!No Fraet: Biliv Nomo!

Toktok blong mi i go long ol yangfala pipol blong Jos, we i minim eniwan we yia blong hem i olsem blong Presiden Russell M. Nelson, i kam daon. Mi no stap yusum ol pikja tumas, be mi no save holemtaet mi blong serem hemia.

Pikja

Leta i kam long Marin Arnold

Singaot ia, cri de coeur i kam long fren blong mi we i gat eit yia, Marin Arnold, we hem i bin raetem taem hem i gat seven yia. Bae mi transletem long yufala from hem i raet long lanwis Ijip:

Marin, ating toktok blong mi tedei, bae i mekem yu harem nogud. Be, taem yu raet i go long bisop blong komplen, hem i impoten blong talem long hem se nem blong mi i “Kearon. Elda Patrick Kearon.”

Blong kolosap tu yia nao, wan wol sik we i olsem olgeta long Baebol, i kavremap planet blong yumi, mo nating we bigfala sik ia i putum stop long kolosap evri samting we i sosol, i klia se i no stopem strong fasin, vaelens, mo strong faet blong politik–long kantri o intanasonol. Mo olsem se hemia i no inaf, yumi stap fesem yet ol jalenj blong longtaem long saed blong sosaeti mo kalja, stat long fasin blong sot long vatu i go we yumi sot long samting long envaeromen, kasem we yumi luk nogud long ol pipol folem kala blong skin mo moa.

Ol strong win mo tudak dei olsem, i save mekem tingting blong ol yut i foldaon, be yumi lukluk long olgeta blong gat hop mo paoa long maen, long saed blong tumoro blong laef blong yumi. Oli talem se “paoa blong ol yut, i bigfala rij samting blong ful wol. Ol … yangfala … oli fes blong fiuja blong … yumi.”² Blong ademap, ol pikinini blong yumi, oli olgeta we yumi trastem mo putum fiuja blong Jos ia long han blong olgeta.

From taem blong yumi tedei, yumi andastanem se gud tingting abaot ol yangfala, i stap godaon smol. Dokta Laurie Santos, wan profesa long Yel Yunivesiti, i jes statem wan klas we oli singaotem “Tingting blong maen mo Gudfala Laef.” “Long fas yia we oli putumaot klas ia, kolosap wan kwota blong ful grup blong ol andagraduet studen, oli enrol.”³ Ova 64 milian pipol oli visitim podkas blong hem. Taem hem i stap raet abaot niu samting ia, wan junalis i talem se i had blong luk se plante long ol smat yang studen—mo adalt—oli “lukaotem bigwan wan samting we oli bin lusum”, o mowas long hemia, oli wantem tumas wan samting we oli neva gat.⁴

Plis blong mi tedei long ol yut blong yumi, mo long yufala ol papa mo mama, mo adalt we i stap givim advaes long olgeta, i blong stat blong lukaotem hapines taem yufala i akseptem ol plante samting we yumi bin kasem finis long Hem we i givim evri gudfala presen.⁵ Naoia i stap, plante long wol oli gat ol bigfala kwestin insaed long sol blong olgeta, we yumi sapos blong ansarem wetem “gud nius” ia⁶ blong gospel blong Jisas Kraes. Jos Ia blong Jisas Kraes blong Ol Lata-dei Sent, we i holem hae antap misin mo mesej blong Sevya blong wol, i givim ol bes wei we i no save finis blong faenem gud samting mo mekem gud samting long taem ia blong nid.

Presiden Russell M. Nelson i bin talem se jeneresen ia blong ol yang pipol oli gat paoa blong mekem “plante gud samting long wol ia bitim eni jeneresen blong bifo.”⁷ Yumi, aot long evri pipol, yumi sapos blong stap “singsing long singsing blong lav ia we i pemaot man⁸ be hemia i nidim disiplin—“o fasin blong disaepol,” sapos yu wantem—kaen fasin ia we i holemtaet hem agensem ol nogud fasin mo ol fasin we i prapa spolem man, we bae i mekem yumi singsing rong taem bae yumi traem blong singsing long singsing ia blong sevem man blong taem we i no save finis.

Iven sapos yumi stap long “gud saed blong rod,”⁹ yumi stap fas wanwan taem long man ia we i gat strong tingting blong faenem wan nogud samting mo luk evri ting i tudak. Yu save moto ia: “I tudak oltaem iven bifo yu stat.” !Hem i wan prapa nogud lukluk mo hem i wan nogud laef! Yes, samtaem bae yumi wantem ronwe long ples we yumi stap long hem, be i tru se bae yumi no save ronwe long huia yumi—ol pikinini blong God we i stap laef, we i lavem yumi, i rere oltaem blong fogivim yumi, mo bae Hem i neva, neva ronwe long yumi. Yu yu pikinini we i impoten tumas long Hem. Yu, yu pikinini blong Hem, we Hem i givim long ol profet mo ol promes long yu, ol presen long saed blong spirit mo ol revelesen, ol merikel mo ol mesej, mo ol enjel long tugeta saed blong vel¹⁰

Mo tu, Hem i bin givim yu wan jos we i mekem ol famli oli kam strong moa long laef long wol ia, mo i joenem olgeta blong taem we i no save finis. Hem i givim moa long 31,000 wod mo branj, ol ples we ol pipol oli kam tugeta wanples, mo oli singsing, mo oli livim kaekae, mo prea blong wanwan long olgeta, mo oli givim wanem we oli gat long ol puaman. Ples ia nao oli givim nem mo oli kaontem mo givhan long evri man mo woman, mo i ples we ol fren mo neba oli givim volontia seves long wanwan long olgeta tru long ol koling we i stat long klak wok i go kasem, blong lukaot long bilding. Ol yang adalt—mo tu, ol senia kapol misinari— plante taosen long olgeta, oli go long misin, mo pem misin blong olgeta, mo oli no save jusum ples we bae oli wok long hem; mo ol memba, yang o olfala oli go long ol tempol blong mekem ol tabu odinens we i nid blong joenem tugeta famli blong man—wan strong aktiviti long wan wol we i seraot, be i stap talem klia se hemia i blong sot taem. Hemia samfala risen, from wanem yumi givim “hop ia we i stap insaed long yumi.”¹¹

I tru, long taem tedei, ol bigfala had samting i fesem eni disaepol blong Jisas Kraes. Ol lida blong Jos Ia, oli stap givim laef blong olgeta blong lukaotem rod we Lod i soem blong stretem ol jalenj ia. Sapos sam oli no folem tingting blong evriwan, maet oli pat blong kros ia we Jisas i talem se bae yumi tekem blong save stap folem Hem.¹² I from se bae i gat ol tudak dei mo ol had problem, we i mekem se God i bin promesem se bambae Hem, tru long klaod long dei mo tru long stamba blong faea long naet, bae i lidim ol profet, i givim wan aean rel, mo i openem wan get we i no isi blong pas, we i lidim man long rod we i stret, mo antap long evriwan, i givim yumi paoa blong kasem en blong rod ia.¹³

So, plis plis. Stap kasem kaekae blong lafet i finis iven sapos yu no sua se brokoli i gud o no. Kam insaed long laet blong Hem mo serem kandel blong yu long bigfala wok ia.¹⁴ Oli talem stret long Praemeri: Jisas i rili wantem “yumi stap olsem laet blong san.¹⁵

Taem lida blong Ol Man Jiu, i askem blong Jisas i hilim gel blong hem we i gat 12 yia we i stap slip ded long hom, bigfala grup blong ol pipol oli lidim rod blong Sevya i longwan tumas mekem se wan wokman i kam, i talem long papa ia we i stap wari: “Gel blong yu i ded finis. Yu no trabolem Masta.”

“Be taem Jisas i harem, hem i ansa, i talem : “yufala i no fraet; Yufala i biliv nomo, mo bae hem i kam oraet.”¹⁶

Mo hem i kam oraet. Semmak long yu. “!No fraet: biliv nomo!”

From se wanwan long yufala insaed ia i impoten tumas long God mo long Jos blong Hem, mi endem wetem spesel toktok blong mi olsem aposol. Bifo yu bin kasem presen we i Tabu Spirit, yu bin gat Laet blong Kraes we oli putum insaed long sol blong yu,¹⁷ laet ia we i stap long evri samting, i givim laef long evri samting,¹⁸ mo i paoa long tingting blong yu mekem gud long hat blong evri pipol we i bin laef o bae i laef long wol ia. Laet ia, oli givim blong i protektem mo tijim yu. Wan long stamba mesej, i we, laef ia i wanem presen we i moa hae long evri presen, wan presen we yumi kasem blong taem we i no save finis tru nomo long Atonmen blong Lod Jisas Kraes. Olsem Laet mo Laef blong Wol,¹⁹ Wan Stret Pikinini Ia Nomo blong God we i bin kam blong givim yumi laef taem Hem i bin winim ded.

Yumi mas komitim yumi long presen ia we i laef, mo ron blong helpem olgeta we oli stap long denja we oli stap lego tabu presen ia. Ol lida, ol advaesa, ol fren, ol famli—lukaot gud blong faenem ol saen blong sik blong tingting, fasin blong lusum hop, o eni samting we bae i talem yu se wan i wantem karemaot laef blong hemwan. Talem se bae yu help. Lisin. Mekem wan samting we yu luk se bae i stret.

Long eni yut blong yumi we yu stap, we yu gat hadtaem wetem wan samting, nomata wanem wari blong yu, o samting we i had, ded tru long fasin blong tekemaot laef blong yuwan, i no ansa. Bae i no helpem harem nogud ia we yu stap filim o we yu ting se yu stap givim. Long wan wol we i nidim tumas evri laet we hem i save karem, plis, yu no daonem laet we i no save finis we God i bin putum insaed long sol blong yu bifo wol ia i stat. Toktok long wan Askem help. Yu no aotem wan laef we Kraes i bin givim laef blong Hem blong holemtaet gud. Yu save tekem ol had samting blong laef long wol ia from se bae mifala i helpem yu blong tekem olgeta. Yu yu strong moa bitim we yu save. Help i stap, we i kam long ol narawan, mo speseli, we i kam long God. Oli lavem yu mo yu yu impoten, mo oli nidim yu. !Mifala i nidim yufala! !No fraet: biliv nomo!

Wan we i bin fesem ol semmak situesen we oli moa had long hemia yu mo mi i fesem, i bin talem wan taem: “Go fored be i no biaen [ol yang fren we mi lavem tumas]. !Gat strong paoa long tingting … mo gohed, go fored kasem viktri! Hat blong yumi i mas stap glad, mo stap glad tumas.”²⁰ Yumi gat fulap samting blong stap glad from. Yumi gat wanwan long yumi, mo yumi gat Hem. No karemaot janis blong mifala blong gat yu. Mi testifae olsem long tabu nem blong Lod Jisas Kraes, Masta, amen.