Tuku ke Tau Vilitaki Atu

Siʻoku kāinga ʻofeina, ʻi heʻetau aʻu mai ki he fakaʻosinga ʻo e konifelenisi fakahisitolia ko ʻení, ʻoku ou kau fakataha mo kimoutolu he fakamālō ki he ʻEikí koeʻuhí ko ʻEne tatakí mo e ivi tākiekina fakalaumālié. Kuo fakaʻofoʻofa mo langaki moʻui e hivá. Kuo ʻikai ngata pē he langaki moʻui ʻa e ngaahi pōpoakí, ka kuo liliu moʻui foki!

Ne tau hikinimaʻi ʻi he fakataha mamalú, ʻa e Kau Palesitenisī ʻUluaki foʻoú. Kuo fokotuʻu ha ongo tangata maʻongoʻonga ki he Kōlomu ʻo e Kau ʻAposetolo ʻe Toko Hongofulu Mā Uá. Kuo uiuiʻi foki mo ha Kau Fitungofulu Taki Māʻolunga foʻou ʻe toko valu.

ʻOku hanga ʻe ha foʻi himi manakoa ʻo fakamāʻopoʻopo mai ʻetau fakapapau, tukupā mo e tufakanga foʻou ke tau hoko atu ki aí:

ʻOku ou tapou atu ke mou toutou ako e ngaahi pōpoaki ʻo e konifelenisi ko ʻení—pe maʻu pē—lolotonga e māhina ʻe ono ka hokó. Fekumi fakamātoato ki ha ngaahi founga ke fakaʻaongaʻi ai e ngaahi pōpoakí ni ʻi hoʻomou efiafi fakafāmili ʻi ʻapí, ʻi hoʻomou akoʻi e ongoongoleleí, ʻi hoʻomou fetalanoaʻaki mo e fāmilí mo e kaungāmeʻá pea mo hoʻomou talanoa mo kinautolu ʻoku ʻikai kau mai ki heʻetau tuí. ʻOku tokolahi ha kakai lelei te nau tali e ngaahi moʻoni ne akoʻi he konifelenisí ni he taimi ʻoku akoʻi ai ʻi he ʻofá. Pea ʻe toe fakalahi ange ai hoʻomou holi ke talangofuá, ʻi hoʻomou manatua mo fakalaulauloto ki he meʻa kuo mou ongoʻi he ongo ʻaho ʻe ua ne toki ʻosí.

ʻOku fakaʻilongaʻi ʻe he konifelenisi lahí ni ha kamataʻanga ʻo ha ʻēpoki foʻou ʻo e ngāue fakaetauhí. Kuo fai ʻe hhe ʻEikí ha ngaahi liliu mahuʻinga ki he founga ʻetau fetauhiʻakí. ʻE fetauhiʻaki ʻa e kāingá—ʻa e matuʻotuʻa mo e talavou—ʻi he founga foʻou mo māʻoniʻoni ange. ʻE fakamālohia e kōlomu kaumātuʻá ke faitāpuekina e moʻui ʻa e kakai tangata, fefine mo e fānau ʻi he funga ʻo e māmaní. ʻE hokohoko atu e ngāue fakatauhi ʻa e kau Fineʻofá ʻi heʻenau founga makehe mo ʻofá, pea ʻoatu e ngaahi faingamālie ko iá ki he kau finemuí ke nau kau fakataha ʻo ka vahe ange.

ʻOku faingofua mo fakamātoato ʻetau pōpoaki ki he māmaní: ʻoku tau fakaafeʻi e fānau kotoa ʻa e ʻOtuá he ongo tafaʻaki ʻo e veilí ke nau haʻu ki honau Fakamoʻuí, maʻu e ngaahi tāpuaki ʻo e temipale māʻoniʻoní, maʻu ha fiefia ʻoku tuʻuloá pea moʻui taau ke maʻu e moʻui taʻengatá.²

ʻOku fie maʻu ʻe he hakeakiʻí ʻa e moʻui anganofo kakato he taimí ni ki he ngaahi fuakava ʻoku tau faí, kae pehē ki he ngaahi ouau ʻoku tau maʻu ʻi he fale ʻo e ʻEikí. ʻI he taimi ní, ʻoku ʻi ai hatau temipale ʻe 159 ʻoku lolotonga ngāue, pea kei langa mo ha niʻihi. ʻOku mau fakaʻamu ke ʻomi e temipalé ke ofi ange ki he kāingalotu tupu tokolahi ʻo e Siasí. ʻOku mau fiefia ai ke fanongonongo atu he taimí ni ha palani ke langa ha toe temipale ʻe fitu. ʻE tuʻu e ngaahi temipale ko iá ʻi he ngaahi feituʻu ko ʻení: Salta, Argentina; Bengaluru, India; Managua, Nicaragua; Cagayan de Oro, Philippines; Layton, Utah; Richmond, Virginia; pea mo ha kolo lahi ʻoku teʻeki ai fakapapauʻi ʻi Lūsia.

ʻE kāinga ʻofeina, mahalo he ʻikai hanga ʻe hono langa ʻo e ngaahi temipale ko ʻení ʻo liliu hoʻo moʻuí, ka kuo pau ke liliu ia ho taimi ʻi he loto temipalé. ʻI he laumālie ko iá, ʻoku ou tāpuakiʻi kimoutolu ke mou ʻiloʻi e ngaahi meʻa te mou lava ʻo tuku ki he tafaʻakí kae lava ke mou fakaʻaongaʻi ha taimi lahi ange ʻi he temipalé. ʻOku ou tāpuakiʻi kimoutolu ke ʻi homou ʻapí ha uouangataha mo e ʻofa ʻoku lahi angé, pea ke mou maʻu ha holi lahi ange ke tokangaʻi hoʻomou ngaahi fetuʻutaki fakafāmili taʻengatá. ʻOku ou tāpuakiʻi kimoutolu ʻaki ha tui lahi ange ki he ʻEiki ko Sīsū Kalaisí, pea mo ha ivi lahi ange ke muimui kiate Ia, ko ʻEne kau ākonga moʻoni kimoutolu.

ʻOku ou tāpuakiʻi kimoutolu ke hiki hake homou leʻó ʻo fakamoʻoni, ʻo hangē ko ia ʻoku ou faí, ʻoku tau kau ki he ngāue ʻa e ʻOtua Māfimafí! Ko e Kalaisí ʻa Sīsū. Ko Hono Siasí ʻeni, pea ʻokú Ne tataki ia ʻo fakafou ʻi Heʻene kau tamaioʻeiki kuo paní. Ko ʻeku fakamoʻoní ia, fakataha mo ʻeku ʻofa kiate kimoutolu takitaha, ʻi he huafa toputapu ʻo Sīsū Kalaisí, ʻēmeni.