Is-Sagrament Jista’ Jgħinna Nitqaddsu
Ikkunsidraw ħames modi kif aħna nistgħu nkabbru l-impatt u l-qawwa tal-parteċipazzjoni regolari tagħna fl-ordinanza sagra tas-sagrament.
Waħda mit-tifkiriet bikrin ta’ tfuliti teħodni lura fil-laqgħat tas-sagrament ta’ fejn aħna konna noqogħdu ġewwa Warrnambool, Australia. Fil-fergħa tagħna konna nkunu bejn 10 u 15-il persuna, u missieri, wieħed mit-tlett irġiel li kienu jħaddnu s-saċerdozju, spiss kien ikollu l-opportunità li jbierek is-sagrament. Niftakar sew kif kont inħossni hekk kif b’ umiltà u bir-reqqa kollha huwa kien jaqra t-talb tas-sagrament. Ħafna drabi kont inħoss leħnu jirtriegħed hekk kif hu kien iħoss fih l-Ispirtu. Numru ta’ drabi kien ikollu jieqaf ftit biex ikun jista’ jikkontrolla l-emozzjonijiet tiegħu qabel ikompli bit-talba.
Bħala tifel ċkejken ta’ ħames snin, ma stajtx nifhem it-tifsira sħiħa ta’ dak li kien jingħad jew jitwettaq; madankollu, kont naf li kienet tkun qed isseħħ xi ħaġa speċjali. Stajt inħoss l-influwenza kalma u konfortanti tal-Ispirtu s-Santu hekk kif missieri kien ikun qed jikkontempla dwar l-imħabba tas-Salvatur għalina.
Is-Salvatur għallem: “Hekk għandkom dejjem tagħmlu intom li tindmu u titgħammdu f’ ismi; u għandkom tagħmlu dan b’ tifkira ta’ demmi, li jien xerridt għalikom, sabiex intom tixhdu mal-Missier li dejjem se tiftakru fija. U jekk dejjem tiftakru fija intom ikollkom l-Ispirtu tiegħi magħkom” (3 Nephi 18:11).
Nistieden lilna lkoll sabiex nikkunsidraw ħames modi kif aħna nistgħu nkabbru l-impatt u l-qawwa tal-parteċipazzjoni regolari tagħna fl-ordinanza sagra tas-sagrament, ordinanza li tista’ tgħinna nitqaddsu.
1. Inħejju minn Qabel
Nistgħu nibdew it-tħejjija tagħna għas-sagrament minn ħin ferm qabel ma tibda il-laqgħa tas-sagrament. Is-Sibt huwa żmien tajjeb biex fih aħna nikkontemplaw dwar il-progress u t-tħejjija spiritwali tagħna.
Il-mortalità hija rigal essenzjali fil-vjaġġ tagħna biex insiru bħal Missierna tas-Smewwiet. Hija ħaġa neċessarja li l-vjaġġ tagħna jinkludi fih għadd ta’ sfidi li jipprovdulna opportunitajiet biex aħna ninbidlu u nikbru. Is-Sultan Benjamin għallem li “il-bniedem naturali huwa għadu ta’ Alla, … u hekk se jibqa’, għal dejjem ta’ dejjem, sakemm hu ma jismax mill-istigazzjoni tal-Ispirtu s-Santu, u jinża’ minn fuqu l-bniedem naturali u jsir qaddis permezz tal-att tal-fidwa ta’ Kristu l-Mulej” (Mosiah 3:19). Il-parteċipazzjoni tagħna fl-ordinanza tas-sagrament tipprovdilna opportunità biex aħna noffru kompletament ruħna u qalbna lil Alla.
Fit-tħejjija tagħna, qalbna timtela bl-umiltà hekk kif aħna nesprimu l-gratitudni tagħna għall-Att tal-Fidwa ta’ Kristu, nindmu mill-iżbalji u n-nuqqasijiet tagħna, u nitolbu għall-għajnuna tal-Missier fil-vjaġġ kontinwu tagħna biex insiru nixbhuh aktar. Imbagħad aħna nkunu nistgħu nħarsu ‘l quddiem għall-opportunità li jipprovdilna s-sagrament biex niftakru fis-sagrifiċċju Tiegħu u nġeddu l-impenn tagħna lejn il-patti kollha li għamilna.
2. Naslu Kmieni
L-esperjenza tagħna tas-sagrament tista’ tikber meta aħna naslu ħin mhux ħażin qabel tibda l-laqgħa u noqogħdu nixtarru ftit hekk kif tkun qed tindaqq il-mużika tal-ftuħ.
Il-President Boyd K. Packer għallem: “Il-mużika tal-ftuħ, meta tindaqq b’ qima, hija ta’ nutriment għall-ispirtu. Hi tistieden l-ispirazzjoni.”1 “Dan mhux ħin,” spjega l-President Russell M. Nelson, “biex fih noqogħdu niddiskutu jew ngħaddu l-messaġġi iżda huwa mument li fih, bl-għajnuna tat-talb, aħna nimmeditaw hekk kif il-mexxejja u l-membri jitħejjew spiritwalment għas-sagrament.”2
3. Inkantaw u Nitgħallmu mill-Kliem tal-Innu tas-Sagrament
L-innu tas-sagrament speċjalment huwa parti importanti mill-esperjenza tagħna tas-sagrament. Il-mużika televa ħsibijietna u s-sentimenti tagħna. L-innu tas-sagrament iħalli fuqna influwenza akbar meta aħna niffokaw fuq il-kliem u d-duttrina importanti li nistgħu nitgħallmu minnu. Aħna nitgħallmu ħafna minn kliem bħal “imbenġel, imkisser, imtertaq għalina,”3 “Ejjew niftakru u niżguraw li qalbna u jdejna huma ndaf u safja,”4 u “Fejn l-imħabba, il-ġustizzja, il-ħniena jiltaqgħu flimkien f’ armonija divina!”5
Hekk kif inkantaw bi tħejjija biex nieħdu sehem fl-emblemi tas-sagrament, il-kliem jista’ jsir parti mill-impenn tal-patt tagħna. Ikkunsidraw, per eżempju: “Inħobbuk, Mulej; qalbna mimlija. Aħna nimxu fit-triq magħżula tiegħek.”6
4. Nipparteċipaw Spiritwalment fit-Talb tas-Sagrament (ara Moroni 4–5)
Minflok ma’ nisimgħu l-kliem b’ attitudni li aħna dal-kliem diġà smajnieh bosta drabi qabel, aħna nistgħu verament nitgħallmu u nħossu fina ċerti sentimenti qawwija jekk aħna nipparteċipaw spiritwalment billi nixtarru sew l-impenni tagħna u l-barkiet marbutin magħhom li huma inklużi f’ dan it-talb sagru.
Il-ħobż u l-ilma jitbierku u jitqaddsu għal ruħna. Huma jfakkruna fis-sagrifiċċju tas-Salvatur u li Hu jista’ jgħinna verament nitqaddsu.
It-talb jispjega li aħna nieklu mill-ħobż b’ tifkira tal-ġisem tal-Iben, prezz li Huwa offra biex kulħadd ikun jista’ jikkwalifika għall-qawmien mill-imwiet, u aħna nixorbu mill-ilma b’ tifkira tad-demm tal-Iben, li Huwa xerred minn jeddu sabiex aħna nkunu nistgħu niġu mifdijin, dejjem jekk aħna nindmu.
It-talb jintroduċi l-patti bil-frażi “li huma lesti”(Moroni 4:3). Din il-frażi fiha qawwa u potenzjal kbir għalina. Lesti aħna li nservu u nipparteċipaw? Lesti aħna li ninbidlu? Lesti aħna li nindirizzaw id-dgħjufijiet tagħna? Lesti aħna li nilħqu u nbierku lil ħaddieħor? Lesti aħna li nafdaw fis-Salvatur?
Hekk kif jiġu mlissna l-wegħdiet u hekk kif aħna nieħdu sehem mill-ħobż u l-ilma, aħna nikkonfermaw f’ qalbna li aħna lesti li:
-
Nieħdu fuqna isem Ġesù Kristu.
-
Nagħmlu l-almu tagħna biex inżommu l-kmandamenti kollha Tiegħu.
-
Dejjem Niftakru Fih
It-talb jikkonkludi b’ dil-istedina u l-wegħda sublimi: “Li huma jkollna dejjem magħhom l-Ispirtu Tiegħu” (Moroni 4:3).
Pawlu kiteb, “Il-frott tal-Ispirtu huma l-imħabba, l-hena, is-sliem, is-sabar, il-ħniena, it-tjieba, il-fidi, il-manswetudni u t-temperament” (Galatin 5:22–23). Jekk aħna nżommu l-patti tagħna hemm jistennewna għadd ta’ barkiet u rigali mill-isbaħ.
5. Nixtarru u Niftakru Fih Hekk Kif Jitqassmu l-Emblemi tas-Sagrament
Il-mumenti ta’ qima li fih dawk li jħaddnu s-saċerdozju iqassmu s-sagrament jista’ jsir għalina ħin mill-aktar sagru.
Hekk kif jitqassam il-ħobż, aħna nistgħu nikkontemplaw li fl-akbar att ta’ mħabba li qatt twettaq għalina, is-Salvatur ħa “fuqu l-mewt, sabiex ikun jista’ jkisser il-ktajjen tal-mewt li jorbtu lill-poplu tiegħu” (Alma 7:12).
Nistgħu niftaktu fil-barkiet glorjużi tar-Reżurezzjoni li “għandu jiksibhom kulħadd, … kemm min hu ilsir kif ukoll min hu ħieles, kemm l-irġiel kif ukoll in-nisa, kemm il-ħżiena kif ukoll it-twajbin; u l-ebda xagħra waħda minn rashom m’hi se tintilef; iżda kollox se jiġi rrestawrat għall-forma perfetta tiegħu” (Alma 11:44).
Hekk kif jitqassam l-ilma, aħna nistgħu niftakru fit-talba li għamel f’ isimna s-Salvatur:
“Araw, jiena, Alla, sofrejt dan kollu għall-bnedmin kollha, ħalli huma ma jsofrux, jekk huma jindmu; …
“Liema sofferenza wasslet biex jiena, l-istess Alla, l-akbar wieħed fost kulħadd, nirtriegħed minħabba l-uġigħ, u nxerred demmi mill-pori kollha tiegħi u nsofri kemm fil-ġisem kif ukoll fl-ispirtu—u ma nixrobx mill-kalċi għal xejn” (D&C 19:16, 18).
Niftakru li Huwa “ħa fuqu s-sofferenza tagħna, sabiex huwa jimtela bil-ħniena, skont il-ġisem, ħalli jkun jaf skont il-ġisem kif jista’ jgħin lin-nies tiegħu skont is-sofferenza tagħhom” (Alma 7:12).
Hekk kif aħna nikkunsidraw l-esperjenza tagħna tas-sagrament, aħna nafu nistaqsu lilna nfusna:
-
Din il-ġimgħa jien x’ nista’ nagħmel biex nitħejja aħjar għas-sagrament?
-
Nista’ nikkontribwixxi aktar għall-qima u r-rivelazzjoni li tista’ takkumpajna l-bidu tal-laqgħa sagramentali?
-
X’ duttrina ġiet mgħallma fl-innu tas-sagrament?
-
Xi smajt u x’ ħassejt jiena hekk kif beda jingħad it-talb tas-sagrament?
-
Fuq xiex kont qed naħseb meta beda jitqassam is-sagrament?
Il-Presbiteru David A. Bednar għallem: “L-ordinanza tas-sagrament hija stedina mqaddsa u ripetuta biex aħna sinċerament nindmu u niġġeddu spiritwalment. L-att per se, li nieħdu sehem fis-sagrament, fih innifsu ma jaħfrilniex dnubietna. Iżda hekk kif aħna kuxjenzjożament nitħejjew u nieħdu sehem f’ din l-ordinanza mqaddsa b’ qalb maqsuma u bi spirtu sogħbien, imbagħad aħna ngawdu mill-wegħda li aħna jista’ jkollna dejjem magħna l-Ispirtu tal-Mulej. U permezz tal-qawwa li tqaddes tal-Ispirtu s-Santu bħala s-sieħeb kostanti tagħna, aħna nistgħu niksbu dejjem maħfra ta’ dnubietna.”7
Jiena nixhed dwar in-numru kbir ta’ barkiet li huma disponibbli għalina hekk kif aħna nkabbru t-tħejjija tagħna u l-parteċipazzjoni spiritwali tagħna fl-ordinanza tas-sagrament. Jiena nixhed ukoll li dawn il-barkiet huma disponibbli għalina lkoll minħabba l-imħabba ta’ Missierna tas-Smewwiet u s-sagrifiċċju infinit tat-tpattija ta’ Ibnu l-Għażiż, Ġesù Kristu. Fl-isem sagru ta’ Ġesù Kistu, amen.