Be Mifala I No Lisin long Olgeta
Ol kavenan mo odinens blong yumi, oli poenem yumi i go, mo i helpem yumi blong oltaem tingbaot we yumi joen long Lod taem yumi stap progres folem kavenan rod ia.
Waef blong mi, Susan, ol trifala boe blong mitufala mo waef blong olgeta, evri apupikinini blong mitufala, mo Elda Quentin L. Cook, fren we i stap sidaon kolosap long mi long Kworom blong Olgeta Twelef Aposol blong kolosap 15 yia, evriwan bae oli talem se, i tru se mi mi no singsing gud. Be nating we mi no gat gud voes, mi laekem blong singsing ol hym blong Restoresen. Kombaen toktok blong insperesen mo ol naes melodi i helpem mi blong lanem ol stamba prinsipol blong gospel mo i tajem sol blong mi.
Wan hym we i bin blesem laef blong mi, long plante gud wei, hem i: “Yumi Mas Gohed.” I no longtaem i pas, mi bin stap tingting hevi mo stap lanem abaot wan sentens long kores blong hym ia. “Taem ol man blong sin oli tok jes talem se Papa God nomo mi mas obei.”1
Mifala I No Lisin.
Taem mi stap singsing “Yumi mas Gohed,” plante taem mi tingting long ol pipol long visen blong Lihae, we oli stap wokbaot i go fored long rod ia we i go long tri blong laef, we oli no hang nomo2 be oli gohed blong holemtaet gud aean rel ia, kasem taem we oli go kasem en mo oli foldaon, mo oli tekem mo kakae frut blong tri ia.”3 Lihae i tokbaot plante pipol we oli bin stap long bigfala bilding ia we i gat plante rum long hem, we ol pipol ia oli bin stap poenem “fingga long olgeta we oli stap tekem mo kakae frut.”4 Ansa blong hem long ol man blong jik mo ol swea, i bigwan mo man i no save fogetem: “be mifala i no lisin long olgeta.”5
Mi prea se bae Tabu Spirit i blesem mo bae i givim moa laet long wanwan long yumi taem yumi stap tingting tugeta long hao blong yumi save kam strong moa blong “no lisin” long ol nogud paoa mo ol voes blong jik blong wol blong tedei, we yumi stap laef long hem.
No lisin
Toktok ia “heed” long Inglis, i stap talem se blong lisingud, o mekem folem wan man o wan samting. From hemia, toktok blong hym ia “Yumi Mas Gohed” i stap askem strong long yumi blong mekem wan strong desisen blong no lisingud long wanem “ol man blong sin oli talem.” Mo Lihae mo ol pipol we oli stap wetem hem, we oli stap tekem mo kakae long frut ia blong tri, oli save givim wan strong eksampol blong no stap lisin long ol jik mo ol nogud tok we oli stap kamaot long bigfala haos ia.
Doktrin blong Kraes we oli raetem “wetem Spirit blong God we i stap laef long mit blong hat blong yumi”,6 i leftemap paoa blong yumi blong “no lisin” long ol plante samting we i pulum tingting, ol jik, mo tok olbaot blong wan wol we i stap foldaon. Eksampol: fet we i lukluk nomo long, mo i stap nomo long Lod Jisas Kraes, oltaem i givim strong paoa long yumi wetem paoa long saed blong spirit. Fet long Ridima i wan prinsipol blong aksen mo blong paoa. Taem yumi stap mekem samting i folem ol trutok blong gospel blong Hem, yumi gat blesing ia blong gat paoa long saed blong spirit we bae yumi yusum blong muv fored tru long ol jalenj blong laef blong wol ia, long semtaem we yumi stap lukluk nomo long ol glad we Sevya i stap givim long yumi. I tru, “sapos yumi obei, yumi no nid blong fraet, God i klosap mo hem i helpem yumi long faet.”7
Yumiwan I Joen long Hem tru long Ol Kavenan
Taem yumi mekem ol tabu kavenan, mo yumi stap klin inaf blong stap kasem ol odinens blong prishud, hemia i joenem yumi, mo i fasem yumi long Lod Jisas Kraes, mo wetem Papa long Heven.8 Hem i minim simpol nomo se yumi trastem Sevya olsem Loya blong yumi,9 mo olsem Medelman blong yumi,10 mo dipen long ol wok, lav mo sore, mo gladhat blong Hem11long taem blong wokbaot blong yumi long laef ia. Taem yumi stap strong blong stap go long Kraes, mo yumi joen wetem Hem, Atonmen blong Hem i klinim, i hilim, mo i mekem yumi kam strong, we i no gat en mo i blong taem we i no save finis.12
Taem yumi stap laef folem mo stap folem ol komitmen blong kavenan blong yumi, i mekem se yumi joen gud wetem Lod long wan wei we i gat strong paoa. Taem yumi stap ona long ol kondisen blong ol tabu kavenan mo odinens, sloslo mo moa, yumi go kolosap long Hem13 mo yumi filim strong paoa blong tabu fasin blong Hem, mo save stret se hem i ril insaed long laef blong yumi. Nao, Jisas i kam moa bitim medel pikja insaed long skripja stori ia; eksampol blong Hem, mo ol tijing blong Hem oli lidim wanem hat blong yumi i wantem, i lidim ol tingting mo aksen blong yumi.
Mi save talem stret se mi mi no save tokbaot stret gud wanem ia mo paoa ia blong kavenan we yumi joen long hem wetem Pikinini blong God we i laef bakegen long ded, mo i stap laef tedei. Be mi witnesem se wanem i joenem yumi wetem Hem mo Papa long Heven, oli ril, mo oli ol stret ples blong gat tingting i kwaet, gat pis, glad mo paoa long saed blong spirit ia we i mekem se yumi no save “fraet, nomata ol enemi oli fulap.”14 Olsem ol disaepol blong Jisas Kraes we yumi mekem mo stap kipim ol kavenan, yumi gat blesing blong “gat sapot from Papa God i stap antap,”15 mo gat blesing blong no lisin long ol nogud paoa mo jik blong wol ia.
Taem mi stap visitim ol memba blong Jos raon long wol, plante taem mi askem olgeta kwestin ia: ?wanem nao i helpem yu blong “no lisin” long ol paoa blong wol ia, ol jik mo ol fingga we oli poen? Ansa blong olgeta, i tijim mi fulap samting.
Ol strong memba, plante taem oli talemaot hamas i impoten blong stap invaetem paoa blong Tabu Spirit insaed long laef blong olgeta tru long ol skripja stadi we i gat mining, ol strong prea, mo stret fasin blong rere blong tekpat long odinens blong sakramen. Wan samting we oli talem plante tu, oli ol spirit sapot blong ol fetful memba blong famli, mo ol fren we oli trastem, ol impoten lesen we oli lanem tru long wok blong givhan, mo fasin blong givim seves long Jos Ia we i kambak, we i blong Lod, mo paoa ia blong luksave taem samting i emti gud, o taem i kam long bigfala bilding ia we i bigwan.
Mi bin luk tu, se long ol ansa blong ol memba ia, i gat wan paten we i impoten tumas. Faswan long evriwan, olgeta disaepol ia oli bin gat ol strong testemoni abaot plan blong hapines blong Papa long Heven, mo rol ia blong Jisas Kraes olsem Ridima mo Sevya. Mo nambatu, save mo strong tingting blong olgeta long saed blong spirit, i blong wanwan, i blong olgetawan, mo i spesifik; i no toktok jeneral, mo i no klia. Mi lisin long ol sol ia we oli givim hat, taem oli tokbaot ol kavenan we i stap givim paoa blong winim wanem i kam agens, mo hao oli joen wetem Lod we i stap laef, we i sapotem olgeta tru long ol taem we oli gud mo nogud. Long wanwan long ol man mo woman ia, Jisas Kraes, i tru, i wan Sevya blong olgeta.
Ol kavenan mo odinens blong gospel oli wok, insaed long laef blong yumi, olsem wan kampas. Wan kampas i wan tul we oli yusum blong talemaot daereksen blong Not, Saot, Is, mo Wes, blong save travel i go long ol defren ples. Long semmak wei, ol kavenan mo odinens blong yumi, oli poenem yumi i go, mo i helpem yumi blong oltaem tingbaot we yumi joen long Lod taem yumi stap progres folem kavenan rod ia.
Ol stret daereksen blong yumi evriwan long laef long wol ia, hem i blong kam long Kraes mo kam stret gud tru long Hem.16 Ol tabu kavenan mo odinens, oli helpem yumi blong lukluk nomo long Sevya mo traehad, wetem gladhat blong Hem,17 blong kam moa olsem Hem. I tru, “blong helpem ol Sent, God Hem i no save taet, God i sapotem trutok.”18
Holem Strong Aean Rel
Kavenan we yumi joen long hem wetem God mo Jisas Kraes, hem i rod ia, we tru long hem, bae yumi save kasem paoa long bodi mo long maen blong “no lisin.” Mo bae yumi joen strong moa taem yumi gogohed blong hang strong long aean rel ia. Be olsem we ol brata blong Nifae oli bin askem, “?Wanem mining blong aean rel we papa blong yumi i bin luk?
“Mo [Nifae] i talem long olgeta se i toktok blong God; mo eni man we bae i lisin gud long toktok blong God, mo bae i hang strong long hem, bae i no save lus; mo tu, ol temtesen mo ol spia blong devel, we i gat faea long hem, i no save winim olgeta blong mekem oli kam blaen, blong lidim olgeta oli gowe blong lus.”19
Plis luk we, paoa blong stanap agensem ol temtesen mo ol spia blong faea blong enemi, i promes ia we i go long wanwan man o woman we i stap “hang strong” be i no jes “hang” nomo long toktok blong God.
I gud blong luk se, Aposol Jon i tokbaot Jisas Kraes se Hem i Toktok ia.20
“Bifo we bifo olgeta, taem we wol ya i no stap yet, i gat wan man i stap we nem blong hem ‘Tok blong God, mo Tok ya, hem i stap wetem God, mo Hem tu i God. …
Mo long olgeta samting ya we God i mekem, i no gat wan samting nating we Tok ya i no mekem. …
“ Tok ya i kam man, nao i stap wetem yumi, mo hem i stap soemaot we God i lavem yumi tumas, mo i stap mekem i gud tumas long yumi, mo i soemaot tu we God i tru olgeta. Mo mifala i luk bigfala paoa blong hem. Hemia bigfala paoa ya we God we i Papa blong hem i givim long hem, from we hem nomo i stret Pikinini blong God.”21
From hemia, wan long ol nem blong Jisas Kraes, hem i “Tok Ya.”22
Antap long hemia, namba eit toktok blong bilif i talem se: “Mifala i biliv we Baebol i toktok blong God sapos oli transletem i stret gud; mifala i biliv tu we Buk blong Momon i toktok blong God.”23
From hemia, ol tijing blong Sevya, olsem we oli raetemdaon long ol tabu skripja, olgeta tu oli “tok ya.”
Bae mi talem olsem se, blong hang strong long tok blong God i minim se (1) yu tingbaot, givim ona, mo mekem yu joen strong moa wetem Sevya mo Papa blong Hem tru long ol kavenan mo odinens blong gospel ia we i kambak, mo (2) yu prea, wetem strong tingting, mo oltaem stap yusum ol tabu skripja mo ol tijing blong ol profet mo ol aposol we oli stap laef olsem ol tru stamba blong trutok we i kam tru long revelesen. Taem yumi fasem yumi, mo stap “hang strong” long Lod, mo yumi kam blong jenis taem yumi laef folem doktrin blong Hem,24 mi promes se yuwan, mo yumi evriwan, bambae yumi kasem blesing ia blong stanap long ol tabu ples, mo bae yumi no muvmuv.25 Sapos yumi stap long Kraes, nao bae Hem i stap insaed long yumi mo wokbaot wetem yumi.26 I tru, “blong helpem Ol Sent, God i no save taet, God i helpem wok blong trutok.”27
Testemoni
Gogohed. Hang strong. No lisin.
Mi witnes se taem yumi tru long ol kavenan mo ol odinens blong gospel we i kambak we i blong Sevya, i givim yumi paoa blong gogohed long wok ia blong Lod, blong yumi hang strong long Hem we i Tok Ya blong God, mo blong yumi no lisin long ol giaman blong enemi. Taem yumi stap faet from raet, bae wanwan long yumi i yusum wan naef blong faet, we i naef blong trutok28 long tabu nem blong Lod Jisas Kraes, amen.