E ti’a noa ānei ia ’outou ?

I te hō’ē mahana sābati, ’a fa’aineine ai au nō te rave i te ’ōro’a mo’a, i muri a’e e rave rahi hepetoma o te ’āmuira’a titi, ’ua tae mai te hō’ē mana’o fa’ahiahia ’e te pūai i roto i tō’u ferurira’a.

’A ha’amata ai te tahu’a i te pūpū i te ha’amaita’ira’a i te pane, te mau parau ’o tā’u i fa’aro’o pinepine e rave rahi taime nā mua a’e, ’ua puta roa ïa i roto i tō’u ferurira’a ’e tō’u māfatu. « ’E ’ia ’ite rātou, e te Atua, te Metua mure ’ore, e ti’a ia rātou i te rave i te i’oa o tō tamaiti i ni’a iho ia rātou, ’e i te ha’amana’o ā iāna ē a muri noa atu ’e ma te ha’apa’o maita’i i tāna mau fa’aue tāna i hōro’a mai ia rātou ra ; ’ia vai noa tōna Vārua i roto ia rātou ».¹ E hia rahira’a taime tō tātou fa’a’ite-pāpū-ra’a i te Atua ē, ’ua ti’a ānei ia tātou ?

’A feruri noa ai au i te aura’a o teie mau parau mo’a, ’ua putapū roa ’ino vau i te parau ra, ’ia ti’a. ’Ī a’e ra tō’u ferurira’a ’e tō’u māfatu i te hō’ē ’are o te mau ’itera’a au maita’i ’e te mo’a, i te here ’e te māuruuru nō te tūsia tāra’ehara a te Fa’aora ’e tōna ti’ara’a mau i roto i te fa’anahora’a a te Metua, nō tō’u ’utuāfare ’e nō’u nei. ’Ia oti, fa’aro’o a’e rā vau ’e ’ua fāri’i i te mau parau fa’ahiahia o te pure nō te pape : « ’ia fa’a’ite rātou ia ’oe […] e ha’amana’o ā rātou iāna ē a muri noa atu »,² ’Ua māramarama iā’u i te reira iho taime ē, te ha’apa’ora’a i tā’u mau fafaura’a e ti’a ’ia riro hau atu i te mau hina’arora’a maita’i.

Te ’amura’a i te ’ōro’a mo’a, e ’ere noa i te hō’ē peu nō te ha’apa’ora’a fa’aro’o, e tītau-noa-hia tō tātou fāri’ira’a. E fa’aha’amana’ora’a pūai nō te tupura’a mau o te tāra’ehara mure ’ore a te Fa’aora ’e te tītaura’a ’ia ha’amana’o noa iāna ’e ’ia ha’apa’o i tāna mau fa’auera’a Te hina’arora’a i te tūtonu i ni’a i te Fa’aora e mea faufa’a roa ïa, ’o te parau poro’i tumu ïa o nā ’īrava e piti e tai’o-roa-hia a’e i roto i te ’Ēkālesia––nā pure nō te ’ōro’a mo’a. Te hāro’aro’ara’a i te parau mau nō te mea tā te Metua i te ao ra e pūpū nei ma te hina’aro mau ia tātou tāta’itahi nā roto i tāna tamaiti Fānau Tahi, e ti’a i tā tātou mau tauto’ora’a rahi a’e ’ia fa’a’ite mai i te mana’o tae.

’Ua fa’atumu-pāpū-hia ānei tō tātou niu i ni’a ia Iesu Mesia ?

Mai te peu e mea pāpā’u ’aore rā e mea ha’avarevare tō tātou niu pae vārua, e ’oi’oi tātou i te fa’atumu i tō tātou mana’o tae i ni’a i te hō’ē hi’opo’ara’a moni ’aore rā te nūmerara’a ’ia ’āpī mai. Mai te mea e tauahi tātou i te parau a te ’Ēkālesia tei parauhia ē, e ’ohipa tahito tēnā ’aore rā, ’aita e nā reira fa’ahouhia i teie tau, e mau tā’ōtira’a hape, e māu’a te taime, i reira ato’a ïa tō tātou mana’o tae e paruparu ato’a ai. E’ita e ti’a ia tātou ’ia tītau i te parau tumu o te mana’o tae, nō te pe’e i te peu a te feiā tāviri mana’o i ni’a i te tūreiara’a tōtiare ’aore rā te Tik Tok. Mea varavara te mau mana’o o te ta’ata i te tūea i te parau mau hanahana.

’Ua riro te ’Ēkālesia ’ei vāhi ha’apūra’a i te mau ta’ata maita’i ’ore tei here i te Atua, ’e tei hina’aro mau e pe’e i te Fatu ia Iesu Mesia. E ā’ahia taua mana’o tae ra i roto i te tupura’a mau ē, ’o Iesu te Mesia, te Tamaiti a te Atua ora. E ’ite-noa-hia teie parau mau hanahana nā roto ana’e i te mana o te Vārua Maita’i. Inaha, ’ua tū’ati-’āfaro-hia tō tātou mana’o tae i te rahira’a taime ’o tā tātou e rave nō te fa’aea i te mau vāhi mo’a, i reira ho’i te fa’aurura’a a te Vārua maita’i e vai ai.

E mea maita’i a’e nō tātou ’ia rave i te taime nō te hō’ē ’āparaura’a au maita’i nō tō tātou mau ha’ape’ape’ara’a ’e te Metua here i te ao ra ’e ’ia fa’aiti te taime i te ’imira’a i te mau mana’o o te tahi atu mau reo. E nehenehe ato’a tātou e mā’iti e taui i tā tātou rēni parau ’āpī i te mau mahana ato’a, nō te mau parau a te Mesia i roto i te mau pāpa’ira’a mo’a ’e i te mau parau a te mau peropheta ora.

Tā tātou ha’afaufa’ara’a e fa’atura i te mahana sābati, te ’aufaura’a i te tuha’a ’ahuru ti’a, te maura’a i te parau fa’ati’a nō te hiero ’e te ha’apa’ora’a i te mau fafaura’a mo’a o te hiero, e mau tāpa’o ana’e nō tō tātou mana’o tae ’e e mau fa’a’itera’a nō tō tātou hina’aro mau. E mana’o tae ānei tō tātou nō te hōro’a hau atu i te itoito nō te ha’apūai i tō tātou fa’aro’o i te Mesia ?

’Ua here mau te Metua i te ao ra ia tātou, e tae mai rā teie here ma te mau tīa’ira’a rahi. Tē tīa’i nei ’oia ’ia tu’u tātou ma te mana’o tae i te Fa’aora i ropū i tō tātou orara’a. ’Ua riro te Fa’aora ’ei hi’ora’a maita’i nō te mana’o tae ’ia auraro tātou i te Metua i roto i te mau mea ato’a. ’O ’oia « te ’ē’a, te parau mau ’e te ora ».³ ’Ua pohe ’oia ma te hina’aro mau nō tā tātou mau hara ’Ua ha’amāmā ’oia ma te mana’o tae i tā tātou mau hōpoi’a, ’ua tāmarū i tō tātou mau mata’u, ’ua hōro’a mai ia tātou te pūai ’e ’ua ’āfa’i mai te hau ’e te hāro’aro’a i tō tātou māfatu i roto i te mau taime ’ati ’e te ’oto.

’Āre’a rā, e mā’itira’a te fa’aro’o ia Iesu Mesia. « Maori rā ’o te hina’aro noa [tātou] ’ia ti’aturi »⁴ i tāna mau parau, e tāpa’o nō te ’ōmura’a tā tātou nō te ha’amata ’aore rā nō te fa’a’āpī i tō tātou tere nō te fa’aro’o. Mai te mea e tanuhia tāna mau parau i roto i tō tātou māfatu mai te hō’ē huero ra ’e ’ia aupuru-maita’i-hia, e toro te a’a ’e e tupu i te rahi tō tātou fa’aro’o ma te pāruruhia ’e e riro mai ’ei parau tumu nō te ’ohipa ’e te mana. ’Ua riro te Buka a Moromona ’ei puna pūai mau nō te fa’arahi ’e nō te fa’ati’a i tō tātou fa’aro’o. Nā te mana’o tae e fa’ananea i te fa’aro’o.

E ’ere te tāhuti nei, i te mea ’ōhie ’e i te tahi taime e mea ta’ahoa, e rāve’a hanahana rā. Nō reira, « tē vai nei [tātou], ’ia noa’a tō [tātou] ’oa’oa » !⁵ E hōpoi mai te rōtahira’a i ni’a i te Fa’aora ’e i ni’a i tā tātou fafaura’a, i te ’oa’oa mure ’ore ! Te fā mau ’o te tāhuti nei ’o te fa’a’itera’a ïa i tō tātou mana’o tae. « Te ’ohipa rahi o te orara’a nei [’e te ho’o nō te ti’ara’a pipi] ’o te ’apora’a mai ïa i te hina’aro o te Fatu ’e i te ravera’a i muri iho i te reira ».⁶ E arata’i te ti’ara’a pipi mau i te ’īra’a o te ’oa’oa. ’Ua hina’aro ānei tātou ’ia ’aufau i te ho’o nō te ti’ara’a pipi ?

E ’ere te ’ē’a nō te fafaura’a i te hō’ē tāpura hi’opo’ara’a noa ; e ravera’a nō te tupura’a pae vārua ’e e fa’ahōhonura’a nō te fafaura’a i mua i te Fatu ia Iesu Mesia. Te fā mātāmua o te fa’auera’a tāta’itahi, te parau tumu, te fafaura’a ’e te ’ōro’a ’o te patura’a ïa i te fa’aro’o ’e te ti’aturi ia Iesu Mesia. Tā tātou fa’aotira’a e niu i tō tātou orara’a i ni’a i te Mesia, e ti’a te reira ’ia vai ’āueue ’ore––noa atu te huru o te orara’a, te vaira’a ’e te mea nā ni’a ’ē atu. ’Aita e mahana ’aore rā e taime nō te fa’afa’aeara’a nō ’oe iho, nō tō tātou mana’o tae ’ia « ti’a ’ei mau ’ite nō te Atua i te mau taime ato’a ’e i roto i te mau vāhi ato’a ».⁷ ’Aita te ti’ara’a pipi i te ’ohipa faufa’a ’ore, nō te mea te auhoara’a i te Vārua Maita’i ’aita e roa’a i te moni.

Mea pāpū roa, tē feruri nei te Fatu i tō tātou nei tau, ’a ha’api’i ai ’oia i te parabole nō nā pāretenia hō’ē ’ahuru. Nō nā pāretenia pa’ari e pae, tē parau nei ’oia : « ’Ua rave ho’i i te Vārua Mo’a ’ei arata’i nō rātou ra, ’e ’aita ho’i rātou i ti’aturi i te parau ha’avare »,⁸ āre’a rā te lamepa a te pāretenia ma’ama’a ra « tē pohe nei » ïa nō te ’erera’a i te hinu.⁹ Penei a’e e tano mau te parau a Nephi i te mau melo nō te ’Ēkālesia : « E te tahi pae, e fa’ahau ’oia ia rātou ’e e fa’ata’oto ho’i ia rātou i te ta’oto hau roa, ’e e parau mai rātou ē : E mea maita’i i Ziona ».¹⁰

Te pārurura’a i te pae tino ’o te ’imira’a ïa ’e tē ti’aturira’a i te mau mea o te ao nei, ’eiaha rā i tā te Mesia––e parau-ato’a-hia, tē hi’ora’a nā roto i te mata ta’ata noa, ’eiaha rā i te mata pae vārua. Tē hōro’a nei te Vārua Maita’i ia tātou i te rāve’a ’ia hi’o i « te huru mau o te mau mea e vai nei… ’e te huru mau ho’i o te mau mea e vai a muri a’e ».¹¹ ’E « nā roto i te mana o te Vārua Maita’i e ’ite ai ’outou i te parau mau o te mau mea ato’a ra ».¹² ’e ’eiaha ’ia ha’avarehia mai. E tu’u tātou i te Mesia i rōpū i tō tātou orara’a ’e e fafau atu i tō tātou mana’o tae ’ia ha’apa’o i tāna mau fa’auera’a, ’eiaha nō te mea e mata pō tō tātou, nō te mea rā tē ’ite mau nei tātou.¹³

E aha iho ra nā pāretenia ma’ama’a ra ? Nō te aha ’aita rātou i hina’aro e amo i te vaira’a mōrī hinu pae vārua ? ’Ua ha’amarirau noa ānei rātou ? Penei a’e ’ua tāu’a ’ore rātou, e ’ere i te mea ’āfaro roa ’aore rā, e ’ere i te mea faufa’a roa i tō rātou hi’ora’a ? Noa atu te rahira’a o te tumu, ’ua vare rātou i te parau ha’avare nō ni’a i te ti’ara’a mau o te Mesia. ’O te ha’avarera’a niu ïa a Sātane ’e ’o te tumu ïa i mohimohi ai te lamepa o tō rātou ’itera’a pāpū nō te ’erera’a i te hinu pae vārua. ’Ua riro tei parabole ’ei fa’ahōho’ara’a nō tō tātou nei ’anotau. Mea rahi ’o tei fa’aru’e i te Fa’aora ’e i tā rātou mau fafaura’a, hou ’a fa’aru’e ai i tāna ’Ēkālesia.

Tē ora nei tātou i te ’anotau ’aita i ’itehia a’e nei, tei tohuhia e te mau peropheta i tahito ra, e mahana teie e tāhae ai Sātane « i roto i te ’ā’au o te mau tamari’i a te ta’ata nei, e fa’aitoito ’oia ia rātou ’ia riri i te mea maita’i ».¹⁴ Rahi roa o tātou e ora nei i roto i te hō’ē ao moemoeā tei ’ī i te fa’a’āreareara’a rau ’e te mau parau poro’i ’ī’ino nō te ti’ara’a hanahana ’e te ti’aturira’a i te Mesia.

Te fa’aurura’a pae vārua pūai roa a’e i roto i te orara’a o te hō’ē tamari’i ’o te hi’ora’a maita’i ïa o te metua ’e o te mau metua tupuna here, ’o tē ha’apa’o maita’i nei i tā rātou iho mau fafaura’a mo’a. E ha’api’i te mau metua hina’aro mau i tā rātou mau tamari’i i te fa’aro’o i te Fatu ia Iesu Mesia « ’ia ’ite tā tātou mau tamari’i ’o vai tā rātou e hi’o atu nō te ha’amatarara’a i tā rātou ra mau hara ».¹⁵ E arata’i, te tāu’a ’ore ’e te ha’apa’o ’ore i te fafaura’a i te pohe i te pae vārua. Mea rahi a’e taua ’ino ra i ni’a i tā tātou mau tamari’i ’e te mau mo’otua. Te mau metua ’e te mau metua rū’au, tē vai noa ra ānei te mana’o tae ?

’Ua fa’aara mai te peresideni Russell M. Nelson, « i te mau mahana i muri nei, e’ita tātou e ora mai i te pae vārua mai te peu ’aita te mana arata’i ’e te fa’atere ’e te tāmāhanahana ’e te tāmau o te Vārua Maita’i ».¹⁶ E fa’aarara’a māramarama ’e te hape ’ore teie, nō te fa’atanotano i tā tātou lamepa ’e ’ia fa’arahi i tā tātou vaira’a hinu pae vārua. Tē vai noa rā ānei te mana’o tae nō te pe’e i te mau peropheta ora ? E aha te fāito hinu i roto i tā ’outou lamepa ? E aha te mau tauira’a i roto i tō ’outou iho orara’a, ’o te fa’ati’a ia ’outou ’ia vai tāmau noa mai te fa’aurura’a a te Vārua Maita’i ?

I teie mahana mai te ’anotau o Iesu, tē vai ra te fēia e ho’i mai, ’aita e hina’aro e fāri’i i te ho’o nō te ti’ara’a pipi. ’A pūai noa ai ’e ’a rahi ai te fa’a’inora’a i te ’Ēkālesia a te Fa’aora ’e i te feiā e pe’e nei iāna, tō tātou ti’ara’a pipi e tītauhia te mana’o tae rahi roa a’e, nō te fa’a’āfaro ’e nō te ha’apa’ari i tō tātou mau tara pae vārua ’e te tāu’a ’ore ia rātou. ¹⁷

Mai te mea e patu-pa’ari-hia tō tātou niu pae vārua i ni’a ia Iesu Mesia, ’aita tātou e fati ’e ’aita e māta’u.

« Inaha, ē tītau nei te Fatu i te ’ā’au ’e te mana’o ’ana’anatae ; ’e e ’amu ho’i te feiā ’ana’anatae ’e te feiā ha’apa’o maita’i i te mā’a maita’i nō te fenua nō Ziona i teie mau mahana hope’a nei ».¹⁸

E ti’a ia tātou ’ia vai noa te mana’o tae, e ti’a ai. Nā roto i te i’oa o te Fatu Iesu Mesia, ’āmene.