Xhud ta’ Alla
Jien nissuġġerixxi li intom ma tibqgħux tħossukom ħatja ta’ xi insuffiċjenza li taħsbu li għandkom meta tiġu biex taqsmu l-evanġelju ma’ ħaddieħor. Pjuttost, jien nitlob “li tieqfu bħala xhieda ta’ Alla.” Din hija xi ħaġa li timmotivakom ferm aktar mill-ħtija.
Ħafna mix-xogħol l-aktar importanti ta’ Alla lanqas biss jiġi nnutat min-nies tad-dinja. Tul is-sitt seklu qabel Kristu, id-dinja laqgħet fi ħdanha ħassieba mill-aktar rispettati bħal Konfuċju fiċ-Ċina u Budda ġewwa l-Indja tal-Lvant, iżda l-qawwa tas-saċerdozju ta’ Alla kienet tinsab f’ Danjel, il-profeta li kien qed jgħix fil-jasar fi żmien is-saltna tas-Sultan Nabukodonosor tal-Babilonja.
Wara li ħassu mħawwad minħabba ħolma li kien ħolom matul il-lejl, is-Sultan Nabukodonosor talab biex il-maġi u s-sħaħar tiegħu jgħidulu x’ kien ħolom kif ukoll ifissrulu l-ħolma tiegħu. Ovvjament, huma ma setgħux jgħidu lis-sultan x’kien ħolom u għalhekk huma pprotestaw. “Ma hemmx bniedem fuq din l-art li għandu l-ħila juri dil-ħaġa u l-ebda sultan ma qatt staqsa ħaġa bħal din.”1 Is-Sultan Nabukodonosor inkorla bil-kbir bil-falliment tagħhom u b’ rabja ddikjara li l-kunsillieri kollha tiegħu kellhom jinqatlu.
Danjel, wieħed min-nies għorrief tas-sultan, talab għall- “ħniena ta’ … Alla … dwar dan il-misteru.”2
Seħħ miraklu. Il-misteru dwar dak li kien ħolom dwaru s-sultan ġie żvelat lil Danjel.
Danjel ittieħed quddiem is-sultan. “Għandek int ħila tgħarrafni l-ħolma li rajt u tfissirhieli?”
Danjel wieġeb:
“La l-għorrief, la l-astroloġi, u lanqas il-maġi m’għandhom ħila jgħidulek xi ħlomt. …
“Iżda hemm Alla fis-sema li jikxef il-misteri, u Huwa jgħarraf lis-sultan Nabukodonosor x’sejjer jiġri fl-aħħar jiem. …
“L-Alla tas-smewwiet,” qal Danjel, “se jqajjem saltna, [ġebla li nqatgħet bla ma messha ħadd, li se ssir muntanja mill-aktar kbira u timla d-dinja kollha,] li ma tinqered qatt … iżda tibqa’ wieqfa għal dejjem.
“… Il-ħolma,” qal Danjel, “hi minnha, u t-tifsira tagħha ta’ min jemminha.”3
Bil-ħolma tiegħu spjegata u mfissra, is-sultan lissen b’ mod ċar, “Alla tiegħek hu tabilħaqq Alla tal-allat u Sid is-slaten.”4
Mill-intervent mirakoluż ta’ Alla lil Danjel ġie żvelat il-futur tal-evanġelju ta’ Ġesù Kristu li kellu jiġi rrestawrat fid-dinja, saltna li se timla kull naħa tad-dinja, “li ma tinqered qatt … iżda tibqa’ wieqfa għal dejjem.”
In-numru tal-membri tal-Knisja fl-aħħar jiem se jkun relattivament wieħed żgħir, kif bassar Nefi, iżda huma se jkunu jinsabu f’ kull naħa tad-dinja, u l-qawwa u l-ordinanzi tas-saċerdozju se jkunu disponibbli għal dawk kollha li jixtiquhom, fejn se jimlew id-dinja kif bassar Danjel.5
Fl-1831 il-Profeta Joseph Smith irċieva din ir-rivelazzjoni: “L-imfietaħ tas-saltna ta’ Alla u l-ġabra ta’ Iżrael mill-erba’ naħat tad-dinja ġew mogħtijin lill-bniedem fid-dinja, u minn hemm l-evanġelju se jinfirex sat-truf id-dinja hekk kif il-ġebla li nqatgħet bla ma messha ħadd se tibqa’ titgerbeb, sakemm eventwalment tispiċċa timla lid-dinja kollha.”6
Responsabbiltà li Għandna Lkoll
Il-ġabra ta’ Iżrael hija miraklu. Hija bħal pażil li kull biċċa finalment se ssib postha qabel iseħħu l-ġrajjiet glorjużi tat-Tieni Miġja. Bl-istess mod kif aħna nafu nitħawdu meta naraw quddiemna muntanja sħiħa magħmula minn biċċiet tal-pażil, nistgħu nimmaġinaw kif setgħu ħassewhom il-Qaddisin tal-ewwel żminijiet meta ġew mitlubin biex ixerrdu l-evanġelju rrestawrat mad-dinja kollha. Iżda huma bdew bil-ħidma, persuna wara persuna, u biċċa mil-pażil wara l-oħra, fejn l-ewwel sabu dawk il-biċċiet kollha li kellhom naħa minnhom dritta u minn hemm bdew jikkwadraw din il-ħidma divina. Ftit ftit, il-ġebla li nqatgħet bla ma messha ħadd bdiet titgerbeb; minn mijiet għal eluf, għal għexieren ta’ eluf u llum miljuni ta’ Qaddisin tal-Aħħar Jiem tal-patt minn kull ġens jinsabu jgħaqqdu flimkien il-biċċiet tal-pażil ta’ din il-ħidma meraviljuża u li tgħaġġbek.
Kull wieħed u waħda minna aħna biċċa mill-pażil, u kull wieħed u waħda minna qed ngħinu biex jitpoġġew f’ posthom biċċiet essenzjali oħra. Intom verament importanti għal din il-kawża mill-aktar kbira. Il-viżjoni tagħna issa hija waħda ċara. Aħna nistgħu naraw il-miraklu jkompli u id il-Mulej tiggwidana hekk kif aħna nkomplu nimlew il-vojt li baqa’. Imbagħad, “il-Kbir Ġehova jgħid il-ħidma ġiet fis-seħħ,”7 u Huwa jerġa’ lura bil-majestà u l-glorja kollha.
Il-President Thomas S. Monson qal: “Issa huwa ż-żmien li l-membri u l-missjunarji jingħaqdu flimkien, sabiex jaħdmu flimkien … ħalli jressqu l-erwieħ għandu. … Huwa se jassistina fil-ħidma tagħna jekk aħna naġixxu bil-fidi waqt li nwettqu l-ħidma Tiegħu.”8
Ir-responsabbiltà mogħtija lilna b’ mod divin li darba kienet fdata biss f’ idejn il-missjunarji full-time issa ġiet fdata f’ idejna lkoll. Ilkoll kemm aħna rridu naqsmu l-evanġelju rrestawrat u, grazzi lill-Mulej, eluf ta’ erwieħ jinsabu jitgħammdu kull ġimgħa. Iżda b’ din il-barka mill-aktar meraviljuża, l-imħabba tagħna lejn ħutna u x-xewqa tagħna li nogħġbu lil Alla timlina b’ ċerta urġenza biex aħna nxerrdu u nsaħħu s-saltna ta’ Alla madwar id-dinja.
Il-Limiti tal-Ħtija
Anke jekk għandkom fikom xewqa kbira li taqsmu l-evanġelju ma’ ħaddieħor, intom tafu li m’intomx kuntenti wisq bl-isforzi tagħkom tal-passat. Intom tafu tħossukom bħal dak il-ħabib li qalli, “Jiena tkellimt mal-membri tal-familja tagħna u mal-ħbieb tagħha dwar il-Knisja, iżda ftit urew interess u ma’ kull persuna li ma bdietx taċċetta l-istedina, aktar ma mmur aktar bdejt inħossha bi tqila. Jiena naf li jeħtieġ nagħmel sforz akbar, iżda nħossni li weħilt u nħoss fija ħtija enormi.”
Ħa nara nistax ngħin.
Il-ħtija tilgħab irwol importanti biex tqajjimna waħda fuq tagħna u nintebħu x’ tibdil jeħtieġ li nagħmlu, iżda hemm limitu kemm tista’ tgħinna l-ħtija.
Il-ħtija hija bħal batterija f’ karozza taħdem bil-fjuwil. Hija tipprovdi d-dawl lill-karozza u tistartja l-magna iżda hi ma tipprovdix il-fjuwil għal vjaġġ twil li jkollna quddiemna. Il-batterija, weħidha, mhux biżżejjed. U lanqas il-ħtija.
Jien nissuġġerixxi li intom ma tibqgħux tħossukom ħatja ta’ xi insuffiċjenza li taħsbu li għandkom meta tiġu biex taqsmu l-evanġelju ma’ ħaddieħor. Minflok, itolbu, kif għallem Alma, biex ikollkom opportunitajiet “li tieqfu bħala xhieda ta’ Alla f’ kull ħin u f’ kollox, u kull fejn tkunu … biex oħrajn jiġu mifdijin minn Alla, u jingħaddu ma’ dawk tal-ewwel resurrezzjoni, sabiex ikollhom il-ħajja eterna.”9 Din hija xi ħaġa li timmotivakom ferm aktar mill-ħtija.
Li nieqfu bħala xhieda ta’ Alla f’ kull ħin u f’ kollox tirrifletti kemm fil-mod li ngħixu kif ukoll bil-mod li bih nitkellmu.
M’ għandkomx għalfejn tistħu meta titkellmu dwar il-fidi tagħkom fi Kristu. Meta quddiemkom tiġikom l-okkażżjoni, tkellmu dwar ħajtu, dwar it-tagħlim Tiegħu u r-rigal inkomparabbli Tiegħu lill-umanità. Aqsmu ma’ ħaddieħor il-veritajiet Tiegħu mill-aktar qawwija kif jinsabu fil-Ktieb ta’ Mormon. Huwa tana din il-wegħda: “Kull min jistqarr quddiem il-bnedmin li hu miegħi, jien ukoll nistqarr li jiena miegħu quddiem Missieri li hu fis-smewwiet.”10 Jiena nwegħidkom li hekk kif intom titolbu ta’ spiss u b’ sinċerità biex ikollkom opportunitajiet biex “tieqfu bħala xhieda ta’ Alla,” dawn l-opportunitajiet jiġu, u dawk li jinsabu jfittxu aktar dawl u għarfien jitfaċċaw quddiemkom. Hekk kif intom twieġbu għas-suġġerimenti spiritwali, l-Ispirtu s-Santu iġorr kliemkom f’ qalb ħaddieħor, u xi darba s-Salvatur jistqarr li Hu magħkom quddiem Missieru.
Sforz Kollettiv
Il-ħidma spiritwali li ngħinu lil xi ħadd jersaq lejn is-saltna ta’ Alla hija sforz kollettiv. Ingaġġaw kemm tistgħu fil-ħidma tagħkom lill-missjunarji u itolbu għall-għajnuna divina. Iżda ftakru, iż-żmien li fih bniedem hu lest biex jikkonverti mhuwiex f’ idejkom.11
Kamla Persand kienet mill-gżira ta’ Mauritius, u kienet qed tattendi l-iskola medika ġewwa Bordeaux, fi Franza, meta aħna ltqajna magħha fi Frar tal-1991. Bħala familja aħna tlabna biex inkunu nistgħu naqsmu l-evanġelju ma’ xi ħadd li kien qed ifittex il-verità, u lilha aħna għallimniha fid-dar tagħna. Kien privileġġ kbir għalija li għammidtha, iżda aħna ma konniex l-akbar influwenza li kellha Kamla biex ingħaqdet mal-Knisja. Il-ħbieb tagħha, il-missjunarji, kif ukoll il-membri tal-familja tagħha kienu għaliha “xhieda ta’ Alla” f’ pajjiżha, u darba waħda ġo Franza, meta kien iż-żmien opportun għal Kamla, hija ddeċidiet li titgħammed. Illum, 25 sena wara, il-barkiet ta’ dik id-deċiżjoni tista’ tarahom madwarha, u binha huwa missjunarju ġewwa l-Madagaskar.
Jekk jogħġobkom tħarsux lejn l-isforzi tagħkom li taqsmu l-imħabba tas-Salvatur ma’ ħaddieħor bħala xi test li jekk tgħaddux jew tfallux jiddependi minn kemm iwieġbu b’ mod pożittiv sħabkom għas-sentimenti tagħkom jew għall-istedina tagħkom li intom tiltaqgħu mal-missjunarji.12 Aħna ma nistgħux niġġudikaw l-isforzi permezz tal-għajnejn mortali tagħna u lanqas ma nistgħu niddeċiedu ż-żmien li fih ħaddieħor ikun lest biex jaċċetta l-istedina tagħna. Meta intom taqsmu l-imħabba tas-Salvatur ma’ ħaddieħor, il-grad tagħkom huwa dejjem A+.
Xi gvernijiet għamlu ċerti restrizzjonijiet fuq il-ħidma tal-missjunarji, fejn wasslu biex il-membri nobbli tagħna qed ikollhom juru kuraġġ akbar biex ikunu “xhieda ta’ Alla f’kull ħin u f’ kull … post.”
Nadezhda minn Moska tqassam regolarment kopji tal-Ktieb ta’ Mormon lil ħaddieħor f’ kaxxa tar-rigali ppakkjata b’ ħafna ħelu madwar il-ktieb. “Jien ngħidilhom,” hija qalet, “li dan huwa l-aktar rigal ħelu li jiena nista’ nagħtihom.”
Ftit wara li tgħammdet fl-Ukrajna, Svetlana ħasset li kellha taqsam l-evanġelju ma’ wieħed raġel li hija ta’ spiss kienet tara fuq ix-xarabank. Meta dan ir-raġel waqaf fejn kellu jieqaf, hija staqsietu, “Tixtieq tkun taf aktar dwar Alla?” Dan ir-raġel wieġeb, “Iva.” Il-missjunarji għallmu lil Viktor u huwa tgħammed. Aktar tard hu u Svetlana ġew issiġillati ġewwa t-Tempju ta’ Freiberg, il-Ġermanja.
Oqgħodu attenti; il-barkiet tagħkom tafu tirċevuhom b’ modi li ma tistennewx.
Seba’ snin ilu, Kathy u jiena ltqajna ma’ Diego Gomez u l-familja meraviljuża tiegħu ġewwa l-Belt ta’ Salt Lake. Huma attendew ġo wieħed mit-tempji fil-jum li nfetaħ għall-pubbliku iżda b’ mod grazzjuż ma aċċettawx l-istedina tagħna li jitgħallmu aktar dwar il-Knisja. Mejju li għadda, jiena rċevejt telefonata mingħand Diego li ssorprendietni. Ċerti avvenimenti f’ ħajtu wassluh biex jinżel għarkupptejh jitlob. Huwa minn jeddu mar ifittex lill-missjunarji, sema’ d-diskussjonijiet u kien lest li jitgħammed. Fil-11 ta’ Ġunju li għadda, jiena nżilt fl-ilmijiet tal-magħmudija flimkien mal-ħabib tiegħi u dixxiplu bħali Diego Gomez. Il-konverżjoni tiegħu ħadet iż-żmien tagħha u waslet bl-għajnuna u s-sapport ta’ ħafna nies li daru lejh biex jgħinuh bħala “xhieda ta’ Alla.”
Stedina liż-Żgħażagħ
Lilkom iż-żgħażagħ u l-adulti żgħażagħ meraviljużi minn madwar id-dinja kollha, jiena nwasslilkom stedina u sfida speċjali biex intom tkunu “xhieda ta’ Alla.” Dawk li jinsabu madwarkom jinsabu lesti għal investigazzjoni spiritwali. Tiftakruha l-pażil? Intom ma tmorrux madwar il-mejda b’ idkom vojta iżda bit-teknoloġija u l-midja soċjali lesti biex jgħinukom. Aħna għandna bżonnkom; il-Mulej jeħtieġ li intom tkun aktar dedikati f’ din il-kawża mill-aktar kbira.
Is-Salvatur qal, “Morru, mela, agħmlu dixxipli mill-ġnus kollha, u għammduhom fl-isem tal-Missier tal-Iben u tal-Ispirtu s-Santu.”13
Mhijiex kumbinazzjoni li intom toqogħdu fl-Afrika; fl-Asja; fl-Ewropa; fl-Amerka ta’ Fuq, fl-Amerka Ċentrali jew fl-Amerka t’ Isfel; fil-Paċifiku; jew f’ xi post ieħor fid-dinja ta’ Alla, għaliex l-evanġelju għandu jżur “kull ġens, razza, ilsien u poplu.”14
“L-Alla tas-smewwiet qajjem saltna, [ġebla li nqatgħet bla ma messha ħadd, li saret muntanja mill-aktar kbira u qed timla d-dinja kollha,] li ma tinqered qatt … iżda tibqa’ wieqfa għal dejjem.
“… Il-ħolma hi minnha, u t-tifsira tagħha ta’ min jemminha.”15
Jiena se nagħlaq bil-kliem mid-Duttrina u Patti: “Itolbu lill-Mulej, sabiex is-saltna tiegħu tinxtered madwar id-dinja, sabiex l-abitanti tagħha jkunu jistgħu jirċevuha, u jkunu mħejjijin għaż-żmien li ġej, li fih Bin il-Bniedem se jinżel mis-smewwiet, imlibbes bid-dija tal-glorja tiegħu, biex jiltaqa’ mas-saltna ta’ Alla … fid-dinja.”16 f’ isem Ġesù Kristu, amen.