mīsini tuituí, kuo mole e faingamālie naʻá ne mei fakakakato ai ki he lahi taha naʻá ne mei lavá ha ngaahi vala, kapau ne ʻikai ʻene ʻalu ʻo tokoní.

Naʻe hoko ʻa Pānisi mo ʻAilini ko ha ongo kaungāmeʻa fuoloa, tuʻunga ʻi he kiʻi tōʻonga angaʻofa ko ʻení. Naʻe aʻu pē ʻo na takitaha mali mo ʻi ai ʻena fānau. ʻI he taʻu 1950 tupú, naʻe foaki ʻe Pānisi, ko ha mēmipa ʻo e Siasí, ha tatau ʻo e Tohi ʻa Molomoná kia ʻAilini mo hono fāmilí. Naʻe papitaiso ʻa ʻAilini mo hono husepānití mo e fānaú ko e kau mēmipa ʻo e Siasí ʻi he 1960. Naʻe toki silaʻi kinautolu kimui ange ʻi he temipale māʻoniʻoni ʻo e ʻOtuá.

Tuʻunga ʻi he ʻofa naʻe fakahaaʻi ʻe Pānisi ʻi heʻene feilaulau ke tokoniʻi ha taha naʻe ʻikai ke ne ʻiloʻi ka naʻe faingataʻaʻia mo fie maʻu tokoní, kuo maʻu ai heni ʻe ha niʻihi tokolahi, ʻoku lolotonga moʻui pe kuo pekia, ʻa e fiefia ʻi he ngaahi ouau fakamoʻui ʻo e ongoongoleleí.

ʻOku foaki mai ʻi he ʻaho kotoa ʻo ʻetau moʻuí ha ngaahi faingamālie ke fakahaaʻi ha ʻofa mo ha angaʻofa kiate kinautolu ʻoku tau feohí. Naʻe pehē ʻe Palesiteni Sipenisā W. Kimipolo: “[Kuo pau ke tau manatuʻi ʻa e kakai matelie ʻoku tau fetaulaki mo kinautolu ʻi he feituʻu tauʻanga meʻalelé, ngaahi ʻōfisí, ʻeleveitá, mo ha ngaahi feituʻu kehe pē, ko e konga kinautolu ʻo e faʻahinga ʻo e tangatá kuo tuku mai ʻe he ʻOtuá ke tau ʻofaʻi mo tokoniʻi. ʻE siʻi haʻane lelei kiate kitautolu ke tau lea ki he tuʻunga fakatokoua ʻo e faʻahinga ʻo e tangatá kapau he ʻikai ke tau lau kinautolu ʻoku tau feohí ko e ngaahi tokoua mo e tuofāfine.]”⁶

Ko e taimi lahi ʻoku hoko fakafokifā ai hotau ngaahi faingamālie ke fakahaaʻi ʻetau ʻofá. Naʻe hā e sīpinga ʻo e faʻahinga faingamālie peheé ʻi ha nusipepa ʻi ʻOkatopa 1981. Naʻá ku mālieʻia ʻi he ʻofa mo e manavaʻofa naʻe fakamatalaʻi aí peá u tauhi ai e konga ko iá ʻi heʻeku failé ʻo laka hake he taʻu ʻe 30.

ʻOku pehē ʻe he fakamatalá naʻe puna hangatonu ha Vakapuna ʻAlasikā mei ʻEngikulasi, ʻAlasikā ki Siato, Uāsingatoní—ko ha puna naʻe toko 150 ai e kau pāsesé—naʻe afeʻi ia ki ha kolo tukuʻuta ʻi ʻAlasikā ke ʻave ha kiʻi tamasiʻi lavea lahi. Naʻe motu ha foʻi kālava ʻi he nima ʻo e kiʻi tamasiʻi taʻu uá ʻi haʻane tō ʻi ha konga sioʻata lolotonga haʻane vaʻinga ofi pē ki honau ʻapí. Naʻe maile ʻe 450 (kilomita ʻe 725) ʻa e koló ki he fakatonga ʻo ʻEngikulasí pea naʻe ʻikai ke ʻi he halanga ia ʻo e vaká. Neongo ia, ne fai ʻe he kau ngāue fakafaitoʻo ʻi he feituʻu ko iá ha kole vavale ki ha tokoni, pea afeʻi leva ai ʻa e vaká ke fakaheka mai ʻa e kiʻi tamasiʻí ʻo ʻave ki Siato ke lava ʻo faitoʻo ai ʻi ha falemahaki.

Ko e taimi naʻe tūʻuta ai ʻa e vaká ofi ki he kiʻi kolo tukuʻutá ni, ne fakahā ʻe he kau ngāue fakafaitoʻó ki he pailaté naʻe fānoa lahi ʻa e totó ʻi he kiʻi tamasiʻí he ʻikai moʻui ia ʻo aʻu ki Siato. Ne fai leva ha tuʻutuʻuni ke toe puna ʻi ha maile ʻe 200 kehe (kilomita ʻe 320) ki Sīnoa ʻi ʻAlasikā, ko e kolo lahi ofi tahá ia ʻoku ʻi ai ha falemahaki.

Hili hono ʻave ʻo e kiʻi tamasiʻí ki Siuno, ʻAlasikaá, ne hoko atu leva ʻa e puná ki Siato, kuo lauhoua ʻene tōmuí. Naʻe ʻikai ke lāunga ha taha he kau pāsesé, neongo ko honau tokolahi te nau tōmui heʻenau ʻapoinimení mo e fetongi vaká. Ko hono moʻoní, ʻi he fakalau atu e taimí, naʻa nau tātānaki ha paʻanga, ʻo maʻu ai ha paʻanga lahi maʻá e kiʻi tamasiʻí mo hono fāmilí.

ʻI he ʻamanaki tūʻuta ʻa e vaká ki Siató, naʻe mavava ʻa e kau pāsesé ʻi he fakaongo mai ʻe he pailaté kuó ne maʻu ha fakamatala he letioó ʻe sai pē ʻa e kiʻi tamasiʻí.⁷

ʻOku haʻu ki heʻeku fakakaukaú e ngaahi lea ʻo e folofolá: “Ko e manavaʻofá ʻa e ʻofa haohaoa ʻa Kalaisí, … pea ko ia ia ʻe ʻiloʻi ʻokú ne maʻu ia ʻi he ʻaho fakaʻosí, ʻe lelei ia kiate ia.”⁸

Kāinga, ko e niʻihi ʻo hotau ngaahi faingamālie lelei taha ke fakahaaʻi ai ʻetau ʻofá, ʻe hoko ia ʻi he lotofale ʻo hotau ngaahi ʻapí. ʻOku totonu ke hoko ʻa e ʻofá ko e mafu ia ʻo e moʻui fakafāmilí, ka ko e taimi ʻe niʻihi ʻoku ʻikai. ʻE lava pē ke tōtuʻa ʻa e taʻe-kātakí, tōtuʻa e felāuakí, tōtuʻa ʻa e keé, tōtuʻa mo e loʻimatá. ʻI he tangilaulau ʻa Palesiteni Kōtoni B. Hingikelí: “[Ko e hā ʻoku hoko ai kinautolu ʻoku tau ʻofa taha aí ko e tāketi ʻo ʻetau ngaahi lea kakahá? Ko e hā ʻoku tau faʻa lea ai he taimi ʻe niʻihi ʻo hangē ha ngaahi hele fufū ʻokú ne tuiʻi ʻa e lotó?]”⁹ Mahalo ʻe kehekehe ʻa e tali ki he ngaahi fehuʻi ko ʻení kiate kitautolu taki taha, ka ko hono fakaʻosingá ʻoku ʻikai mahuʻinga e ngaahi ʻuhingá. Kapau te tau tauhi ʻa e fekau ke feʻofaʻakí, kuo pau ke tau feangalelei ʻaki mo fefakaʻapaʻapaʻaki.

ʻOku moʻoni ʻe ʻi ai pē taimi ʻe fie maʻu ai ke fakahoko ʻa e fakatonutonú. Neongo ia, tau manatuʻi, ʻa e faleʻi ʻoku ʻi he Tokāteline mo e Ngaahi Fuakavá—ko e taimi ʻoku fie maʻu ai ke tau valokiʻi ha tahá, ke tau fakahā kimui ange ha ʻofa lahi ange kiate ia.¹⁰

ʻOku ou fakatauange te tau feinga maʻu pē ke fakaʻatuʻi mo ongoʻi ngofua ʻa e ngaahi fakakaukau mo e ngaahi ongo pea mo e ngaahi tūkunga ʻo kinautolu ʻoku tau feohí. ʻOua naʻa tau fakamaaʻi pe tukuhifoʻi. Ka, ke tau manavaʻofa mo fakatupu loto lahi. Kuo pau ke tau tokanga ke ʻoua naʻa tau maumauʻi e lotofalala ʻa ha taha ʻi haʻatau lea pe tōʻonga taʻe-tokanga.

ʻOku totonu ke fetākinima ʻa e faʻa fakamolemolé mo e ʻofá. ʻE lava ke hoko ʻi hotau ngaahi fāmilí, pea mo hotau kaungāmeʻá foki ha loto lavea mo ha taʻefelotoi. Ka, ʻoku ʻikai hano fuʻu mahuʻinga ʻoʻona pe ko e hā ʻa e palopalemá. ʻOku ʻikai tonu ke tuku ke ne maumauʻi, ke hōloa, pea fakaiku ʻo ʻauha. ʻOku hanga ʻe he tukuakiʻí ʻo fakaava ʻa e matakafó. Ko e faʻa fakamolemolé pē ʻokú ne fakamoʻuí.

Naʻá ku talanoa mo ha fefine hoihoifua ne toki mālōloó ni atu, ʻi ha ʻaho ʻe taha pea fakaʻohovale ʻene fakamatala mai ʻene ngaahi fakaʻiseʻisá. Naʻá ne fakamatala ki ha meʻa naʻe hoko ʻi he ngaahi taʻu lahi kimuʻá pea naʻe kau ai ha taha faama ko e kaungāʻapi, ne hoko ʻi ha taimi ko ha kaungāmeʻa lelei ka naʻá na fetaʻemahinoʻaki ai mo hono husepānití ʻi ha ngaahi meʻa lahi. Naʻe kole ange ʻe he taha fāmá ʻi ha ʻaho ʻe taha pe ʻe lava ʻo kolosi atu ʻi hono kelekelé ki heʻene fāmá. Naʻe kiʻi taʻofi he taimi ko ʻení ʻene fakamatalá, pea naʻá ne pehē mai ʻi ha leʻo tetetete, “Misa Monisoni, naʻe teʻeki ke u tuku ke kolosi tuʻo taha ʻi homa kelekelé ka naʻá ku fie maʻu ke takai lōloa hake ki hono ʻapí. Naʻá ku hala, pea ʻoku ou fakaʻiseʻisa ai. Kuo mālōlō ia kae pehē ange mai ne u lava ʻo talaange, “Fakamolemole atu.’ Pehē ange mai ne toe maʻu haku faingamālie ke angaʻofa.”

ʻI heʻeku fanongo ki aí, naʻe haʻu ki heʻeku fakakaukaú ha lea fakamamahi ʻa Sione Kilifi Uite: “ʻI he ngaahi lea fakamamahi kotoa ʻa e ʻeleló pe pení, ko e fakamamahi tahá ʻeni: ‘Naʻe mei lava pē ke peheni!’”¹¹ Kāinga, ʻi heʻetau feʻofaʻaki mo fakaʻatuʻi ʻi he ʻofá, te tau hao ai mei he faʻahinga fakaʻiseʻisa peheé.

ʻOku fakahaaʻi ʻa e ʻofá ʻi ha ngaahi founga ʻiloa lahi: ʻi ha malimali, taʻataʻalo, lea ʻofa, pe fakahīkihiki. ʻOku ʻi ai ha founga kehe ʻoku fakapulipuli ange, hangē ko e mahuʻingaʻia ʻi ha ngaahi ʻekitivitī ʻa ha taha, akoʻi ha tefitoʻi moʻoni ʻi he angaʻofa mo e faʻa kātakí, ʻaʻahi ki ha taha ʻoku puke pe nofo maʻu pē ʻi ʻapi. ʻE lava ʻe he ngaahi lea mo e tōʻonga ko ʻení, pea mo ha ngaahi founga lahi kehe, ʻo fakahaaʻi ʻa e ʻofá.

Naʻe tui ʻa Teili Kānani, ko ha taha faʻu tohi mo lea ʻiloa ʻi ʻAmelika, ʻoku ʻi he tangata pe fefine taki taha ʻa e “mālohi ke fakalahi ʻa e fiefia ʻo e māmaní ʻaki haʻane fai ha ngaahi lea siʻi ʻo e fakahoungaʻi moʻoní ki ha taha ʻoku taʻelata pe loto foʻi.” Naʻá ne pehē, “Mahalo ʻe ngalo ʻiate koe ʻapongipongi ʻa e ngaahi lea ʻofa ʻokú ke fai he ʻaho ní, ka ʻe lava ke fakamahuʻingaʻi ia ʻe he taha naʻá ne maʻú ʻi he kotoa ʻene moʻuí.”¹²

ʻOfa ke tau kamata he taimí ni, ʻi he ʻahó ni, ke fakahaaʻi ha ʻofa ki he kotoa ʻo e fānau ʻa e ʻOtuá, tatau ai pē pe ko e kau mēmipa hotau fāmilí, hotau kaungāmeʻá, hotau ngaahi mahení, pe sola fakaʻaufuli. ʻI heʻetau ʻā hake he pongipongi kotoa pē, tau fakapaauʻi ke tau tali ʻaki e ʻofa mo e angaʻofa ha faʻahinga meʻa pē te tau fetaulaki mo ia.

Kāinga, ʻoku mahulu atu e ʻofa ʻa e ʻOtuá kiate kitautolú ʻi he meʻa ʻoku tau mākupusí. Naʻá Ne fekauʻi mai Hono ʻAló tuʻunga ʻi he ʻofa ko ʻení, koeʻuhí ke tau lava ʻo maʻu ʻa e moʻui taʻengatá. ʻI he mahino kiate kitautolu ʻa e meʻaʻofa taʻe-fakatatauá ni, ʻe fakafonu hotau lotó ʻaki e ʻofa ki heʻetau Tamai Taʻengatá, ki hotau Fakamoʻuí, pea mo e faʻahinga kotoa ʻo e tangatá. ʻOku ou fakatauange moʻoni ʻe hoko ʻeni, ʻi he huafa toputapu ʻo Sīsū Kalaisí, ʻēmeni.