“Ejjew, Imxu Warajja” billi Tipprattikaw l-Imħabba u s-Servizz Kristjan

Elie Wiesel, li ġie mogħti l-premju Nobel, kien jinsab rikoverat fl-isptar wara operazzjoni tal-qalb meta mar iżuru n-neputi tiegħu ta’ ħames snin. Hekk kif it-tifel ċkejken ħares f’ għajnejn nannuh, huwa seta’ jinnota li kien qed ibati. “Nannu,” staqsieh, “li kieku nħobbok aktar milli nħobbok, inti tbati anqas?”¹ Illum jien nistaqsi mistoqsija simili: “Li kieku aħna nħobbu aktar lis-Salvatur, aħna nsofru anqas?”

Meta s-Salvatur sejjaħ lid-dixxipli Tiegħu biex jimxu warajh, huma kienu qed jgħixu l-liġi ta’ Mosè, li tinkludi “Għajn għal għajn u sinna b’sinna,”² iżda s-Salvatur ġie biex iġib fis-seħħ l-Att tal-Fidwa Tiegħu. Huwa għallem duttrina ġdida: “Ħobbu lill-għedewwa tagħkom, u itolbu għal dawk li jippersegwitawkom.”³

Id-dixxipli ġew mgħallmin biex minflok ma jimxu wara l-għemejjel tal-bniedem naturali huma jimxu wara l-imħabba li għallem is-Salvatur billi post it-tilwim jittieħed mill-maħfra, mit-tjubija u mill-kompassjoni. Il-“kmandament ġdid ... ħobbu lil xulxin”⁴ ma kienx dejjem faċli biex jobduh. Meta d-dixxipli kienu qed jikkonfondu jekk kellhomx jitħalltu mal-midinbin u ma’ ċerta klassi ta’ nies, bil-paċenzja kollha s-Salvatur għallimhom, “Kull ma għamiltu mal-iżgħar fost ħuti, għamiltuh miegħi.”⁵ Jew, kif spjega wieħed profeta fil-Ktieb ta’ Mormon, “Meta tkun ta’ servizz għal għajrek inti tkun ta’ servizz għal Alla tiegħek.”⁶

Bħala d-dixxipli tal-aħħar jiem tas-Salvatur, aħna nersqu lejh billi nħobbu u naqdu lil ulied Alla. Hekk kif nagħmlu dan, jaf li xorta ma jirnexxilniex nevitaw it-tribulazzjoni, it-tbatija, u s-sofferenza fil-ġisem, iżda żgur li spiritwalment insofru anqas. Anke qalb l-isfidi aħna nistgħu nesperjenzaw il-ferħ u l-paċi.

L-imħabba u s-servizz Kristjan tagħna naturalment jibdew ġewwa darna. Intom il-ġenituri ġejtu msejħin biex b’ imħabba tkunu għalliema u missjunarji fost it-tfal u ż-żgħażagħ tagħkom. Huma l-investigaturi tagħkom. Tagħkom hi r-responsabbiltà li tgħinuhom jikkonvertu. Fil-verità, ilkoll kemm aħna qed infittxu li nikkonvertu—li jfisser li nkunu mimlijin bl-imħabba tas-Salvatur.

Hekk kif aħna nimxu wara Ġesù Kristu, l-imħabba Tiegħu timmotivana biex nissapportjaw lil xulxin fil-vjaġġ mortali tagħna. Dan ma nistgħux nagħmluh weħidna.⁷ Intom diġà smajtuni qabel naqsam magħkom il-proverbju Kwakkru: Inti għolli lili u jiena ngħolli lilek, u hekk nibqgħu telgħin ‘il fuq flimkien lejn l-eternità.⁸ Bħala dixxipli, aħna nibdew nagħmlu dan meta nitgħammdu, fejn nuru r-rieda tagħna li “nġorru t-tagħbija ta’ xulxin, sabiex tkun ħafifa.”⁹

“Li ngħallmu lil xulxin id-duttrina tas-saltna”¹⁰ huwa mod kif nistgħu nħobbu u naqdu lil xulxin. Aħna l-ġenituri u n-nanniet għandna ħabta ngergru dwar l-istat ta’ miżerja tad-dinja—li l-iskejjel mhux qed jgħallmu l-karattru morali. Iżda hemm ħafna x’ aħna nistgħu nagħmlu. Aħna nistgħu nieħdu vantaġġ mill-mumenti ta’ tagħlim fil-familji tagħna—u dan ifisser bħalissa. Tħalluhomx jaħarbulkom. Meta jkollkom opportunità li taqsmu il-ħsibijiet tagħkom dwar l-evanġelju u l-lezzjonijiet tal-ħajja, ieqfu minn dak li tkunu qed tagħmlu, poġġu bilqiegħda u tkellmu ma’ wliedkom u n-neputijiet tagħkom.

M’għandniex għalfejn noqogħdu ninkwetaw li aħna m’aħniex għalliema tal-evanġelju mħarrġin b’ mod professjonali. L-ebda klassi jew manwal ta’ taħriġ m’huma ta’ għajnuna daqs meta aħna nistudjaw personalment l-iskrittura tagħna, nitolbu, nixtarru u nfittxu l-gwida tal-Ispirtu s-Santu. L-Ispirtu żgur li jmexxikom f’ dak li tagħmlu. Jiena nwegħidkom: is-sejħa tagħkom bħala ġenituri tinkludi d-don li ngħallmu b’ modi li huma l-aqwa modi għalikom u għal uliedkom. Ftakru, il-qawwa ta’ Alla biex jinfluwenzana fit-tajjeb hija l-imħabba Tiegħu. “Aħna nħobbu, għax hu ħabbna l-ewwel.”¹¹

Intom iż-żgħażagħ intom uħud mill-aktar għalliema tal-evanġelju effettivi li għandna. Intom tiġu l-knisja biex titgħallmu ħalli tkunu tistgħu tmorru d-dar biex tgħallmu u taqdu lill-familja tagħkom, lill-ġirien tagħkom u lil sħabkom. Tibżgħux. Afdaw fil-fidi tagħkom u ixhdu dwar dak li tafu li hu veru. Aħsbu ftit kif il-missjunarji full-time jikbru fit-testimonjanza tagħhom għaliex huma jinsabu jgħixu b’ fedeltà ħajja kkonsagrata—billi jużaw il-ħin u t-talenti tagħhom u jaqsmu t-testimonjanza tagħhom biex jaqdu u jbierku lil ħaddieħor. Hekk kif intom taqsmu t-testimonjanza tagħkom tal-evanġelju, il-fidi tagħkom tikber u l-kunfidenza tagħkom tiffjorixxi!

Servizz Kristjan li aħna nagħtu li jħalli l-aktar impatt jingħata meta flimkien nistudjaw l-iskrittura bħala familja, nitolbu bħala familja u meta nżommu l-laqgħat tal-kunsill tal-familja. Għal aktar minn mitt sena, il-mexxejja tal-Knisja talbuna biex kull ġimgħa niddedikaw ħin ‘il bogħod minn kull distrazzjoni. Iżda ħafna minna għadna mhux qed ingawdu minn dawn il-barkiet. Il-lejla d-dar mal-familja mhijiex xi lekċer mill-Mamà u l-Papà. Hija ħin fil-familja tagħna fejn naqsmu ċerti kunċetti u esperjenzi spiritwali sempliċi, fejn ngħinu lil uliedna jitgħallmu ijħobbu lil xulxin u jaqsmu li għandhom mal-oħrajn, fejn aħna nieħdu gost flimkien, naqsmu t-testimonjanza tagħna ma’ xulxin u nikbru u navvanzaw flimkien. Hekk kif kull ġimgħa aħna nżommu l-lejla d-dar mal-familja, l-imħabba tagħna lejn xulxin tikber aktar b’ saħħitha u aħna nsofru ferm anqas.

Ejjew niftakru, l-aktar ħidma importanti li nistgħu nwettqu fil-familji tagħna isseħħ permezz tal-qawwa tal-Ispirtu s-Santu. Kull darba li aħna ngħollu leħinna minħabba r-rabja, l-Ispirtu ma jibqax jgħammar aktar fir-relazzjonijiet u l-familji tagħna. Meta aħna nitkellmu b’ imħabba, l-Ispirtu jkun jista’ jgħammar fostna. Ejjew niftakru li wliedna u n-neputijiet tagħna jkejlu l-imħabba tagħna skont kemm aħna niddedikaw ħin għalihom. Fuq kollox, titilfux il-paċenzja u taqtgħux qalbkom!

L-iskrittura tgħidilna li meta xi wħud mill-ulied spirti ta’ Missierna tas-Smewwiet għażlu li ma jimxux wara l-pjan Tiegħu, is-smewwiet bkew.¹² Hawn ġenituri li ħabbew u għallmu lil uliedhom li jispiċċaw jibku meta t-tfal tagħhom jikbru u jagħżlu li ma jimxux wara l-pjan tal-Mulej. X’ jistgħu jagħmlu l-ġenituri? Aħna ma nistgħux nitolbu li ħaddieħor jiġi miċħud mill-għażla ħielsa tiegħu jew tagħha. Ftakru f’ missier l-iben il-ħali, li bil-paċenzja kollha stenna biex ibnu “jiġi f’ tiegħu,” waqt li hu baqa’ jistennieh. U “kif kien għadu fil-bogħod,” huwa ġera lejh.¹³ Aħna nistgħu nitolbu biex niġu ggwidati dwar meta għandna nitkellmu, x’ għandna ngħidu, u iva, xi drabi, meta għandna nisktu. Ftakru, uliedna u l-membri tal-familja tagħna diġà għażlu li jimxu wara s-Salvatur fir-renju primortali tagħhom. Xi kultant iridu jkunu biss l-esperjenzi tagħhom fil-ħajja biex huma jerġgħu jħossu ġewwa fihom għal darb’oħra dawk is-sentimenti sagri. Ultimament, iridu jkunu huma stess li jagħzlu li jħobbu u nimxu wara l-Mulej.

Hemm mod ieħor kif id-dixxipli jistgħu juru l-imħabba tagħhom għas-Salvatur. Illum se nfakkar lil dawk kollha li jinsabu jaqdu lill-Mulej billi jieħdu ħsieb ħaddieħor. Kemm iħobbkom il-Mulej! Permezz tas-servizz sieket tagħkom li ftit huma li jinnutawh, intom tinsabu timxu wara Dak li wiegħed, “Missierek, li jara dak li hu moħbi, iroddlok hu.”¹⁴

Jiġi f’ moħħi wieħed ġar tiegħi li martu kienet tbati bil-marda tal-Alzheimer. Kull nhar ta’ Ħadd huwa kien jgħinna tilbes għal-laqgħat tal-Knisja, jagħmillha xagħarha u l-irtokk, u saħansitra jlibbsilha l-imsielet tagħha. Fis-servizz tiegħu, huwa kien ta’ eżempju għal kull raġel u mara fil-qasam tagħna—fil-fatt, għad-dinja kollha. Darba waħda martu qaltlu, “Jiena nixtieq nerġa’ nara r-raġel tiegħi u nkun miegħu għal dejjem.”

Huwa wieġeb, “Jiena r-raġel tiegħek.”

U bil-ħlewwa kollha weġbitu, “Tajjeb ħafna!”

Ma nistax nitkellem dwar li għandna nieħdu ħsieb l-oħrajn mingħajr ma nagħraf lil dik li ilha tieħu ħsiebi b’ mod speċjali ħajti kollha—id-dixxiplu speċjali tas-Salvatur li tinsab taqdi lili—is-sieħba eterna tiegħi, Mary. Hija ddedikat l-enerġija kollha tagħha biex b’ kompassjoni kbira tieħu ħsiebi u tħobbni. Idejha jirriflettu l-għafsa ġentili Tiegħu, li dejjem issostnini . Jiena żgur li ma kontx inkun hawn mingħajrha. U bl-għajnuna tagħha, jiena nista’ nibqa’ nikkumbatti sal-aħħar u nerġa’ nkun magħha fil-ħajja eterna.

Jekk intom verament tinsabu ssofru, kemm jekk qed tagħmlu dan weħdikom kif ukoll ma’ ħaddieħor, nitlobkom bil-ħerqa biex tħallu lis-Salvatur jieħu ħsiebkom Hu. Afdaw fl-imħabba abundanti Tiegħu.¹⁵ Aċċettaw l-assigurazzjoni li tagħkom. “Ma nħallikomx iltiema: Nerġa’ niġi għandkom,” Huwa wiegħed.¹⁶

Ħuti, jekk għadna ma għamilniex dan, ejjew ninklinaw ruħna aktar lejn il-maħfra, it-tjubija u l-imħabba. Ejjew nirrinunzjaw il-gwerra li ħafna drabi tkun għaddejja f’ qalb il-bniedem naturali u niddikjaraw l-imħabba u l-paċi ta’ Kristu.¹⁷

Jekk “intom ksibtu l-għarfien u l-glorja u t-tjubija ta’ Alla”¹⁸ kif ukoll “l-att tal-fidwa li ġie mħejji mis-sisien tad-dinja,”¹⁹ “intom lanqas tiġikom f’ moħħkom li tweġġgħu lil xulxin, iżda li tgħixu ħajja ta’ paċi. … U lanqas tiġikom f’ moħħkom li taraw lil uliedkom … jiksru l-liġijiet ta’ Alla u jiġġieldu u jitlewmu bejniethom. … Iżda tgħallmuhom … iħobbu lil xulxin, u jaqdu lil xulxin.”²⁰

Ftit qabel ma ġie msallab, is-Salvatur għallem lill-Appostli Tiegħu: “Nagħtikom kmandament ġdid, li tħobbu lil xulxin. Bħalma ħabbejtkom jien, hekk ukoll ħobbu intom lil xulxin”²¹ u “Jekk tħobbuni, ħarsu l-kmandamenti tiegħi.”²²

Jiena nixhed li l-unika attitudni vera tas-Salvatur lejna hija dik ta’ dirgħajh miftuħin beraħ għalina kif jidher fl-istatwa ta’ Thorvaldsen Christus. Huwa jkompli jistedinna b’ dirgħajh miftuħin,²³ , “Ejjew, imxu warajja.” Aħna nimxu warajh billi nħobbu u naqdu lil xulxin u nżommu l-kmandamenti Tiegħu.

Jiena naqsam ix-xhieda speċjali tiegħi li Huwa jgħix u jħobbna b’ imħabba perfetta. Din hi l-Knisja Tiegħu. Thomas S. Monson huwa l-profeta Tiegħu fid-dinja llum. Li aħna nħobbu aktar lil Missierna tas-Smewwiet u lil Ibnu, u li nsofru anqas, hija t-talba tiegħi. F’ isem Ġesù Kristu, amen.