Fasin blong Jenisim Laef Hem I Gol blong Yumi

Tingting gud long tru stetmen ia we i stap long fas toktok blong Kam Folem Mi:

“Stamba blong lanem mo tijim gospel i blong mekem dip jenis long laef blong yumi long Papa long Heven mo Jisas Kraes. …

“… Be kaen wei ia blong lanem gospel, we i stap mekem fet blong yumi i kam strong moa, mo i stap lidim yumi long merikel ia blong jenisim yumi, i no hapen evriwan long wan taem ia nomo. Kaen wei ia blong lanem gospel, i go i bitim klasrum mo i go kasem hat mo hom blong wanwan. I nidim blong traehad oltaem, evri dei, blong andastanem mo laef moa gud folem gospel. Fasin blong lanem gospel we i lidim yumi blong i mekem tru jenis long laef blong yumi, i nidim paoa blong Tabu Spirit blong lidim tingting blong yumi.”¹

Hemia nao merikel we yumi stap lukaotem—taem wan man o woman i gat wan eksperiens long skripja,² mo eksperiens ia i hapen tru long paoa blong Tabu Spirit. Ol eksperiens olsem oli ol gudfala stamba fandesen we oli blong jenisim, laef blong yumi i go long Sevya. Mo olsem we Presiden Russell M. Nelson i bin rimaenem yumi long hem i no longtaem, ol fandesen long saed blong spirit, oltaem oli mas stap mekem i kam strong.³ Fasin blong jenisim laef we i save stap longtaem i wan jenis blong laeftaem.⁴ Fasin blong Jenisim Laef Hem I Gol blong Yumi.

Blong mekem gud wok, eksperiens blong yu wetem ol skripja i mas blong yuwan.⁵ Blong stap ridim o harem abaot ol eksperiens mo tingting blong ol defren man o woman i save help, be hemia i no save givim long laef semfala paoa ia blong jenisim laef. I no gat wan nara samting blong tekem ples blong taem we yu spendem long ol skripja, harem Tabu Spirit i toktok stret long yu.

Evri wik taem mi openem Kam Folem Mi lesen buk, mi raetem kwestin ia antap long pej blong buk blong mi: “?Wanem nao Tabu Spirit i tijim long mi long wik ia taem mi rid long ol japta ia?”

Taem mi stap stadi long ol skripja, mi stap tingting hevi long kwestin ia bakegen mo bakegen. Taem mi mekem olsem oltaem, Spirit i toktok long mi, mo mi raetemdaon long buk blong mi.

Nao, ?olsem wanem mi save se Tabu Spirit i stap tijim mi? I hapen oltaem long smol mo simpol wei. Samtaem wan sentens long skripja i kamaot klia mo pulum tingting blong mi. Long ol nara taem, mi filim olsem se, tingting i fulap wetem bigfala andastaning long wan gospel prinsipol. Mi filim paoa blong Tabu Spirit tu taem waef blong mi, Anne Marie, mo mi i tokbaot wanem we mitufala i stap ridim. Ol tingting blong hem i invaetem Spirit oltaem.

Long yia ia yumi stap stadi long OlTesteman—tabu skripja we i fulumap sol blong yumi wetem laet. Taem mi stap rid long OlTesteman, mi filim olsem mi stap spenem taem wetem ol gaed we mi trastem olgeta: Adam, Iv, Inok, Noa, Ebraham, mo plante moa.

Long wik ia taem yumi stap stadi long Eksodas japta 7–13, yumi lanem olsem wanem Lod i mekem ol pikinini blong Isrel oli go fri aot long Ijip. Yumi ridim abaot naen hadtaem—naen samting we God i soemaot paoa blong Hem—we Fero i witnesem be yet, i mekem hat blong hem i strong.

Afta Lod i talem long profet blong Hem, Moses, abaot namba ten hadtaem—mo olsem wanem wanwan famli blong Isrel oli save rere from. Olsem wan samting we oli stap mekem oltaem bae oli singaotem Pasova, ol man Isrel bae oli sakrifaesem wan yangfala man sipsip we i klin mo helti gud. Afta oli nid blong makem frem blong doa blong olgeta wetem blad blong sipsip ia. Lod i promesem olgeta se evri haos we oli makem wetem blad bae i no kasem hadtaem ia we i stap kam.

Skripja i talem, “Nao oli mekem … olsem we Lod … i talem long Moses” (Eksodas 12:28). I gat wan samting we i gat moa paoa long simpol toktok ia blong stap obei.

From se ol pikinini blong Isrel oli folem ol toktok blong Moses mo wok wetem fet, oli bin stap sef long ol hadtaem ia, i kam long taem, oli aot long long fasin blong stap olsem slef.

So, ?wanem nao Tabu Spirit i tijim long ol japta ia, long wik ia?

Hemia sam tingting we i stap long maen blong mi:

• Lod i wok tru long ol profet blong Hem blong protektem mo sevem ol pipol blong Hem oli stap sef.

• Fet mo fasin blong gat tingting i stap daon i lid i go long merikel blong protektem mo kamaot long fasin blong stap slef.

• Blad long frem blong doa i wan saen aotsaed we i soemaot fet insaed,we i stap long Jisas Kraes, Smol Sipsip ia blong God.

Mi stap tingting bigwan long semfala fasin we Lod i blesem ol pipol blong Hem long OlTesteman stori mo long wei we i blesem ol Pipol blong Hem tedei.

Taem Profet blong Lod, we i stap, Presiden Nelson, i tokbaot Kam Folem Mi long yumi olsem wan wei blong yumi stadi long ol skripja, hem i invaetem yumi blong jenisim hom blong yumi i kam ol sef ples blong fet mo blong lanem gospel.

Afta hem i promesem fofala spesel blesing:

1. Bae ol Sabat deiblong yufala bae oli kam wan glad,

2. Bae ol pikinini blongyufala oli glad tumas blong lanem samting, mo blong laef folem ol tijing blong Sevya,

3. Paoa blong enemi insaed long laef blong yufala mo insaed long hom blong yufala bae i go daon, mo

4. Ol jenis ia insaed long famli blong yufala bae i i sapotem yufala bigwan.⁶

Nao, yumi no gat eni storian long jenol blong olgeta we oli eksperiensem Pasova wetem Moses long Ijip. Be, yumi gat plante testemoni we i kam long ol sent we, oli gat semmak fet, oli stap folem toktok blong Presiden Nelson mo kasem ol blesing we oli promesem blong oli kasem.

Hemia sam long ol testemoni ia:

Wan mama blong wan yang famli i talem: “Mifala i tokbaot Kraes mo glad long Kraes insaed long hom blong mifala. Long mi hemia i bigfala blesing—blong ol pikinini blong oli save groap wetem ol toktok blong gospel ia long hom we bae i save karem olgeta i kam moa kolosap long Sevya.”⁷

Wan bigfala brata i singaotem stadi blong hem blong ol skripja tru Kam Folem Mi “olsem wan paep we i fulap wetem laet, we i kam long heven we i helpem mifala i luk doktrin blong gospel we yumi nidim blong gud blong laef blong yumi long saed blong spirit.”⁸

Wan yang waef i tokbaot ol blesing blong mared blong hem: “Mi kam blong save hat blong hasban blong mi moa dip, mo mi kam blong save openem hat blong mi moa long hem taem mitufala i stap stadi tugeta.”⁹

Wan mama long wan bigfala famli, i faenemaot olsem wanem traehad blong hem blong tijim famli blong hem i jenis. Hem i talem: “Taem mi lukluk i gobak, i olsem mi stap plei long piano wetem hanglav blong sno long han blong mi. Mi stap plei be miusik ia i no stret tumas from hanglav ia. Naoia we mi karemaot ol hanglav ia, mo we miusik blong mi i no kam stret gud yet, mi harem save wanem nao i defren. Kam Folem Mi i givim long mi fasin blong save lukluk i go fored, fasin blong save mekem samting, fasin blong tingting strong long wan samting, mo fasin blong gat stamba tingting.”¹⁰

Wan yang hasban i talem: “Ol fas impoten wok blong mi long haos oli kam moa klia taem mi stat blong mekem Kam Folem Mi i kam pat blong ol moning blong mi. Blong stap stadi i lidim blong tingting long ol samting we i moa impoten long mi, olsem tempol, rilesensip blong mi wetem waef blong mi, mo koling blong mi. Mi glad we hom blong mi i wan sef ples we God i kam faswan.”¹¹

Wan sista i serem: “Evri dei eksperiens blong mi wetem Kam Folem Mi i no tumas, be afta long wan longfala taem we i pas, mi kam blong luksave olsem wanem i jenisim mi blong tingting strong blong stadi long ol skripja. Kaen stadi olsem, i putum tingting blong mi i stap daon, i tijim mi, mo wanwan taem, i jenisim mi.”¹²

Wan misinari we i kam bak i talem: “ Kam Folem Mi program i karem mi i kam moa kolosap long level blong skripja stadi we mi bin mekem long misin blong mi, mo mi muv aot long tingting ia blong stap jekem lis blong skripja riding, i go long long level blong kam blong save gud huia God.”¹³

Wan brata i talem: “Mi filim Tabu Spirit i kam moa long laef blong mi, mo filim revelesen blong God, blong mekem ol desisen. Mi gat moa storian we i kam long hat, folem naesfala filing ia long simpol doktrin blong Atonmen blong Kraes.”¹⁴

Wan yangfala blong seven yia i serem: “I no longtaem bae mi kasem baptaes, mo Kam Folem Mi i stap mekem mi rere from. Famli blong mi mo mi i tokbaot baptaes, mo mi no filim fraet abaot baptaes naoia. Kam Folem Mi i helpem Tabu Spirit i kam long hat blong mi, mo mi filim gud taem mi ridim ol skripja.”¹⁵

Mo laswan nao i kam long mama blong ol pikinini: “Taem mifala i stap stadi long toktok blong God, Hem i helpem famli blong mifala i muv aot long wari i go long paoa; aot long hadtaem mo jalenj i go fri; aot long raorao mo fasin blong spolem man i go long lav mo pis; mo aot long paoa blong devel i go long paoa blong God.”¹⁶

Olgeta ia, mo plante moa man mo woman we oli gat fet mo oli folem Kraes, olsem wan simbol, oli putum blad blong Smol Sipsip blong God long doa blong hom blong olgeta. Oli stap soemaot komitmen we i stap insaed long olgeta blong folem Sevya. Fet blong olgeta i karem merikel i kam. Hem i merikel blong wan man we i gat wan eksperiens long ol skripja mo eksperiens ia i kam tru long paoa blong Tabu Spirit.

Taem yumi stadi long ol skripja, i no gat hanggri long saed blong kakae blong spirit long graon. Olsem Nifae i talem, “mo eni man we bae i lisin gud long toktok blong God, mo bae i hang strong long hem, bae i no save lus; mo tu, ol d temtesen mo ol spia blong devel, we i gat faea long hem, i no save winim olgeta blong mekem oli kam blaen, blong lidim olgeta oli gowe blong lus.” (1 Nifae 15:24).

Long taem bifo, taem ol pikinini blong Isrel oli folem wanem Lod i lidim olgeta long hem tru long profet Moses, i blesem olgeta wetem sefti mo fridom. Tedei taem yumi stap folem Lod i lidim yumi, tru long profet we i stap laef, Presiden Nelson, yumi kasem semmak blesing blong fasin blong jenisim laef insaed long hat blong yumi mo proteksen long hom blong yumi.

Mi testifae se Jisas Kraes i stap laef. Hemia i Jos blong Hem, we i kambak long wol tru long Profet Josef Smit. Presiden Russell M. Nelson i profet blong Lod tedei. Mi lavem mo sastenem hem. Long nem blong Jisas Kraes, amen.