?Plan Ia, I Stap Wok Ia?

?Plan Ia, I Stap Wok Ia?

I no longtaem i pas, mi toktok wetem wan yang adalt we i bin go long wan misin sam yia i pas, mo naoia i stap wok long wok blong hem. Long sam wei, i luk olsem laef blong hem i stap gohed gud. Be fet blong hem i no stap gro. Hem i stap draon long ol tu tingting abaot Sevya mo Jos blong Hem. Hem i bin eksplenem se hem i no stap kasem ol blesing we hem i ting se bae hem i kasem from gospel ia. Hem i no filim se plan ia blong stap glad i stap wok long laef blong hem.

Mesej blong mi tedei i stap go long olgeta we oli gat ol semmak filing ia. Mi toktok long olgeta ia we long wan taem oli bin “filim blong singim singsing blong lav blong pemaot man” be oli no “filim samting ia naoia.”¹

Papa long Heven i bin rere long wan naesfala plan blong mekem yumi stap glad blong taem we i no save finis. Be taem laef i no wok long wei we yumi hop from, yumi ting se plan ia i no stap wok.

Ating bae yumi stap filim olsem we ol disaepol blong Jisas oli bin filim taem oli stap insaed long wan sip “long medel blong lagun ia, win mo wef i stap sakem bot i go olbaot.”²

Afta, long eli moning:

“Jisas i kam long olgeta, i stap wokbaot antap long wota.

“Be taem ol man blong hem oli luk hem, we i stap wokbaot i kam, oli fraet tumas, mo oli singaot from we oli fraet tumas.

“Be wantaem nomo, Jisas i talem long olgeta se ‘Yufala i no harem nogud. Mi nomo ya. Yufala i no fraet.”

“Mo Pita i talem se: ‘?Masta i tru, yu ya? Sapos i olsem, yu talem long mi blong mi wokbaot antap long wota mi kam long yu.’

Mo hem i bin talem: “Yes.” Mo taem Pita i kam daon aot long bot, hem i wokbaot long wota, i go long Jisas.

“Be taem hem i luk se win i stap kam strong, mo ol wef oli muvmuv andanit leg blong hem, Pita i fraet mo “stat draon mo i singaot se: ‘Masta, plis yu sevem mi.’

“Nao wantaem nomo Jisas i stretem han blong hem i holem hem nao i talem se: “?Man, from wanem yu gat tu tingting olsem?”³

?Mi save serem long yufala tri prinsipol mi lanem long Pita? Mi prea se ol prinsipol ia i save helpem eniwan we i filim se plan blong stap glad i no stap wok long laef blong olgeta.

Faswan, wok wetem fet long Jisas Kraes.

Mi sapraes bigwan long fet blong Pita. Wetem simpol invitesen blong Jisas “kam,” hem i lego bot blong hem. I luk olsem hem i save se sapos Jisas Kraes i invaetem hem blong mekem wan samting bae hem i save mekem.⁴ Pita i trastem Sevya bitim we i trastem bot blong hem. Mo fet ia i givim hem paoa blong wok wetem strong tingting long taem blong fraet.

Fet blong Pita i mekem mi tingbaot wan eksperiens we mi bin harem long Elda José L. Alonso. I no longtaem afta we boe blong Elda Alonso i bin lus, mo i livim biaen wan famli wetem ol yang pikinini, Elda Alonso i harem oli pikinini oli stap toktok.

“?Wanem nao bae yumi mekem?” oli askem.

Gel blong hem we i gat naen yia i ansa, “Papa i oraet. Hem i stap prijim gospel blong Jisas Kraes.”

Olsem Pita, smol gel ia i lukluk ova long ol hadtaem blong hem mo putum tras blong hem long Jisas Kraes mo Atonmen blong Hem. Fet long Sevya i givim pis mo paoa blong muv fored.

Sapos yu luklukbak long laef blong yu, mi bilif bae yu save luk se yu bin eksasaesem fet plante taem. Joenem Jos, hem i wan aksen blong fet. Blong stap toktok wetem Papa long Heven long prea i wan aksen blong fet. Blong stap rid long skripja, hem i wan aksen blong fet. Blong stap lisin long mesej blong mi jeneral konfrens ia, i wan aksen blong fet. Olsem Presiden Russell M. Nelson i talem: “Yu no daonem hamas fet we yu yu gat finis.”⁵

Wan nara lesen we mi lanem long Pita i hemia:

Long ol taem blong trabol, tanem yu go long Jisas Kraes kwiktaem.

Taem hem i stap wokbaot i go long Sevya, win i mekem Pita i fraet, mo i stat blong draon. Be taem Pita i save wanem i stap hapen, hem i no traem blong wokbaot long wota hemwan o swim go bak long sip. Long taem ia Pita i save ronwe long fet blong hem long Kraes, be hem i holem taet, mo singaot “Masta, plis yu sevem mi.”

“Nao wantaem nomo, Jisas i stretem han blong hem, i holem hem.”⁶

Evriwan long yumi i fesem ol strong win we i save seksekem fet blong yumi mo i mekem yumi draon. Taem hemia i hapen, plis tingbaot se plan blong glad blong Papa long Heven i gat wan nara nem—plan blong pemaot man. Plan ia i no blong yumi flae isi nomo tru long laef, neva fas long wan samting, neva draon long wota, wetem wan smael oltaem long fes blong yumi. Papa long Heven i bin save se bae yumi nidim blong oli pemaot yumi. Hemia nao from wanem Hem i rere long plan blong fasin blong pemaot man.⁷ Hemia nao from wanem Hem i sendem wan Man blong Pemaot Man. Taem yumi stap traehad—blong eni risen—hemia i no minim se plan ia i no stap wok. !Hemia nao i taem we yumi nidim plan ia moa!

Long ol taem olsem, folem eksampol blong Pita. Tanem yu i go long Sevya kwiktaem.

“Naoia i taem mo dei blong sevem yufala. … “No pusumbak dei blong sakem sin blong yufala.”⁸

Nomata weaples yumi stap mo weaples yumi bin go long hem, sakem sin hem i fasin we bae i karem yumi go fored. Presiden Nelson i bin tijim:

“Blong save progres, i no gat wan samting we i mekem yumi moa fri, gat moa gud fasin, o i moa impoten blong stap lukluk evri dei long fasin blong sakem sin. …

“Sapos yu stap wok strong blong muv folem rod ia blong kavenan, o yu bin glis o jiamaot long kavenan rod ia, o yu no iven save luk rod ia blong kavenan aot long ples we yu stap long hem naoia, mi plis long yu se yu sakem sin. Eksperiensem paoa we i mekem yu kam strong moa taem yu sakem sin evri dei—paoa ia blong mekem mo stap gud moa evri dei.”⁹

Blong kam long Kraes i minim moa blong tingbaot Hem, o tokbaot Hem, o iven lavem Hem. Hemia i minim blong folem Hem. I minim blong laef folem wei we Hem i tijim yumi blong laef folem. Mo blong yumi evriwan hemia i minim se yumi sakem sin kwiktaem.

Wan long ol gel blong mi i bin stap wok long misinari trening senta. Hem i bin talem long mi abaot wan elda we i bin talem long hem se hem i no save stret sapos Buk blong Momon i tru o no. Hem i bin prea mo prea blong kasem wan witnes long saed blong spirit, be i no kasem wan ansa.

Gel blong mi i prea blong save wanem blong mekem blong helpem misinari ia. Filing we hem i kasem i we ol skripja oli no givim blong ridim olgeta nomo blong kasem wan testemoni, be oli givim tu long olgeta blong tijim yumi blong kipim ol komanmen blong God. Gel blong mi i serem tingting ia wetem misinari ia.

Long wan nara taem, hem i luk misinari ia, i glad moa. Hem i talem long hem se hem i kasem wan testemoni se Buk blong Momon i tru. Hem i save se witnes ia i kam from se hem i stap traehad blong mekem wanem we Buk blong Momon i tijim.

Letem yumi folem eksampol blong Pita blong tanem yumi go long Sevya long trabol taem. Folem Jisas Kraes. Yu no stap dipen long waes mo paoa blong yuwan. Nomata hamas taem we yu traem blong wokbaot long wota yuwan, be i no wetem Hem, i neva let tumas blong singaotem Hem. !Plan ia i wok!

Namba tri prinsipol we mi lanem aot long Pita mo eksperiens blong eksperiens hem i hemia:

Putum yu daon long fored blong Lod, mo Hem bae i leftemap yu blong mekem ol bigfala wok.

Pita i bin soem fet, blong wokbaot long wota mo blong singaotem Sevya taem hem i nidim help. Wetem hemia, Sevya i luk moa samting long Pita we hem i save mekem. “?Man, from wanem yu gat tu tingting olsem?,” Hem i talem, “!Bilif blong yu i smol tumas!”¹⁰

Pita i save harem nogud from toktok ia. Be hem i akseptem wetem tingting we i stap daon. Hem i gohed blong lukaotem moa bigfala fet long Jisas Kraes. Tru long plante moa eksperiens we i bildimap fet—sam long olgeta i had tumas—Pita i kam wan lida we Lod i wantem, blong stap strong olsem ston. Hem i bin mekem ol bigfala samting long wok blong Lod.

?Wanem bigfala wok we Lod i wantem yumi blong mekem? Long Jos mo kingdom blong Hem, i gat plante janis blong givim seves mo givhan long ol narawan olsem we Sevya i bin mekem. Hem i wantem yu blong tekpat long bigfala wok blong Hem. Blong plan ia blong stap glad i wok long laef blong yu, hem i taem we yu stap helpem ol narawan blong laef folem plan ia.

Taem mi stap bildimap fet blong miwan, ol toktok ia blong Alma oli jenisim laef blong mi: “olgeta we oli putum tingting blong olgeta i stap daon, we oli no fosem olgeta blong putum tingting blong olgeta i stap daon, oli kasem blesing.”¹¹ Letem yumi putum yumi daon long wan ples we Jisas i save leftemap yumi, lidim yumi, mo i mekem yumi blong yumi save mekem plante samting.¹²

Mi testifae se plan ia blong fasin blong stap glad, i wok. Papa blong yu long Heven we i lavem yu, i bin krietem. Hem i wok from Jisas Kraes i bin winim sin mo ded tru long Atonmen blong Hem. Go long Hem, folem Hem, mo “naoia nomo bae bigfala plan blong fasin blong pemaot man i wok long yufala.”¹³ Long nem blong Jisas Kraes, amen.