Leftemap Hed blong Yu mo Stap Glad
Yumi bon long taem ia blong wan tabu wok, blong karembak Isrel i kambak tugeta.
Toktok blong Hem long Tomas B. Mars, wan niu konvet, Lod i leftemap tingting blong hem. Hem i se, “Leftemap hat blong yu mo stap glad, from aoa blong misin blong yu i stap kam” (Doktrin mo Ol Kavenan 31:3).
Mi biliv se invitesen ia i wan insperesen blong evri memba blong Jos. Yumi evriwan ia, i bin kasem misin ia long Papa long Heven blong karembak Isrel i kam tugeta long tugeta saed blong vel.
“Kam tugeta ia”, Presiden Russell M. Nelson i bin talem se hem i, “samting ia we i moa impoten we i stap tekples long wol tedei. I no gat samting we yu save komperem, we i bigwan tumas olsem, we i impoten tumas olsem, mo i hae mo i tabu tumas olsem.”1
I gat fulap samting i hapen long wol ia. Hem i no posibol blong talemaot evriwan. ?Be yu no wantem tekpat long wan bigfala wok we yu save kasem, mo we yu save mekem wan bigfala jenis? Kam tugeta ia i mekem wan jenis we i no save finis long yumi evriwan. Evri pipol we oli gat ol defren kaen yia i save tekpat long bigfala wok ia nomata wanem oli stap fesem mo ples we oli stap long hem. I nogat wan wok long wol ia we yumi evriwan i pat long hem.
Long toktok blong hem we i go speseli long ol yut, Presiden Nelson i talem: “Papa blong yumi long Heven i holemtaet plante long ol haeman mo haewoman spirit blong Hem—maet mi save talem se… Hem i nambawan tim blong Hem—blong oli kam long las pat blong taem ia. Ol haeman mo haewoman spirit ia—ol nambawan pleya ia, ol hiro ia—oli yufala!”2
Yes, yufala i bin rere bifo yufala kam long wol ia, mo yufala i bon naoia blong tekpat long bigfala wok ia blong karem Isrel i kam tugeta long tugeta saed blong vel long ol las dei ia (luk long Ol Doktrin mo Ol Kavenan 138:53–56).
?From wanem wok ia i impoten tumas? “Tingbaot se “praes blong ol sol i bigwan tumas long ae blong God” (Doktrin mo Ol Kavenan 18:10). Mo from se “huia we i biliv long [Jisas Kraes], mo i kasem baptaes, semfala ia bae mi sevem hem; mo … olgeta ia nao we bambae oli kasem kingdom blong God” (3 Nifae 11:33). Wetem hemia, “evri samting we Papa blong mi i gat, bambae God Papa i givim long hem” long olgeta we oli kasem ol odinens blong Hem mo kipim olgeta kavenan blong Hem. (Doktrin mo Ol Kavenan 84:38) Antap long hemia, “smol man nomo oli stap” (Luk 10:2).
Hem i insaed nomo long Jos Ia blong Jisas Kraes blong Ol Lata-dei Sent we yumi save faenem paoa, atoriti, mo wei blong givim blesing long ol narawan, i nomata oli laef o oli ded.
Olsem we Presiden Nelson i talem: “Eni taem yu mekem eni samting we i helpem eniwan—long tugeta saed blong vel—evri taem yu tekem wan step fored blong stap mekem ol kavenan wetem God mo stap kasem baptaes mo tempol odinens we i nid long bihaf blong olgeta, yu stap help blong karem Isrel i kam tugeta. Hem i simpol olsem ia nao”3
I gat fulap wei blong help blong karembak Isrel i kam tugeta, mi wantem tokbaot wan long ol wei ia; stap givim seves olsem wan ful-taem misinari. Long plante long yufala, hemia i minim bae yufala i stap wan tija misinari. Long plante long yufala, hemia i minim bae yufala i stap wan seves misinari. Be wol ia i traem blong pulum aot tingting blong ol yut long tabu responsabiliti ia, bae i yusum fraet mo mekem yu tingting se yu no inaf blong mekem wok ia.
Sam narafala samting we bae i pulum aot tingting i; bigfala wol sik, lego wan gudfala wok, lego skul, o yu laekem wan man o woman. Evriwan i gat ol jalenj we i blong hemwan. Ol samting we oli pulum aot tingting oli kam stret long taem we yu stap rere blong stat mekem wok blong Lod, ol joes we oli blong afta bae oli no isi blong mekem long taem ia.
Mi save, from mi bin pas tru long hem finis. Taem mi stap rere blong go long misin blong mi, i gat sam samting i kam blong stopem mi. Wan hem i dokta blong tut blong mi. Taem hem i luk se apoenmen blong mi i blong mi kam wan misinari, hem i traem blong stopem mi blong mi no go. Mi no bin save se dokta blong tut blong mi i no laekem Jos.
Blong mi stopem skul blong smol taem i had lelebet. Taem mi askem blong lego ol program blong mi long yunivesiti blong tu yia, oli talem long mi se hem i no posibol. Bae mi lusum ples blong mi long yunivesiti sapos mi no gobak afta wan yia. Long Brasil, hem i wan bigfala samting from we i gat wan wei nomo blong save tekem wan program long yunivesiti, mo hem i tru long wan had eksam we plante i kompit from.
Mi gohed blong fos, mo oli talem long mi se mi save absen blong wan yia, be mi mas aplae bakegen. Be bae oli save apruvum o no apruvum. Mi seksek tumas long tingting ia blong mi mekem bak evri tes ia bakegen afta tu yia we bae mi nomo stadi.
Mi bin laekem wan yang woman tu long taem ia. Plante long ol fren blong mi tu oli laekem hem. Mi tingting long miwan, “Sapos mi go long misin, bae mi lusum hem.”
Be Lod Jisas Kraes hem i wan bigfala insperesen blong mi blong no fraet long fiuja, taem mi stap traehad blong givim seves long Hem wetem ful hat blong mi.
Hem tu i bin gat wan misin blong flatem. Long toktok blong Hemwan, Hem i eksplenem: “From we mi mi no kamaot long heven blong mekem ol samting we mi nomo mi wantem. Mi kam blong mekem ol samting we Papa blong mi we i sanem mi mi kam, hem i wantem” (Jon 6:38). ?Mo misin blong Hem i bin isi? No i no isi. Safaring ia i mekem mi, we mi God, we mi hae long evriwan, mi seksek from soa long bodi, mo blad blong mi i ronaot long evri hol blong skin blong mi, mo mi safa tugeta long bodi mo long spirit—mo mi no wantem dring kap ia we i konkon, mo mi wantem holemtaet mi—
“Be, glori i go long Papa, mo mi dring mo mi finisim wok blong mi blong mekem rere evri samting blong gud blong ol pikinini blong ol man” (Doktrin mo Ol Kavenan 19:18–19).
Seves olsem wan fultaem misinari bae i had long yumi. Hem i nidim yumi blong lego ol samting we oli impoten long yumi blong wan smol taem nomo. Lod i save hemia, mo oltaem Hem bae i stap long saed blong yumi.
Long mesej blong olgeta i go long ol misinari insaed long Prijim Gospel blong Mi, olgeta long Fas Presidensi oli promes se, “Lod bae i givim praes, mo bae i blesem yu plante, taem yu stap givim seves wetem tingting i stap daon mo wetem prea.”4 Hem i tru se evri pikinini blong God oli kasem blesing long wan wei o wan nara wei, be i gat wan samting i defren bitwin olgeta we oli kasem blesing mo olgeta we oli kasem plante moa blesing long seves blong Hem.
?Tingbaot ol jalenj we mi ting se mi bin fesem bifo long misin blong mi? ?Dokta blong tut blong mi? Mi faenem wan narafalawan. ?Yunivesiti blong mi? Oli letem mi gobak. Tingbaot yang woman ia? Hem i maredem wan long ol gudfala fren blong mi.
Be God i bin blesem mi wetem plante moa blesing. Mi lanem se ol blesing blong Lod i save kam long ol defren kaen wei be i no long wei we yumi wantem. I tru. Ol wei blong God oli no ol wei blong yumi (luk long Aesea 55:8–9).
Long plante moa blesing we Hem i bin givim long mi taem mi givim seves olsem wan fultaem misinari hem i, bigfala fet long Jisas Kraes mo long Atonmen blong Hem, mo wan bigfala save mo testemoni long ol tijing blong Hem, mekem se bae i no isi blong mi “tantanem mi olbaot” (Efesas 4:14). Mi nomo fraet blong stap tij. Save blong mi blong fesem ol jalenj wetem strong tingting i kam antap moa. Taem mi stap lukluk long wanwan man, woman mo famli we mi bin mitim o tijim olsem wan misinari, mi lanem se ol tijing blong God oli tru taem Hem i talem se, sin i no karem tru fasin blong stap glad mo fasin blong obei long olgeta komanmen blong God, bae i helpem yumi gat plante moa long saed blong bodi mo long saed blong spirit (luk long Mosaea 2:41; Alma 41:10). Mi lanem long miwan se God i wan God blong ol merikel (luk long Momon 9).
Evri samting ia oli ol tul we oli rere long mi long adalt laef blong mi, olsem mared mo kam wan papa, Jos seves, wok blong mi mo laef long komuniti blong mi.
Afta long misin blong mi, mi gat strong tingting blong mi stap fetful blong folem Jisas Kraes mo Jos blong Hem long evri samting mo long evri pipol, iven blong serem gospel wetem wan naesfala woman we i klin i naf, i waes, i fani, mo i kompanion blong mi blong taem we i no save finis, hem i sansaen blong laef blong mi.
Yes, God i givim mi plante rij blesing, i bitim hemia we mi save pikjarem, olsem we bae Hem i mekem long olgeta we oli “putum tingting i stap daon mo givim sevem blong Hem wetem tru tingting”. Mi talem tangkyu long God from gudfala fasin blong Hem.
Misin blong mi i jenisim laef blong mi. Mi lanem se i moa gud blong putum tras long God, blong trastem waes blong Hem mo sore blong Hem, mo ol promes blong Hem. Hem i Papa blong yumi, mo i nogat tu tingting i blokem hemia, Hem i wantem wanem i gud blong yumi.
Ol dia yut raon long wol, mi talemaot sem invitesen we profet blong yumi, Presiden Nelson, i mekem long wanwan long yufala, “blong help long yut faet ia blong Lod blong help blong karembak Isrel i kambak tugeta”. Presiden Nelson i talem:
“I no gat wan bigfala risal. I nogat nomo.
“Kam tugeta ia, i mas minim evri samting long yu. Hemia nao i misin we oli sendem yufala from long wol ia.”5
Yumi bon long taem ia blong wan tabu wok, blong karembak Isrel i kambak tugeta. Taem yumi kam wan fultaem misinari, bae yu gat ol jalenj, be Lod Hemwan i bigfala eksampol mo i gaed blong yumi long taem ia. Hem i andastanem se misin i had. Wetem help blong Hem, yumi save mekem ol had samting. Hem bae i stap long saed blong yumi (luk long Doktrin mo Ol Kavenan 84:88), mo Hem bae i blesem yumi bigwan taem yumi givim seves wetem tingting i stap daon.
From ol risen ia nao, mi no sek long wanem Lod i talem long Tomas B. Mars mo long yumi evriwan, “Leftemap hat blong yu mo stap glad, from aoa blong misin blong yu i stap kam.” Long nem blong Jisas Kraes, amen.