Strong Disaepol long Taem blong Ol Las Dei

Fasin blong jusum gud o nogud, i wan long ol bigfala presen we God i givim long ol pikinini blong Hem.¹ Mo yumi “fri blong jusum fridom mo laef we i no save finis, tru long bigfala Man blong Toktok blong evri man, o blong jusum blong kam prisena mo ded, folem fasin blong kam prisena mo paoa blong devel.”² God bae i no fosem yumi blong mekem gud mo devel i no save fosem yumi blong mekem nogud.³ Nomata se sam oli ting se laef long wol ia i wan faet bitwin God mo enemi, taem Sevya i tok, Setan i stap kwaet mo i gowe. … God i stap traem paoa blong yumi, be i no paoa blong Hem.”⁴

Long en, bambae yumi kakae wanem we ol laef joes blong yumi i planem.⁵ So, ?wanem nao totol blong evri tingting long maen, long hat, ol toktok, mo wok blong yumi oli stap talem abaot lav ia we yumi gat long Sevya, ol wokman we Hem i jusum, mo Jos blong Hem we i kambak? ?Weswe? ?Ol kavenan blong baptaes, prishud mo tempol oli minim moa long yumi bitim ol pres blong wol ia, o bitim namba blong ol “laek” long sosol media? ?Weswe? ?Lav blong yumi long Lod mo ol komanmen blong Hem oli moa strong bitim lav blong yumi long eni samting, o eni narawan insaed long laef ia?

Enemi mo olgeta we oli stap folem hem, oltaem oli bin wantem blong prapa spolem gud ol wok blong Kraes mo ol profet blong Hem. Ol komanmen blong Sevya, plante long wol tedei, oli no wantem save nating long ol, o oli mekem eskius wetem ol smol samting. Ol mesenja blong God we oli stap tijim ol trutok we i no stret long tingting blong man, plante taem, oli sakemaot olgeta. Iven Sevya Hemwan, oli bin singaotem Hem se “man blong kakae tumas, mo i man blong drong,⁶ se Hem i stap spolem hat blong pablik mo i seraotem ol man. Ol sol we oli no strong mo trikim man, oli “go mekem toktok blong traem faenem rod blong mekem Jisas i foldaon long ol tok blong hem.”⁷ mo “grup blong hem” we i gat ol fasfala Kristin Man, oli tokbaot nogud olgeta long evri ples.⁸

Sevya, mo olgeta we oli biaen long olgeta, oli bin stap fesem agens insaed mo aotsaed long grup blong olgeta, mo yumi fesem i semmak tedei. Tedei, kolosap i nomo posibol blong gat strong paoa long tingting blong laef folem bilif blong yumi, mo no fesem sam fingga blong wol ia we oli poenem yumi. Be yumi save trastem se, blong stap folem Sevya, i gat praes from, be samtaem, yumi fas long ol nogud tok blong olgeta we oli stap prijim tingting blong “kakae, dring mo stap hapi,”⁹ from oli riplesem bilif long Kraes mo fasin blong stap obei mo fasin blong sakem sin wetem giaman tingting ia se God bae i sarem ae long wan smol sin from se Hem i lavem yumi plante.

Taem Hem i toktok tru long voes blong Hem o ol wokman blong Hem,¹⁰ ?Sevya i no talem se long taem blong yumi, “we ol man bambae oli no moa wantem harem ol trutok. Bambae oli save mekemhed, blong go lukaot plante narafala tija olbaot, we oli save talem wanem tok we olgeta oli wantem,” mo plante “oli no save lesin long ol trutok, be bambae oli gowe long hem blong go lesin long ol kastom stori ya we oli no tru”?¹¹ ?Hem i no bin talem se “Oli stap mekem wosip long mi blong nating nomo, from we taem oli tijim ol man, oli talem se tok ya i blong mi, be i tingting blong man nomo?”¹² ?Hem i no bin givim woning finis se “i gat taem i stap kam, we sam man blong yufala bambae oli save girap, oli giaman nomo blong lidim ol man blong Jisas oli biaen long olgeta, oli go krangke?¹³ Hem i no bin luk finis se bae man i singaotem ivel se i gud, mo gud se i ivel?¹⁴ Mo se “bambae man i gat ol enemi blong hem, we olgeta oli famli blong hem nomo.”¹⁵

?Be olsem wanem long yumi? ?Bae yumi sek o fraet? ?Bae yumi haed blong laef folem bilif blong yumi? !No i no olsem.! Wetem fet long Kraes, yumi no nid blong fraet long ol toktok blong man, o stap fraet long ol agens blong olgeta.¹⁶ Wetem Sevya i stap long stia, mo wetem ol profet we oli stap laef blong lidim mo gaedem yumi, ?huia nao bae i agensem yumi?”¹⁷ Bae yumi gat tras be no talem sore, yumi strong be i no semsem, yumi fetful be i no fraet taem yumi stap holem laet blong Lod i stap antap long ol las dei ia.¹⁸

Sevya i talem klia se “man we i talemaot nem blong mi long fes blong ol man, bambae mi tu, mi talemaot nem blong hem long fes blong Papa blong mi long heven. … Man we i talemaot long fes blong ol man, se hem i no man blong mi, bambae mi tu, mi talemaot long fes blong Papa blong mi long heven, se hem i no man blong mi.”¹⁹

From hemia, taem sam oli wantem wan God we i kam we i no gat komanmen, bae yumi testifae klia wetem ol toktok blong Elda D. Todd Christofferson se, “wan God we i no askem samting, i semmak long wan God we i no laef, i no stap.”²⁰

I gat samfala we oli wantem jusum ol komanmen we oli stap folem, be bae yumi akseptem, wetem glad, invitesen ia blong Sevya blong “laef folem evri toktok we i kamaot long maot blong God.”²¹

Taem we plante oli biliv se Lod mo Jos blong Hem bae oli fogivim wanem we hat blong yumi i wantem,²² bae yumi strong blong talem se hem i rong blong folem “bighaf blong ol man oli mekem samting we i no stret,”²³ from se “ol big grup blong ol man oli no save mekem i raet wanem we God i talemaot se i rong.”²⁴

“O tingbaot, tingbaot, … ol komanmen blong God, i blong mas folem stret evriwan.”²⁵ Blong stap tijim ol komanmen ia i klia, samtaem, man i luk se i wan aksen blong gat sot maen. So, bae yumi mas soemaot, wetem respek, se i posibol, be tu, se i wan mas blong lavem wan pikinini blong God we i gat ol bilif we oli defren long ol bilif blong yumi.

Yumi save akseptem mo respektem ol narawan, mo semtaem, no akseptem ol bilif o aksen blong olgeta we oli no folem stret tingting blong Lod. I no gat nid blong sakrifaesem trutok long olta blong samting we blong agri o akseptem long sosaeti.

Saeon mo Babilon, tufala i no go wan. “I no gat man i save wok blong tu masta.”²⁶ Bae yumi evriwan i tingbaot bigfala kwestin blong Sevya: “?Weswe yufala i stap singaot mi se, ‘Masta*, Masta,’ be yufala i no save mekem ol samting ya we mi talem long yufala?”²⁷

Bae yumi soemaot lav we yumi gat long Lod tru long fasin blong obei we i kam long hat mo wetem tingting blong yumiwan.

Sapos yu filim se yu stap long medel blong fasin blong stap disaepol mo fasin blong wol ia, plis tingbaot se Sevya blong yu we i lavem yu, “hem i sendemaot wan toktok long evri man blong kam, from hem i stretem ol han blong sore i go long [yu], mo hem i talem: ‘Sakem sin, mo bae mi akseptem [yu].’”²⁸

Presiden Russell M. Nelson i tijim: “Jisas Kraes, bambae i mekem sam bigbigfala wok bitwin naoia mo taem we bae Hem i kambak bakegen.”²⁹ Be tu, Hem i tijim se “olgeta we oli jusum wei blong Lod, bambae i luk se bae oli gotru long wanem i kam agensem olgeta.”³⁰ Blong God i kaontem yu se yu “inaf blong kasem sem long fes blong ol man, from nem blong Jisas,”³¹ samtaem i hevi wok blong yumi ia blong “letem voes blong Hem i kam faswan long eni nara voes.”³²

Sevya i talem se: “Mo man we i luk mi, mo i no gat tu tingting long mi, hem i save harem gud.”³³ Long nara ples, yumi lanem se: “Olgeta we oli laekem Loa blong yu oli stap gud oltaem nomo, i no gat wan samting we i save mekem olgeta oli foldaon.”³⁴ !I no gat samting.! So, yumi askem yumiwan: “?Mi mi stap strong, be taem hadtaem o agens i kam from toktok blong God, be mi foldaon?³⁵ ?Mi mi bildimap mi strong antap long strong ston ia we i Jisas Kraes mo ol wokman blong Hem?”

Sam man oli stap faet strong se, trutok, i wan samting we sosaeti i mekemap, se i no gat ol rul blong wanem i gud mo nogud. Wanem we oli stap talem, i we, i no gat sin,³⁶ se “eni samting we wan man i mekem, i no brekem loa,”³⁷ !mo hemia wan tingting we Setan i klemem wetem praod! Nao, from hemia, yumi lukaotgud long ol wael dog we oli werem klos blong sipsip, we oltaem, mo plante taem, oli “yusum save blong olgeta blong kavremap rong fasin blong olgeta.”³⁸

Sapos yumi rili wantem blong stap ol strong disaepol blong Kraes, bambae yumi faenem wan wei. Sapos no, enemi i stap switim yumi wetem ol nara wei. Be, olsem ol fetful disaepol, “yumi no nid blong talem sore from bilif blong yumi, o kamaot long wanem we yumi save se i tru.”³⁹

Blong endem, wan smol toktok abaot ol 15 wokman blong God we oli sidaon biaen long mi. Taem we olgeta long wol oli stap talem long ol sia: “yufala i no luk,” mo oli talem long ol profet: “Yufala i no talem profesi,”⁴⁰ olgeta we oli fetful “bae mi givim long olgeta ia ol blesing we oli kam long heven antap long hed blong olgeta, olsem hat blong king, yes, mo plante komanmen, mo ol revelesen long stret taem blong olgeta.”⁴¹

I no wan sapraes se ol man ia, plante taem oli kam ol laetning faea blong olgeta we oli no stap hapi wetem toktok blong God, olsem we ol profet oli talem. Olgeta we oli stap sakemaot ol profet, oli no luksave se “wok blong talemaot mining blong tok blong ol profet …, hem i no wan wok we man i save mekem, hemwan,” o i risal blong tingting blong man, “from we … taem tok blong profet i kamaot, … be Tabu Spirit i stap givim tok long olgeta, nao oli talemaot tok we i kamaot long God.”⁴²

Semmak olsem Pol, ol man ia oli “no sem blong testifae abaot Lod,” mo oli “ol prisena” blong Hem⁴³ long wei ia se, doktrin we oli tijim, i no blong olgeta, be i blong Hem we i singaotem olgeta. Semmak olsem Pita, bae oli gohed “blong talemaot ol samting ya we [oli] luk long ae blong [olgeta], mo we [oli] harem long sora blong [olgeta].”⁴⁴ Mi testifae se Fas Presidensi mo Kworom blong Olgeta Twelef Aposol oli ol gudfala man mo ol ones man we oli lavem God mo ol pikinini blong Hem, mo God i lavem olgeta. Ol toktok blong olgeta, yumi sapos blong akseptem olsem se oli kamaot long stret maot blong Lod, wetem fasin blong save wet longtaem mo wetem fet. Taem yumi mekem olgeta samting ia, ol get blong hel bae oli no save win agensem [yumi] … mo Lod God bae i ronemaot ol paoa blong tudak long fes blong yumi.”⁴⁵

“I no gat eni doti han we i save stopem wok ia blong i gohed;”⁴⁶ bae i gohed kasem viktri, wetem o no wetem yu o mi, so yu jusum gud tedei, huia bae yu wok blong hem.”⁴⁷ Yu no foldaon long trik o fraet long ol laod noes blong enemi we oli kamaot long bigfala bilding ia wetem plante rum. Ol sap tiun blong olgeta oli no naf long paoa blong pis blong smol kwaet voes we i wok long hat we i talem sore mo spirit we i wantem sakem sin.

Mi testifae se Kraes i stap laef, se Hem i Sevya mo Ridima blong yumi, se, Hem i stap lidim Jos blong Hem tedei tru long Fas Presidensi mo Kworom blong Olgeta Twelef Aposol, mo long wei ia, i meksua se oli no saksakem yumi go kam, mo yumi no folem eni kaen win blong doktrin.”⁴⁸

“Ol tru disaepol blong Jisas Kraes,” Presiden Nelson i tijim, “oli wantem blong oli luk olgeta, oli toktok, mo oli defren long ol pipol blong wol ia. Oli no fraet, oli tru mo strong, mo oli gat strong paoa long tingting.⁴⁹

Ol brata mo sista. !Hem i wan gud taem blong stap gud man! Long tabu nem blong Jisas Kraes, amen.