Jenisim Laef blong Folem Tingting blong God
Blong jenisim laef blong yumi, i tekem tu, responsabiliti ia blong serem gospel blong Jisas Kraes wetem wol.
Mi mi glad long strong singaot blong Presiden Russell M. Nelson olsem profet, blong mekem misinari seves, mo ol mesej blong Presiden M. Russell Ballard mo Elda Marcos A. Aidukaitis tedei we i givim insperesen.
Wan misinari asaenmen long Inglan long las yia, i letem mi blong tingtingbak long ol samting we oli bin hapen, long saed blong spirit, we oli bin ol fandesen blong desisen blong mi blong kam wan misinari.1 Taem mi bin gat 15 yia nomo, bigfala brata blong mi, Joe, i gat 20 yia—yia we i mekem hem i naf blong go long wan misin long taem ia. Long Yunaeted Stet, from raorao blong Koria, sam nomo oli letem olgeta blong givim seves. Long wan yia, oli save singaotem wan nomo aot long wanwan wod.2 Hem i wan sapraes taem we bisop blong mifala i askem Joe blong tingting long rod ia, mo tokbaot wetem papa blong mifala. Joe i bin aplae blong go long wan medikol skul. Papa blong mifala, i no aktiv long Jos, i sevem vatu blong helpem Joe, mo i no glad blong Joe i go long misin. Papa i talem se i gud moa blong Joes i go long medikol skul. Hemia i wan bigfala problem insaed long famli.
Taem mi bin storian wetem bigfala brata we i eksampol blong mi mo i waes, mitufala i agri se desisen blong hem blong go long misin, mo seftem skul bae i dipen long trifala kwestin ia: (1) ?Jisas Kraes i wan Hae Man o no? (2) ?Buk blong Momon i tok blong God? mo (3) ?Josef Smit i Profet blong Restoresen? Sapos ansa blong ol kwestin ia oli, yes, nao bae i klia se Joe bae i mekem moa gud blong tekem gospel blong Jisas Kraes i go long wol bitim blong kam wan dokta naoia.3
Long naet ia, mi prea strong mo wetem wan tru tingting blong wantem save. Spirit, long wan wei we yu no save tanem baksaed long hem, i konfemem se, ansa long ol trifala kwestin ia hem i yes. Hemia i wan big taem blong mi. Mi luksave se evri desisen we bae mi mekem long ful laef blong mi, bae ol trutok ia oli lidim tingting blong mi. Mi bin save tu se bae mi go long misin, sapos mi gat janis. Ova long wan laef blong seves mo ol eksperiens long saed blong spirit, mi kam blong andastanem se tru fasin blong jenisim laef, i risal blong yu luksave mo akseptem tingting blong God, mo we Tabu Spirit i save lidim yumi long ol aksen blong yumi.
Mi bin gat finis wan testemoni se Jisas Kraes i hae man, mo i Sevya blong wol. Long naet ia, mi kasem wan testemoni long saed blong spirit, se Buk blong Momon i tru,4 mo Profet Josef Smit i tru profet.
Josef Smit I Bin Wan Tul long Ol Han blong Lod
Testemoni blong yu bae i kam strong moa taem yu save insaed long hat blong yu, tru long ol prea se Profet Josef Smit i wan tul long ol han blong Lod. Long ol las eit yia, wan long ol wok blong mi insaed long Olgeta Twelef Aposol, i blong luklukbak mo ridim ol pepa blong Josef Smit mo stadi we i mekem se oli pablisim ol buk blong Ol Sent .5 Testemoni blong mi mo bigfala sapraes blong mi abaot tabu koling blong Profet Josef Smit i bin kam strong moa taem mi bin ridim ol ditel blong laef blong hem mo blong seves blong hem olsem profet we oli bin odenem finis bifo.
Translesen blong Josef blong Buk blong Momon tru long paoa mo presen blong God, i fandesen blong Restoresen ia.6 Buk blong Momon, insaed evri samting i stret, oli raetem i naes, mo i tekem ol ansa blong ol bigfala kwestin blong laef. Hem i wan nara Testeman abaot Jisas Kraes. Mi testifae se Josef Smit i bin stret mo gud, i gat fulap fet, mo i bin wan tul long han blong Lod blong tekem Buk blong Momon i kam.
Ol revelesen mo ol samting we oli hapen, we oli rekodem long Doktrin mo Ol Kavenan, oli givim ol ki, ol odinens mo ol Kavenan we i nid blong Hem i sevem yumi mo yumi kam olsem wan god. Oli no givim nomo wanem we i nid blong stanemap Jos, be tu, oli givim ol bigfala doktrin we i letem yumi andastanem stamba tingting blong laef mo i givim yumi wan lukluk we i no save finis.
Wan long ol plante eksampol blong rol blong Josef Smit olsem profet, i stap long namba 76 seksen blong Doktrin mo Ol Kavenan. Hem i wan ditel histri blong visen blong heven, we i tekem ol kingdom blong glori, we Profet Josef mo Sidni Rigdon oli kasem blesing blong kasem long 16 Febwari 1832. Long tetaem ia, plante long ol jos oli bin stap tijim se bae Atonmen blong Jisas Kraes bae i no save sevem plante pipol. Oli bin biliv se, samfala nomo bae Lod i sevem olgeta, mo bigfala namba ia, bae i mas go lus long hel mo panismen we i no save finis, we i tekem ol prapa nogud samting we i no gat en blong hem.”7
Revelesen we i stap long namba 76 seksen i givim wan tabu visen blong ol digri blong glori we bigfala namba blong ol pikinini blong Papa long Heven we oli bin strong long fasfala laef blong olgeta, bae oli gat bigfala blesing afta long las jajmen blong olgeta.8 Visen blong ol trifala digri blong glori, mo hemia blong telestial, we i bitim wanem we man i andastanem,9 i sakemaot ol strong mo rong doktrin ia we bigfala namba i biliv se bae oli mas go long hel mo bigfala panismen.
Taem yu luksave se Josef Smit i bin 26 yia nomo, i skul smol nomo, mo i no bin savegud ol lanwis we oli bin stap transletem Baebol aot long hem, i tru, hem i bin wan tul long han blong Lod. Long namba 17 ves blong seksen 76, hem i bin kasem insperesen ia blong yusum toktok ia, olgeta we oli no stret be i no fasin blong no save kam antap we oli yusum long Gospel blong Jon.10
Hem i gud blong luk se, 45b yia afta, wan lida blong Anglikan jos, mo wan hae man we i skul,11 Frederic W. Farrar, we i bin raetem The Life of Christ,12 i talem se mining blong fasin blong no save kam antap insaed long King Jemes Vesen blong Baebol, i risal blong ol translesen mistek, aot long Hibru mo Grik lanwis i kam long Inglis.13
Long taem tedei, plante oli gat tingting ia se, bae i no save gat risal from sin. Oli sapotem se i no gat kondisen blong fogivim sin, iven spos man i no sakem sin. Doktrin we Lod i talemaot, i sakemaot tingting ia se plante pipol bae oli go long hel mo no save kam antap, be tu, i putum se, wanwan i mas sakem sin olsem wan komanmen blong save tekem mo yusum Atonmen blong Sevya, mo kasem selestial kingdom.14 Mi testifae se !Josef Smit i bin wan tul long han blong Lod blong putumbak gospel blong Hem!
From Restoresen blong gospel blong Jisas Kraes, yumi andastanem hamas i impoten blong gat tugeta ia, fasin blong sakem sin mo “ol stret mo gud wok.”15 Yumi andastanem bigfala mining blong Atonmen blong Sevya, mo mining blong ol odinens mo kavenan blong Hem we oli sevem man, we i tekem olgeta ia we oli stap mekem insaed long tempol.
Olgeta “stret mo gud wok” oli kamaot, mo oli, ol frut blong fasin blong jenisim laef. Tru fasin blong jenisim laef, i kam taem man i akseptem, wetem gud tingting blong hem, mo i komitim hem blong folem tingting blong God.16 Bigfala tebol blong ol gud risal mo ol blesing we oli kam from fasin blong jenisim laef, hem i tru, mo i gat pis we i stastap mo stret save se i gat hapines long en17nomata ol strong win blong laef ia.
Fasin blong jenisim laef i go long Sevya, i jenisim wan man we i folem fasin blong wol, i go long wan man we i kam tabu, i bon bakegen, i kam klin gud— niu man wetem Kraes Jisas.18
Plante Oli No Save Kasem Hapines From se Oli No Save Weaples blong Faenem
?Wanem nao ol samting we wan i mas mekem from se hem i jenisim laef blong hem? Long Libeti kalabus, profet Josef i bin teknot se “i gat plante … we oli no save faenem trutok from nomo oli no save weaples blong faenem trutok.”19
Long fas toktok blong Buk blong Doktrin mo Ol Kavenan, i gat wan bigfala pikja we i talemaot stamba tingting blong Lod, i stap long ples ia, blong yumi ridim. Hem i talem: “Taswe, Mi Lod, we mi save bigfala trabol we bae i kam long ol man we oli stap laef long wol, mi bin singaotem wokman blong mi, Josef Smit Junia, mo mi stap long heven mo toktok long hem, mo givim ol komanmen long hem.” Hem i go moa i se: “Olgeta we oli no strong mo oli simpol bae oli talemaot ful gospel blong mi kasem evri en blong wol, mo long fored blong ol king mo ol man blong rul.”20 Hemia i tekem ol fultaem misinari. Hemia i minim wanwan long yumi. Hemia i sapos blong stap olsem wan lesa laet we i poenem evriwan we i bin gat blesing blong jenisim laef blong hem i go long tingting blong God. Wetem gladhat blong Hem, Sevya i stap invaetem yumi blong stap olsem voes mo han blong Hem.21 Lav blong Sevya bae i laet we i saenem rod long yumi. Sevya i tijim ol disaepol blong Hem se: “yufala i mas go long ol man long olgeta ples long wol, blong pulum olgeta oli kam man blong mi.”22 mo long Josef Smit, Hem i bin talem: “Yufala i mas go long ful wol, mo prijim gospel blong mi long evri man we i no kasem gospel yet.”23
Wan wik afta long dedikesen blong Ketlan Tempol, long namba 3 Epril 1836, we i wan Ista Sandei, mo tu, i Pasova, Lod i bin kamkamaot long wan visen, long Josef mo Oliva Kaodri. Lod i bin akseptem tempol ia mo i talem: “Hemia i stat blong blesing we bae mi kapsaetem long hed blong ol pipol blong mi.”24
Afta long visen ia, Moses i bin kamkamaot mo i bin “givim … ol ki blong wok blong karem Isrel i kam wanples aot long ol fo pat blong wol, mo blong lidim ol ten traeb aot long kantri long Not.25
Presiden Russell M. Nelson, profet blong tedei we yumi laekem, we i holem ol semfala ki, i bin tijim long moning se: “Yufala, ol yang man, Lod i bin holemtaet yufala from taem tedei, taem we promes blong kam tugeta blong Isrel ia i stap tekem ples. Taem yufala i stap givim seves long ol misin, !yufala i plei wan impoten rol long wanem i stap hapen tedei we i neva hapen bifo!”26
From se, strong wok we Hem i givim blong serem gospel blong kam pat blong huia yumi, yumi nid blong jenisim laef i go long tingting blong God; yumi nidim blong lavem ol neba blong yumi, serem gospel we i kambak blong Jisas Kraes, mo invaetem evriwan blong kam mo luk. Olsem ol memba blong Jos, yumi laekem ansa blong Profet Josef i go long Jon Wetnwot, edita blong Chicago Democrat, long 1842. Jon i stap askem infomesen abaot Jos. Josef i endem ansa blong hem wetem “Standet blong Trutok” we i fas toktok blong ol tetin Toktok blong Bilif. Standet ia, talemaot, long wan stret wei, wanem i mas hapen:
“I nogat wan han we i toti i save stopem wok blong i gohed; ol fasin blong agens bae oli strong, ol rabis man bae oli joen wanples, ol ami bae oli kam tugeta, fasin blong tokbaot nogud man bae i spolem man, be trutok blong God bae i gohed strong, hae antap, mo indipenden, kasem taem we bae i gotru long evri graon, i visitim evri kaen weta, i brum long evri kantri, mo i ring long evri sora kasem taem ol stamba tingting blong God oli kamtru, mo Hae Jehova bae i talem se wok ia i finis.”27
Hemia i bin singaot i go long evri jeneresen blong ol Ol Lata-dei Sent, speseli ol misinari. Wetem spirit blong “Standet blong Trutok,” yumi talem tangkyu se long medel blong wan wol sik ia, ol fetful misinari oli stap serem gospel. !Ol misinari! !Mifala i lavem yufala! Lod i askem wanwan long yumi blong serem gospel blong Hem, tru long toktok mo aksen. Blong jenisim laef blong yumi, i tekem tu, responsabiliti ia blong serem gospel blong Jisas Kraes wetem wol.
Ol blesing blong stap serem gospel, i tekem blong stap kam antap long fasin blong jenisim laef mo tingting i go long tingting blong God, mo letem God i win insaed long laef blong yumi.28 Yumi blesem ol narawan blong gotru long wan “bigfala jenis” blong hat blong olgeta.29 I tru, i gat glad we i no save finis taem yumi tekem ol sol oli kam long Kraes.30 Blong stap wok blong yumi jenisim laef blong yumiwan, mo hemia blong ol narawan, hem i hae tabu wok ia .31 Mi testifae long hemia, long nem blong Jisas Kraes, amen.