Wan Bigfala Jenis long Hat

Long Fraedei 28 Oktoba 1588, afta we raba blong sip i brok mo oli yusum barel nomo, sip ia La Girona, we i wan wo sip blong man Spen ia, Armada, i bangem sam bigfala ston long Lakada Poen long Not Aerlan.¹

Sip ia i kapsaet. Wan long olgeta man long sip ia, we i traehad blong laef, i bin werem wan gol ring we waef blong hem i bin givim long hem sam manis bifo taem ia. Long ring ia oli raetem, “Mi nomo gat wan samting blong givim long yu.”²

“Mi no gat wan samting moa blong givim long yu”— wan sot toktok, mo wan ring wetem disaen blong wan han we i stap holem wan hat. Wan wei blong soem lav blong waef long hasban blong hem.

Taem mi ridim storian ia, mi nomo save fogetem. Mi bin tingting long wanem Sevya i askem long yumi: “Mo bae yufala i mekem olsem wan sakrifaes long mi, wan hat we i fulap wetem sore mo wan spirit we i wantem blong sakem sin.”³

“Yes, mifala i bin bilivim evri toktok we yu bin talemaot long mifala …, i bin mekem wan bigfala jenis long mifala, o insaed long hat blong mifala, mekem se mifala i nomo wantem blong mekem nogud fasin, be blong gohed blong mekem gudfala fasin oltaem.”⁴

Letem mi serem wetem yu wan eksperiens mi bin gat taem mi gat 12 yia, risal blong hem i stap kasem tedei.

Mama blong mi i talem: “Eduardo, hariap nao. Yumi let nao blong go long Jos.”

“Mama, mi bae mi stap wetem papa tedei,” mi ansa.

“?Yu talem tru? Yu mas go long prishud kworom miting blong yu,” hem i talem.

Mi ansa, “Sori long papa! Bae hem i stap hem wan nao. Bae mi stap wetem hem tedei.”

Papa i no wan memba long Jos ia Blong Jisas Kraes blong Ol Lata Dei Sent.

Mama blong mi mo ol sista blong mi oli go long ol Sandei miting. Mi go luk papa blong mi long woksop blong hem, ples we hem i laekem blong stap long hem evri Sandei. Mo olsem we mi bin talem long mama blong mi, mi bin stap wetem papa smol taem, hemia, sam minit nomo, mo afta mi askem hem se, “Papa, ?evri samting i oraet?”

Hem i gohed blong fiksim ol redio mo klok folem interes blong hem, mo i smael nomo long mi.

Afta mi talem long hem se, “Bae mi go pleplei wetem ol fren blong mi.”

Papa, i no luk mi be i talem long mi se, “Tedei hem i Sandei. ?Yu sud go long jos ia no?”

“Yes, be tedei mi bin talem long mama se bae mi no go,” mi ansa. Papa i gohed nomo long bisnis blong hem, mo long mi, hem i stap givim raet long mi blong go.

Long moning ia bae i gat wan impoten futbol gem, mo ol fren blong mi oli bin talem long mi se oli nidim mi. Mi no save mestem, mo mifala i mas winim gem ia.

Jalenj blong mi i blong mi pas long fored blong japel blong go long futbol fil.

Wetem strong tingting, mi ron kwik i go long futbol fil mo stop long fored blong japel we i blokem mi blong pas. Mi ron i go narasaed rod we i gat sam bigfala tri, mo disaed blong ron long medel blong ol tri ia blong mekem se bae nogat man i save luk mi, from naoia, hem i taem we ol memba oli stap kamtru blong statem ol miting.

Mi kasem stret taem we gem bae stat;. Mi bin plei mo go hom bifo mama blong mi i kambak hom.

Evri samting i bin go gud; tim blong mifala i win, mo mi bin glad tumas. Be gudfala plan blong ron long medel blong ol tri i go long fil i no bin wok from dikon kworom advaesa i bin luk mi.

Brata Félix Espinoza i bin luk mi taem mi stap ron long wan tri i go long narawan blong mekem se man i no luk mi.

Long stat blong wik, brata Espinoza i kam long haos blong mi mo askem blong toktok wetem mi. Hem i no talem eni samting abaot wanem hem i bin luk long Sandei ia, hem i no iven askem mi from wanem mi bin mestem miting blong mi.

Hem i jes givim lesenbuk long mi, mo talem: “Mi wantem yu blong tijim prishud klas long Sandei. Mi bin makem lesen blong yu finis. Hem i no had tumas. Mi wantem yu ridim, mo mi bae kam pas afta long tu dei blong helpem yu rere from lesen ia.” Afta long toktok ia, hem i givim lesenbuk ia long mi mo hem i go.

Mi no wantem tijim klas, be i had tumas long mi blong talem no long hem. Mi bin plan se long Sandei ia bae mi stap wetem papa blong mi bakegen—i minim se, bae i gat wan nara impoten futbol gem.

Brata Espinoza i wan man we ol yangfala oli respektem.⁵ Hem i bin faenem gospel ia we i kambak, mo i bin jenisim laef blong hem o, long nara toktok, hat blong hem.

Taem Satedei aftenun i kam, tingting blong mi se: “ating bae mi sik tumoro, mo bae mi no nid blong go long jos.” Hem i no futbol gem we mi wari long hem; hem klas we mi bae tijim, speseli wan lesen abaot Sabat dei.

Sandei i kam, mi bin wekap we mi helti gud bitim oltaem. Mi nomo save trik—nogat ronwe.

Hem i fas taem we mi bae tijim wan lesen, be Brata Espinoza i bin stap long saed blong mi. Hem i bin wan dei blong wan bigfala jenis long hat blong mi.

Stat long taem ia, mi stat blong kipim Sabat dei i tabu, mo sloslo, folem toktok blong Presiden Nelson, mekem Sabat dei hem i kam tabu.⁶

“Lod, mi givim long Yu evri samting; Mi no gat wan samting moa blong givim long Yu.”

?Olsem wanem nao yumi kasem wan bigfala jenis long hat? Yumi statem, mo sloslo bae i hapen:

1. Taem yumi stadi long ol skripja blong kasem save we bae i mekem fet blong yumi i kam strong moa long Jisas Kraes, mo bae i krietem wan strong filing blong wantem jenis.⁷

2. Taem yumi mekem strong filing ia blong wantem jenis i gro tru long prea mo fasin blong livim kakae.⁸

3. Taem yumi laef folem ol toktok we yumi bin stadi long hem o kasem, mo yumi mekem kavenan blong sarenda hat blong yumi long Hem, olsem ol pipol blong King Benjamin.⁹

?Olsem wanem nao yumi save se hat blong yumi i stap jenis?¹⁰

1. Taem yumi mekem samting we God i wantem.¹¹

2. Taem yumi tritim ol nara man wetem lav, respek, mo tingting.¹²

3. Taem yumi stap luk ol fasin blong Kraes oli kam ol fasin blong yumi.¹³

4. Taem yumi filim se Tabu Spirit i lidim yumi oltaem.¹⁴

5. Taem yumi kipim wan komanmen we i bin had tumas blong obei, mo gohed blong laef folem.¹⁵

Taem yumi lisin gud long ol advaes blong ol lida mo disaed wetem glad hat blong folem, ?yumi no bin filim wan bigfala jenis long hat?

“Lod, mi givim long Yu evri samting; Mi no gat wan samting moa blong givim long Yu.”

?Olsem wanem nao yumi save holemtaet bigfala jenis ia?

1. Taem yumi tekem mo kakae long sakramen evri wik ,mo riniu kavenan ia blong tekem long yumi, nem blong Kraes, mo oltaem tingbaot Hem, mo stap obei long ol komanmen blong Hem.¹⁶

2. Taem yumi tanem laef blong yumi i go long tempol.¹⁷ Blong go long tempol evri taem bae helpem yumi blong holemtaet wan niu hat, mo wan hat we i kam niu evri taem taem yumi stap tekpat long ol odinens.

3. Taem we yumi lavem mo givim seves long ol neba blong yumi taem yumi mekem ol givhan aktiviti mo misinari wok.¹⁸

Blong gat bigfala glad ia, jenis insaed ia i kam strong mo i go aot kasem i mekem plante gudfala wok.¹⁹

Bigfala jenis long hat i mekem yumi filim fridom, tras, mo pis.²⁰

Bigfala jenis long hat i no wan samting we i tekples nomo afta i finis; i nidim fet, fasin blong sakem sin, mo wok oltaem long saed blong spirit blong i hapen. Hem i stat taem yumi wantem blong mekem wanem we Lod i wantem, mo jenis blong hat i tekem ples taem yumi mekem mo kipim ol kavenan wetem Hem.

Aksen blong yu bae i helpem yu mo olgeta pipol raonabaot long yu.

Long toktok blong Presiden Russell M. Nelson, “Ol nogud raorao oli go kwik raon long wol—mo olgeta long wanwan laef blong yumi—bae oli stretem olgeta sapos yumi evriwan i jusum blong folem Jisas Kraes mo mekem folem ol tijing blong Hem.”²¹ Aksen ia blong stap folem ol tijing blong Sevya i lid i go long wan bigfala jenis long hat.

Ol dia brata mo sista, ol yang pipol, mo ol pikinini. Taem yumi pat long konfrens ia long wiken ia, letem ol toktok blong ol profet, we bae oli kam long Lod, oli go insaed long hat blong yumi blong yumi filim wan bigfala jenis.

Long yufala we i no joenem Jos ia blong Lod we i bin kambak, mi invaetem yufala blong lisin long ol misinari wetem wan strong gud filing blong wantem save wanem God i wantem long yu, mo filim jenis ia insaed long yu.²²

Tedei hem i dei blong disaed blong folem Lod Jisas Kraes. “Lod, mi givim Yu, hat blong mi; Mi no gat wan samting moa blong givim long Yu.”

Semmak olsem ring we oli faenem long sip we i draon, taem yumi givim ol hat blong yumi long God, Hem i sevem yumi long ol trabol blong laef ia. Mo folem ol step ia, yumi kam smut moa, mo kam klin gud tru long Atonmen blong Kraes mo kam “ol pikinini blong Kraes” we “hem i bin bonem yumi i kam long saed blong spirit.”²³ Long hemia, mi testifae long nem blong Jisas Kraes, amen.