Rod blong Kavenan: Wei we I Go long Laef we I No Save Finis

Wan king we i gat fulap paoa i wantem pikinini boe blong hem blong i rul long wan long ol kingdom blong hem. Prins ia i mas lanem mo gro long save blong save sidaon long jea blong king ia. Wan dei, king ia i luk prins ia mo serem plan blong hem. Tufala i agri se bae prins ia i go long wan defren taon mo kasem sam eksperiens. Hem bae i fesem ol jalenj, mo tu, glad long evri gud samting longwe. King i sendem hem i go long taon, ples ia nao bae prins i pruvum long king sapos hem i fetful long king, mo bae hem i soemaot se hem i save kasem ol raet mo responsabiliti ia we bae hem i givim long hem. Prins i gat fridom ia blong jusum blong kasem ol raet mo responsabiliti ia o no, i dipen long wanem hem i wantem mo fasin blong hem blong stap fetful. Mi sua se yu wantem save se wanem i hapen long prins. ?Hem i gobak blong karem kingdom ia?

Ol dia brata mo sista. Wanwan long yumi i wan boe blong king o gel blong king. Oli sendem yumi kam long wol ia aot long wan Papa we i stap long Heven we i lavem yumi tumas, blong kasem blesing ia blong bodi, mo blong yumi kam olsem wan god tru long atonmen blong girap bakegen blong Jisas Kraes. Yumi nid blong rere blong gobak mo stap wetem God taem yumi soem se bae yumi “mekem evri samting we Lod, God blong [yumi] bae i givim oda long [yumi]” (Ebraham 3:25).

Blong helpem yumi, Sevya i kam blong sevem yumi mo soem rod ia blong gobak mo stap wetem God. Ol pikinini blong God oli invaetem olgeta blong kam long Sevya mo kam stret evriwan long Hem. Insaed long ol skripja, yumi faenem invitesen ia blong yumi kam long Lod we oli ripitim ova 90 taem, mo moa long haf long hemia, i invitesen blong yuwan we i kam long Lod Hemwan. Blong akseptem invitesen blong Sevya i minim blong tekpat long ol odinens blong Hem mo kipim ol kavenan blong yumi wetem Hem. Jisas Kraes i “rod ya, mo i stamba blong trutok, mo i stamba blong laef” (Jon 14:6), mo Hem i invaetem yumi “evriwan blong kam long hem mo tekem pat long gud fasin blong hem” (2 Nifae 26:33).

Stamba blong lanem mo tijim gospel i blong mekem tru jenis blong folem Papa we i stap long heven mo Jisas Kraes, mo blong helpem yumi kam moa olsem Tufala. Nomata we oli no soemaot evri samting abaot stret taem mo olsem wanem bae ol blesing blong kam olsem god bae i kam, yumi save gud se ol blesing ia bae oli kam (M. Russell Ballard, “Hop long Kraes,” Liahona, Mei 2021, 55).

Hae pris Alma, we i stap tij long graon blong Sarahemla, i talem strong invitesen blong Jisas Kraes se:

“Luk, hem i sendemaot wan toktok long evri man blong kam, from hem i stretem ol han blong sore i go long olgeta, mo hem i talem: ‘Sakem sin, mo bae mi akseptem yufala.’

“Yes, hem i talem: ‘Kam long mi mo bae yufala i save tekem mo kakae frut blong tri blong laef” (Alma 5:33–34

Sevya Hemwan i invaetem yumi blong kam long Hem mo tekem long yumiwan yok blong Hem blong yumi save gat spel long wan wol we i fulap long noes (luk long Matiu 11:28–29). Yumi kam long Kraes taem “yumi stap praktisim fet long Kraes, sakem sin evri dei, stap mekem ol kavenan wetem God taem yumi kasem ol odinens blong fasin blong sevem man mo kam olsem wan god, mo stap strong kasem en taem yumi stap kipim olgeta kavenan ia” (Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, 1.2.1, Churchofjesuschrist.org/study?lang=bis). Rod blong kam stret evriwan i rod blong kavenan, mo Jisas Kraes i stap long medel blong ol odinens mo ol kavenan ia.

King Benjamin i tijim se from ol kavenan we yumi mekem, yumi kam ol pikinini boe mo gel blong Kraes, we long saed blong spirit hem i gat yumi, mo anda long Hem yumi fri, from “fasin blong sevem man i no save kam tru long wan narafala nem” (luk long Mosaea 5:7–8 Yumi sef taem yumi stap strong kasem en taem yumi “folem eksampol blong Pikinini blong God we i stap laef, Lod i no save sevem hem.” (2 Nifae 31:16 Nifae i givim kaonsel ia se evri samting oli mekem long rod ia we i stret mo smol, be yumi “mas wokbaot fored wetem strong bilif long Kraes, wetem wan stret mo klin hop, mo wan lav blong God mo blong evri man” (luk long 2 Nifae 31:19–20

Doktrin blong Kraes i helpem yumi blong faenem mo stap long kavenan rod ia, mo gospel ia i folem wan oda we i mekem se ol promes blesing blong Lod yumi kasem tru long ol tabu odinens mo ol kavenan. Profet blong God, Presiden Russell M. Nelson i talem strong long yumi long 16 Jenuware 2018 telekas blong “stap long kavenan rod ia. Komitmen blong yu blong folem Sevya taem yu mekem ol kavenan wetem Hem, mo afta, blong gohed blong holem ol kavenan ia, bambae i openem doa long evri blesing long saed blong spirit, mo blong kasem spesel janis ia we i stap long ol man, woman, mo pikinini long evri ples. … En, we wanwan long yumi i stap traehad from, i blong oli kavremap yumi wetem paoa insaed long wan haos blong Lod, blong yumi sil olsem ol famli, blong yumi stap fetful long ol kavenan we yumi mekem insaed long tempol; ol kavenan ia oli mekem yumi kwalifae from presen ia we i moa bigwan we i kam long God—we i laef we i no save finis” (“Taem Yumi Stap Muv Tugeta I Go Fored,” Liahona, Epril 2018, 7).

God bae i no lego rilesensip we Hem i gat, o bae i no holemtaet ol blesing blong promes blong laef we i no save finis long eniwan we i fetful blong kipim ol kavenan. Mo taem yumi stap ona ol tabu kavenan, bae yumi muv i go kolosap moa long Sevya. Elda David A. Bednar i bin tijim yumi yestedei se ol kavenan blong gospel, mo ol odinens blong gospel, oli wok insaed long laef blong yumi olsem wan kampas, blong i givim yumi ol stret daereksen blong go long Kraes mo kam moa olsem Hem.

Ol kavenan i makem rod i gobak long God. Ol odinens blong baptaes mo kasem presen ia we i Tabu Spirit, odinesen blong prishud, mo sakramen, i lidim yumi i go long tempol blong Lod blong tekpat long ol odinens blong Hem blong kam olsem god.

Mi laekem blong talem tu samting we Sevya i talem strong blong helpem yumi blong yumi fetful blong kipim ol kavenan:

1. Tabu Spirit i tijim yumi, rimaenem yumi long ol tijing blong Sevya, mo stap wetem yumi blong oltaem (luk long Jon 14:16, 26). Hem bae i stap olsem wan kompanion blong yu blong oltaem blong lidim yumi long rod blong kavenan ia. Presiden Russell M. Nelson, i tijim yumi se, “long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem” (“Revelesen blong Jos, Revelesen blong Laef blong Yumi,” Liahona, Mei 2018).

2. Sevya i mekem odinens blong sakramen, blong oltaem yumi tingbaot Hem mo gat Spirit blong Hem i stap wetem yumi. Baptaes i openem get blong go long laef we i no save finis, mo sakramen i helpem yumi blong yumi muv i go fored wetem kavenan rod ia. Taem yumi tekpat long sakramen bae hem i wan testemoni long Papa se bae oltaem yumi tingbaot Pikinini Boe blong Hem. Mo oltaem bae yumi tingbaot Hem mo kipim olgeta komanmen blong Hem, bae yumi gat Spirit blong Hem i stap wetem yumi. Antap long promes ia, Lod i riniu long promes ia blong kam klin long sin taem yumi sakem sin wetem tingting i stap daon.

Taem yumi stap fetful long olgeta kavenan blong yumi, yumi mas traem blong oltaem gat Spirit blong Hem blong i rere long yumi blong yumi klin inaf blong tekpat long sakramen, semmak long hemia tu, taem yumi tekpat long sakramen oltaem blong gat Spirit blong Hem i stap wetem yumi.

Taem we pikinini gel blong mitufala i gat faef yia, hem i gat wan trak we i wok wetem batri, mo hem i laekem blong draevem raon long haos. Wan naet, hem i kam long mi mo i talem, “Papa, trak blong mi i nomo save ron. ?Yumi save go from sam masut long trak blong yu blong putum long trak blong mi blong i save ron bakegen? Ating hem i olsem trak blong yu, i nidim masut blong i ron.”

Mi lukluk mo mi luk se batri i flat, mekem se mi talem long hem, bae yumi save draevem long wan aoa taem. Hem i glad tumas mo i talem, “!Yes! Bae yumi tekem i go long fiul stesen.” Mi jes go mo jajem batri, mo afta long wan aoa hem i save draevem trak blong hem bakegen. Afta long hemia , hem i lanem se hem i impoten blong jajem batri, taem yu konektem i go long wan paoa.

Semmak olsem we gel blong mi i lanem rilesensip ia bitwin batri mo paoa blong save draevem pleplei trak blong hem, yumi tu yumi lanem abaot Jisas Kraes, sakramen, mo Spirit. Yumi nidim Spirit blong i helpem yumi go tru long wol ia taem yumi fetful blong kipim ol kavenan, mo yumi nidim sakramen blong putumbak paoa long saed long spirit. Blong stap riniu olgeta kavenan we yumi mekem long taem blong baptaes mo taem yumi stap tekem mo kakae sakramen, i mekem yumi gat fasin blong stap fetful long ol narafala kavenan. Wan en we i hapi, taem yumi gohed blong stadi givim ona long invitesen blong Sevya mo glad wetem ol promes blesing blong Hem. Hem i talem, “Mo blong yu save lukaot gud blong ol samting blong wol oli no spolem yu, yu mas go long haos blong prea mo mekem ol tabu seremoni long tabu dei blong mi” (Doktrin mo Ol Kavenan 59:9).

Mi testifae se ol man blong kipim kavenan oli promesem “pis long olgeta long wol ia mo long laef we i no save finis long wol we i stap kam” (Doktrin mo Ol Kavenan 59:23). Mi talem witnes se taem yu stap tekem mo kakae long ol saen blong Sevya oltaem tru long sakramen, bambae yu gat Spirit blong Hem i stap blong lidim yu long kavenan rod ia mo stap fetful long kavenan blong yu. Long nem blong Jisas Kraes, amen.