Fa’a’ohipa ana’e i te maita’i tano noa

E vai noa vau i roto te māuruuru rahi nō teie pi’ira’a i roto i te ’Ēkālesia tei tono iā’u, ’ia ora i roto i te mau fenua e rave rahi. ’Ua noa’a ia mātou e rave rau mau ’ite nō te huru ta’a ’ē ’e te au ho’i o te mau nuna’a ’e te raura’a o tā rātou mau peu ’e tā rātou hīro’a tumu.

’E peu ’e e hīro’a tumu tō tātou pā’āto’a nō te ta’ata ’ōtahi, nō roto mai i te ’utūafare ’aore rā nō roto mai i te orara’a huira’atira i reira tātou e ora ai, ’e tē ti’aturi nei tātou e tāpe’a mai terā e ana’i nei i ni’a i te mau parau tumu o te ’evanelia. E hina’aro-mau-hia te mau peu ’e te mau hīro’a tumu teitei i roto i tā tātou mau tauto’ora’a nō te fa’aea i ni’a i te ’ē’a nō te fafaura’a, ’e terā e riro ’ei pāto’ira’a e ti’a ia tātou e fa’aru’e atu i te reira.

’Ua riro te peu ’ei ’ohipa ’aore rā e ferurira’a tāmau ’e te mātauhia nō te hō’ē ta’ata, te ta’ere ’aore rā te hīro’a tumu. Mea pinepine, te mea tā tātou e feruri nei ’e e fa’a’ohipa nei ma te huru tāmau, e ’itehia e mea « tano noa ».

Fa’ati’a mai iā’u i te fa’ahōho’a i te reira : Tō’u hoa here ’o Patricia , mea au roa nāna i te inu i te pape ha’ari ’e te amu ato’a i te mā’a ha’ari. Tō māua tere mātāmua i te ’oire nō Puebla i Mehiko, ’ua haere atu māua i te hō’ē vāhi nō te ho’o mai i te ha’ari. Te paura’a te pape i te inuhia, ’ua ani tō’u hoa here ’ia tāpuhia te ha’ari ’e ’ia hōpo’i mai te ’i’o. Te taera’a mai, ’ua mā ute’ute te ’i’o. ’Ua tūtūhia i te hu’ahu’a ri’i ’ōporo i ni’a iho ! Ha’ari monamona ’āno’ihia ’e te ’ōporo ! ’Ua riro te reira e mea huru ē nō māua Terā rā i muri iho mai, tō māua ha’api’ira’a ē taua mea huru ’ē ra, nō māua ïa ’e tō’u hoa here, ’aita roa atu māua i ’amu i te ha’ari ’āno’ihia ’e te ’ōporo. ’Āre’a rā, i Mehiko, e ’ere ïa i te mea varavara e mea tano noa te reira.

I te tahi atu taime, tē tāmā’a ra māua ’e tō māua nā hoa i Peretīria, ’e ’ua hōro’a mai rātou i te mā’a ’āvōta. I te taime ’a tūtū haere ai māua i te miti pāpa’a i ni’a iho, ’ua parau mai tō māua nā hoa ē, « te aha ra ’ōrua ! ? ’Ua tu’u a’ena mātou i te tihota i ni’a iho i te ’āvōta ! » ’Āvōta ’e te tihota ! ’Ua riro te reira e mea huru ’ē roa nō māua. Terā rā i muri iho mai, tō māua ha’api’ira’a mai ē, taua mea huru ’ē ra, nō māua ïa ’e tō’u hoa here, ’aita māua e ’amu nei i te ’āvōta ’āno’ihia ’e te tihota. Terā rā i Peretīria, te ’āvōta e tūtūhia i te tihota i ni’a iho, e fa’anahora’a tano noa ïa.

Te mea tano noa nō te tahi, e mea huru ’ē ïa nō vetahi, tei te huru o tā rātou mau peu ’e tā rātou hīro’a tumu.

’E aha te peu ’e te hīro’a tumu e tano noa i roto i tō tātou orara’a ?

Tē nā ō ra peresideni Nelson ē : « I teie mahana e mea pinepine tātou i te fa’aro’o i te parau nō te ‘terera’a ’āpī tano noa’. Mai te mea e hina’aro mau ’outou e pe’e i te hō’ē terera’a ’āpī tano noa, tē ani nei au ia ’outou ’ia fāriu atu i tō ’outou ’ā’au, te ferurira’a ’e te vaerua i tō tātou Metua i te ao ra ’e i tāna tamaiti ’o Iesu Mesia. ’Ia nā-reira-hia tō ’outou terera’a ’āpī tano noa » (« E terera’a ’āpī nō te mau mea », Liahona, Novema 2020, 118).

Teie tītaura’a, nō te tā’āto’ara’a ïa. ’Aita e hi’ora’a e feiā veve ’aore rā e feiā ’ona tātou, tei ha’api’ihia ’aore rā ’aita, e mea ru’au ’aore rā e mea ’āpī, tei ma’ihia ’aore rā te ora maita’i. Tē tītau nei ’oia ’ia vaiiho i te mau mea tano noa i roto i tō tātou orara’a, ’ia riro ’ei tauturu ia tātou ’ia mau pāpū i ni’a i te ’ē’a nō te fafaura’a.

’Aita hō’ē a’e fenua tei roto iāna te tā’āto’ara’a o te mea maita’i ’aore rā te mea fa’ahiahia. Teie rā, mai tā Paulo ’e tā Iosepha Semita te peropheta i ha’api’i :

« E mai te mea tē vai atu ra te mau mea maita’i, te mau mea fa’ahiahia, te mau mea ro’o maita’i ’e te mau mea poupouhia ra, e tītau ïa mātou i te reira » (Hīro’a Fa’aro’o 1:13).

« Te vai na te tahi mea ha’amaita’i ra, e ha’amana’o i taua mau mea ra » (Philipi 4:8).

’A hi’o na, e a’ora’a teie e ’ere noa i te hō’ē tātarara’a mana’o.

Tē hina’aro nei au ia tātou pā’āto’a ’ia rave i te hō’ē taime nō te feruri māite i ni’a i tā tātou mau peu ’e te huru tā te reira e fa’auru i tō tātou ’utūafare.

I roto i te mau peu fa’ahiahia mau ’o te nehenehe e riro ’ei mea tano noa nō te mau melo o te ’Ēkalesia, tē vai nei e maha :

1. Tā ’oe iho ’e tā te ’utūafare tuatāpapara’a i te pāpa’ira’a mo’a. Nō te riro ’ei ta’ata fa’afāriuhia i te Fatu ra ia Iesu Mesia, e hōpoi’a nā te mau melo tāta’itahi o te ’Ēkālesia i te ’apo mai i te ’evanelia nōna iho. E hōpoi’a nā te mau metua te ha’api’ira’a i te ’evanelia i tā rātou mau tamari’i (hi’o Te Ha’api’ira’a Tumu ’e te mau Fafaura’a 68:25 ; 93:40).

2. Tō ’oe iho pure ’e tā te ’utūafare. Tē fa’aue mai nei te Fatu ia tātou ’ia tāmau noa i te pure (hi’o Te Ha’api’ira’a Tumu ’e te mau Fafaura’a 19:38). ’Ua hōro’a mai te pure ia tātou i te rāve’a nō te paraparau i tō tātou Metua i te ao ra nā roto i te i’oa o tāna Tāmaiti, ’o Iesu Msesia.

3. Te haerera’a i te purera’a ’ōro’a i te mau hepetoma ato’a (hi’o 3 Nephi 18:1–12 ; Moroni 6:5–6). Tē na reira nei tātou nō te ha’amana’o ia Iesu Mesia, ’ia rave ana’e tātou i te ’ōro’a mo’a. I roto i teienei ’ōro’a, e fa’a’āpī te mau melo o te ’Ēkalesia i tā rātou mau fafaura’a nō te rave i ni’a ia rātou i te i’oa o te Fa’aora ’e ’ia ha’amana’o noa iāna, ’e ’ia ha’apa’o i tāna mau fa’auera’a (hi’o Te Ha’api’ira’a Tumu ’e te mau Fafaura’a 20:77, 79).

4. Te ’āmui-pinepine-ra’a atu i te ’ohipa hiero ’e te ’ā’amu ’utuāfare. ’Ua riro teie ’ohipa ’ei tuha’a nō te tāhō’ēra’a ’e te tā’atira’a i te mau ’utūafare nō te ao mure ’ore (hi’o Te Ha’api’ira’a Tumu ’e te mau Fafaura’a 128:15).

E aha tō tātou huru ’ia fa’aro’o ana’e tātou i teie nā ’ohipa e maha ? E tuha’a ānei te reira nō tō tātou orara’a tano noa ?

Tē vai nei e rave rahi atu ā hīro’a tumu ’o te nehenehe e riro ’ei huru tano noa ’o tā tātou i ha’amau, i te vaiihora’a i te Atua ’ia upo’oti’a i roto i tō tātou orara’a.

Nāhea tātou e nehenehe ai e fa’ata’a e aha te mau mea tano noa i roto i tō tātou orara’a ’e i roto i tō tātou ’utūfare ? I roto i te mau pāpa’ira’a mo’a, tē ’ite nei tātou i te tahi hi’ora’a maita’i roa ; i roto i te Mosia 5:15 e parau nei : « I hina’aro ai au ’ia tāmau māite ’outou ma te ’āueue ’ore, ’ia rahi ā i te ’ohipa maitata’i ».

Tē here nei au i teie mau parau, nō te mea ’ua ’ite tātou ē te mau mea ’o te riro mai e mea tano noa i roto i tō tātou orara’a, ’o terā ïa o tā tātou e nā ni’a noa ’e e nā ni’a fa’ahou. Mai te mea e tamau māite noa tātou ma te ’āueue ’ore ’ia rave i te maita’i, e tu’ati noa tā tātou peu i te mau parau tumu o te ’evanelia, ’e e tauturu te reira ia tātou ’ia fa’aea noa i ni’a i te ’ē’a nō te fafaura’a.

’Ua a’o ato’a mai te peresideni Nelson : « A tauahi i tō ’outou terera’a ’āpī tano noa ma te tātarahapara’a i te mau mahana ato’a. ’A ’imi ’ia vai vi’ivi’i ’ore hau atu ’outou i roto i te mana’o, te parau ’e te ’ohipa. ’A aupuru ia vetahi ’ē. ’A tāpe’a noa i te hō’ē hi’o ātea mure ’ore. ’A fa’a’ū’ana maita’i i tō ’outou mau pi’ira’a. ’E noa atu tō ’outou mau tāmatara’a, e au mau taea’e ’e e au mau tuahine here, ’a ora i te mahana tāta’itahi ’ia ineine hau atu ’outou nō te fārerei i tō ’outou Rahu nui » (« E terera’a ’āpī nō te mau mea », 118).

I teienei e ’ere fa’ahou i te mea huru ’ē nō māua tō’u hoa here, Patricia, te ’amura’a i te i’o ha’ari ’āno’ihia ’e te ’ōporo—e inaha, ’ua au roa ho’i māua i te reira. ’Āre’a rā, e ’ohipa te fa’ateiteira’a tei hau atu i te aura’a nō te mā’a ; e tumu parau tei tū’ati i te ora mure ’ore.

Tē pure nei au ē, ’ia fāri’i tō tātou huru tano noa i te mau ’ite tei fa’a’ite i te « ’oa’oara’a hope ’ore » tei tohuhia nō tei ha’apa’o i te mau fa’auera’a a te Atua (Mosia 2:41) ē ’ia fa’a’ohipahia te reira, e ti’a ai ia tātou i te parau ē, « pārahi iho ra mātou ma te ’oa’oa » (2 Nephi 5:27)

Tō’u mau taea’e ’e mau tuahine, tē fa’a’ite pāpū nei au nō teie nā tino 15 tā tātou i pāturu ’ei peropheta, ’ei hi’o ’e ’ei heheu parau, ’oia ato’a tō tātou peropheta here te peresideni Russell M. Nelson. Tē fa’a’ite pāpū nei au ē, e parau mau Te ’Ēkālesia a Iesu Mesia i te Feiā Mo’ā i te mau Mahana Hōpe’a nei. Tē fa’a’ite pāpū nei au ē, ’o Iesu Mesia, tō tātou Fa’aora ’e tō tātou Tāra’ehara nā roto i te i’oa o Iesu Mesia ra, ’āmene.