Stap Tijim Fasin blong Stap Dipen long Yuwan long Ol Pikinini mo Ol Yut

Bae mi tokbaot fasin blong stap dipen long yuwan, mo olsem wanem blong tijim long ol pikinini mo ol yut. Fasin blong stap dipen long yuwan, oli save andastanem se hem i wan topik blong ol adalt. Mi kam blong save se ol adalt oli save mekem moa gud long rod blong fasin blong stap dipen long yuwan, taem oli bin tijim olgeta long gospel blong Jisas Kraes mo oli bin praktisim doktrin ia mo ol prinsipol blong hem, long taem we oli pikinini mo olsem ol yut long hom.

Bes wei blong soem hemia, hem i long wan gudfala eksampol blong tru laef. Wilfried Vanie, ol seven brata mo sista blong hem, mo mama blong hem oli bin joenem Jos long Abijan, Aevori Kos, taem hem i gat sikis yia. Hem i bin kasem baptaes taem hem i gat eit yia. Papa blong hem, mein man blong lukluk long famli, i bin ded taem Wilfried i gat leven yia.

Nomata famli situesen i mekem tingting i foldaon, Wilfried i disaed blong gohed long skul wetem ol toktok blong leftemap tingting we i kam long mama blong hem mo wetem Jos sapot. Hem i graduet long sekendri skul mo givim wan fultaem seves long Gana Kep Kos Misin, mo ples ia, hem i lanem Inglis. Afta long misin blong hem, hem i go fored, i go long yunivesiti mo kasem wan diploma long akaonting mo faenens. Nomata se i had blong kasem wok long eria blong wok ia, hem i faenem wok long indastri blong turis.

Hem i stat olsem wan man blong sevem kaekae, long wan faef sta hotel, be lav blong hem from wok ia, i pusum hem blong lanem moa kasem taem hem i wok long risepsen, olsem wan we i toktok gud long tu lanwis. Taem wan niufala hotel i open, oli givim wok long hem olsem odita blong naet . Afta, hem i enrol long BYU–Pathway Worldwide, mo naoia hem i stap stadi long wan sabjek blong kasem wan setifiket long saed blong Turis mo ol Hotel. Hem i wantem se, wan dei, bae hem i kam maneja blong wan 5 sta hotel. Wilfried i save lukaot long kompanion blong hem we i no save finis mo tufala pikinini, mo tu helpem mama mo ol brata mo sista blong hem. Naoia hem i stap givim seves insaed long Jos, olsem wan memba blong stek hae kaonsel.

Fasin blong stap dipen long yuwan, i minim, “paoa, komitmen, hadwok blong givim ol samting long saed blong wol mo long saed blong spirit we yumiwan mo famli i nidim long laef.”¹ Blong stap traehad blong stap dipen long yuwan, i pat blong wok blong yumi, blong folem rod blong kavenan, we i lidim yumi gobak long Papa blong yumi long Heven mo Pikinini Boe blong Hem, Jisas Kraes. Bae i mekem fet blong yumi long Jisas Kraes i kam moa strong mo stap glad blong folem Hem tru ol kavenan mo ol odinens blong fasin blong sevem man, mo blong kam olsem wan god. Fasin blong stap dipen long yuwan, i wan doktrin blong gospel blong Jisas Kraes i no wan program. Hem i wan rod we i bae i stap blong oltaem long laef, i no wan samting we i stap hapen samtaem nomo.

Yumi kam blong dipen long yumiwan truaot long laef blong yumi, tru long fasin blong kam antap long saed blong spirit, kam antap long saed blong bodi mo filing, stap gohed blong lukaotem edukesen mo wok, mo stap rere long saed blong ol samting blong laef long wol ia.² Long enitaem, ?wok ia bae i finis long taem yumi stap laef? No, hem i wan rod blong stap laef folem, blong lanem samting, gro, mo wok. Hem i neva en, i wan rod blong folem evri dei we i gogohed.

?Olsem wanem nao yumi save tijim doktrin mo ol prinsipol blong fasin blong stap dipen long yuwan, long ol pikinini mo ol yut blong yumi? Wan impoten wei, i blong yusum ol prinsipol blong program blong Ol Pikinini mo Ol Yut evri dei. Ol papa mo mama, mo ol pikinini, oli lanem gospel blong Jisas Kraes, oli tekpat long seves mo ol aktiviti, mo wok tugeta long fofala pat blong fasin blong stap developem wanwan, we oli spesel blong wanwan pikinini. I nomo semmak program blong evriwan.

Gaedbuk blong Ol Pikinini i talem: “Taem Jisas i gat semmak yia olsem yu, Hem i bin stap lanem samting, mo i bin groap. Yu tu, yu stap lanem samting mo stap groap. Ol skripja oli talem: ‘Jisas i stap groap moa long waes mo long bodi, mo oltaem God i glad tumas long hem, mo ol man tu oli glad tumas long hem’ (Luk 2:52).”³ Skripja ia i stap tokbaot blong kam bigwan mo stap lanem samting long wan impoten wei long saed blong spirit, we God i glad tumas long hem; sosol pat, we man oli glad tumas long hem; pat long saed blong bodi, mo pat blong tingting we i waes. Ol eria ia blong developem wanwan, i blong evriwan long yumi, nomata yia blong yumi. ?Wetaem nao yumi tijim olgeta? Long Dutronome 6:6–7 yumi ridim se:

“Yufala i no stap fogetem ol tok ya we mi mi stap givim long yufala tedei.

“Oltaem yufala i mas tijim [olgeta long] ol pikinini blong yufala. Sapos yufala i stap long haos, no yufala i stap wokbaot, no yufala i go blong slip, no yufala i girap bakegen, be yufala i mas tokbaot ol samting ya.”

Yumi tijim ol samting ia long ol pikinini tru long gudfala eksampol blong yumi, taem yumi stap wok mo givim seves wetem olgeta, stadi long ol skripja, mo stap folem ol tijing blong Jisas Kraes, olsem we ol profet oli bin tijim.

Mi bin talem se, long program blong Ol Pikinini mo Ol Yut, ol pikinini oli jusum ol defdefren gol long wanwan long ol fofala eria blong developem olgetawan. Hem i impoten se oli krietem ol gol blong olgetawan long wanwan eria ia. Ol papa mo mama mo ol lida oli save tij, kaonsel, mo sapotem olgeta.

Eksampol. Apu gel blong mitufala, Miranda we tru long eli moning seminari klas, i pusum hem blong gro long saed blong spirit, taem hem i stap tekpat evri dei. Hem i kam blong gat intres taem hem i stap harem ol gudfala komen we i kam long ol narafala studen long wod blong hem. Mama blong hem i no stap wekemap hem blong go long seminari. Hemwan nomo, i girap mo konek long vidio konfrens long taem we oli bin putum, 6:20 long moning, from se hem i bin developem ol gudfala fasin, we oli bin helpem hem blong mekem olsem. Papa mo mama blong mi, oli bin talem long mi se, naoia Miranda i toktok plante taem hem i visitim olgeta, from hem i bin developem tras long hemwan. Hemia i ol lesen blong laef mo kam bigwan, we man i luksave tru long ol aksen.

Ol papa mo mama, ol bubu man mo woman, ol lida mo ol fren, oli helpem ol pikinini blong kam bigwan mo developem olgetawan. Ol givhan brata mo sista we oli aktiv long wok blong givhan, tugeta wetem ol prishud mo oganaesesen blong ol lida blong wod, oli givim sapot. “Famli: Wan Ofisol Toktok i Go long Wol” i talem: “Folem plan blong God, ol papa oli mas lidim ol famli blong olgeta wetem lav mo fasin blong stap stret oltaem. Oli gat wok ia tu, blong luk se ol famli blong olgeta i gat proteksen mo evri samting we oli nidim long laef. Ol fas wok blong wan mama hem i blong fidim ol pikinini blong tufala long saed blong spirit mo long saed blong bodi. Long ol tabu wok ia, papa mo mama, tufala i mas helpem wanwan long tufala, olsem we tufala i semmak. … Olgeta narafala memba blong famli oli mas givim help sapos i gat nid.”⁴ Las laen ia i stap tokbaot ol bubu man mo woman, wetem ol narawan.

Taem mitufala i stap givim seves long Wes Afrika, waef blong mi Nuria, i bin mekem wan gudfala wok blong stap givhan mo oltaem stap konek wetem famli mo ol apupikinini blong mitufala, i go narasaed long bigfala solwota. Hem i mekem hemia, taem hem i stap yusum teknoloji. Hem i ridim ol buk i go long ol yangfala apupikinini. Hem i tijim ol bigfala apugel abaot ol topik olsem stori blong famli blong mifala, topik blong saens, histri blong Pueto Riko, Ol Toktok blong Bilif mo gospel blong Jisas Kraes. Tedei, nomata rod i longwe, be i no stopem yumi blong konek, kam pat, mo stap givhan, mo stap tijim ol jeneresen blong ol famli blong yumi, we oli stap kam antap. Mi tu, mi joen wetem Nuria taem mi save tijim ol gudgudfala apupikinini blong mitufala, blong lavem olgeta, mo blong givim wanem oli wantem mo mekem olgeta oli laf.

Yu mas luksave insperesen ia we oli semmak wetem fasin blong developem olgetawan, long Ol Pikinini mo Ol Yut program mo blong bildimap fasin blong stap dipen long yuwan. Ol fofala eria blong developem, long wanwan ia oli semmak nomo . Paoa long saed blong spirit long fasin blong stap dipen long yuwan, i go wetem laef long saed blong spirit, long program blong Ol Pikinini mo Ol Yut. Helt long saed blong filing mo bodi, long fasin blong stap dipen long yuwan, long saed blong bodi mo sosol i konek wetem tufala ia, insaed long program blong Ol Pikinini mo Ol Yut. Fasin blong stap dipen long yuwan, long saed blong edukesen, wok, fasin blong stap rere long ol samting blong wol, i go wetem waes, long program blong Ol Pikinini mo Ol Yut.

Blong endem, bae yumi folem Sevya blong yumi Jisas Kraes mo gospel blong Hem, taem yumi kam blong dipen long yumiwan, truaot long laef blong yumi, mo blong stap tijim hemia long ol pikinini mo ol yut blong yumi. Yumi save mekem i kam moa gud taem yumi

1. stap olsem ol gudfala eksampol, blong stap givim seves long ol narawan.

2. stap laef folem mo tij folem doktrin mo ol prinsipol blong fasin blong stap dipen long yuwan, mo

3. stap obei long ol komanmen, blong bildimap fasin blong stap dipen long yuwan, olsem pat blong gospel blong Jisas Kraes.

Doktrin mo Ol Kavenan 104:15–16 i talem:

“Hem i stamba tingting blong mi blong mi lukluk long ol sent blong mi, from we evri samting oli blong mi.

“Be i nid blong i hapen long wei blong mi; mo luk, hemia i wei we mi, Lod, mi bin talem wetem atoriti blong lukluk long ol sent blong mi, se bae ol puaman bae oli kam antap, from se bae mi mekem ol rijman oli kam daon.

Hemia i Jos Ia blong Jisas Kraes. Gospel blong Hem i blesem ol famli long wol ia mo truaot long taem we i no save finis. Hem i lidim yumi long laef blong yumi, taem yumi traehad blong kam ol famli we i no save finis. Mi save se hemia i tru. Long nem blong Jisas Kraes, amen.