’Oa’oa ē a muri noa atu

E au mau hoa, te mau taea’e, te mau tuahine here, tē ha’amana’o ra ānei ’outou i tō ’outou ti’aturira’a, tō ’outou hina’aro e ti’aturi i te ’oa’oa ē a muri noa atu ?

Haere a’era te orara’a. ’Ua « pa’ari » tātou. ’Ua tāfifi tō tātou mau tā’amura’a. E ao māniania teie ’e te ta’ata rahi ’e te onoono, ma te fa’ahua ’e te fa’a’oru. I « te hōhonu rā o tō tātou ’ā’au »,¹ tē ti’aturi nei tātou, ’e ’ua hina’aro tātou e ti’aturi ē, e vāhi ’e e rāve’a e ’ite-pāpū-hia ai te ’oa’oa ē a muri noa atu.

E ’ere te « ’oa’oa ē a muri noa atu » i roto i te mau ’ā’ai heu noa. Te ’oa’oa mau ’e te vai maoro, ’e te vai-mure-’ore-ra’a i pīha’i iho i te feiā tā tātou i here, ’o te tumu mau ïa nō te fa’anahora’a a te Atua nō te ’oa’oa. E ti’a i tōna ’ē’a, tei fa’aineinehia nā roto i te here, ’ia fa’ariro i tō tātou tere mure ’ore, ’ei mea ’oa’oa ē a muri noa atu.

’Ua rahi te mea e fa’ahanahana ’e e māuruuru. Terā rā, ’aita te hō’ē o tātou i tae i te fāito maita’i roa, ’aita ato’a ho’i e ’utuāfare. I roto i tō tātou mau tā’amura’a, tē vai nei te here, te huru hoara’a ’e tō tātou huru, tē vai ato’a nei rā te ’ume’umera’a, te pēpē ’e i te tahi taime, te māuiui rahi.

« Mai te ta’ata i hope i te pohe ia Adamu, e hope ato’a i te fa’aorahia e te Mesia. »² Te parau fa’aorahia e te Mesia, ’o te tāhuti ’ore ato’a ïa—tāna hōro’a nō te ti’afa’ahoura’a pae tino. ’Ia ora tātou nā roto i te fa’aro’o ’e te ha’apa’o, te parau fa’aorahia e te Mesia, ’o te ora mure ’ore ’auhune ato’a ïa ’e te ’oa’oa i pīha’i iho i te Atua ’e tei herehia.

Ma te fa’ahiahia rahi, tē ha’afātata nei te peropheta a te Fatu ia tātou i tō tātou Fa’aora, nā roto ato’a ho’i i te mau ’ōro’a mo’a nō te hiero ’e te mau fafaura’a e ha’afātatahia nei ia tātou, i te mau vāhi e rave rahi atu ā. E rāve’a hōhonu mau nā tātou, ’e e hōro’a ho’i, nō te ’ite mai i te māramaramara’a pae vārua ’āpī ’e te here ’e te tātarahapara’a ’e te fa’a’orera’a hara, te tahi i te tahi, ’e i rotopū i te ’utuāfare, nō teie tau ’e te tau mure ’ore.

Ma te parau fa’ati’a, e fa’a’ite atu vau e piti ’ohipa mo’a tei tupu, e ’ohipa rahi i te pae vārua tā tō’u nā hoa i fa’ati’a mai, nō ni’a i te tāhō’ēra’a Iesu Mesia i te mau ’utuāfare nā roto i te fa’aorara’a i te mārō tei vai noa na i roto i te mau u’i.³ « Rahi ’e te hope’a »,⁴ « pūai a’e i te mau taura nō te pohe »,⁵ e nehenehe te tāra’ehara a Iesu Mesia e fa’ahau i te tauāhemo ’e e fa’atupu i te tīa’ira’a nō tō tātou ananahi.

I te tomora’a rātou i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, ’ua ’oa’oa tō’u hoa ’e tāna tāne i te ha’api’ira’a ē e ’ere te mau tā’amura’a ’utuāfare « ē pohe noa atu ’outou. » I roto i te fare o te Fatu, e ti’a i te mau ’utuāfare ’ia tāhō’ēhia ē a muri noa atu (tā’ati).

’Aita rā tō’u hoa i hina’aro e tā’ati iāna i tōna metua tāne. « E ’ere i te tāne fa’aipoipo maita’i i ni’a i tōna metua vahine. E ’ere i te metua tāne maita’i i ni’a i tāna mau tamari’i », tāna i parau. « E tīa’i tō’u pāpā. ’Aita tō’u hia’ai e rave i tāna ’ohipa hiero, ’e ’ia tā’atihia vau iāna i te tau mure ’ore. »

Hō’ē matahiti te maoro ’oia i te ha’apaera’a i te mā’a, i te purera’a, i te paraparau-rahi-ra’a i te Fatu nō ni’a i tōna metua tāne. Ē ’ua ineine atu ra. ’Ua ravehia te ’ohipa hiero nō tōna metua tāne. ’Ua fa’ati’a mai ’oia i muri mai ē : « I roto tō’u ta’oto, ’ua fā mai tō’u pāpā i roto i te hō’ē moemoeā, e ’ahu ’uo’uo tōna. ’Ua taui roa ’oia. ’Ua nā ’ō mai ’oia : ‘’A hi’o mai na. ’Ua mā roa vau. Māuruuru nō te ravera’a i te ’ohipa nō’u i roto i te hiero’. » Parau fa’ahou a’era tōna metua tāne : « ’A ti’a mai, ’a ho’i i te hiero ; tē tīa’i ra tō ’oe taea’e ’ia bāpetizohia ’oia. »

’Ua parau tō’u hoa ē : « Tē tīa’i ’e te hia’ai rahi nei tō’u mau tupuna, ’e rātou ato’a tei mo’e atu, ’ia ravehia tā rātou ’ohipa. »

’Ua parau ’oia : « Nō’u nei, te hiero, e vāhi fa’aora māuiui ïa, nō te ha’api’i ’e nō te fā’i i te tāra’ehara a Iesu Mesia. »

Te piti o te ’ohipa i tupu. ’O te tahi fa’ahou hoa tei fa’aitoito i te ’imi i tōna ’ā’amu ’utuāfare. I hina’aro ’oia ’ia ’ite ’o vai terā tupuna tāne e hina ’oia nōna.

I te hō’ē ’ā’ahiata, tē parau ra tō’u hoa ē, mai te huru ē e ta’ata vārua i roto i tōna piha. I hina’aro terā ta’ata ’ia ’itehia mai ’oia ’e ’ia mātau tōna ’utuāfare iāna. Tē hepohepo ra terā ta’ata nō te hō’ē ’ohipa hape tāna i rave ’e ’o tāna i tātarahapa i teienei. ’Ua tauturu terā ta’ata i tō’u hoa ’ia ’ite ē, ’aita tōna tā’amura’a ADN i terā ta’ata, tā tō’u hoa i mana’o ē ’o tōna tupuna tāne. ’Ua nā ’ō mai tō’u hoa : « E nehenehe e parau ē, ’ua ’itehia mai iā’u tō’u tupuna tāne, ’e e ’ere terā ta’ata tei parauhia ’o tō mātou tupuna tāne i roto i tō mātou papara’a tupuna. »

’Ua pāpū i teienei tōna tā’amura’a ’utuāfare, ’ua nā ’ō tō’u hoa : « E mana’o ti’amā tō’u, e mana’o hau. E taui roa te mau mea ’ia ’ite ’oe ’o vai tō ’oe fēti’i. » ’Ua māna’ona’o tō’u hoa : « E ’ere ē, e ’āma’a fefe ra, e tumu rā’au ’ino ïa. E mea faufa’a a’e ’o vai tātou ’ia fa’aru’e atu, i te huru tātou i tae mai i roto i teie nei ao. »

Nā roto i te mau pāpa’ira’a mo’a ’e te mau ’ohipa mo’a nō te fa’aorara’a māuiui ’e te hau e tupu nō te hō’ē ta’ata, i te ao vārua ato’a ho’i, e pae ïa parau nō te ha’api’ira’a tumu e tāpe’a mai.

’A tahi : I te pū o te fa’anahora’a a te Atua nō te tāra’ehara ’e te ’oa’oa, ’o te parau fafau ïa a Iesu Mesia, nā roto i tāna tāra’ehara, ’ia tāhō’ē i tō tātou vārua ’e tō tātou tino, « e ’ore roa ïa e fa’ata’a-’ē-fa’ahou-hia, ’e ’ia ti’a ia [tātou] ’ia fāri’i i te ’īra’a o te ’oa’oa. »⁶

Te piti : Te tāra’ehara—te tāhō’ēra’a i te Mesia—e tae mai ïa ’ia fa’a’ohipa tātou i te fa’aro’o ma te fa’atupu i te mau hotu nō te tātarahapara’a.⁷ I te tāhuti nei, i te tāhuti ’ore ato’a ïa. E ’ere nā te mau ’ōro’a i te hiero e taui ia tātou, ’e ia rātou i roto i te ao vārua. Maoti rā teie mau ’ōro’a hanahana e ti’a ai te mau fafaura’a ha’amo’a i mua i te Fatu, ’o tē nehenehe e fa’atae mai i te au maita’i ’e āna ’e i te tahi ’e te tahi.

E ’ī tō tātou ’oa’oa ’ia putapū tātou i te maita’i rahi o Iesu Mesia ’e tāna fa’a’orera’a hara nō tātou. ’E ’ia pūpū tātou i te semeio nō tōna maita’i rahi ’e nō te fa’a’orera’a hapa i te tahi ’e te tahi, e tauturu ïa te aroha tā tātou e fāri’i ’e te aroha tā tātou e pūpū, i te fa’ati’a i te mau mea ti’a ’ore o te orara’a.⁸

’A toru : ’Ua ’ite maita’i roa ’e ’ua here hope te Atua ia tātou. « E ’ore te Atua e noa’a i te ha’avare »,⁹ e ’ore ato’a e noa’a i te fa’ahema. Ma te aroha hope ’e te parauti’a hope, tē fa’a’ati nei ’oia i tōna rima pāruru i tei ha’eha’a ’e tei tātarahapa.

I roto i te hiero nō te Kirtland, ’ua ’ite te peropheta Iosepha Semita i roto i te ’ōrama i tōna taea’e ia Alvin tei fa’aorahia i roto i te bāsileia tiretiera. ’Ua māere te peropheta Iosepha, i pohe ho’i Alvin hou te ’ōro’a fa’aora nō te bāpetizora’a i fāri’ihia.¹⁰ ’Ua tāmarū atu te Fatu ’e ’ua fa’a’ite nō te aha : E ha’avā te Fatu ia tātou « mai te au i tā [tātou] mau ’ohipa, ’e mai te au ho’i i te hina’aro o tō [tātou] ’ā’au. »¹¹ E fa’a’ite tō tātou vairua i tā tātou mau ’ohipa ’e tō tātou mau hina’aro.

’Ua māuruuru tātou i te ’ite ē, te ta’ata ora ’e « te feiā i pohe ’o tē tātarahapa e fa’aorahia ïa, nā roto i te ha’apa’ora’a i te mau ’ōro’a nō te fare o te Atua »¹² ’e nā roto i te tāra’ehara a te Mesia. I te ao vārua, ’ua fāna’o ato’a te feiā i roto i te hara ’e te ’ōfatira’a ture, ’ia tātarahapa.¹³

I te tahi atu pae, te feiā e mā’iti iho i te ’ino, ’o tē feruri pāpū e fa’atāere i tā rātou tātarahapara’a, ’aore rā ’o tē ’ōpua a’ena, ’aore rā ’o tē ’ite ē e ’ōfati rātou i te mau fa’auera’a, ma te ’ōpua e tātarahapa ’oi’oi i muri iho, e ha’avāhia ïa rātou e te Atua ’e « te ha’amana’o pāpū maita’i i tā [rātou] ato’a ra mau hara. »¹⁴ E’ita e nehenehe e parau ē, e hara tātou i te mahana mā’a, ’a mana’o atu ai ē e tupu noa mai te fa’aorera’a hara i te ravera’a i te ’ōro’a i te Sābati. Ia ’outou te mau misiōnare, ’aore rā te mau ta’ata e parau nei ē, e pe’e i te Vārua ra, ’aita ïa e tītauhia ’ia ha’apa’o i te mau ture misiōni, ’aore rā te mau fa’auera’a, ’a ha’amana’o na ē, nā te ha’apa’ora’a i te mau ture misiōni ’e te mau fa’auera’a e tītau manihini i te Vārua. ’Eiaha na hō’ē o tātou e fa’ataime i te tātarahapara’a. E ha’amata te mau ha’amaita’ira’a nō te tātarahapara’a ’ia ha’amata tātou i te tātarahapa.

Te maha : Tē fa’afāna’o nei te Fatu ia tātou i te rāve’a hanahana nō te riro rahi atu ā mai iāna te huru, ’ia pūpū tātou i te mau ’ōro’a mono tei tītauhia i roto i te hiero, e’ita rā tā te ta’ata e nehenehe e rave nō rātou iho. E mea oti atu ā tātou ’e e maita’i roa atu ā¹⁵ ’a riro ai tātou ’ei « feiā fa’aora i ni’a i te mou’a ra i Ziona. »¹⁶ ’Ia tāvini tātou i te ta’ata, e ti’a i te vārua mo’a nō te fafau e ha’amana roa i te mau ’ōro’a ’e e ha’amo’a to’opiti, te ta’ata hōro’a ’e te ta’ata fāri’i. E ti’a i te ta’ata hōro’a ’e te ta’ata fāri’i ’ia rave ’e ’ia fa’ahōhonu atu ā i te mau fafaura’a fa’ataui, ’a fāri’i ai, i te roara’a o te tau, i te mau ha’amaita’ira’a tei parauhia ia Aberahama, Isaaka ’e Iakoba.

’E te pae : Mai te ture ’auro ra, ¹⁷ e tītau manihini mai te ti’arua ha’amo’a nō te tātarahapara’a ’e te fa’a’orera’a hara ia tātou tāta’itahi, ’ia pūpū atu i te ta’ata i te mea e tītauhia nei nō tātou iho, ’e ’o tā tātou e hina’aro nei.

I te tahi taime, maoti tō tātou ineine e fa’a’ore i te hapa a te ta’ata e ti’a ai ia rātou ’e ia tātou nei, ’ia ti’aturi ē e nehenehe e tātarahapa ’e e fa’a’orehia tā tātou hara. I te tahi taime, e tae mai te ineine nō te tātarahapa ’e te pūai nō te fa’a’ore i te hapa i nā taime ’e’ē. ’O te Fa’aora tō tātou Ārai i mua i te Atua, e tauturu ato’a rā ’oia ia tātou ’ia fa’aiho ia tātou iho ’e ’ia haere ia vetahi ’ē ra, ’a haere ai tātou iāna. I te mau taime pēpē iho ā rā e te māuiui hōhonu mau, e mea pa’ari ’ia tātā’i i tō tātou mau tā’amura’a ’e ’ia fa’aora i te māuiui o te ’ā’au, ’e pēnei a’e e’ita e haere ia tātou iho. E ti’a rā i tō te ra’i ’ia hōro’a mai i te pūai ’e te pa’ari hau atu i tō tātou iho, nō te ’ite ahea e tāpe’a māite ai, ’e nāhea i te tu’u atu.

E iti mai te mo’emo’e ’ia ’ite tātou e ’ere ’o tātou ana’e iho. ’Ua māramarama noa te Fa’aora.¹⁸ I te tauturu a tō tātou Fa’aora, e ti’a ia tātou ’ia vaiiho i tō tātou te’ote’o, tō tātou mau pēpē ’e tā tātou mau hara i te Atua ra. Terā rā i te ha’amatara’a tātou e ’ite paha tātou ē, tē oti noa atu ra tō tātou pēpē i te ti’aturira’a iāna ’ia fa’aoti i tō tātou mau tā’amura’a pēpē.

Nō te Fatu, tei ’ite ’e tei māramarama maita’i roa, e fa’a’ore ïa ’oia i te hara a te ta’ata tāna e hina’aro ; tātou nei rā (’aita i te fāito maita’i roa) e fa’a’ore ïa tātou i te hapa a te tā’āto’ara’a. ’Ia haere mai tātou i tō tātou Fa’aora, e iti mai tō tātou rōtahi i ni’a ia tātou iho. E fa’aiti tātou i te ha’avā, e fa’a’ore rahi a’e i te hapa. E ti’a i te ti’aturira’a i tōna maita’i rahi ’e tōna aroha ’e tōna maita’i¹⁹ e fa’ati’amā ia tātou i te mārō, i te ’īria, i te hāmani ’ino, i te fa’aru’era’a, i te tano ’ore ’e i te mau fifi pae tino ’e pae manava e vai nei i te tahi taime i ni’a i te hō’ē tino tāhuti i roto i te hō’ē ao tāhuti. Te ’oa’oa ē a muri noa atu, e ’ere ïa ’o tō tātou mau tā’amura’a ato’a tē ’oa’oa ē a muri noa atu. Pēnei a’e rā i te tauasini matahiti mileniuma, ’ia ru’uru’uhia Sātane,²⁰ e noa’a paha ïa te taime ’e te mau rāve’a māere nō te here, nō te māramarama ’e nō te fa’a’āfaro i te mau mea, nō te fa’aineine nō te tau mure ’ore.

E ’ite tātou i te huru hoara’a o te ra’i i roto i te tahi ’e te tahi.²¹ Te ’ohipa a te Atua ’e te hanahana, ’o te fa’atupu-ato’a-ra’a ïa i te ’oa’oa ē a muri noa atu.²² Te ora mure ’ore ’e te fa’ateiteira’a, ’o te ’itera’a ïa i te Atua ’e ia Iesu Mesia, ’e nā roto ho’i i te mana paieti, te vāhi tei reira rāua, i reira ato’a ïa tātou.²³

Te mau taea’e e te mau tuahine here, tē ora nei te Atua tō tātou Metua i te ao ra ’e tāna Tamaiti here. Tē pūpū nei rāua i te hau, te ’oa’oa ’e te fa’aorara’a māuiui i te mau nūna’a ato’a ’e te mau reo, ia tātou tāta’itahi. Nā te peropheta a te Fatu e fa’a’ite nei i te ’ē’a. Tē tāmau noa nei te heheura’a i te mau mahana hope’a nei. ’Ia ha’afātata atu ā tātou i tō tātou Fa’aora i roto i te fare mo’a o te Fatu, ’e ’ia ha’afātata a’e ’oia ia tātou i te Atua ’e i te tahi ’e te tahi, i te tāhō’ēra’a i tō tātou ’ā’au i te aumihi nō ’ō mai i te Mesia, i te parau mau ’e te aroha, i roto i tō tātou mau u’i ato’a—nō teie tau ’e te tau mure ’ore, ma te ’oa’oa ē a muri noa atu. Ia Iesu Mesia ra, e oti ai ; ia Iesu Mesia ra, e parau mau ai. Te fa’a’ite pāpū nei au i te reira, nā roto i te i’oa mo’a o Iesu Mesia, ’āmene.