Yumi, Yumi Jos Ia blong Jisas Kraes blong Ol Lata-dei Sent

Afta we mi kasem wan invitesen blong “kam mo luk,”¹ mi bin kam long Jos Ia blong Jisas Kraes blong Ol Lata-dei Sent long fas taem, taem mi gat 26 yia. Mi jes seperet long fas hasban blong mi. Mi gat wan boe we i gat 3 yia. Mi filim se mi no gat paoa mo mi fraet. Taem mi go insaed long bilding, mi fulap long gud filing taem mi kasem bilif mo glad blong ol pipol raon long mi. Rili, i “wan ples blong haed long strong win.”² Tri wik afta, mi mekem kavenan blong baptaes wetem Papa long Heven mo statem wokbaot blong mi olsem wan disaepol blong Kraes, nomata laef i no bin stret gud long wokbaot ia.

Blong mi kasem ol blesing ia we oli no save finis, plante samting long bodi mo spirit, i mas stap long stret ples. Gospel blong Jisas Kraes i bin kambak, mo oli bin stap prijim; mitinghaos ia oli bin bildim mo lukaotemgud; i gat eklesiastik laen i stap, stat long profet i go kasem ol lokol lida; mo wan branj we i fulap long ol memba we oli mekem kavenan, we oli rere blong akseptem mi mo boe blong mi taem oli bin tekem mitufala i kam long Sevya, we oli “fidim mitufala wetem gudfala toktok blong God,”³ mo blong mitufala i kasem janis blong givim seves.⁴

Stat long stat, God i bin wantem blong pulum tugeta mo oganaesem ol pikinini blong Hem,⁵ “blong mekem man i nomo save ded mo i kasem laef i no save finis.”⁶ Wetem stamba tingting ia long maen, Hem i bin givim instraksen long yumi blong bildim ol ples blong wosip,⁷ ol ples blong kasem save mo ol odinens we oli sevem man mo mekem oli kam olsem wan god; blong mekem mo kipim ol kavenan we oli fasem yumi long Jisas Kraes,⁸ blong Hem i kavremap yumi wetem “paoa blong wan god”;⁹ mo blong kam tugeta plante taem blong tingbaot Jisas mo mekem wanwan i strong moa tru long Hem.¹⁰ Jos oganaesesen mo ol bilding blong hem, oli stap blong gud blong spirit blong yumi. Jos, i stamba pos mo timba we yumi stap bildim ol famli we oli no save finis .¹¹

Taem mi bin stap storian long wan fren we i bin gotru long wan had taem, mi askem olsem wanem oli stap gotru long saed blong vatu. Hem i krae, i talem se bisop i stap helpem hem mo stap yusum fast ofring basket. Hem i talem: “Mi no save se weaples nao famli blong mi bae i stap long hem sapos i no Jos. Mi ansa: “Jos hem i ol memba. Olgeta nao oli ol man we oli glad mo wetem glad, oli givim ol fast ofring blong helpem olgeta we oli stap long nid. Yu stap kasem frut blong bilif blong olgeta mo strong tingting blong olgeta blong folem Jisas Kraes.”

Ol fren disaepol blong mi long Kraes; bae yumi no ting nating long bigfala wok we Lod i stap mekem tru long yumi, Jos blong Hem, nomata yumi no stret gud. Samtaem, yumi givim, mo samtaem yumi kasem, be yumi evriwan i wan famli long Kraes. Jos blong Hem i ples we Hem i givim blong gaedem mo blesem yumi taem yumi stap wosipim Hem mo givim seves long wanwan long yumi.

Sam sista oli talem sori long mi, we oli ting se oli no aktiv memba blong Rilif Sosaeti from oli stap wok long Praemeri o Ol Yang Woman. Ol sista ia, oli ol aktiv memba blong Rilif Sosaeti, from se oli stap helpem ol gudfala pikinini mo yut blong yumi blong mekem bilif blong olgeta long Jisas Kraes i kam strong moa.

Rilif Sosaeti i no wan rum insaed long wan bilding, wan Sandei lesen, wan aktiviti, o wan presidensi long lokol o jeneral level. Rilif Sosaeti i ol kavenan woman blong Jos; hem i yumi—wanwan long yumi mo yumi evriwan. Hem i “wol komuniti blong fasin blong gat lav mo sore.”¹² Eni ples mo evri ples yumi go long hem, oltaem yumi pat blong Rilif Sosaeti taem yumi stap traehad blong mekem tabu stamba tingting blong hem, we i blong ol woman blong mekem wok ia blong God hemwan, mo tu, olsem wan grup,¹³ blong givim spel, “helpem karemaot pua laef, help karemaot sik; helpem karemaot tu tingting mo fasin blong no save samting—karemaot evri samting we i blokem glad mo progres.”¹⁴

Semmak samting i stap insaed long ol kworom blong ol elda mo ol oganaesesen blong Jos blong evri yia, wetem ol pikinini mo ol yut. Jos i moa bitim ol bilding, mo ol eklesiastik laen; Jos, hem i yumi, ol memba, wetem Kraes long hed mo profet olsem man blong toktok long bihaf blong Hem. Yumi, Yumi Jos Ia blong Jisas Kraes blong Ol Lata-dei Sent, wetem Kraes i stap long hed mo profet i man blong toktok long bihaf blong hem. Lod i talem se:

“Luk, hemia hem i doktrin blong mi—huia i sakem sin mo i kam long mi, hem i kam man blong jos blong mi.

“Mo nao… huia i man blong jos blong mi, mo i stap strong long jos blong mi kasem en, bambae mi stanemap hem antap long strong ston blong mi”¹⁵.

Ol sista mo brata. Bae yumi mas luksave spesel janis ia we yumi gat blong yumi blong Jos Ia blong Jisas Kraes, we yumi save yunaetem fet, hat, paoa, maen, mo han blong yumi blong Hem i mekem ol bigfala merikel blong Hem. “From se bodi blong Jos Ia blong Kraes i no wan memba nomo, be i plante memba.¹⁶

Wan yangfala i talem long mama blong hem se: “Taem mi smol, evri taem mi givim 100 vatu long taeting, mi ting se wetem 100 vatu ia, bae oli save bildim wan ful mitinghaos wetem. “?I fani ah?”

Hem i krae, i ansa: “!hem i gud tumas! ?Yu gat pikja blong olgeta long maen blong yu?

“!Yes!”, Faneva i talem. “Oli naes, mo i gat plante milian long olgeta.”¹⁷

Ol dia fren blong mi, bae yumi gat fet blong wan pikinini, mo stap glad se, iven ol smol hadwok blong yumi, i save mekem bigfala samting long kingdom blong God.

Stamba tingting blong yumi long kingdom ia blong Hem i blong tekem wanwan long yumi i go long Kraes. Taem yumi stap ridim ol skripja, Sevya bae i givim invitesen ia long Ol Man blong Nifae:

“?Yufala i gat eniwan we i sik long medel blong yufala? Karem olgeta oli kam long ples ia. ?Yufala i gat eniwan we i sik long medel blong yufala? Karem olgeta oli kam long ples ia mo bae mi mekem olgeta i oraet, from mi mi gat sore long yufala; ol insaed blong mi oli kam fulap wetem sore.

“… From mi luk se fet blong yufala i inaf blong mi mas mekem yufala i oraet.”¹⁸

?I no tru se yumi evriwan i gat ol hevi samting we yumi save tekem i go long leg blong Sevya? Sam long yumi i gat jalenj long bodi, plante moa oli traehad wetem ol filing, ol narawan oli traehad blong gat sosol laef, mo yumi evriwan i lukaotem blong mekem spirit blong yumi i spel taem i gat jalenj. Yumi evriwan i fesem sam hadtaem.

Yumi ridim se “oli go fored wetem ol sikman blong olgeta, mo olgeta we oli gat hadtaem, … mo wetem evriwan we i gat hadtaem long eni fasin; mo hem i bin mekem olgeta evriwan oli kam oraet taem we oli karem olgeta oli go fored long hem.

“Mo olgeta evriwan, olgeta we oli bin kam oraet tugeta wetem olgeta we oli bin stap gud nomo, oli bodaon long ol leg blong hem, mo oli wosipim hem.”¹⁹

Stat wetem wan smol boe we i pem taeting wetem fet, i go kasem wan singgel mama we i nidim paoa blong gladhat blong Lod, i go kasem wan papa we i traehad blong lukaotem famli blong hem, i go kasem ol bubu we oli nidim ol odinens blong sevem man mo kam olsem wan god, i go kasem wanwan long yumi we i riniu ol kavenan wetem God evri wik, yumi nidim wanwan long yumi, mo yumi save tekem wanwan long yumi i go long hiling blong Sevya we i pemaot man.

Ol dia sista mo brata. Bae yumi folem invitesen blong Jisas Kraes, blong tekem yumiwan mo ol hadtaem blong yumi i go long Hem. Taem yumi go long Hem mo tekem olgeta we yumi lavem i go long Hem, Hem i luk bilif blong yumi. Bae Hem i mekem olgeta oli kam oraet, mo bae Hem i mekem yumi kam oraet evriwan.

Olsem “ol man blong Kraes we i folem Hem wetem pis,”²⁰ yumi traehad blong gat “wan hat mo wan maen,”²¹ mo yumi gat tingting i stap daon; yumi lisin; yumi kaen; yumi gud, fulap wetem longfala tingting mo save gotru longtaem long hadtaem; yumi skelem evri samting; yumi strong blong obei ol komanmen blong God long evri taem; yumi fulap long fet, hop mo jareti; mo yumi mekem fulap gudfala wok.²² Yumi stap traehad blong kam olsem Jisas Kraes.

Mi testifae se, olsem Jos Ia blong Kraes, yumi nao rod, olsem we Presiden Russell M. Nelson i tijim, we “Sevya mo Ridima blong yumi, Jisas Kraes, bambae i mekem sam bigbigfala wok bitwin naoia mo taem we bae Hem i kambak bakegen.”²³

Lod i talem se:

“Luk, bambae mi mekem wok blong mi i muv hariap moa long stret taem.

“Mo mi givim long yufala, … wan komanmen se bae yufala i kam tugeta wanples, mo oganaesem yufala, mo mekem yufala i rere, mo mekem yufala i kam tabu; yes, mekem hat blong yufala i kam klin evriwan, mo klinim ol han mo leg blong yufala long fored blong mi, blong mekem se mi mekem yufala i klin.”²⁴

Bae yumi akseptem invitesen ia mo, wetem glad, bae yumi kam wanples, yumi oganaes, yumi rere, yumi mekem yumi kam tabu, hemia i hambol prea blong mi, long nem blong Jisas Kraes, amen.