Te fa’a’amura’a ’e te fa’a’itera’a i tō ’outou ’itera’a pāpū

E mea pinepine te mau taime faufa’a o te orara’a i te tupu mai ’e ma te mana’o-’ore-hia, ’e noa atu ē, e mea ’āpī noa ā outou. Tē hina’aro nei au e fa’a’ite atu i te ’ā’amu o te hō’ē pīahi nō te ha’api’ira’a tuatoru, ’o Kevin, tei mā’itihia nō te tere i rāpae i te tuha’a fenua nō te hō’ē ’ohipa nō te pīahi fa’atere, mai tāna iho i fa’ati’a.

« ’Ua tae mai tō’u taime ’e ’ua ani mai te pāpa’i parau i tō’u i’oa. ’Ua hi’o ’oia i tāna tāpura ’e nā ’ō maira, ‘’O ’oe terā taure’are’a nō Utaha mai.’

« ‘Tē parau ra ’oe ē, ’o vau ana’e ?’ Tā’u ïa uira’a.

« ‘’Ē, ’o ’oe ana’e.’ Hōro’a mai nei tā’u tāreta ma te pāpa’ihia ‘Utaha’ i raro a’e i tō’u i’oa. I tō’u tāmaura’a i te tāreta, mai te huru ra ē, ’ua tāpa’ohia vau.

« ’Ua fa’aō vau iā’u i roto i te piha ta’uma uira ’e e pae atu pīahi ’nō te ha’api’ira’a teitei ’e tō rātou tāreta i’oa mai tō’u. ‘Hey, nō Utaha mai ’oe. E momoni ’oe ?’ te uira’a ïa a te hō’ē pīahi.

« ’Aita vau i ’āfaro maita’i i rōpu i teie mau pīahi fa’atere ’e ’ati a’e te fenua. ’Ua pāhono atu vau ‘’Ē’ ma te ’oti’ati’a ri’i.

« ‘’Outou terā mau ta’ata e ti’aturi nei ia Iosepha Semita tei parau ē, ’ua ’ite ’oia i te mau melahi. ’Aita ’oe e ti’aturi mau nei i te reira, ’ere ānei ?

« ’Aita vau i ’ite e aha tē parau. ’Ua hi’o noa mai te mau pīahi i roto i te piha ta’uma uira iā’u. Nō tae noa mai nei ho’i au, ’e ’ua mana’o te mau ta’ata ato’a ē, e mea ta’a ’ē au. ’Ino’ino ri’i au, ’e ’ua parau atu ra vau ē, ‘’Ua ’ita au e peropheta Iosepha Semita nā te Atua.’

« ‘Nō hea mai terā parau ?’ ’Ua māere au. ’Aita vau i ’ite e roa’a iā’u ’ia nā reira. Terā rā, mai te huru ra ē, e mau parau mau te reira.

« ‘’Oia, ’ua fa’aro’o iho ā vau ē, e mau ta’ata fa’aro’o ma’ama’a ana’e ’outou’, tāna ïa parau.

« I muri iho, ’ua tupu te māmū au ’ore a matara ai te ’ūputa o te piha ta’uma uira. ’A ’ohi ai mātou i tā mātou mau tauha’a, ’ua haere atu ’oia nā roto i te aroā tomora’a ma te ’ata.

« I muri iho, ’ua ui maira te hō’ē reo i muri iā’u, ‘Hei, tē vai ra ānei tā te mau momoni te tahi atu huru Bibilia ?’

« Auē. ’Eiaha fa’ahou ā. ’Ua huri au nō ’e ’ua ’ite atu i te tahi atu pīahi tei ti’a ato’a i roto i te piha ta’uma uira ’e ’o vau, ’o Christopher tōna i’oa.

« ‘E parauhia te reira, te Buka a Moromona,’ tā’u ïa parau, ma te hina’aro e tāpū i te reira tumu parau. ’Ua rave mai au i tā’u mau pūtē ’e ’ua ha’amata i te haere nā roto i te aroā tomora’a.

« ‘Terā te buka tā Iosepha Semita i ’īriti ?’ tāna ïa uira’a.

« ‘’Ē, tē reira iho ā,’ tā’u ïa pāhonora’a. ’Ua haere noa vau, ’ia ’ore au e ha’amā.

« ‘’Ua ’ite ānei ’oe ē, nāhea e roa’a mai ai hō’ē iā’u ?’

« I terā iho taime, ’ua puta maira te hō’ē ’īrava nō te Séminaire i roto iā’u. ‘’Aore ho’i au i ha’amā i te ’evanelia a te Mesia.’¹ A puta mai ai terā i roto i tō’u ferurira’a, ’ua ha’amā vau i te mea ē, ’ua huru ’ē au.

« ’Aita terā ’īrava i fa’aru’e fa’ahou iā’u nō te toe’a o te hepetoma. ’Ua pāhono vau i te mau uira’a e rave rahi nō ni’a i te ’Ēkālesia ’e ’ua rahi roa tō’u mau hoa i reira.

« ’Ua ’ite a’era vau ē, e fa’ahiahia rahi tō’u i tā’u ha’apa’ora’a fa’aro’o.

« ’Ua hōro’a vau i te hō’ē Buka a Moromona ia Christopher. I muri a’e, ’ua pāpa’i mai ’oia iā’u, ma te parau mai ē, ’ua ani ’oia i te mau misiōnare ’ia haere mai i tōna fare.

« ’Ua ha’api’i mai au ’eiaha e huru ’ē ’ia fa’a’ite i tō’u ’itera’a pāpū. »²

’Ua fa’auru te itoito o Kevin iā’u i te fa’a’itera’a i tōna ’itera’a pāpū. Te hō’ē te reira itoito tei fa’a’ite-tāmau-noa-hia i te mau mahana ato’a nā te mau melo ha’apa’o maita’i o te ’Ēkālesia ’ati a’e te ao nei. A fa’a’ite atu ai au i tō’u mau mana’o, tē ani atu nei au ia ’outou ’ia feruri i teie nā uira’a e maha :

1. ’Ua ’ite ānei au, ’e ’ua ta’a ānei au e aha te hō’ē ’itera’a pāpū ?

2. ’Ua ’ite ānei au e mea nāhea ’ia fa’a’ite i tō’u ’itera’a pāpū ?

3. E aha te mau fifi nō te fa’a’ite i tō’u ’itera’a pāpū ?

4. Nāhea vau i te tāpe’a maīte i tō’u ’itera’a pāpū ?

Tō ’outou ’itera’a pāpū, ’o te hō’ē ïa tao’a faufa’a rahi a’e, ’o tē ’āpitihia i te mau mana’o pae vārua hōhonu. I te rahira’a o te taime, ’e fa’a’itehia te reira mau mana’o ma te marū o tē tātarahia ’ei « reo iti marū. »³ ’O tō ’outou ïa ti’aturira’a ’aore rā tō ’outou ’itera’a i te parau mau, ’o tei hōro’ahia ’ei fa’a’itera’a pae vārua nā roto i te fa’aurura’a a te Vārua Maita’i. E taui te fāri’ira’a i teie ’itera’a i te mea tā ’outou e parau ’e e nāhea ’outou ’ia rave. Teie te tahi mau tāpa’o faufa’a nō tō ’outou ’itera’a pāpū, ha’amauhia e te Vārua Maita’i :

• Te Atua tō ’outou Metua i te ao ra ; E tamari’i ’outou nāna. ’Ua here ’oia ia ’outou.

• Tē ora nei Iesu Mesia. E tamaiti ’oia nā te Atua ora ’e e Fa’aora ’e e tāra’ehara nō ’outou.

• E peropheta Iosepha Semita nā te Atua tei pi’ihia nō te fa’aho’i fa’ahou mai i te ’Ēkālesia a Iesu Mesia.

• Te ’Ēkālesia a Iesu Mesia i te Feiā Mo’a i te mau Mahana Hope’a Nei, ’o te ’Ēkālesia ïa a te Atua i fa’aho’i-fa’ahou-hia mai i ni’a i te fenua nei.

• Tē arata’ihia nei te ’Ēkālesia a Iesu Mesia e te hō’ē peropheta ora i teie mahana.

E fa’a’ite ’outou i tō ’outou ’itera’a pāpū ’ia fa’a’ite ana’e ’outou i te mau mana’o pae vārua ia vetahi ’ē. ’Ei melo nō te ’Ēkālesia, tē vai ra te taime fa’a’itera’a i tō ’outou ’itera’a pāpū parau vaha i roto i te mau putuputura’a mātarohia a te ’Ēkālesia, ’aore rā te mau ’āparaura’a te tahi ’e te tahi ’e tō ’outou ’utuāfare, tō ’outou mau hoa ’e te tahi atu mau ta’ata.

Te tahi rāve’a nō te fa’a’ite i tō ’outou ’itera’a pāpū, e nā roto ïa i tō ’outou huru. Tō ’outou ’itera’a pāpū nō Iesu Mesia, e ’ere tā ’outou mau parau noa, ’o tō ’outou huru mau ïa.

I te mau taime ato’a e fa’a’ite ’outou nā roto i te parau vaha i te ’itera’a ’aore rā e fa’a’ite ’outou nā roto i tā ’outou mau ’ohipa i tā ’outou fafaura’a ’ia pe’e ia Iesu Mesia, tē ani ra ïa ’outou ia vetahi ’ē ’ia « haere mai i te Mesia ».⁴

E ti’a te mau melo o te ’Ēkālesia ’ei mau ’ite nō te Atua i te mau taime ato’a, i roto i te mau mea ato’a, ’e i te mau vāhi ato’a.⁵ E mea hope ’ore te mau rāve’a nō te rave i te reira i roto i te ao rorouira ma te fa’a’ohipa i tā tātou iho mau parau fa’auruhia ’aore rā ma te fa’a’ite i te mau parau fa’aitoito tei fa’aineinehia e vetahi ’ē. E fa’a’ite pāpū tātou ’ia here ana’e tātou, ’ia hōro’a ana’e, ’e ’ia ani manihini ana’e tātou, nā ni’a ato’a i te natirara. E riro tā ’outou mau tweet, mau MP, ’e mau pāpa’ira’a, i te mea faufa’a rahi a’e ’e te mo’a a’e ’a fa’a’ohipa ato’a ai ’outou i te mau rāve’a tūreiara’a sōtiare nō te fa’a’ite i te ’ohipara’a a ’evanelia a Iesu Mesia i roto i tō ’outou orara’a.

Teie te tahi mau fifi nō te fa’a’itera’a i tō ’outou ’itera’a pāpū, ’oia ho’i, te pāpū ’ore i te mea e parau. ’Ua fa’a’ite ’o Matthew Cowley, hō’ē o te mau ’āpōsetolo mātāmua, i teie ’itera’a ’a reva ai ’oia i te 17 o tōna matahiti, nō te hō’ē misiōni e pae matahiti te maoro i Niuterani :

« ’E’ita roa atu e mo’ehia iā’u te mau pure a tō’u metua tāne i te mahana a reva ai au. ’Aita vau i fa’aro’o a’enei i te hō’ē ha’amaita’ira’a nehenehe a’e i roto i tō’u orara’a. ’E tāna mau parau hope’a iā’u i te fare tāpe’ara’a pereo’o auahi, ‘E tā’u tamaiti, e reva ’oe i te misiōni ; e tuatāpapa ’oe i te ’evanelia ; e fa’aineine ’oe i tā ’oe mau a’ora’a ’e i te tahi taime ’ia pi’i-ana’e-hia ’oe, e feruri ’oe ē, ’ua ineine maita’i roa ’oe, terā rā, ’ia ti’a ana’e i ni’a, ’aita hō’ē mea fa’ahou i roto i tō ’oe ferurira’a.’ ’Ua tupu iho ā taua ’ohipa e rave rahi taime.

« Nā ’ō atura vau, ‘E aha tā ’oe e rave ’ia ’ore ana’e hō’ē a’e mea i roto i tō ’oe ferurira’a ?’

« Nā ’ō maira ’oia, ‘E ti’a noa ’oe i reira, ’e ma te pūai ato’a o tō ’oe vārua, e fa’a’ite ’oe i te ’itera’a ē, ’ua riro na o Iosepha Semita ’ei peropheta nō te Atua ora, ’ei reira te mau mana’o e māni’i mai ai i roto i tō ’oe ferurira’a ’e te mau parau i roto i tō ’oe vaha […] i roto i te ’ā’au o te mau ta’ata e fa’aro’o mai ra.’ ’E nō reira, nō te mea ’aita hō’ē a’e mea i roto i tō’u ferurira’a i te rahira’a o te taime i roto i tā’u […] misiōni […] nā te reira i hōro’a mai iā’u i te rāve’a nō te fa’a’ite i te ’itera’a pāpū nō te ’ohipa rahi roa a’e i roto i te ’ā’amu o te ao nei mai te taime o te fa’atataurora’a o te Fatu. ’A tāmata na i te reira i te tahi taime, e te mau tamāroa ’e te mau tamahine. Mai te mea ē, ’aita atu tā ’outou e parau fa’ahou, a fa’a’ite pāpū ē, ’ua riro ’o Iosepha Semita ’ei peropheta nā te Atua, ’ei reira te tā’ato’ara’a o te ’ā’amu o te ’Ēkālesia e māni’i mai ai i roto i tō ’outou ferurira’a ».⁶

’Ua fa’a’ite ato’a mai te peresideni Dallin H. Oaks, « E roa’a maita’i a’e te tahi mau ’itera’a pāpū i ni’a i te mau ’āvae e amo ra ia rātou, i terā i ni’a i te turi e pure ra nō rātou ».⁷ E fa’a’ite pāpū te vārua i te ta’ata e paraparau ’e i te ta’ata e fa’aro’o.

Te tahi ato’a fifi, mai tā te ’ā’amu ’o Kevin e ha’apāpū nei, ’oia ho’i, te mata’u. Mai tā Paulo i pāpa’i ia Timoteo :

« E ’ere ho’i i te ’ā’au taiā tā te Atua i hōro’a mai nō tātou ; i te ’ā’au itoito rā, ’e te aroha…

’Eiaha ’oe e ha’amā i te parau o tō tātou Fatu »⁸

E ’ere te mau mana’o taiā nō roto mai i te Fatu, e mea pinepine nō roto mai i te ’enemi. Te fāri’ira’a i te fa’aro’o, mai ia Kevin i nā reira, e tauturu te reira ia ’outou ’ia upo’oti’a i ni’a i te reira mau huru mana’o ’e ’ia fa’a’ite maīte i te mau mea i roto i tō ’outou ’ā’au.

Tē ti’aturi nei au ē, e vaira’a tumu tō te ’itera’a pāpū i roto ia tātou, terā rā, nō te tāpe’a maīte ’e nō te fa’ahotu pāpū i te reira, ’ua ha’api’i mai ’o Alama ē, « e tauturu ïa tātou ma te tīa’i maīte.⁹ ’Ia nā reira ana’e tātou, e « a’ahia, e tupu i ni’a, ’e e fa’ahotu mai ho’i i te mā’a ».¹⁰ ’Ia ’ore te reira « e ’ōriorio ïa ».¹¹

’Ua hōro’a mai te mau melo o te Peresidenira’a Mātāmua tāta’itahi i te arata’ira’a nō te tāpe’a i te ’itera’a pāpū.

’Ua ha’api’i mai te peresideni Henry B. Eyring ē, « e ti‘a i te ’oa’oara’a i te parau a te Atua, te pure ’ū’ana, ’e te ha’apa’ora’a i te mau fa’auera’a a te Fatu ’ia fa’a’ohipa-māite-hia ’e ’ia tamauhia nō te tupu-ruperupe-ra’a o tō tātou ’itera’a pāpū.¹²

’Ua fa’aha’amana’o mai te peresideni Dallin H. Oaks ē, nō te tāpe’a i tō tātou ’itera’a pāpū, « tītauhia ’ia rave i te ’ōro’a mo’a i te mau hepetoma ato’a (hi’o D&C 59:9) ’ia noa’a te fafaura’a ē, e ‘vai noa tōna Vārua i roto ia [tātou] ē a muri noa atu’ (D&C 20:77) ».¹³

’Ua a’o mai te peresideni Russell N. Nelson ’aita i maoro a’e nei :

’A fa’a’amu i [tō ’outou ’itera’a pāpū] i te parau mau.

« …’A fa’a’amu ia ’outou iho i te mau parau a te mau peropheta i tahito ra ’e nō teie tau. ’A ani i te Fatu ’ia ha’api’i ia ’outou nāhea ’ia fa’aro’o maita’i a’e iāna. ’A hōro’a hau atu i te taime i roto i te hiero ’e i roto i te ’ohipa hiero ’e te ’ā’amu utuafare.

« … ’Ia riro tō ’outou ’itera’a pāpū ’ei ’ohipa mea mātāmua roa e ti’a ai ».¹⁴

E tā’u mau taea’e ’e mau tuahine here, tē fafau atu nei au ē, mai te mea, e hāro’aro’a hope hau atu ’outou e aha te ’itera’a pāpū, ’e mai te mea, e fa’a’ite ’outou i te reira, e upo’oti’a ’outou i ni’a i te mau fifi o te huru pāpū ’ore ’e te taiā, ’e nā te reira e tauturu ia ’outou ’ia fa’a’amu ’e ’ia tāpe’a maīte i teie tao’a faufa’a rahi roa a’e, ’oia tō ’outou ’itera’a pāpū.

E fāna’ora’a tō tātou ’ia fāri’i i te mau hi’ora’a e rave rahi o te mau peropheta tahito ’e nō teie anotau tei fa’a’ite i tō rātou ’itera’a pāpū ma te itoito.

I muri a’e i te pohera’a o te Mesia, ’ua ti’a ’o Petero i ni’a ’e ’ua fa’a’ite pāpū :

« ’Ia ’ite mai ’outou ato’a […] ’e nō te i’oa o Iesu Mesia o Nazareta, tā ’outou i fa’asatauro iho nei, ’o tei fa’ati’ahia e te Atua mai te pohe maira […] nōna i ti’a atu ai teie nei ta’ata i mua i tō ’outou aro […]

« ’Aita atu ho’i e i’oa i fa’a’itehia mai i te ta’ata i raro a’e i teie nei ra’i e ora ai tātou nei ».¹⁵

I muri a’e i te a’ora’a a Alama nō ni’a i te fa’aro’o, ’ua parau ’o Amuleka ma te puai : « ’o vau iho, e fa’a’ite atu vau ia ’outou ē, e parau mau teie mau mea. Inaha, tē parau atu nei au ia ʼoutou ē, ’ua ʼite au ē, e tae mai te Mesia i rotopū i te tamariʼi a te taʼata […] ’ia riro ʼoia ’ei tāraʼehara nō tō te ao nei ; ’ua parau mai ho’i te Fatu te Atua i te reira ».¹⁶

I muri a’e i tō Iosepha Semita ’e ’o Sidney Rigdon rirora’a ’ei ’ite nō te hō’ē orama hanahana o te Fa’aora ti’a fa’ahou, ’ua fa’a’ite pāpū rāua :

« E i teie nei, i muri mai i te mau parau fa’a’ite e rave rahi ’o tei hōro’ahia nōna ra, ’o teie ho’i te parau fa’a’itera’a hope’a roa ra, ’o tā māua e fa’a’ite atu nei nōna : ’Oia ho’i tē ora nei ’oia !

« Nō te mea ’ua ’ite mata atura māua iāna, i te pae ’atau ho’i nō te Atua ; ’e ’ua fa’aro’o māua i te reo i te fa’a’itera’a mai ē, ’o ’oia ana’e te Fanau Tahi ra nō te Metua ».¹⁷

E te mau taea’e ’e te mau tuahine, tē ani atu nei au ia ’outou ’ia ’imi i te mau rāve’a nō te fa’a’ite i tō ’outou ’itera’a pāpū nā roto i te parau ’e te ’ohipa. ’Ua tupu mai te reira huru rāve’a i ni’a iā’u ’aita i maoro a’e nei, i te pae hope’a o te hō’ē putuputuraa ’e te tavana o te ’oire pū i Amerika apato’a, i roto i tōna piha tōro’a ’e e rave rahi atu mau melo nō tāna ’āpo’ora’a. A fa’aoti ai mātou ma te mana’o maita’i, ’ua feruri au ma te ’oti’ati’a ri’i, e ti’a iā’u ’ia fa’a’ite i tō’u ’itera’a pāpū. Ma te ha’apa’o i te muhumuhura’a, ’ua pūpū vau i te hō’ē ’itera’a ē, e tamaiti Iesu Mesia nā te Atua ora ’e e Fa’aora nō tō te ao. ’Ua taui te mau mea ato’a i taua taime ra. ’Ua vai te hō’ē Vārua pūai i roto i te piha. E au ē, ’ua putapū te mau ta’ata ato’a. « Tē fa’a’ite pāpū mai ra ho’i [te Fa’aa’o] i te parau nō te Metua ’e nō te Tamaiti ».¹⁸ E māuruuru rahi tō’u nō te roa’ara’a iā’u te itoito nō te fa’a’ite i tō’u ’itera’a pāpū.

’Ia tupu ana’e te hō’ē taime mai teie te huru, ’a tāpe’a mai ’e ’a tauahi mai. E ’ite ’outou i te māhanahana o te Fa’aa’o i roto ia ’outou ’ia nā reira ana’e ’outou.

Tē pūpū nei au i tō’u ’itera’a pāpū ’e te hōhonu ē, ’o te Atua tō tātou Metua i te Ao ra, tē ora nei ’o Iesu Mesia, ’e te ’Ēkālesia a Iesu Mesia i te Feiā Mo’a i te Mau Mahana Hope’a nei, ’o te ’Ēkālesia ïa a te Atua i ni’a i te fenua nei i teie mahana, ’e ’ua fa’aterehia e tō tātou peropheta herehia, ’o Russell M. Nelson. I te i’oa o Iesu Mesia ra, āmene.