Lav we I Kam long Heven Insaed long Plan blong Papa

Wan samting we plante man i andastanem abaot jajmen we i kam afta long laef ia we i no save finis, i we, ol gud pipol, oli go long wan ples we oli singaotem heven mo ol nogud pipol oli go long wan ples we i no gat en, we oli singaotem hel. Rong tingting ia, se i gat tufala ples ia nomo, i minim se olgeta we oli no save obei evri komanmen we i nid blong go long heven, bae oli mas go nomo nao long hel blong oltaem.

Papa long Heven we i gat lav, i gat wan plan we i moa gud yet, blong ol pikinini blong Hem. Doktrin we i kam tru long revelesen insaed long Jos Ia we i Kambak blong Jisas Kraes, i stap tijim se evriwan long ol pikinini blong God—be nomo sam we bae yumi no tokbaot long ples ia—bae oli kasem wan kingdom blong glori.² “Insaed long haos blong Papa blong mi, i gat plante rum i stap,”³ Jisas i tijim. Aot long revelesen blong tedei, yumi save se ol rum ia, oli stap long trifala defren kingdom blong glori. Long Las Jajmen, wanwan long yumi bae i kasem jajmen folem ol wok mo ol tingting blong hat blong yumi.⁴ Bifo long hemia, bambae yumi nidim blong safa from ol sin ia we yumi no stap sakem. Ol skripja oli talem klia long saed ia.⁵ Afta, Jaj ia blong yumi we i stret, bae i givim wan ples long yumi insaed long wan long ol kingdom blong glori ia. Olsem ia nao, yumi save tru long revelesen blong tedei se: “From we bae hem i jajem olgeta … mo evri man bae i kasem samting folem ol wok blong hemwan, ol samting blong hemwan, insaed long ol haos we Lod i mekem rere long olgeta.”⁶

Lod i bin jusum blong talemaot smol nomo abaot tu long olgeta kingdom blong glori ia. Be, long narasaed, Hem i talem plante abaot hae kingdom blong glori, we Baebol i tokbaot se i “glori blong san.”⁷

Insaed long “selestial” glori,⁸ i gat trifala digri, o ol level.⁹ Hemia we i hae evriwan, i blong kam wan god insaed long selestial kingdom, wan ples we bae yumi kam olsem Papa blong yumi, mo olsem Pikinini blong Hem, Jisas Kraes. Blong helpem yumi developem ol fasin olsem hemia blong God mo jenisim fasin blong kasem ful paoa blong yumi, Lod i bin talemaot doktrin ia tru long revelesen, mo i stanemap ol komanmen folem loa we i no save finis. Hemia nao yumi stap tijim insaed long Jos Ia blong Jisas Kraes blong Ol Lata-dei Sent, from se stamba tingting blong doktrin mo ol polisi blong Jos ia we i kambak, i blong mekem ol pikinini blong God oli rere blong Lod i sevem olgeta insaed long selestial glori, mo speseli, blong kam olsem wan god insaed long level ia we i hae evriwan.

Ol kavenan we oli mekem mo ol blesing we Hem i promesem insaed long ol tempol blong God, long olgeta we oli fetful, oli ki ia nao. Hemia i eksplenem from wanem yumi bildim tempol, olsem we kwaea ia i singsing abaot, long wan naes wei. Sam oli sek long hemia, mo oli no andastanem se ol kavenan mo ol odinens blong tempol oli lidim yumi i go blong kasem fasin blong kam olsem wan god. Hemia man i save andastanem nomo taem i tekem trutok we i kam long revelesen abaot ol trifala digri blong glori. From bigfala lav we God i gat long evriwan long ol pikinini blong Hem, Hem i givim ol nara kingdom blong glori—olsem we Elda Quentin L. Cook i eksplenem yestedei—evriwan we oli naes gogo we yumi no save andastanem.¹⁰

Atonmen blong Jisas Kraes i mekem se evri samting ia i posibol. Hem i soem tru long revelesen se “Hem i givim glori long Papa, mo i sevem evri wok blong han blong hem.”¹¹ Fasin ia blong sevem man, i kamaot long ol defren kingdom blong glori. Yumi save, aot long revelesen blong tedei, se “evri kingdom, i gat wan loa we i go wetem.”¹² We i go olsem:

“From hem we i no save obei long loa blong selestial kingdom, bae i no save stap long selestial glori.

“Mo hem we i no save obei long loa blong terestrial kingdom, bae i no save stap long terestrial glori.

“Mo hem we i no save obei long loa blong telestial kingdom, bae i no save stap long telestial glori.”¹³

Long nara toktok, kingdom blong glori we yumi kasem long Las Jajmen, i folem ol loa we yumi jusum blong obei long olgeta folem plan blong lav ia we i kam long Papa long Heven. Anda long plan ia, i gat plante kingdom, blong mekem se evriwan long ol pikinini blong Hem oli save kasem wan kingdom we oli save “stap” long hem.

Ol tijing mo ol polisi blong Jos we i kambak, we i blong Lod, oli folem ol trutok ia we oli no save finis long wan wei we man i save andastanem fulwan nomo taem i lukluk long plan blong lav we Papa long Heven i gat long evri pikinini blong Hem.

From hemia, yumi ona long fridom blong joes blong wanwan man o woman. Plante oli save gud long bigfala wok blong Jos ia blong promotem fridom blong relijin. Ol hadwok ia, oli blong mekem plan blong Papa long Heven i go moa. Yumi wantem blong helpem evri pikinini blong Hem—i no ol memba blong yumi nomo—blong oli stap glad long fridom ia blong save mekem joes.

Semmak, oli askem yumi from wanem yumi stap sendem ol misinari i go long plante kantri, iven long ol Kristin populesen. Yumi kasem sem kwestin se from wanem yumi givim plante milian vatu long yumaniterian help, i go long olgeta we oli no memba blong Jos blong yumi, mo from wanem yumi no joenem ol wok ia long misinari wok blong yumi. Yumi mekem hemia from Lod i tijim yumi blong tekem se evriwan long ol pikinini blong Hem oli semmak, oli ol brata mo sista blong yumi, mo yumi wantem serem wanem we yumi gat we i plante wetem evriwan.

Doktrin ia we i no save finis, i givim wan stret lukluk we i spesel long wanwan pikinini. Tru long lukluk ia, yumi luk se blong karem pikinini i kam long wol ia, mo lukaotem gud olgeta, i pat blong plan ia blong heven. Hem i wan diuti we i gat glad mo i tabu blong olgeta we oli kasem paoa ia blong tekpat long hem. From hemia, yumi kasem komanmen blong mas tijim mo faet from ol prinsipol mo praktis we oli givim ol bes situesen blong divelopmen mo hapines blong ol pikinini, hemia folem plan blong God.

Laswan, Jos Ia blong Jisas Kraes blong Ol Lata-dei Sent, oli savegud hem olsem wan famli Jos. Be wanem man i no andastanem gud, i we famli ia i no stop wetem ol famli rilesensip blong wol ia. Ol rilesensip we oli no save finis oli stamba blong bilif blong yumi. Misin blong Jos ia we i kambak i blong helpem ol pikinini blong god blong kwalifae blong wanem God i wantem se bae i las ples we bae oli stap long hem. Tru long fasin blong pemaot man tru long Atonmen blong Kraes, evriwan bae i save kasem laef we i no save finis (kam olsem wan god insaed long selestial kingdom), we i mekem Mama Iv i talem: “God i givim long evriwan we oli stap obei.”¹⁴ Hemia i moa bitim fasin blong sevem man. Presiden Russell M. Nelson i mekem yumi tingbaot se: “long plan blong God we i no save finis, blong sevem man i wan samting we i blong wanwan man; be, blong kam olsem wan god, i wan famli mata.”¹⁵

Wanem i impoten long yumi, i revelesen ia blong God se, fasin blong kam olsem wan god, bae oli save kasem nomo taem wan i fetful long ol kavenan blong wan mared we i no save finis, bitwin wan man mo wan woman.¹⁶ Tabu doktrin ia i risen from wanem yumi stap tijim se “blong stap olsem man o woman, hem i wan stamba samting we i save talem stret huia nao yumi olsem man mo woman, … hemia long laef bifo yumi kam long wol ia, long laef long wol ia, mo long laef we bae i kam afta mo from wanem hem i olsem.”¹⁷

Hemia nao from wanem Lod i askem Jos blong Hem we i kambak blong agensem plante sosol paoa mo loa blong jenisim doktrin blong Hem long saed blong mared bitwin wan man mo wan woman, mo blong agensem tu ol jenis ia we i mekem wanem i defren bitwin man mo woman i nomo klia, o i mekem man i konfius, o i mekem man i jenisim jenda.

Posisen blong Jos we i kambak long saed blong ol impoten poen ia, plante taem i mekem se i gat agens. Mifala i andastanem hemia. Plan blong Papa long Heven i letem se i gat agens long evri samting¹⁸ mo agens blong Setan we i strong tumas, i agensem wanem we i moa impoten long plan ia. From hemia, hem i stap lukaot blong agensem fasin blong kam olsem wan god, taem i mekem man i konfius se hem i man o woman, taem i tantanem wanem i mared, mo taem i daonem tingting blong man blong gat pikinini. Be, yumi save se, ova long wan longfala taem, stamba tingting blong heven, mo plan blong Papa long Heven we i gat lav, bae i no jenis. Ol situesen blong yumiwan, oli save jenis, mo plan ia blong God i putum se, long longfala taem, olgeta we oli fetful, we oli stap obei long ol kavenan blong olgeta, bae oli gat janis ia blong kwalifae from evri blesing we Hem I Promesem.¹⁹

Wan tijing we i impoten tumas, i blong helpem yumi blong rere from laef we i no save finis, “presen ia we i hae moa long evri nara presen blong God,”²⁰ i stap long ofisol toktok blong famli we i kamaot long 1995.²¹ Ol samting we hem i talem oli defren evriwan long sam loa, praktis, mo toktok blong wol tedei, olsem fasin blong stap laef wanples bifo mared, mo sem seks mared. Olgeta we oli no andastan fulwan plan blong Papa ia we i gat lav long ol pikinini blong Hem, bae oli save tekem se famli ofisol toktok ia, i jes wan nara toktok blong polisi, we oli mas jenisim. Be, long nara saed, yumi talem tru se famli ofisol toktok i stap long doktrin we oli no save sakemaot, mo i talem klia kaen famli rilesensip we bigfala pat blong divelopmen blong yumi we i no save finis, i save hapen long hem.

Hemia nao spesel risen blong spesel doktrin mo ol polisi blong Jos Ia blong Jisas Kraes blong Ol Lata-dei Sent, we i kambak.

Long plante rilesensip mo situesen long laef, yumi laef wetem ol pipol we oli defren long yumi. Olsem ol man we i stap folem Kraes, we yumi sapos blong lavem ol nara man, yumi mas laef wetem pis wetem olgeta we oli no biliv long sem wei we yumi stap biliv long hem. Yumi evriwan, yumi ol pikinini blong Papa long Heven we Hem i lavem yumi. Long yumi evriwan, hem i putum se i gat laef afta long ded, mo long en, i gat wan kingdom blong glori. God i wantem yumi evriwan blong traehad blong kasem ol blesing we oli hae moa, taem yumi kipim ol komanmen, ol kavenan, mo ol odinens we oli hae moa, evriwan we oli kam mit wanples insaed long ol tabu tempol blong Hem, we oli stap bildim raon long wol. Yumi mas lukaotem mo serem ol trutok ia blong taem we i no save finis wetem ol narawan. Be wetem lav we yumi mas givim long evri neba blong yumi, yumi oltaem akseptem desisen blong olgeta. Olsem wan profet blong Buk blong Momon i tijim, yumi mas go fored we yumi gat lav blong God mo blong evri man.²²

Olsem we Presiden Russell M. Nelson i talem long las konfrens blong yumi: “I neva bin gat wan taem long histri blong wol we save abaot Sevya blong yumi i moa impoten long wanwan man o woman, mo i moa tru long evri sol blong man. … Doktrin blong Kraes we i stret gud, i gat paoa. Hem i jenisim laef blong evriwan we i andastanem doktrin ia mo i lukaotem blong praktisim insaed long laef blong hem.”²³