Ol Lesen long Wel

Ol sista. Mi save se plante long yufala i bin filim semmak olsem mi, blong no save olsem wanem blong fesem ol had jalenj mo yu lus—lus from se laef blong yu i no hapen folem wei we yu hop from, prea from, mo plan from.

Nomata long ol situesen olsem, laef blong yumi i tabu mo i gat mining mo stamba tingting. Wanwan long yumi i wan stret pikinini gel blong God, wetem tabu aedentiti long sol blong yumi.

Sevya blong yumi Jisas Kraes, tru long sakrifaes blong Hem we i pem praes, i mekem i posibol blong yumi, blong kam klin mo kam oraet bakegen, we i mekem se yumi save mekem stamba tingting blong yumi long wol ia i hapen, nomata long ol desisen blong ol memba blong famli, sapos yumi mared o singgel, helti long bodi o tingting, o eni narafala situesen.

Tingting long woman ia long wel. ?Laef blong hem i bin olsem wanem? Jisas i save se woman ia i bin gat faef hasban mo man we hem i stap wetem naoia i no mared wetem hem. Mo yet, nomata ol hadtaem blong hem, Sevya i talemaot long wan toktok blong Hem long pablik se, Hem i Mesaea ia nao. Hem i talem se: “Mi we mi stap toktok long yu hem i mi ya nao.”²

Woman ia i kam wan strong witnes blong stap talemaot long olgeta we oli stap long siti se Jisas Hem i Kraes. “Nao long taon ya, i gat plante man Sameria we oli bilif long Jisas from tok ya we woman ya i talem.”³

Ol situesen blong hem long taem bifo mo tedei i no talem fiuja blong hem. Semmak olsem woman ia, yumi save jusum tedei blong tanem yumi i go long Sevya from paoa mo hiling we bae i helpem yumi blong mekem evri samting we oli sendem yumi i kam ia blong mekem.

Long wan ves we yumi save long hem insaed long Doktrin mo Kavenan, Lod i leftemap tingting blong ol man mo woman blong “oli mas wok wetem strong tingting long wan gudfala wok, mo mekem plante samting long tingting blong olgetawan nomo, mo mekem i hapen ol plante stret mo gud wok; from paoa i stap long olgeta.”⁴

Ol sista. !Paoa ia i stap wetem yumi blong mekem plante stret mo gud wok!

Presiden Nelson i tijim yumi se: “Evri woman mo evri man, we oli mekem ol kavenan wetem God mo i stap kipim ol kavenan ia, mo i stap klin inaf blong tekpat long ol prishud odinens ia, oli save go stret blong kasem paoa blong God.”⁵

Mi kam blong save se taem yumi traehad blong respektem ol tabu kavenan we yumi bin mekem taem yumi baptaes mo insaed long ol tabu tempol, Lod bae i blesem yumi “wetem paoa blong Hem we i save hilim mo givim moa strong paoa” mo wetem “ol niu tingting mo blong yu wekap long saed blong spirit olsem i neva hapen bifo.”⁶

Jisas i stap tijim ol man blong Hem antap long hil: “Yufala i olsem sol long ol man long wol,”⁸ mo “Yufala i olsem laet long ol man long wol.”⁹ Afta Hem i komperem gro blong kingdom blong heven olsem is, “we woman i putum long wan bigfala dis flaoa, nao is ya, man i no moa save luk, be i mekem olgeta flaoa ya i solap.”¹⁰

• Sol

• Is

• Laet

Iven long ol smosmol namba, wanwan samting ia i givim paoa long evri samting we i stap raon long hem. Sevya hem i invaetem yumi blong yusum paoa blong Hem blong stap olsem sol, is, mo laet.

Ol sista. Hat i save jenis mo laef i save kasem blesing taem yumi givim smol sol, wan spun we i fulap long is, mo wan smol saen blong laet.

Mi testifae se Sevya hem i sol long laef blong yumi, mo Hem i stap invaetem yumi blong testem glad mo lav blong Hem.¹⁴ Hem i Hem we i is long taem we laef blong yumi i had, i givim hop long yumi mo¹⁵ leftemap ol hevi samting blong yumi¹⁶ tru long paoa blong Hem ia we i bitim eni narafala paoa mo lav blong pemaot man.¹⁷ Hem i laet blong yumi,¹⁸ we i saenem rod blong yumi i gobak hom.

Mi prea se bae yumi save go long Sevya, olsem woman ia long wel, mo drink aot long wota blong Hem we i laef. Wetem ol pipol blong Sameria, yumi save talemaot strong se: “Be naoia mifala i bilif, … from we mifala nomo i harem tok blong hem, mo mifala i save we hem i Kraes, Sevya blong wol.”¹⁹ Long nem blong Jisas Kraes, amen.